Исаның құрбандығының арқасында Алла Тағала адамзатты күнә мен өлімнен азат етеді. Киелі жазбаларда Исаның төгілген қаны күнәні өтейтіні туралы айтылған (Ефестіктерге 1:7; Петірдің 1-хаты 1:18, 19). Сол себепті Иса “көптеген адамдар үшін жанын төлем ретінде беруге келгенін” айтқан (Матай 20:28).

Неліктен “көптеген адамдар үшін төлем” қажет болды?

 Адам ата о баста кемелді, яки күнәсіз болып жаратылған. Оның мәңгі өмір сүруге мүмкіндігі болған еді. Бірақ ол Құдайдың тілін алмай, бұл мүмкіндіктен айырылып қалды (Мұсаның 1-жазбасы 3:17—19). Ол өз балаларына күнәні мұра етіп қалдырды (Римдіктерге 5:12). Сол себепті Киелі жазбаларда Адам ата өзін және ұрпақтарын күнә мен өлімнің құлдығына “сатып” жіберді делінген (Римдіктерге 7:14). Күнәкар пенде болғандықтан, ешкім Адам ата жоғалтқан кемелді өмірді қайтара алмайды (Зәбүр 49:7, 8).

 Адам баласының шарасыз күйіне қарап, Алла Тағаланың оларға жаны ашыды (Жохан 3:16). Алайда Құдайдың әділеттілігі күнәға көз жұма салуына не оны еш негізсіз кешіруіне жол бермес еді (Зәбүр 89:14; Римдіктерге 3:23—26). Адамзатты жақсы көргендіктен, Құдай адамдардың күнәлары кешіріліп, мүлдем ойға алынбау үшін заңды негіз қалады, яғни төлемнің берілуіне жағдай жасады (Римдіктерге 5:6—8).

Төлем қандай игіліктер әкеледі?

 Киелі жазбаларда “төлемнің” үш қыры айтылған:

1.   Сатып алу (Мұсаның 4-жазбасы 3:46, 47).

2.   Азат ету, яки босату (Мұсаның 2-жазбасы 21:30).

3.   Пара-пар келу не құнын толықтай өтеу. a

 Исаның төлем құрбандығының осы қырларын қарастырайық.

1.   Сатып алу. Киелі жазбаларда Құдайдың шынайы қызметшілерінің “қымбат бағаға сатып алынғандары” айтылған (Қорынттықтарға 1-хат 6:20; 7:23). Осы “қымбат баға”, яғни өзінің қаны арқылы Иса “әрбір рудан, тілден, халықтан және ұлттан шыққан адамдарды... сатып алып, Құдайдың меншігі” етті (Аян 5:8, 9).

2.   Азат ету. Исаның төлем құрбандығы күнәдан “азат етеді” (Қорынттықтарға 1-хат 1:30; Қолостықтарға 1:14; Еврейлерге 9:15).

3.   Пара-пар келу. Исаның төлем құрбандығы Адам ата жоғалтқан кемелді өмірдің құнына сайма-сай келеді (Қорынттықтарға 1-хат 15:21, 22, 45, 46). Киелі жазбада былай делінген: “Бір кісінің [Адам атаның] мойынсұнбауы көп адамды күнәкар етсе, дәл солай, бір кісінің [Исаның] мойынсұнуы көп адамды әділ қылады” (Римдіктерге 5:19). Бұдан бір адамның өлімі көптеген күнәкарлардың құнын қалай өтей алатынын көруге болады. Исаның төлем құрбандығы оның игілігін көру үшін нақты қадамдар жасайтын адамдардың бәрін күнәдан босатады (Тімөтеге 1-хат 2:5, 6).