Sooq ataatsimeeqatigiittassaagut?
“Peqatigiinneq ... aalajangerfigaat.” – APS 2:42.
1-3. (a) Kristumiut ilaasa ataatsimiinnernik pingaartitsinertik qanoq ersersissimavaat? (Allaaserisap aallaqqaataani asseq takuuk). (b) Allaaserisami matumani suut sammissavavut?
CORINNA 17-inik ukioqartoq arnaa tigusaavoq ungasissorsuarmullu pinngitsaalisatut sulisussanngortitaalluni. Kingornatigut aamma Corinna angerlarsimaffimminiit kilometerinik tuusintilinnik ungasitsigisumut, Siberiamut, aallarussaavoq. Tassani narsaammi sulisitaalluni inussiaatitut pineqarpoq. Ilaannikkut naammattunik oqorsaateqarnani issittumi sulisitaasarpoq. Taamaakkaluartoq Corinna qatanngullu arnaq alla aalajangerput qanorluunniit ajornartigissagaluarpat narsaat qimallugu ilagiit ataatsimiinneranni najuukkumallutik.
2 Corinna ima oqarpoq: “Unnukkut suliffipput qimallugu qimuttuitsoqarfimmut 25 kilometerisut ungasitsigisumut pisulluta aallarpugut. Qimuttuitsut unnuakkut marlunut aallarput nalunaaquttallu-akunneri arfinillit ingerlaareerluta niugatta 10 kilometerisut ungasitsigisumut pisoqqilluta aatsaat ataatsimiigiarfitsinnut apuuppugut.” Corinnap ataatsimiigiarsimanini peqqissimissutigaa? Ima oqarpoq: “Ataatsimiinnermi Napasuliaq Alapernaarsuiffik atuaqqissaaqatigiissutigaarput Naalagaaffilersaarutinillu erinarsoqatigiilluta. Nakussatsinnaqaaq uppernikkullu nukittorsaatigingaarlutigu.”
Qatanngutit taakku marluk ullut pingasut qaangiuttullu narsaammut uterput, peqannginneralluunniit nunaatilimmit malugineqarsimanngilaq.3 Jehovap innuttaasa naapeqatigiinnissartik qilanaariuaannartarpaat. Assersuutigalugu kristumiut siulliit Jehova pallorfiginiarlugu ilisarinerulerumallugulu naapeqatigiittarnertik pingaartippaat. (ApS 2:42) Qularnanngilaq aamma illit ataatsimiigiarnissat qilanaarisarit. Immaqali qatanngutitut allatulli ataatsimiinnerit tamaasa najuuffiginissaat ajornakusoortittarsimassavat. Immaqa nalunaaquttap-akunnerpassuini sulisariaqartarputit, suliassarpassuaqartarputit qasutaavittarlutilluunniit. Ataatsimiinnerilli tamatigut najuuffigisarumallugit suut iluaqutigisinnaavavut? [1] Biibilimik atuaqqissaaqativut allalluunniit ataatsimiinnerni aalajangersimasumik najuuttalernissaannik qanoq kajumissaarsinnaavavut? Allaaserisami matumani nassuiarneqassaaq ataatsimiinnerni najuuttarnerput sooq (1) uagutsinnut iluaqutaasoq, (2) allanut iluaqutaasoq aamma (3) Jehovap iluarisarigaa. [2]
ATAATSIMIINNERIT UAGUTSINNUT ILUAQUTAAPPUT
4. Ataatsimiinnitsinni Jehova pillugu qanoq ilikkagaqartarpugut?
4 Ataatsimiinnerni ilinniartinneqartarpugut. Ataatsimiinnerit tamarmik Jehovamik ilisimasaqarnerulernissatsinnut iluaqutaapput. Assersuutigalugu ilagiinni atuagaq “Guutip asanninneraniittuinnaritsi” atuaqqissaaqatigiissutiginikuuarput. Atuakkami tamatumani Jehovap pissusii sammigatsigit aamma uppeqatitta akissutaat tusaagakkit qanoq misigivit? Jehova asanerulersimassagunarpat. Ataatsimiinnerni aamma oqalugiaatinut piviusuusaartitsinernullu malinnaanikkut Biibilimillu atuaanernut tusarnaaqqissaarnikkut Biibilimi allassimasunik ilikkagaqartuartarpugut. (Neh 8:8) Aamma eqqarsaatigiuk Biibilimi sapaatip-akunneranut atuagassatsinnik misissuisarnitsinni allallu qanoq ilikkagaqarsimanerannik tusarnaartarnitsinni qanoq paasisaqartigisartugut.
5. Biibilimik atuillaqqinnerulernissannut oqaluussillaqqinnerulernissannullu ataatsimiinnerit qanoq iluaqutigisimavigit?
5 Ataatsimiinnerni Biibilimi ilikkakkatta inuunitsinni qanoq atornissaat ilinniartarparput. (1 Th 4:9, 10) Assersuutigalugu Napasuliaq Alapernaarsuiffik-mik atuaqqissaaqatigiinnermi Jehovamut kiffartornermi iliuuseqarnerunissamut, qinusarninnik pitsanngortitsinissannut qatanngummilluunniit isumakkeerfiginninnissannut kajumissisinneqarnikuuit? Sapaatip-akunnerata ingerlanerani ataatsimiinnitsinni nutaarsiassaq nuannersoq pillugu qanoq oqaluussisinnaasugut qanorlu inuit sallusuissummik Biibilimeersumik ilinniartissinnaagivut ilikkartarparput. – Matt 28:19, 20.
6. Kristumiut ataatsimiinnerini suut kaammattuutigalugillu nakussatsissutigisarpavut?
Apustilit Suliaat 15:30-32 atuakkit). Ataatsimiinnitsinni siulittuutit Biibilimeersut qanoq eqquussimaneri sammikulasarpavut. Tamakku Jehovap neriorsuutaasa siunissami eqquukkumaarnerannut qularunnaassutiginerulertarpavut. Qatanngutitta saqqummiussamikkuinnaanngitsoq aammali akissutimikkut erinarsorlutillu qamannga pisumik Jehovamik unnersiutiginninnermikkut kaammattortarpaatigut. (1 Kor 14:26) Aamma ataatsimiinnerup siornatigut kingornatigullu oqaloqatigiikkaangatta qiimmattarpugut uagutsinnik isumassuisunik ikinnguteqaratta. – 1 Kor 16:17, 18.
6 Ataatsimiinnitsinni kaammattorneqartarpugut. Saatanip silarsuaani uppernitsinnik sanngiillissutigisinnaasavut, stressilissutigisinnaasavut nikallussutigisinnaasavullu amerlaqaat. Ataatsimiinnitsinnili kaammattorneqarlutalu Jehovamut kiffartortuarnissatsinnut nakussatsinneqartarpugut. (Ataatsimiinnitsinni kaammattorneqarlutalu Jehovamut kiffartortuarnissatsinnut nakussatsinneqartarpugut
7. Sooq ataatsimiinnerni najuunneq taama pingaaruteqartigaa?
7 Ataatsimiinnerni Guutip anersaavanit sunnerneqartarpugut. Jiisusip ilagiinnik siulersuinermini anersaaq illernartoq atortarpaa. Taamaattumik kajumissaarpaatigut ‘anersaap ilagiinnut oqaaserisai’ tusaqqullugit. (Saqq 2:7) Anersaaq illernartoq ussernartunik ingalassimanninnissatsinnut, nakimaalluta oqaluussinissatsinnut silatusaartumillu aalajangiinissatsinnut iluaqutigisinnaavarput. Taamaattuminguna Guutip anersaava illernartoq iluaqutigiumallugu sapinngisarput tamaat ataatsimiinnerni najuunniartuartassasugut.
ATAATSIMIINNERNI ALLAT IKIORTARPAVUT
8. Ataatsimiinnerni najuuttarnerput, akissutivut erinarsoqatigiittarnerpullu qatanngutitsinnut qanoq sunniuteqartarpat? (Aamma ungalusaq “ Ataatsimeereeraangami iluarusuttaqaaq” takuuk).
8 Ataatsimiinnerni qatanngutitsinnik asanninnermik ersersitsinissatsinnut periarfissaqarpugut. Ilagiinni amerlasuut unamminiagassarpassuaqartarput. Apustili Paulusi ima allappoq: “Immitsinnut isumageqatigiinniarta.” (Hebr 10:24, 25) Ataatsimiinnitsinni qatanngutitsinnik isumassuisarsinnaavugut. Ataatsimiigiaraangatta ersersittarparput qatanngutivut ilagerusullugillu oqaloqatigerusukkivut qanorlu inneri soqutigigivut. Aamma qamannga pisumik erinarsoqatigiinnerput akissutivullu tusaagaangamikkit kajumissaarneqartarput. – Kol 3:16.
9, 10. (a) Qatanngutitta ataatsimeeqatigisarnissaasa pingaaruteqarluinnarneranik paasinninnissatsinnut Johannesip iivangkiiliua 10:16 qanoq iluaqutigigipput nassuiaruk. (b) Qatanngutit ilaquttaminnit ajattorneqartut ataatsimiigiartuarnitsigut qanoq ikiorsinnaavavut?
9 Ataatsimiinnerni ataasiussuseqarnerulertarpugut. (Johannesi 10:16 atuaruk). Jiisusi imminut savanik paarsisumut assersuuppoq ajoqersukkanilu savaatinut assersuullugit. Una eqqarsaatigiuk: Savat marluk qattunermiippata allallu marluk qoorumiippata allalu sumi tamaaniilluni taava oqartoqarsinnaava taakku tallimat ‘savaataasut katersat ataatsit’? Naamik, savaatit katersat ataatsimoortarput savanillu paarsisumik malinnittarlutik. Tamatumunnga assingusumik ataatsimiinnerni najuutinngitsoortarnikkut qatanngutitsinnit immikkoorniassanngilagut. Savaataassagutta ‘katersat ataatsit’ ‘paarsisumik ataatsimik’ malinnittut naapeqatigiittarnissarput pisariaqartipparput.
10 Ataatsimiinnerit ilaqutariittut asaqatigiittutut ataasiussuseqalissutigisarpavut. (Tuss 133:1) Ilagiinniittut ilaat ilaquttaminnit, soorlu angajoqqaaminnit qatanngutiminnilluunniit, ajattorneqartarput. Jiisusili neriorsuivoq asannittunik isumassuisunillu ilaqutartaartikkumaarlugit. (Mark 10:29, 30) Ataatsimiinnerni najuuttuaannaruit taakkua ilaannut ataatatut, anaanatut qatanngutitulluunniit ilersinnaavutit. Tamanna eqqarsaatigisarutsigu sapinngisarput tamaat ataatsimiinnerit tamaasa najuuffigerusuttassavavut.
JEHOVA NUANNAARTIKKUSUPPARPUT
11. Ataatsimiinnerni Jehovamut pisassarititaasoq qanoq tunniuttarparput?
11 Ataatsimiinnerni Jehovamut pisassarititaasoq tunniuttarparput. Pinngortitsisorsuarigatsigu qujaniarfigalugulu ataqqinartillugulu unnersiutigisariaqarparput. (Saqqummersitat 7:12 atuaruk). Taamaaliortarsinnaavugut ataatsimiinnerni Jehovamut qinunikkut, erinarsornikkut taannalu pillugu eqqartuinikkut. Nuanneqaaq sapaatit-akunneri tamaasa taamatut Jehovamik pallorfiginninnissatsinnut periarfissaqaratta!
Maluginiartarpaa ataatsimiinnernut sapinngisatsinnik najuukkusuttugut
12. Ataatsimiinnerni najuuttarnissatsinnik peqqussummut naalannerput Jehovap qanoq isumaqarfigaa?
12 Jehovap pinngortippaatigut, taannalu naalatassaraarput. Peqquaatigut katisimaqatigiittassasugut, pingaartumik naggatissaq qanilliartortillugu. Tamanna naalakkaangatsigu Jehova nuannaartittarparput. (1 Joh 3:22) Maluginiartarpaa pingaartillugulu ataatsimiinnerni sapinngisatsinnik najuukkusuttugut. – Hebr 6:10.
13, 14. Sooq oqarsinnaavugut ataatsimiinnerni Jehovamut Jiisusimullu qanillisarluta?
13 Ataatsimiikkaangatta Jehovamut erneranullu qanillerusunnerput ersersittarparput. Ataatsimiinnerni Biibili atuaqqissaaqatigiissutigisarparput, aamma Jehovap qanoq iliornissatsinnik qanorlu inuunissatsinnik ilinniartittarpaatigut. (Es 30:20, 21) Soqutiginnittut ataatsimiigiaraangamik paasisarpaat Guutimit siulersorneqartugut. (1 Kor 14:23-25) Jehovap anersaamigut illernartukkut ataatsimiinnerput aquttarpaa, taamaattumillu ilikkakkavut taassumaneersuupput. Ataatsimiikkaangatta Jehovap oqaasiinut tusarnaartarpugut, asaneqangaartutut misigisarpugut taassumunngalu qanillisarluta.
14 Jiisusi, ilagiinnut niaquusoq, ima oqarpoq: “[Marluk] pingasulluunniit atinni katisimagaangata akornanniittarpunga.” (Matt 18:20) Biibilimi aamma allassimavoq Jiisusi ilagiit “akornanni angalaartoq”. (Saqq 1:20-2:1) Ersarippoq Jehovap Jiisusillu ataatsimiinnitsinni nakussatsinniarluta najortaraatigut. Jehovamut erneranullu sapinngisannik qanilliniarnerit Jehovamut qanoq sunniuteqassasoraajuk?
15. Ataatsimiigiaraangatta Guutimut naalakkusunnerput qanoq ersersittarparput?
15 Ataatsimiigiaraangatta Jehovamut naalakkusunnerput ersersittarparput. Jehovap naalaqqulluni pinngitsaalinngilaatigut. (Es 43:23) Ataatsimiigiartarnissamik peqqussutaa naalakkaangatsigu taassumunnga asanninnerput aamma qanoq iliornissatsinnik peqqusisinnaatitaaneranik upperinninnerput ersersittarparput. (Rom 6:17) Assersuutigalugu sulisitsisutta ataatsimiinnerup nalaani sulisarnissarput piumasarippagu qanoq iliussaagut? Aamma imaassinnaavoq oqartussat oqartut Jehovamik pallorfiginninniarluni ataatsimiigiartoq kinaluunniit akiliisitaassasoq, parnaarussaassasoq ajornerusumilluunniit pillarneqassasoq. Imaluunniit imaassinnaavoq ataatsimiigiarnissaminngarnit allanik sammisaqarusunnerusugut. Pissutsini taama ittuni qanoq iliorniarluta nammineq aalajangertassavarput. (ApS 5:29) Jehovali naalakkaangatsigu nuannaartittarparput. – Uss 27:11.
QATANNGUTIT ATAATSIMEEQATIGIUARTAKKIT
16, 17. (a) Kristumiut siulliit naapeqatigiittarnerminnik pingaartitsingaarnerat qanoq nalunngilarput? (b) Qatanngutip George Gangasip ataatsimiinnerit qanoq isumaqarfigai?
16 Ukiumi 33-mi piinsip ullua aallarnerfigalugu kristumiut Jehova pallorfiginiarlugu aalajangersimasumik naapeqatigiittalerput. Aap, taamanimiilli “apustilit ajoqersuinerat, peqatigiinneq ... aalajangerfigaat”. (ApS 2:42) Aamma naak romamiut oqartussaasuinit juutillu upperisarsiortut siuttuinit malersorneqaraluarlutik naapeqatigiittarunnaanngillat. Ajornaatsuinnaanngikkaluartoq sapinngisartik tamaat naapeqatigiinniartuartarput.
17 Aamma ullumikkut Jehovap kiffaasa ataatsimiinnerit qujamasuutigisaqaat najuuttarnertillu nuannaarutigisarlugu. George Gangas ukiut 22-t sinnerlugit siulersuisoqatigiinnut ilaasortaasimasoq ima oqarsimavoq: “Qatanngutit naapeqatigisarneri inuuninni nuannernerpaat ilagaat uannullu nakussatsitsissutaasaqalutik. Nuannaarutigisaqaara ajornanngikkaangat naalagaaffilersaarfimmut siulliit ilagalugit isertarnera kingulliillu ilagalugit anisarnera. Guutip innuttai oqaloqatigigaangakkit qamuuna nuannaartaqaanga. Taakkua akornanniikkaangama misigisarpunga ilaquttakka ilagalugit angerlarsimallunga, anersaakkut paratiisimi.” Ima nangippoq: “Kissaatiginerpaasaraara ataatsimiinnerni tamatigut najuuttarnissara.”
18. Ataatsimiinnerit qanoq isumaqarfigaagit, aamma suna aalajangiusimaviuk?
18 Illit aamma Jehovamut pallorfiginninninni taamatut misigisarpit? Taamaappat sapinngisat tamaat qatanngutitit ataatsimeeqatiginiartuartakkit, aamma ajornakusuussagaluarpalluunniit. Jehovamut ersersiguk Daavip oqaasii uku isumaqatigalugit: “Naalagaq, nuannaraara ineqarfiit.” – Tuss 26:8.
^ [1] (immikkoortoq 3) Qatanngutitta ilaasa ataatsimiinnerit amerlanertigut najuuffigisinnaaneq ajorpaat atukkatik iliuuseqarfigisinnaanngisatik, immaqa napparsimanertik, pissutigalugit. Ilimagilluinnarsinnaavaat Jehovap tamanna paasilluaraa taassumunngalu pallorfiginninnerminni suliatik tamaasa qujamasuutigingaarai. Taamatut atugallit ataatsimiinnernut tusarnaarsinnaanissaannik utoqqaanertat ikiorsinnaavaat, assersuutigalugu oqarasuaatikkut attavilersinnaavaat ataatsimiinnerilluunniit immiullugit.
^ [2] (immikkoortoq 3) Ungalusaq “ Sooq ataatsimiittartugut” takuuk.