Felisa: Spaniami ilaqutariin­ni pigis­saar­tuun­ngitsuni peroriar­tor­punga. Ilaqut­tak­ka katuuliup­put up­per­tupilus­suul­lutil­lu. Al­laat ilaqut­tama ilaat 13-it palasiul­lutil­luun­niit oqaluf­fim­mi sulisuup­put. Anaanama il­lua angut palasiuvoq katuulil­lu atuarfian­ni ilin­niar­titsisuul­luni. Toqum­mat paavip Johan­nesi Paul II-ta ataq­qinaaser­paa pil­luaq­qul­lugu. Ataataga saf­fiuuvoq anaanagalu narsaam­mi sulisuul­luni. Qatan­ngutigiiuvugut arfineq-pingasut uangalu angajul­lersaal­lunga.

Aq­qaneq-marlun­nik ukioqar­tunga Spaniami in­nut­taasut im­min­nut sorsun­nerat aal­lar­tip­poq. Sorsun­neqarun­naarmat ataatama politik­kimut isum­mer­tar­nera pis­sutigalugu naalak­kersuisut par­naarus­saatip­paat. Tamat­ta naam­mat­tunik nerisas­saqar­tin­niarluta anaanaga sulerulut­taqaaq. Taamaat­tumik anaanama nuk­kak­ka, Araceli, Lauri aam­ma Ramoni, il­loqarfim­mut Bilbaomut ar­nat mat­tuf­fian­nut aal­lar­tip­pai. Tas­sani naam­mat­tunik nerisas­saqas­sam­mata.

Araceli: Taamani uanga 14-inik ukioqar­punga, Lauri aq­qaneq-marlun­nik Ramonilu qulinik ukioqarluni. Ilaqut­tavut maqaasisaqaavut. Mat­tuf­fim­mi eq­qiaasutut sulisar­pugut. Ukiut marluk qaangium­mata mat­tut­toqarfim­mut anginerusumut utoq­qar­nik isumagin­nif­fiusumut Zaragozamiit­tumut nuutsitaavugut. Igaf­fim­mi eq­qiaal­luta sulerulut­tar­pugut qasusupilus­suusarlutalu.

Felisa: Qatan­ngutik­ka Zaragozamiit­tumut mat­tuf­fim­mukar­tus­san­ngormata anaanaga angagalu palasiusoq aalajanger­put uangat­taaq tas­sun­ngas­sasunga. Taamaalior­put angum­mit inuusut­tuaq­qamit nuan­narin­nitsin­nit qimagutitin­niarlunga. Guuti asagak­ku mat­tuf­fim­miin­nis­sara qilanaareqaara. Ul­lut  tamaasa nerliiviliar­tar­punga il­lora as­sigalugu Afrikami ajoqersuiar­tor­titatut aal­lar­titaarusuk­kama.

Mat­tuf­fim­miitil­lungali iliuuseriumasar­pas­suak­ka iliuuserisin­naan­ngilak­ka. Neriuutigisat­tut mat­tut­tut nunami al­lami Guutimut kif­far­tor­nis­san­nik kajumis­saan­ngilaan­nga. Ukioq ataaseq qaangiut­toq angaga palasiusoq isumaginiarlugu angerlar­punga. Il­lumi sulias­sat suliarisar­pak­ka un­nuil­lu tamaasa rosenkransi atorlugu qinuqatigisarlugu. Aam­ma oqaluf­fim­mi naasut isumagisarlugil­lu inuusaliat Maria ‘iluar­tuutital­lu’ kusas­sar­tar­pak­ka.

Araceli: Zaragozamiitil­lunga mat­tut­tutut inuujumal­lunga siul­lermeerlunga up­per­narsaavunga. Taava mat­tut­tut aalajanger­paat qatan­ngutik­kalu avis­saas­sasugut. Uanga mat­tut­toqarfim­mut Madridimiit­tumut Laurilu Valenciamiit­tumut aal­lar­titaavugut. Ramoni Zaragozamiigin­nar­poq. Madridimi mat­tut­tun­ngor­nis­san­nut aap­pas­saanik up­per­narsaavunga. Inup­pas­suit soorlu ilin­niar­tut utoq­qasaal­lu mat­tut­toqarfim­mi najugaqar­tar­put. Sulias­sar­pas­suaqar­tar­pugut uangalu mat­tut­tut nap­parsim­mavian­ni sulivunga.

Mat­tut­tutut inuunis­sara qilanaarisimavara. Isumaqaraluar­punga pif­fis­sarujus­suaq atorlugu Biibili ilin­niarlugulu atuar­tas­sal­lugu. Pakatseqaangali. Arlaan­naataluun­niit Biibili, Guuti Jiisusilu eq­qar­tor­neq ajor­paat. Latiinerit oqaasii ilik­kar­pak­ka, katuulil­lu ‘iluar­tuutitaat’ ilin­niarlugit Marialu pal­lorfigisarlugu. Amerlaner­tigul­li sulerulut­tar­pugut.

Stres­siler­punga er­numalerlungalu. Misigaanga mat­tut­toqarfim­mi inuit pisuut al­lat sul­lin­nagit ilaqut­tak­ka ikior­niarlugit akis­sarsior­tariaqarlunga. Taamaat­tumik taman­na pil­lugu mat­tut­tut ar­nat pisor­taat oqalut­tuup­para oqarfigalugulu mat­tut­toqarfik qiman­niarlugu. Ineeq­qamul­li mat­tup­paanga. Isumaqar­poq ersior­tik­kuninga isumaga al­lan­ngor­tis­sagiga.

Mat­tut­tut ineeq­qamit anisip­paan­nga, paasigamik­kuli isumaga al­lan­ngor­tis­siman­ngik­kiga ineeq­qamut mat­tuteq­qip­paan­nga. Pingajus­saan­nik mat­tutereerlunga qimagun­nis­sara aatsaat akuerisin­naavaat oqaatsit imaat­tut al­lareeruk­kit: “Qimagup­punga Saatani Guutimin­ngar­nit kif­far­torfigerusun­nerugak­ku.” Uis­suum­meqaanga. Qimaguk­kusoqaanga, oqaatsil­li taak­ku al­lak­kusun­ngilak­ka. Naggataatigut palasimik oqaloqateqar­nis­sara piumasaraara, qanorlu pisoqarsimaneranik palasi oqalut­tuul­lugu. Biskop­pip akuersineratigut palasip Zaragozami mat­tut­toqarfim­mut uter­tip­paanga. Qaam­matialuit qaangium­mata mat­tut­toqarfik qimas­sin­naaler­para. Tamatuma kingunin­ngua Lauri Ramonilu aam­ma mat­tut­toqarfik qimap­paat.

Felisa: Pif­fis­sap ingerlanerani katip­punga Spaniamilu nunap ilaani, Cantabriami, najugaqalerlunga.  Suli aalajangersimasumik naalagiar­tar­punga. Sapaatit ilaan­ni oqaluf­fim­mi palasi kamaqaluni ima nil­liavoq: “Una atuagaq takusiuk!” Atuagaq sagdlusuíssut inûnigssamut nâgssáungitsumut sangmisoĸ takutip­paa. Ima oqar­poq: “Taama it­tumik peqarus­si uan­nut tun­nius­siuk igil­luguluun­niit!”

Atuagaq taan­na pigin­ngilara, pigerusuler­parali. Ul­lualuit qaangium­mata ar­nat marluk kasut­tor­put. Jehovamik Nalunaajaasuup­put atuagarlu taan­nar­piaq tun­niul­lugu. Un­nuaq taan­na atuagaq naal­lugu atuar­para. Ar­nat uteq­qik­kamik Biibilimik atuaq­qis­saaqatigiumal­lunga neqeroorfigaan­nga, akuersivungalu.

Guutip piumasaatut ilior­nis­sara kis­saatigiuaan­nar­nikuuara. Jehova pil­lugu eq­qor­tunik paasin­nin­nerujar­tor­til­lunga asanerujar­tuler­para. Taan­na pil­lugu kik­kut tamaasa oqalut­tuuk­kusut­taqaak­ka. 1973-imi kuisip­punga. Periarfis­saqaraangama ilaqut­tak­ka sal­lusuis­sut pil­lugu oqalut­tuun­niar­tar­pak­ka. Ilaqut­tamali, ingam­mik nuk­kama Aracelip, up­perisara eq­qun­ngitsuunerar­tar­paat.

Araceli: Mat­tut­toqarfim­mi ajor­tumik pineqar­tar­nera pis­sutigalu up­perisara narrutsaatigeqaara pil­luar­nangalu. Sapaatil­li tamaasa naalagiar­tar­punga rosenkransilu atorlugu ul­lut tamaasa qinusarlunga. Biibilili suli paaserusoqaara, Guutimul­lu ikioq­qul­lunga qinuvunga. Taamaalisorlu Felisap ilik­kak­kaminik oqalut­tuup­paanga. Up­perisani qiim­matsaatigingaarmagu isumaqaleraluar­punga silaqar­pian­ngitsoq.

Kingusin­nerusuk­kut Madridimut suliar­torlunga uter­punga kingor­natigul­lu katil­lunga. Ukiut ingerlaneran­ni maluginialer­para inuit aalajangersimasumik naalagiar­tar­tut Jiisusip ilin­niar­titsis­sutai malin­ngik­kaat. Taamaat­tumik naalagias­saar­punga. “Iluar­tuutitat”, an­niarfik aam­ma palasit ajor­tinik isumak­keerfigin­nis­sin­naatitaanerat up­periun­naar­pak­ka. Al­laat up­perisarsior­nermut tun­ngasut tamaasa pigiun­naar­pak­ka. Naluara eq­qor­tumik ilior­nerlunga. Pakatseq­qaqaanga Guutimul­li qinujuar­punga: “Ilisarisimalerusup­pak­kit, ikiun­nga!” Jehovap Nalunaajaasui matun­nut kasut­tukulasar­tut eq­qaamavara, map­piutin­ngisaan­nar­pak­kali. Up­perisarsior­nerit suul­luun­niit tutsuiginar­tin­ngilak­ka.

 Qatan­ngutiga Lauri Frankrigimi najugaqar­poq Ramonilu Spaniami najugaqarluni. 1980-ik­kut aal­lar­tin­neran­ni Jehovap Nalunaajaasuisa Biibilimik atuaq­qis­saaqatigisalersimavaat. Taak­kua Felisatul­li sal­loqit­taatinik ilin­niar­tin­neqar­ner­tik ilisiman­ngik­kaat qularin­ngil­luin­nar­para. Kingusin­nerusuk­kut eq­qaamiora Angelines naapip­para, ikin­ngutigiil­lualer­pugul­lu. Aam­ma taan­na Jehovamik Nalunaajaasuuvoq. Angelinesip uiatalu Biibilimik atuaq­qis­saaqatigineqarusun­nersunga arlaleriarlutik aperisar­paan­nga. Up­perisarsior­neq soqutigin­ngik­kaluariga paasisin­naavaat Biibili pil­lugu ilin­niarusus­suseqar­tunga. Naggataatigul­li oqarfigaak­ka: “Ajun­ngilarmi, aatsaal­li nam­mineq Biibiliutiga atorlugu atuaqatigisin­naavas­singa!” Nutsik­kamik Nácar-Colunga-mik Biibiliuteqar­punga.

Felisa: 1973-imi kuisik­kama Cantabriami il­loqarfiit pingaar­nersaan­ni, Santanderimi, Jehovap Nalunaajaasui 70-it mis­saaniip­put. Nunap ilaani nunaqarfip­pas­suar­ni inuit oqaluus­sif­figiumal­lugit bus­sinik kingor­natigul­lu biilinik ungasis­sumut angalasar­pugut.

Ukiuni taak­kunani Biibilimik atuaq­qis­saaqater­pas­suaqar­punga, taak­kunan­ngalu aq­qanil­lit kuisereer­put. Atuaq­qis­saaqatigisar­tak­kama amerlanersaat katuuliup­put. Utaq­qisin­naas­suseqar­tariaqar­punga. Uat­tul­li taak­ku up­perisamik kuk­kusuunerata paasinis­saanut pif­fis­saqar­tariaqar­put. Nalun­ngilara Biibilip Jehoval­lu anersaavata il­ler­nar­tup kisimik inuit eq­qarsar­taasiat al­lan­ngor­tis­sin­naagaat sal­lusuis­sul­lu paasitil­lugu. (Hebr 4:12) Uiga Bienvenido, politiitut atorfeqarsimasoq, 1979-imi kuisip­poq, anaanagalu toqun­ngitsiarluni Biibilimik atuaq­qis­saaqatigineqar­taler­poq.

Araceli: Jehovap Nalunaajaasuinit Biibilimik atuaq­qis­saaqatigineqar­talerama tatiginis­saat ajor­nakusoor­tis­simavara. Pif­fis­sal­li ingerlanerani taamatut misigisimajun­naar­punga. Nalunaajaasut Biibilimik ilin­niar­titsiin­naratik ilin­niar­titsis­sutigisatil­li aam­ma maleruar­paat. Jehovamik Biibilimil­lu up­perin­nin­nera al­liar­tor­til­lugu aam­ma pil­luar­neruler­punga. Eq­qaamiuma ilaasa al­lan­ngorsimanera malugisimaleriarlugu ima oqarfigaan­nga: “Araceli, toq­qarsimasat aalajangiusimaan­naruk!”

Eq­qaamavara ima qinul­lunga: “Qujanaq Jehova, im­miniigin­narsiman­ngin­nam­ma ujagaralu, Biibilimi sal­lusuis­sut eq­qor­toq, nas­saariniarlugu amerlasooriarlutit periarfis­sit­tarsimagam­ma.” Aam­ma qatan­ngutiga Felisa oqarfigaara oqaatsik­ka nuan­nin­ngitsut pil­lugit isumak­keerfigeq­qul­lunga. Taamanermiil­li as­sor­tuuk­kun­naarluta Biibili pil­lugu oqaloqatigiit­tar­ner­put nuan­naarutigisaqaar­put. 1989-imi, 61-inik ukioqarlunga, kuisip­punga.

Felisa: Maan­na 91-inik ukioqar­punga. Uil­lar­nikuuvunga aam­ma qangatut pisin­naajun­naarlunga. Ul­lul­li tamaasa Biibili atuar­tar­para, ataatsimiigiar­tar­punga sapin­ngik­kaangamalu oqaluus­sisarlunga.

Araceli: Palasit mat­tut­tul­lu Jehova pil­lugu oqaluus­sif­figinis­saat nuan­nareqaara, im­maqa mat­tut­tuunikooriarama. Taak­kua ilaan­nik oqaloqateqar­tar­nera soqutiginar­taqaaq, amerlasuul­lu atuak­kat atuagas­sial­lu tigusar­paat. Palasit ilaat ataaseq eq­qaamal­luar­para. Oqaloqatigil­lat­taareerlugu isumaqatigiler­paanga. Taava oqar­poq: “Utoq­qalereerlunga qanoq ilius­sagama? Ilagiin­ni ilaasor­taqatik­ka ilaqut­tak­kalu qanoq oqas­sap­pat?” Akivara: “Guutimi qanoq oqas­sava?” Paasivaa eq­qor­tumik oqar­tunga, takusin­naavaralu nikal­lor­toq. Al­lan­nguinis­sani saper­nar­tik­kunar­paa.

Puiun­ngisaan­nas­savara uima ataatsimiigiaqatigerusul­lunga oqarfigim­manga. Siul­ler­paamik ataatsimiigiarami 80-t sin­nerlugit ukioqar­poq, kingor­nalu ataatsimiigiar­tuaan­naler­poq. Biibilimik atuaq­qis­saaqatigineqar­taler­poq oqaluus­sisalerlunilu. Oqaluus­seqatigiit­tar­ner­put nuan­nersor­pas­suar­nik eq­qaamasaqarfigaara. Kuisin­nis­saminut qaam­matit marluin­nan­ngor­tul­lu toquvoq.

Felisa: Jehova kif­far­torfigilerak­ku nuk­kama pingasut akerlerersuaar­paan­nga, kingusin­nerusuk­kul­li sal­lusuis­sut ilas­sivaat. Taman­nalu nuan­naarutiginer­paasama ilagaat. Maan­nak­kut ilagiit­tar­ner­put Jehovalu asasar­put oqaasialu pil­lugit oqaloqatigiit­tar­ner­put nuan­narisaqaar­put! Kiisami tamat­ta Jehova pal­lorfigiler­par­put. *