Katsorsarneqarsinnaavoq

„Aalajangigassaqarpugut: Imerunnaarluta iluarsinngikkutta, imernerput ingerlatiinnassavarput toqullutalu.“ — Imerajuttuusimasoq imernaveersaartunngorsimasoq.

TAKORLOORIARUK unnuakkut iterlutit illut ikuallattoq. Sivitsunngitsoq qamisaajartortoqarpoq innerlu qaminneqarluni. Taava kingornatigut isiinnarsinnaassavit soorlu susoqarsimanngitsoq? Soorunami naamik. Illu aserorsimavoq, iluarsaanneqartariaqarlunilu qangatut inuuffigisinnaaqqilissagukku.

Taamaapportaaq imerajuttoq imigassamik atornerluinermik qaangiiniarsarisoq. Inuunera, immaqa ukiorpassuarni, imigassamit aserorneqarsimavoq. Maannalu imernaveersaartunngorsimavoq. „Inneq“ qaminneqarsimavoq, imigassamilli attuinaveersaassaguni pissutsinik isiginnittaatsini, inooriaatsini ileqqunilu allanngortilluinnartariaqarpai. Imerajuttup imigassamik attuinaveersaalerniartup siunnersuutit makku iluaqutigisinnaavai.

1. Akeraq ilisimajuk

Biibilimi oqaatigineqarpoq uinngup kissaatai ’tarnimut akerartortuusut’. (1 Pîtruse 2:11) Oqaaseq griikerisooq tassani ’akerartortoq’-mik nutserneqarsimasoq, tassani assersuutaasumik atorneqarpoq, inuunermilli piviusumit tigusaalluni isumaqavillunilu „sorsunnermik kiffartuuteqarneq“. Tassa  oqaaseq sorsunnermik aseruisumik imaqarpoq. — Naleqqiuguk Rûmamiunut agdlagkat 7:23-25.

Soorlu sakkutuujulluartup kialuunniit akeqqamik saassusseriaasiat misissoqqissaartaraa, imerajuttup imerajuttuussutsip pissusia ilinniartariaqarpaa paasiniarlugulu qanoq ililluni imminut avatangiisiminullu aseruisartoq. * — Eprîarit 5:14.

2. Imeriaatsit eqqarsariaatsillu allanngortikkit

„Qaatusimasunngorneq tassa puiaasamit aamma ’meeqqamit puiaasamit miluttumit’ kaanngarneq,“ nakorsaq taama oqarsimavoq. Allatut oqaatigalugu imeriaasiinnaanngitsoq, aammali inuttut pissuseq iluanit tamaat, allanngortittariaqarput.

Biibilimi silatuumik ima oqaassuteqarpoq: ’Allanngoritsi isumassigut nutaanngorlusi.’ (Rûmamiut 12:2) ’Inutoqaq ileqqui tappullugit iperarsiuk.’ (Kulorsamiut 3:9) Inuttut pissuseq pinnagu iliuutsit kisiisa allanngortinneqarpata imerajuttuusimasoq immaqa allamik navianartumik atornerlueqqilersinnaavoq — nakkaqqilluniluunniit.

3. Paasinnittumik saaffigisartagaqalerit

Biibilimi ima ussateqarpoq: „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit.“ (Ussatit 18:1) Imerajuttuusimasoq allaat imernaveersaartunngorsimagaluarluni imerajuttuussuseq patsisissarsiuuteqqajaasarpaa. Taamaattumik inummik paasinnittumik aammali aalajaatsumik piumassusilimmik, ikorfartuutigisinnaasaminik ikiortigisinnaasaminillu, saaffigisartagaqarnissani pisariaqartippaa. Iluaqutaassaaq inuk taanna aamma siornatigut imerajuttuusimappat imernaveersaartuunermillu iluatsitsisimasuulluni. (Naleqqiuguk Ussatit 27:17.) Saaffigisartakkap taamaattup imerajuttup upperisaa ataqqisariaqarpaa, imminut pilliutigeriaannaasuulluni tamatigullu ikiuisinnaassalluni. — Ussatit 17:17.

4. Naammagittarit

Ajornartorsiut piartuaartumik aaqqinniarneqartariaqarpoq. Imerajuttup inuunerminik iluarsaaqqinniarnera taassumunnga sivisusinnaavoq. Aningaasatigut ajornartorsiuteqarsinnaavoq, suliffimmini akimmisaarfeqarluni  angerlarsimaffimminilu annertuunik ajornartorsiuteqarluni. Imigassartorunnaaraanni imaanngilaq ajornartorsiutit nungussasut. Immaqa imerajuttup imernaveersaarluni, ’ajornartorsiutinik qamisaateqarnani’, inuulernini aallaqqaammut merserisarpaa. Ajornartorsiutit qaleriiaaginnalerpata tussiaasiortup oqaasii tuppallernartut eqqaamasariaqarpai: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ — Tussiaat 55:23.

5. Ajunngitsunik ilagisartagaqarit

Imerajuttuusimasoq ilumoorluni imminut ima aperisariaqarpoq: ’Imernaveersaarniarlunga aalajangerninnik ikinngutima tapersersorpaannga imaluunniit qanga pisimasunik eqqartuiniaannarpat, maqaasigisaqalersillunga?’ Ussatit 18:24-mi ima allassimavoq: „Inuk ikinnguteqaraluarluni ajutoorsinnaasarpoq, ikinngutaasoqartarporli qatanngummit tatiginarnerusumik.“ Immikkoortitsisinnaassuseqartariaqarpoq kikkut ikinngutaanersut ilumoortut kikkullu ajortumik sunniuteqassanersut nalilersinnaassagaanni.

6. Imminut tatigivallaartoornaveersaarit

„Kakkaak misiginera nuannermat — imerusuttarunnaarpungaluunniit!“ Imerajuttuusimasup taama oqartup siuariarnini ingasaallugu isigaa imerajuttuusimaninilu soqutaanngitsutut isigalugu. Imerajuttuusimasoq imigassamik atornerluiunnaarnermi kinguninngua suna tamaat oqitsunnguatut isigisarpaa, kisianni siusinnerusukkut kingusinnerusukkulluunniit taamatut misigiunnaassaaq. „Pissutsinik oqimaaqatigiissumik isiginnittaaseqalerniarluni ilungersortariaqarpoq,“ atuakkami Willpower’s Not Enough-imi taama siunnersuuteqarpoq, „taamaaliunngikaannimi nakkartooqittoqarsinnaavoq; nakkarfissarlu itisoorujussuuvoq.“ — Naleqqiuguk Ussatit 16:18.

7. Taartitut atornerlugaqalernaveersaarit

Inuit imerunnaartut ilarpassui taarsiullugu nerisarnermikkut ajornartorsiuteqalersarput, suliuaannartunngortarlutik, imaluunniit aningaasannanniarnermut assigisaanulluunniit tiguartittarlutik. ’Soqutaammat? Iminngikkuma naammappoq,’ imerajuttuusimasoq immaqa taama eqqarsartarpoq. Arlaannik sammisaqarnissaq iluaqutaasarpoq. Kisianni sunaluunniit misigissutsinik misikkarlutsitsilersartoq toqqissisimanermik piviusuunngitsumik naajasumillu kinguneqaannartarpoq.

8. Ilaqutariit nutarsakkit

Imerajuttuusimasorpassuit ingerlallualeruttorlutik imminnut nakkarteqqittoortarput! Sooq? Inooriaatsimut allarluinnarmut pulasaramik. Imerajuttuusimasup inooriaaserisimasatoqqani uterfigisooqqajaasinnaasarpaa. Imerajuttusimasorlu imertarunnaaraangat ilaqutariit umiatsiaallusooq immamut maliarsuttumut pisarpoq. Taamaattumik ilaqutariinnut ilaasut ataasiakkaat tamarmik nutaamik iporiaasitaartariaqartarput. „Ilaqutariinnik isiginnaagassiaq allanngorluinnarlugu allaqqinneqartariaqartarpoq,“ atuagassiaaqqami Recovery for the Whole Family-mi taama allassimasoqarpoq. Taamaattumik imerajuttuunerup qaangernissaanut aqqut ilaqutariit susassaannik taaneqarsimavoq. — Naleqqiuguk Korintumiunut agdlagkat sujugdlît 12:26.

9. Nakkaattooqqinnaveersaarit

Imminut tatigivallaarneq, sunniuteqarnerluttunik ilagisartagaqarneq, ikiaroorniutinik allanik pinngitsuuisinnaajunnaarneq imaluunniit imminut mattunneq nakkartooqqinnermik kinguneqarsinnaasarput. Saaffigisartakkannut ammasumik attaveqarniartuaannarit.

Imerajuttuusimasoq imernaveersaartunngorsimasoq ima oqarpoq: „Imerajuttut tamarmik imerunnaartarput. Ilaannaalli uagut iluanaarpugut suli inuutilluta taamaatissimagatta.“ (gD 22/5 92)

[Quppernerup ataani ilanngussaq]

[Qupp. 7-mi ungalusaq]

Nakorsaatit pillugit siunnersuutit

Nakorsaatit aalakoornartumik imallit suulluunniit aalakoornartutorusutsitsileqqissinnaapput imertaleqqissutaasinnaallutillu.

Dr. James W. Smith ima allassimavoq: „Qaqutiguunngitsoq imerajuttuusimasumik ukiuni arlalinni aalakoorsimanngereerluni queruersaatitornermi kingorna aalakoortaqqilersoqartarpoq.“ Imerajuttuusimasumut nipaallisaatit navianartoqartuaannarput. Taamaattumik imerajuttuusimasup nipaallissaatinik pisariaqartitsilluinnarfimmini . . .

1. ulorianaataasinnaasut pillugit nakorsaq juumoorluunniit apersoqqaartariaqarpaa.

2. saaffigisartakkani ilisimatittariaqarlugu, ajornanngippallu, iisilinnginnermini tamatigut oqaloqatigeqqaartariaqarlugu.

3. nakorsaatit iisani naatsorsoqqissaartariaqarpai.

4. nakorsaatitornini sapinngisamik siusinaarluni unitsittariaqarpaa.

5. nakorsaatit iisassani naammatsippata sinneruttut igittariaqarpai.