Inuunerup siunertavia

TAKORLOORIARUK ikinngutivit sannavianut pulaartutit. Ikinngutivit sanasimasaa ineqqammigaa torragisorujussuuat. Sanasimasaa pikkorissumik sanaajuvoq kusanartumillu ilusilersugaalluni. Kisianni sumut atortussaanersoq eqqoriaruminaappoq. Sumut atugassaanersoq qanoq ilillutit paasiniassagaluarpiuk? Soorunami ikinngutit aperisinnaavat; qularnanngitsumillu nuannaarluni nassuiaakkumassavaatit.

Qanoq ililluta paasisinnaavarput inuuneq sumik siunertaqarnersoq? Guuti, „inuunerup pilerfia“, aperiinnarsinnaavarput. (Tussiaat 36:10) Qanoq ililluni taamaaliortoqarsinnaava? Qujanartumik Biibili aqqutigalugu taassuma oqaluffigisimavaatigut. Inuit uppertut eqqarsaatiminik allatsissimavai uagutsinnut paasisinnaaqullugit. Iluamik oqaatigalugu inuunerup siunertaa naatsunnguamik ima oqaatigineqarsinnaavoq: Maaniippugut Guuti ilinniartussaallugu taassumalu piumasaanik iliortussaalluta. Biibilimi ima oqaatigineqarpoq: „Taava oqaaserineqartut tamarmik ataatsimut katinneqarsinnaapput imaalillugit: Guuti mianeruuk inatsisaalu maleruarlugit, tamanna inunni ileqqussaammat.“ — Nalunaajaasup oqaasii 12:13.

Nassuiaat tamanna ajornanngippallaarpa? Naamerluinnaq. Guuti ilinniartussaallugu taassumalu piumasaanik ilinniartussaalluta pinngortitaanerput imalerujussuuvoq.

Guutip aallaqqaammulli siunertaa

Guutip inunnik pinngortitsigami aallaqqaammulli siunertaa ilinniarutsigu inuunerup siunertaa paasisinnaanerulissavarput. Aammalu paasisinnaanerulissavarput sooq ilanngutassiami matuma siulianiittumi taaneqartut ilaat ullumikkut inuunermik naleqarnerulersitseqataasinnaasut.

Inuup pinngortinneqarnera pillugu Biibilimi ima allassimasoqarpoq: „Guuti oqarpoq: ’Inunnik pinngortitsisa immitsinnik assililluta uatsitut ittussanik.’“ (1 Moses 1:26) Tassa inuit Guutimik ilaarsinissaminnut periarfissaqarput, pissusii ersarinnerusut, ilaatigut ilisimassutsip, pissaanerup, naapertuilluassutsip asanninnerullu, assinginik pissuseqalersinnaallutik. Taamaattumik tupinnanngilaq inuit ilaasa ilisimatusarnermikkut imaluunniit isumakkut timikkulluunniit unamminartumik suliaqarnermikkut inuunertik naammagisimaarnartuutinniartarmassuk. Tupinnarpalu inuppassuit inunnik allanik ikiuinertik inuunerminni pisuunnguutigisarmassuk? Naamerluinnaq. Ilaatigummi tamaaliortussatut pinngortitaavugut.

Biibilimi oqaluttuami nangilluni oqaatigineqarpoq inuit nunami uumassusilinnik allanik tamanik — ’aalisakkanik immamiittunik timmissanillu qilaap ataaniittunik nunamilu paarmortunik tamanik’ — nakkutilliinissamik suliassinneqarsimasut. (1 Moses 1:26) Tupinnanngilaq ullumikkut inuppassuit uumasuuteqarneq uumasunillu pinnguaqateqarneq nuannarisarmassuk. Ilaat uumasunut akisussaassutsimik ima angitigisumik misigisimapput uumasut nungutaaqqajaasut nungutaannginnissaat sorsuutigisarlugu imaluunniit uumasunik naalliutsitsinermut akerliullutik suliniuteqartarlutik.

Inuit aamma oqarfigineqarput ’nunarsuarmut naalagaassasut’. (1 Moses 1:28) Tamatuma suut nassatarissavai? Soorunami inuit namminissarsiortumik akisussaassuseqanngitsumillu nunarsuup pisuussutaanik, nungunnissaat, silaannartaata mingutsinneqarnissaa aammalu imartaata  nunataatalu eqqakkanik ulikkaarluinnarneqarnissaa tikillugu, atuipiluttussaanngillat. Aap, inuit qanoq ilillutik nunarsuaq naalagaaffigissagaat Guutip ilaagassippai ’Edenimi naatsiiviliorami kangiani, inulianilu tassunga pisillugu’. (1 Moses 2:8) Edenip naatsiivia taanna nunarsuup qanoq iliumaarnissaanut takussutissiaavoq, Guutip nunarsuatsinnik qanoq siunertaqarfiginninneranik ersersitsisuulluni.

Biibilimi oqaluttuami ima nassuiarneqarpoq: „Guutillu [angut arnarlu siulliit] pilluaqquai oqarfigalugit: ’Kinguaassiorlusi amerliartoritsi nuna tamakkerlugu ilissinnullu naalatsigitillugu.’“ (1 Moses 1:28) Guutip kissaatigaa inuit meeqqiussasut nunarsuarlu inulersorlugu. Inuit aappariit siulliit ataatsimoortippai, taamaalillunilu katititsineq siulleq naammassillugu. (1 Moses 2:22-24) Taamaattumik tupinnarpallaanngilaq aappariinneq ilaqutariittullu inuuneq inuunermik imaqalersitsillutillu siunertaqalersitsisarmata!

Inuuneq qanoq iliartorsimasinnaagaluartoq

Biibili atuaqqissaaraanni paasinarluartarpoq Guutip siunertarisimagaa Adamip ilaqutai amerliartussasut Edenillu naatsiivia alliartortissagaat nunarsuup inunnik ulikkaarnissaata tungaanut. Taamaalilluni nunarsuaq paratiisinngortussaagaluarpoq. Soorunami inuit nunarsuup pisuussutaanik namminneq iluaqutissaminnik inuit atuisussaapput, akisussaassusilimmilli taamaaliortussapput. Inuit nunarsuarmut paarsisuusussaapput, ujajaaffiginnittussaanatik. Nunarsuarmik aserorterineq ullumikkut takusinnaasarput Guutip piumasaanut akerliulluinnarpoq, aserortereqataasullu inuunerup siunertaanut akerliusumik iliorput. — sarĸúmersitat 11:18.

Biibilimi oqaluttuami aamma allamik paasitinneqarpugut, tassa inuit toqusarnissaat Guutip siunertarisimanngikkaluaraa. Siuaasavut siulliit Guutimut naalannginnertik pissutigalugu toqupput. (1 Moses 2:16, 17) Naalanngikkamillu inuunermut siunertarititaasumik naammassinnissinnaajunnaarsimapput Guutip piumasaanik iliorunnaaramik. Taakkuinnaanngitsut toqupput, aammali kinguaavi tamarmik toqumit naalagaaffigineqalerput naammalluinnanngissutsimik kingornussinertik pissutigalugu. (Rûmamiut 5:12) Inuit naassaanngitsumik inuusussaallutik, toqusussaanatik, pinngortitaagaluarput. Qularnanngitsumilluuna tamanna pissutaalluni inuppassuarnut nikallornartartoq eqqarsaatigalugu inuunermi suliarisartik pingaartoq toqukkut kipitinneqarumaartoq.

Guutip siunertaa piviusunngortinneqassaaq

Guutip inunnik nunarsuarmillu aallaqqaammulli siunertaa allanngorsimanngilaq. Suli siunertaraa nunarsuaq paratiisinngorluni inuiannik naammalluinnartunik inoqalissasoq. Siuaasattali siulliit kukkuluttorsimarata kingunipilui aaqqinniarlugit aaqqissuussanik arlalinnik pilersitsisariaqarsimavoq. Ullumikkut Guutip piumasaanik iliorneq tassaavoq Guutip aaqqissuussai tamaasa naapertorlugit iliuuseqarneq. Qujanartumik Biibilimi allaatigineqarpoq siunertaa qanoq ililluni piviusunngoriartuaarumaartoq.

Biibilip atuagartaani siullermi atuarsinnaavarput Guutip siulittuutigigaa kinguaassaq, Adamip Evallu Guutip piumasaanut akerliusumik iliornermikkut ajoqusiinerannik iluarsiisussaq, takkukkumaartoq. (1 Moses 3:15) Kristumiut Allagaataat Griikerisuut-ni („Testamentitaaq“-mi) atuarsinnaavarput Jesus tassaasoq „kinguaassaq“ taanna, aammalu inuuneranut ajorteqanngitsumut akeqqallu assaanni toqutaaneranut tunngasut atuarneqarsinnaapput. Jesusip toqunera uagut sinnerluta pilliutaavoq, pilliut inuunermik naassaanngitsumik Adamip Evallu annaasaannik angusisinnaanissatsinnut periarfissiisoq. (Eprîarit 7:26; 9:28) Aap, Biibilimi ima oqaatigineqarpoq: ’Kinaluunniit taassumunnga uppertoq tammassanngilaq, naassaanngitsumilli inuussuteqassaaq.’ — Juánase 3:16.

Tamaangaannarli killeqanngilaq. Jesus toqunermi kingorna anersaatut toqujuitsutut makititaavoq, massakkullu qilammi Guutip naalagaaffiani kunngitut naalagaavoq. Qanittukkut Guutip naalagaaffiata nunami naalakkersuisut  maannakkut atuuttut inuiaqatigiinnik nutaanik taarsissavai. Biibilimi siulittuummi ima neriorsorneqarpugut: „Kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:44.

Taava naalagaaffiup tamatuma nunarsuarmi Paratiisimik pilersitseqqinniarneq siulersussavaa inuillu naammalluinnassutsimut pisissallugit. Biibilimi allaat eqqartorneqarpoq toqungasut makitinneqarumaartut Guutip inuiannik siunertaanik misinnangaartumik naammassinninnermut peqataanissaminnut aamma periarfissaqarsinnaaqqullugit. (apustilit suliait 24:15) Taava neriorsuut nuanningaartoq manna eqquussimalissaaq: „Kisianni qanilaartut nuna kingornutissavaat, pilluangaarlutillu inuussapput. Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:11, 29.

Qanoq ililluta inuttut iluaqutigisinnaagipput

Guutip nunarsuarmik siunertaa misinnangaartoq inuttut iluaqutigisinnaassagutsigu Guuti ilinniaqqaartariaqarparput. Jesus Kristus ima oqarsimavoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Qanoq ililluta ilisarilersinnaagatsigik? Guuti ilinniarsinnnaavarput silarsuup avatangiisitta, pinngortitarsuup ulloriarpassuillu qimerloornerisigut. (Tussiaat 19:2) Ingammilli Biibili aqqutigalugu Guuti erneralu, Jesus Kristus, ilinniarsinnaavavut. Aqqa pissusiilu kiisalu Guutip inuiannut iliuuserisimasaasa annikitsualuttai ilanngullugit ilikkassavavut. Tamakku tamaasa ilikkarutsigik Guuti asalissavarput taassumunngalu erneranullu qaninnerulissalluta.

Guutimik ilikkarnitta taassuma piumasaanik iliorusussuseqalersittarpaatigut. Immaqa Jesusip ilinniartitsissutigisimasaatut ima qinusimavugut: ’Naalagaaffiit tikiulli; peqqusat [piumasat] qilammisut nunamissaaq pili.’ (Matîuse 6:10) Inuunerup siunertavia — piviusumik nalerisimaalersitsisartoq — tassa Guutip piumasaanut naapertuuttumik inuuneq.

Guutip piumasaanik iliorneq qanoq paasisariaqarpa? Adamimut Evamullu Guutip piumasaa tassaasimavoq uumasut silarsuaannik nakkutilliinissaat nunarsuarmullu naalagaallutik kinguaaminnik naammalluinnartunik nunarsuarmik  inulersuinissaat. Ullumikkut Guutip piumasaanik iliorumagutta Jesusip utertitsissutissatut pilliutaa ilinniartariaqarparput tamatumunngalu uppernermik ersersitsisariaqarluta. Jesusillu maligassiaa malittariaqarparput ’naalagaaffimmik nutaarsiassaq nuannersoq’ oqaluussisutigalugu. — Matîuse 24:14, (NV).

Guutip piumasaanik iliorneq aamma tassaavoq taassuma pissusiitut ittunik pissuseqalerniarneq. Guutip uumigisai tamaasa — sallu, tillinneq, mamarliineq aserorsaasoq kamannermik nunusinnaannginneq — ajattorlugillu uumigisariaqarpavut. Aammalu misissortariaqarparput pissutsit suut Guutip iluarinerai — asanninneq, nuannaarneq, eqqissineq, inussiarnerneq ajunngissuserlu — Guutillu anersaava illernartoq ikiortigalugu pissuserilerniartariaqarlugit. (Galâsiamiut 5:19-24) Inuuneq naassaanngitsoq angorusukkutsigu tassaasariaqarpugut inuit Guutip naassaanngitsumik inooqqusai. Aap, Guutimik taassumalu piumasaanik ilinniarneq allanit tamanit inuunermik imaqalersitsillunilu siunertaqalersitsisarpoq!

Assigiinngissut

Inuit millionilikkuutaat nunarsuarmi sumi tamaaniittut uppernarsarsinnaavaat inuunerup siunertavianik ilikkarneq allanngorluinnarnermik kinguneqarsinnaasartoq. Wayne assersuutigeriartigu. Taanna nuliani siulleq toqummat aliasuttorujussuusimavoq. Palasip tuppallersaaniarnerigalui iluaqutaanngillat, taamaattumik Wayne nammineq kajumissutsiminik kiffartuuteqalerpoq. Sorsoqataasimasut peqatigiiffianni sakkutuut naalagaattut sulilerpoq naalakkersuinikkullu suliniuteqartunut akuulerluni. Kateqqippoq, aappariinneralli ingerlalluanngeqaaq, nulianilu inuunerminni najoqqutaqannginnamik.

Ullulli ilaanni Wayne biibilimik nassaarpoq atualerlugulu. Qaammatit pingasut ingerlaneranni tamaat naallugu atuareerlugulu ima oqarpoq: „Maanna paasilerpara maaniinnerput siunertaqartoq toqullu kingorna inuunermik neriuutissaqartoq.“ Nuliani ima oqarfigaa: „Inunnik Biibilimik najoqqutarinnittunik ujaasisariaqarpugut ilagisalerlugillu.“ Kingunitsianngua Jehovap nalunaajaasuinik naapitsipput, taakkuninngalu oqaloqatiginninnerata Guutip piumasaanik iliorusussusiat annerulersippaa. Waynep nuliatalu inuunertik Guutimut tunniulluinnarpaat, ilaqutariittullu inuunerat pitsaanerujussuanngorpoq.

Susanip, presbyterianerit ajoqersuiartortitaasa paniata, inuunermi silarsuarmut iluaqutaasumik atornissaa kissaatigisimavaa. Atomip nukingata ulorianaateqassusia pillugu oqalugiaat tusarnaareeramiuk qularutigiunnaarluinnarpaa suliassaq tamanna assorsuaq pingaaruteqartoq. Ilisimatusarfik qimappaa ajornartorsiullu tamanna inunnut paasisitsiniutigalugu piffissani tamaat atulerlugu. 21-nik ukioqarluni atomip nukinganut akerliusut ataatsimeersuarneranni ataqatigiissitsisutut sulivoq. Kingorna Jehovap nalunaajaasuinit pulaarneqarpoq, Biibilimilu allassimasut ilikkarlugit inuunerullu siunertavia paasillugu. Inuit nunarsuarmik aserorterinerat suli isumakuluutigaa, paasivaali Guutip nammineq naalagaaffini ikiortigalugu ajornartorsiutit tamakku aaqqikkumaarai. Taamaattumik maannakkut inuit tamatumunnga uppissuseqalernissaannik ikiorniarlugit suliniarpoq.

Mariellep inuunermini anguniagarilersimavaa silarsuup neqeroorutigisinnaasaanik inuulluataarutiginninnissani. Qaffakkiartornartumik suliaqalerpoq, Los Angelesimilu piumasaminik inuulerluni, festeriartarluni ikiaroornartutortarlunilu. Biibilili atuaqqissaaleramiuk, Guuti ilinnialerlugu kiffartorfigilerlugulu, paasilerpaa inuuneriaaserisimasani qanoq imaqanngitsigisimasoq. Oqarpoq maannakkut Guutip siunertaa naapertorlugu inuulerami inuunini assut pisuunngornerusoq.

Ullut tamaasa inuit hundredelikkuutaat inuunerup siunertavianik ilinniartarput. Inuunerup siunertavia naapertorlugu inuuneq Ataatattalu qilammiusup asannittup piumasaanik iliorneq annertuumik allanngortitsisarpoq. Inooriaaseq tamaat allanngortissinnaavaa. Kajumissaarpatsigit nammineerlutit tamanna paasiniaqqullugu. Taamaalioruit inuunerit pisuunngornerullunilu imaqarnerulissaaq. (gD 22/4 92)

[Qupp. 22-mi assiliartaq]

Guutip siunertani — nunarsuup paratiisinngortinnissaa naammalluinnartunik inulik — taamaatissimanngilaa