Құдай бәрін көріп тұрады және кез келген жерде әрекет ете алады (Нақыл сөздер 15:3; Еврейлерге 4:13). Бірақ бұл Құдай барлық жерде мекендейді дегенді білдірмейді. Киелі кітапта Құдайдың тұлға екені және өзінің мекендейтін тұрағы бар екені айтылған.

•   Құдайдың болмысы. Құдай — рухани Тұлға (Жохан 4:24). Адамдар оны көздерімен көре алмайды (Жохан 1:18). Пайғамбарлар алған аяндардан Құдайдың белгілі бір тұрағы бар екенін көруге болады. Онда Құдай барлық жерде мекендейтін тұлға ретінде суреттелмейді (Ишая 6:1, 2; Аян 4:2, 3, 8).

•   Құдайдың тұрағы. Ол адамзат мекенінен әлдеқайда жоғары рухани әлемде өмір сүреді. Сол көктегі әлемде Құдайдың өз тұрағы бар (Патшалар 1-жазба 8:30). Киелі кітапта көптеген періштелер “Ехобаның a алдына жиналғаны” туралы бір оқиға бар. Одан Құдайдың нақты бір жерде мекендейтінін көруге болады (Әйүп 1:6).

Құдай барлық жерде мекендемесе, онда қалай бізге көмектеседі?

 Құдай әрбір адамның қамын ойлайды. Ол көкте мекендесе де өзіне ұнамды болуға тырысатын әркімді көзінен таса қылмай, қажет кезде көмекке келеді (Патшалар 1-жазба 8:39; Шежірелер 2-жазба 16:9). Қазір Ехоба өзінің қызметшілеріне қалай қамқорлық көрсететінін көрейік.

•   Дұға еткенде. Біз Ехобаға дұға еткенде, ол бізді сол сәтте-ақ тыңдайды (Шежірелер 2-жазба 18:31).

•   Жанымыз күйзелгенде. “Жүрегі жаралы жанға Ехоба жақын тұрады, сағы сынғандарды құтқарады” (Зәбүр 34:18).

•   Тығырыққа тірелгенде. Ехоба бізге түсінік сыйлайды және өзінің Сөзі Киелі кітап арқылы жүруіміз керек жолды көрсетеді (Зәбүр 32:8).

Құдайдың мекені туралы қате пікірлер

 Қате пікір: Зәбүр 139:8-дегі “Көкке көтерілсем, сен сонда болар ең, төсегімді көрге салсам да, сен сол жерден табылар ең” деген сөздер Құдайдың барлық жерде мекендейтінін дәлелдейді.

 Шындық: Бұл тармақта Құдайдың тұрағы туралы айтылып тұрған жоқ. Онда Құдайдың көзінен таса жер жоқ екені және бізге қай жерден болсын жәрдем бере алатыны көркем сөзбен жеткізілген.