2023 жылдың 3 желтоқсанында Кабреува қаласында (Бразилия) Киелі кітаптан білім беру орталығының бағышталу бағдарламасы өтті. Бразилия филиалының комитет мүшесі Эдуардо Мартинез бауырлас жергілікті Конгресс сарайында бағышталу баяндамасын айтты. Бағдарламаны Конгресс сарайында 2400-ден аса адам тыңдады, ал видеоконференция арқылы 4900-дан аса адам қосылды.

Осы жаңа білім беру орталығында бірінші кезекте Патшалықты жариялаушыларға арналған мектеп және Аудандық бақылаушылар мен әйелдеріне арналған мектеп өтетін болады. Ғимаратта бір уақытта үш сынып, ал жыл сайын 600-дей студент оқи алады.

2020 жылы бауырластар бір қонақүйді сатып алды. COVID-19 пандемиясы кезінде сақтық шараларын ұстана отырып оны Киелі кітаптан білім беру орталығына сай келетіндей етіп жөндеді. Сөйтіп 3 сынып, 54 тұрғын бөлме, асүй және кеңселер жасалды. Құрылыс жұмыстары аяқталған соң, ашық есіктер күнін өткізу жоспарланды. Бұл іс-шараның мақсаты — жергілікті адамдар мен билік өкілдерін Ехоба куәгерлерімен және олардың атқарып жүрген ісімен таныстыру болды. Осы жиынға келген бір кісі былай деді: “Көп еңбектеніп, тамаша жұмыс атқарғандарың көрініп тұр. Бәрі жоғары сапада. Құдай үшін жасалынатын іс осындай болу керек!”

Құрылыс жобасына атсалысқан Роджерио Браганхоло бауырлас былай деп бөліседі: “Біз жобаның басынан соңына дейін Ехобаның қолдауын сезіндік. Ісімізге батасын беріп жатқанын көріп, Зәбүр 127:1-дегі “үйді Ехоба салмаса, құрылысшылардың ауыр еңбегі бекер” деген сөздердің растығына көзіміз жетті”.

Осындай Киелі кітаптан білім беру орталығы ашылғанына біз өте қуаныштымыз! Өйткені соның арқасына Бразилиядағы көптеген бауырластар өздерінің “тәлім беру” шеберлігін жақсарта алады (Титке 1:9).