Құдай Патшалығы — жердегі барлық үкіметтердің орнын басатын көктегі үкімет. Құдай осы үкімет арқылы өзінің еркін көкте де, жерде де жүзеге асырады. Жуырда Құдай Патшалығы адамдардың көңілінен шығатын ең жақсы билік құрмақ. Ол жер бетіндегі барлық адамдардың басын біріктіреді. Құдай Патшалығы туралы осы хабар шынымен де қуанышты емес пе? (Даниял 2:44; Матай 6:9, 10; 24:14 оқыңыз).

Кез келген үкіметтің басшысы болатыны сияқты, көктегі үкіметтің де билеушісі бар. Ехоба Құдай өз Патшалығының Билеушісі етіп рухани ұлы Иса Мәсіхті тағайындады. (Аян 11:15 оқыңыз).

“Құдай Патшалығы деген не?” деген бейнероликті көріңіз.

Иса ең жақсы Патша, өйткені ол мейірімді және әділ нормаларды берік ұстанады (Матай 11:28—30). Сондай-ақ ол көктен бүкіл жер бетіне билік жүргізетіндіктен, оның адамдарға көмектесуге құдіреті жетеді. Ол қайта тірілгеннен кейін, көкке көтерілген болатын. Содан Патша тағына отырғанша, Құдайдың оң жағында күтіп отырды (Еврейлерге 10:12, 13). Ақырында, Құдай оған Патшалық билігін берді. (Даниял 7:13, 14 оқыңыз).

Иса “қасиетті халық” деп аталатын топпен бірге көкте билік жүргізеді (Даниял 7:27). Жерде болған кезінде Иса шәкірттерінің арасынан кішігірім топты жинап, оларды елшілер деп атады. Осы адал елшілер қасиеттілерге жататындардың ең алғашқылары болып таңдалды. Ехоба Құдай адал ер адамдар мен әйелдер арасынан қасиеттілерді  осы күнге дейін таңдап келеді. Олар да Иса сияқты рухани денемен тіріліп, көкте өмір сүретін болады. (Жохан 14:1—3; Қорынттықтарға 1-хат 15:42—44 оқыңыз).

Көкке қанша адам барады? Иса оларды “кішкене отар” деп атаған (Лұқа 12:32). Олардың саны 144 000-ды құрамақ. Олар Исамен бірге жер бетіне билік жүргізетін болады. (Аян 14:1 оқыңыз).

Құдай Патшалығы 1914 жылдан бастап билік ете бастады *. Патша ретінде Иса ең алдымен Шайтан мен оның жын-перілерін көктен жерге лақтырды. Содан Шайтан ашуға мініп, бар қаһарын жер бетіндегілерге төкті (Аян 12:7—10, 12). Сол уақыттан бері адам баласы қайғы-қасіреттен көз ашпады. Соғыс, аштық, індеттер, жер сілкінісі мен заңсыздық жерді жайлады. Мұның бәрі Патшалықтың жер бетіне толық билік жүргізетін уақытының таяғанын көрсететін “белгі” болып табылады. (Лұқа 21:7, 10, 11, 31 оқыңыз).

Құдай Патшалығы дүниежүзі бойынша жүргізіліп жатқан уағыздау ісі арқылы қазірдің өзінде барша халықтан шыққан ұлы жамағаттың басын біріктіруде. Осы жамағатты құрайтын сан миллиондаған момын адам Исаның билігіне мойынсұнуды шешті. Құдай Патшалығы осы зұлым дүниені жойғанда, оларды аман алып қалады. Олай болса, Құдай Патшалығының игілігін көргісі келетіндердің барлығы Исаның билігіне мойынсұнуды үйренгендері дұрыс. (Аян 7:9, 14, 16, 17 оқыңыз).

Иса 1000 жылдық билігі кезінде Құдайдың адамзатқа қатысты о бастағы ниетін жүзеге асырады. Сонда бүкіл жер беті жұмаққа айналады. Ақырында, Иса Патшалық билігін қайтадан Құдайдың өзіне тапсырады (Қорынттықтарға 1-хат 15:24—26). Құдай Патшалығы туралы осы қуанышты хабарды өзгелерге айтқыңыз келер ме еді? (Зәбүр 37:10, 11, 29 оқыңыз).