Neriunnissamut tunngavissaqarpa?

„Aappariinnerluttuni ajornartorsiutit ilagaat aappariit aappariinnermik pitsaanerulernissaanik neriuuteqannginnerat. Taamatut isumaqarneq iliuuseqarnissamut kajumissuseerutsitsisarami allannguinissat tamaasa ajoqusertarpai.“ — DR. AARON T. BECK.

ANNIAATEQARLUTIT nakorsiartutit takorlooriaruk. Inuunerit peqqinnerillu navianartorsiorsinnaammata ernumanerit paasinarpoq. Misissorneqareerlutilli paasivat nappaatit suusupagisassaanngikkaluarluni katsorsarneqarsinnaasoq. Aap, nakorsaq oqarpoq silatusaartumik nerisaruit timigissartarlutillu peqqissilluinnarsinnaasutit. Qularnanngitsumik oqiliallassaqaatit siunnersuutaasalu malinnisaat nangaassutiginagu.

Takorluuineq tamanna sammineqartumut nooriaruk. Aappariinnissinni anniaateqarpit? Aappariinni tamani ilaannikkut ajornartorsiuteqartarpoq isumaqartigiinngittoqartarlunilu. Aappariinnissinni ilaannikkut najummassimanartoqartarnera isumaqanngilaq aappallu asanasi aappariittusi. Taavami sapaatip-akunnerini, qaammatini ukiuniluunniit ajornartorsiuteqartuaannarussi? Taamaappat ilungersunartumik kinguneqarsinnaammat ernumanartoqarpoq. Aappariinnissi qanoq innera inuuninnut qitornavillu inuunerannut sunniuteqarsinnaavoq. Assersuutigalugu isumaqartoqarpoq aappariinnermi ajornartorsiutit ajornartorsiutinut soorlu isumatsarujussuarnermut, suliffimmi naammassisakippallaarnermut meeqqallu atuarfimmi angusakippallaarnerannut pissutaangaarsinnaasut. Tamakkuunngillallu. Kristumiut miserratiginngilaat aapparminnut attaveqarnertik Guutimut attaveqarnerminnut sunniuteqarsinnaasoq. — 1 Pîtruse 3:7.

Aappallu ajornartorsiuteqaraluarlusi neriuutaarutivittariaqanngilatit. Aappariinnerup piviusorsiortumik isiginera — ajornartorsiuteqalernissap akuerinera — aappariit ajornartorsiutiminnik eqqortumik isiginninnissaminnut aaqqiiniarlutillu sulissuteqarnissaminnut iluaqutigisinnaavaat. Angut Isaacimik atilik oqarpoq: „Nalulluinnarsimavara aappariinnermi allanngorartuuneq nalinginnaasoq. Isumaqaraluarpunga uagutsinni ajortoqartoq.“

Allaat aappariit asajunnaarsimagaluartut aappariinnerat annaanneqarsinnaavoq. Aappariinnerlunnerup kingunerisaanik misigissutsikkut ikit soorunami itisinnaapput, ingammik ukiorpassuarni ajornartorsiuteqarsimagaanni. Taamaakkaluartoq neriuutissaqarpoq. Tamatumunnga tunngatillugu kajumissuseqarneq aalajangiisuulluinnarpoq. Inuit marluk aappariinnerminni  ajornartorsiungaaraluartut marluullutik iluarserusulluinnarunikku imminnut attaveqarnertik pitsaanerulertissinnaavaat. *

Aappariinermi ajornartorsiuteqaraanni imminut ima aperisoqarsinnaavoq: „Aappannut ajunngitsumik attaveqaleqqinnissaq qanoq kissaatigitigaara?“ Aappallu aappaariinnersi pitsaanerulertinniarlugu iliuuseqarusussuseqarpisi? Dr. Aaron Beck, siuliani issuarneqartoq, oqarpoq: „Aappariit aappariinermik sanngiissutaat aaqqinniarlugit nakooqutaallu nakussatsinneruniarlugit suleqatigiikkaangata aappaariinnerliornerusorinaraluartut qanoq pitsanngortigisinnaanerat tupaallaatigigajuppara.“ Taavami aappaq suleqataajumanngippat ajornartorsiuteqarneranilluunniit takunnikkusunngippat? Aappaasup aappariinnerminnik pitsaanerulersitsiniarnera iluaqutaava? Ilaana. Dr. Beck oqarpoq: „Illit  allannguinerit aappannik aamma allannguisitsisinnaavoq — tamatumunnga assersuutissarpassuaqarpoq.“

Ilissi taamaalisinnaanasi isummiutiaarpallaaqinagu. Taamatut ajortumik isumaqarneq aappariinnissinnut navianartorsiortitsinerpaasinnaavoq. Arlarsi alloriaqqaartuusariaqarpoq. Illiusinnaava? Allannguisoqarniariartoq immaqa aappaasup takusinnaalissavaa pilluarluni aappariinnissap sulissutigeqatigiinnissaa iluaqutaasoq.

Aappariinneq annaanniarlugu inuttut ataasiakkaatut aappariittulluunniit qanoq iliortoqarsinnaava? Tamatumani Biibili iluaqutaaqaaq. Apeqqut tamanna qanoq akigaa takoriartigu.

[Quppernerup ataani ilanngussaq]