سۋرەتتەگى ادامداردىڭ جۇزدەرى نەگە جايناپ تۇر؟‏ ويتكەنى ولار ەحوبا كۋاگەرلەرىنىڭ كونگرەسىنە كەلگەن.‏ ەجەلدە قۇدايدىڭ قىزمەتشىلەرى جىلىنا ٷش رەت جينالىپ تۇرۋ كەرەك بولاتىن.‏ بۇگىنگى كۇنى ٴ‌بىز دە جىلىنا ٷش رەت وتەتىن جيىندارىمىزدى اسىعا كۇتەمىز (‏مۇسانىڭ 5-‏جازباسى 16:‏16‏)‏.‏ بۇل جيىندارعا جىلىنا ەكى رەت بولاتىن ٴ‌بىر كۇندىك اۋداندىق كونگرەسس جانە ٷش كۇندىك ايماقتىق كونگرەسس جاتادى.‏ مۇنداي جيىنداردىڭ ٴ‌بىز ٷشىن قانداي پايداسى بار؟‏

باۋىرلاستىعىمىز نىعايادى.‏ يسرايلدىكتەر «ۇلكەن جيىنداردا» ەحوباعا ماداق ايتىپ،‏ زور قۋانىشقا كەنەلەتىن.‏ وزگەلەرمەن بىرگە باس قوسىپ،‏ قۇدايعا عيبادات ەتكەنىمىز بىزگە دە زور قۋانىش اكەلەدى (‏ٴ‌زابۇر 26:‏12؛‏ 111:‏1‏)‏.‏ كونگرەستەرگە باسقا قاۋىمنان،‏ قالادان،‏ ٴ‌تىپتى باسقا ەلدەن كەلگەن باۋىرلاستارمەن تانىسىپ،‏ ارالاسۋدىڭ كەرەمەت مۇمكىندىگى تۋادى.‏ تۇسكى ۇزىلىستە كونگرەسس وتەتىن جەردە وزگەلەرمەن بىرگە تاماقتانىپ،‏ اڭگىمە-‏دۇكەن قۇرعانىمىز رۋحاني تويىمىزدى كوركەيتە تۇسەدى (‏ەلشىلەردىڭ ىستەرى 2:‏42‏)‏.‏ ٴ‌بىز وسىنداي جيىنداردا دۇنيەنىڭ ٴ‌تورت بۇرىشىنداعى «بارلىق باۋىرلاستاردى» بىرىكتىرەتىن سۇيىسپەنشىلىكتى سەزىنەمىز (‏پەتىردىڭ 1-‏حاتى 2:‏17‏)‏.‏

رۋحاني وسۋگە كومەكتەسەدى.‏ جيىنداردا يسرايلدىكتەرگە جازبالاردان ٴ‌تالىم بەرىلەتىن.‏ ال ولار «وزدەرىنە ايتىلعان سوزدەردىڭ ٴ‌مانىن ٴ‌تۇسىنىپ»،‏ مۇنىڭ كوپ پايداسىن كورەتىن (‏نەحەميا 8:‏8،‏ 12‏)‏.‏ ٴ‌بىز دە كونگرەستەردە بەرىلەتىن كيەلى كىتاپقا نەگىزدەلگەن نۇسقاۋلاردى زور قۋانىشپەن قابىل الامىز.‏ كونگرەستىڭ بارلىق ٴ‌بولىمى كيەلى جازبالارعا نەگىزدەلەدى.‏ قىزىقتى باياندامالار مەن كورىنىستەردەن قۇداي ەركىن قالاي ورىنداۋ كەرەكتىگىن ۇيرەنەمىز.‏ باۋىرلاستاردىڭ وسى قيىن-‏قىستاۋ كۇندەرى قۇدايدىڭ تالاپتارىنا ساي ٶمىر سۇرۋگە تىرىسقاندارى ٷشىن قانداي قيىندىقتارعا كەزىككەندەرى جانە ولاردى قالاي جەڭگەندەرى جايلى اڭگىمەلەرىن ەستىپ،‏ جىگەرلەنەمىز.‏ ايماقتىق كونگرەستە كورسەتىلەتىن فيلمدەر كيەلى كىتاپتاعى وقيعالاردى جانداندىرىپ،‏ سولاردان قانداي ساباق الاتىنىمىزدى كورۋگە كومەكتەسەدى.‏ ومىرلەرىن قۇدايعا باعىشتاعانىن كورسەتكىسى كەلەتىندەر ٷشىن ٵر كونگرەستە شومىلدىرۋ ٴ‌راسىمى وتەدى‏.‏

• نەگە ٴ‌بىز كونگرەسكە بارۋدان كوپ قۋانىش الامىز؟‏

• كونگرەسكە بارۋدىڭ ٴ‌سىز ٷشىن قانداي پايداسى بار؟‏