ATUAQQISSAAGASSAQ 40
ERINARSUUT 3 Jehova, neriuffigivatsigit nakuussutigalutillu
Jehovap “katsorsarpai sequmissimasumik uummatillit”
“Katsorsarpai sequmissimasumik uummatillit, ikiilu mattuserlugit.” – TUSS 147:3.
SAMMISAQ
Jehovap misigissutsikkut sequmeqqasut soqutigingaarpai. Allaaserisami matumani aliasuuteqaraangatta qanoq tuppallersartaraatigut allanillu tuppallersaaniassagatta qanoq ikiortaraatigut sammissavarput.
1. Jehovap kiffani qanoq misigissuseqarfigai?
JEHOVAP kiffami qanoq atugaqarnerat maluginiaqqissaartarpaa. Aliasuuteqaraangatta aamma nuannaaraangatta naluneq ajorpaa. (Tuss 37:18) Allaat artornartorsiornitsinni sapinngisatsinnik kiffartoraangatta tulluusimaarutigisarpaatigut. Ikiorlutalu tuppallersarusungaarpaatigut.
2. Jehovap sequmissimasumik uummatillit qanoq ikiortarpai, isumassuineralu qanoq iluaqutigisinnaavarput?
2 Tussiaat 147:3-mi allassimavoq Jehovap sequmissimasumik uummatillit ikii mattusertarai. Tassani Jehova misigissutsikkut anniaateqartunut asannittumik isumassuisutut allaatigineqarpoq. Isumassuinera iluaqutigissagutsigu qanoq iliussaagut? Assersuut una eqqarsaatigiuk: Inuk ajoqusersimasoq ikiorniarlugu nakorsaq pikkorissoq iliuuseqangaarsinnaavoq. Inulli ajoqusersimasoq aamma nammineq iliuuseqartariaqarpoq. Tassa nakorsap ilitsersuussutai maleruaqqissaassavai. Misigissutsikkut naalliuuteqartunut Jehovap oqaatsimini oqariartuutai aamma asannittumik siunnersuutai qanoq maleruarsinnaanerigut allaaserisami matumani sammissavarput.
JEHOVAP PAASITIPPAATIGUT NALEQARTILLUTA
3. Sooq ilaat misigisarpat naleqaratik?
3 Ajoraluartumik inuppassuit asannittuunngillat. Taamaattumik ajortumik pineqartartut kingunerisaanillu naleqanngitsutut misigisut amerlapput. Qatanngut arnaq Helenimik atilik a ima oqarpoq: “Angajoqqaakka asannittuunngillat. Ataataga nakuusertarpoq ullullu tamaasa oqarfigisarlunga naleqanngitsunga.” Immaqa illit Helenitut ajortumik pineqartarsimavutit, isornartorsiorneqartarsimavutit imaluunniit asaneqanngitsutut misigitinneqartarlutit. Taamaappat immaqa upperiuminaatsissinnaavat allanit asaneqarsinnaallutit.
4. Jehovap qanoq neriorsoqqissaarpaatigut? (Tussiaat 34:19)
4 Allanit ajortumik pineqartarsimagaluaruilluunniit qularissanngilat Jehovap asallutillu naleqartikkaatit. Jehovap “qanippai sequmissimasumik uummatillit”. (Tussiaat 34:19 atuaruk). Naleqanngitsutut misigiguit eqqaamajuk Jehovap uummammiutit takullugit imminut qanillisikkaatit. (Joh 6:44) Asangaaramisit ikiuinissaminut piareersimajuaannarpoq.
5. Jiisusip inunnik allanit nikagineqartunik pinnittarnera qanoq ilinniarfigisinnaavarput?
5 Jiisusip maligassiaata eqqarsaatigineratigut Jehovap misigissusii pillugit ilinniarsinnaavugut. Nunarsuarmiikkallarami Jiisusip inuit allanit nikagineqartut maluginiartarpai, misiginneqatigalugillu inussiarnersumik pisarlugit. (Mat 9:9-12) Arnap anniaatigeqisaminik nappaatillip ajorunnaarnissani kissaatigalugu Jiisusip qallersaataa attoramiuk uppernini pillugu Jiisusimit nersualaarneqarpoq. (Mak 5:25-34) Jiisusi angusisarluinnarmat qularissanngilat taassuma arnamik pinninneratulli Jehovap illit pissagaatit. (Joh 14:9) Jehovap pingaartillutillu pissuserisatit ajunngitsut, ilaatigut uppernerit taassumunngalu asanninnerit, maluginiartarpai.
6. Naleqanngitsutut misigiguit qanoq iliorsinnaavit?
6 Naleqanngitsutut misigineq qaffakaakkiartuleraangat qanoq iliorsinnaavit? Allassimaffiit Biibilimeersut Jehovamit naleqartinneqarninnik ersersitsisut atuartakkit eqqarsaatigeqqissaarlugillu. b (Tuss 94:19) Allanut naleqqiuteqinak, iliuuserisinnaanngisatillu eqqarsaatinni initutinnaveersaakkit. Jehovap artukkannik piumaffiginavianngilaatit. (Tuss 103:13, 14) Atornerlunneqarsimaguit nakuuserfigineqarsimaguilluunniit imminut pisuutissanngilatit. Illit pisuunngilatit! Eqqaamajuk Jehovap ajortuliorsimasut akisussaatittussaammagit ajortumilli pineqarsimasut ikiorumaarmagit. (Pet 1. 3:12) Sandra, meeraalluni ajortorujussuarmik pineqarsimasoq, ima oqarpoq: “Jehovatulli imminut isiginnittaaseqaqqullunga, tassa ajunngitsortannik takunnissinnaaqqullunga, qinusarpunga.”
7. Misigisimasagut qanoq Jehovamut kiffartornitsinni atorluarsinnaavagut?
7 Jehovap illit allanik ikiuisussatut atorsinnaagaatit qularinngisaannaruk. Pingaartillutillu oqaluussinermi suleqatigisamisut isigaatit. (Kor 1. 3:9) Inuuninni artornartunik misigisaqarsimaguit ilimanarpoq naalliuuteqartut misiginneqatigalugit paasilluarsinnaagitit. Ikiorniarlugit iliuuseqangaarsinnaavutit. Helen, eqqaariigarput, ikiorneqarpoq maannalu nammineq allanik ikiuisinnaalluni. Ima oqarpoq: “Siornatigut naleqanngitsutut misigaanga. Jehovalli paasitippaanga asaneqartunga allanillu ikiuinissamut atorsinnaallunga.” Helenip pioneritut kiffartornini nuannaarutigaa.
JEHOVAP KISSAATIGAA ISUMAKKEERFIGINNINNINI AKUERISSAGIPPUT
8. Esaja 1:18-imi Jehovap qanoq paasitippaatigut? (Quppernerup ataani ilanngussat takukkit).
8 Jehovamut kiffartortut ilaat siornatigut, imermut morsutsinneqarnermik siorna kingornaluunniit, ajortuliarisimasatik pillugit artorsangaarput. Taamatut misigiguit eqqaamajuk Jehovap uagutsinnik asanningaarnini pissutigalugu ernini akiliutigalugu utertikkaatigut. Qularissanngilarput kissaatigigaa tunissut tamanna akuerissagipput. Jehovap paasitippaatigut ‘akunnitsinni aaqqitassat aaqqikkutsigit’ c isumakkeerfigilluinnassalluta. (Esaja 1:18, New World Translation, atuaruk). d Ataatatta asannittup Jehovap ajortuliarisimasagut eqqaamajunnaartarmagit qujamasuutigeqaarput! Ajunngitsuliornigullu puiunngisaannarpai. – Tuss 103:9, 12; Hebr 6:10.
9. Sooq ajortuliarisimasagut eqqarsaatigiuassanngilagut?
9 Ajortuliarisimasatit pillugit artorsaruit maannakkut siunissamilu iliuuserisinnaasatit eqqarsaatigineruniartakkit. Tamatumunnga tunngatillugu apustili Paulusi maligassaalluarpoq. Peqqarniilluni kristumiunik malersuisimanini peqqissimissutigaa, nalunngilaalu Jehovamit isumakkeerfigineqarsimalluni. (Tim 1. 1:12-15) Taava ajortuliarisimasani eqqarsaatigiuarpai? Qularnanngitsumik taamaaliornaveersaartarpoq, soorlu farisiiarinngorumalluni iliuuserisimasani eqqarsaatigiuanngikkai. (Flp 3:4-8, 13-15) Jehovamut kiffartornini aalluppaa siunissarlu qilanaaralugu. Paulusitut pisimasut allanngortissinnaanngilatit. Maannakkulli Jehova ataqqiniarlugu iliuuseqarsinnaavutit siunissarlu pillugu neriorsuutaasa eqquunnissaat qilanaaralugit.
10. Allat anniaatigisaannik siornatigut iliuuseqarsimagutta susinnaavugut?
10 Allat anniaatigisaannik siornatigut iliuuseqarsimaguit immaqa artorsarputit. Suna iluaqutaasinnaava? Aaqqiiniarlutit sapinngisannik iliuuseqarit, aamma aliasutsitatit ajuusaarninnik paasitillugillu ersersitsivigikkit. (Kor 2. 7:11) Jehova qinnuigiuk ikioqqullugit. Taassumami tamassi kiffartortuarsinnaaqqullusi eqqissisissinnaallusilu ikiorsinnaammasi.
11. Pruffiiti Juuna qanoq ilinniarfigisinnaavarput? (Aamma asseq takuuk).
11 Kukkussutigisimasatit ilinniutigisakkit qanorluunniillu Jehovamit suliassinneqarnissannut piumassuseqarlutit. Pruffiiti Juuna eqqarsaatigiuk. Guutip peqqussutigisaatut iliornani kangianut Niinivimut aallarnani kitaanut Tarshishimut qimaavoq. Jehovap oqaaqqissaarmani Juunap kukkussutigisani ilinniutigaa. (Jon 1:1-4, 15–2:1, 8-11) Jehovap Juuna atorsinnaanngitsutut isiginagu oqarfigeqqippaa Niinivimukassasoq, Juunalu ingerlaannaq naalappoq. Peqqissimissutigisaminik kukkussutigisimasani Jehovamit suliassinneqaqqinnissamut akornutaasutut isiginngilaa. – Jon 3:1-3.
Jehovap Juuna aalisagarujussuup iluaniit aniguisereerlugu Niinivimut tusarliussassani nalunaarutigiartoqqullugu aallarteqqippaa (Immikkoortoq 11 takuuk)
JEHOVAP ANERSAAQ ILLERNARTOQ ATORLUGU TUPPALLERSARTARPAATIGUT
12. Kingunerluutigisatsinnik pineqarsimanitsinni annaasaqarsimanitsinnilu Jehovap qanoq eqqissinermik tunisarpaatigut? (Filippimiut 4:6, 7)
12 Kingunerluutigisatsinnik pineqarsimanitsinni toqukkulluunniit annaasaqarsimanitsinni Jehovap anersaani illernartoq atorlugu tuppallersartarpaatigut. Ronip Carolillu tamanna misigaat. Alianaqisumik ernerat imminut toquppoq. Ima oqarput: “Ernitta toquneranit artornarnerusumik misigisaqarsimanngilagut. Unnuakkut sinissaaruttarpugut, Jehovamulli qinugaangatta eqqissineq Filippimiut 4:6, 7-milu allaatigineqartoq misigisarparput.” (Atuakkit). Illit ajorluinnartumik nalaataqarnerit pissutigalugu aliasungaaruit uummammiutit tamaasa Jehovamut aniatissinnaavatit. Qaqugukkulluunniit qanorluunniillu sivisutigisumik qinusinnaavutit. (Tuss 86:3; 88:2) Anersaamik illernartumik tuneqqullutit kimigiiserlutit Jehova qinnuigisaruk. Qinnutitit tusarnaartuassavai ikiorlutillu. – Luk 11:9-13.
13. Jehovamut kiffartortuarnissatsinnut anersaaq illernartoq qanoq iluaqutigisinnaavarput? (Efesossimiut 3:16)
13 Artornartorsiornerit pissutigalugu sumulluunniit nukissaaruttutut misigivit? Jehova kiffartorfigiuarniassagakku anersaamit illernartumit nakussatsinneqarsinnaavutit. (Efesossimiut 3:16 atuaruk). Qatanngut arnaq Floramik atilik uinilu oqaluussisartutut aallartitatut kiffartortillutik uia allasiorpoq, avippullu. Taamani misigissutsini pillugit ima oqaluttuarpoq: “Uima allasiornera pissutigalugu anniarnera eqqarsaatigiinnaavippara. Naammagalugu atorsinnaaqqullugu anersaamik illernartumik tuneqqullunga Jehovamut qinuvunga. Jehovamit tuppallersarneqarama nakussatsinneqarpunga, qaangiisinnaanngitsutut misigigaluarlunga Jehovamit ikiorneqarama naammagalugu atorsinnaavara.” Flora misigivoq Jehovamit ikiorneqarami taassuminnga tatiginninnerulersimalluni, qularinngilaalu misilinneqarnerni qanorluunniit ittuni ikiussagaani. Ima nangippoq: “Jehovamit ikiorneqarama Tussiaat 119:32-mi allassimasut uku isumaqatigaakka: ‘Aqqut atuaqqusat arpaffigissavara, uummatiga aniguisikkakku.’”
14. Guutip anersaavanit qanoq sunnertissinnaavugut?
14 Anersaamik illernartumik tuneqqullutit Jehova qinnuigereerukku qanoq iliussavit? Taassuma anersaavanik tunineqarnerujumallutit anersaakkut ittunik sammisaqartarit. Iliuuserisinnaasavit ilaat tassaapput ataatsimiigiartarneq oqaluusseqataanerlu. Ullut tamaasa Biibilimik atuartaruit Jehovap eqqarsaatai eqqarsaatigeqqissaarsinnaavatit. (Flp 4:8, 9) Atuarninni maluginiartaruk Biibilimi oqaluttuarineqartut qanoq ajornartorsiortarnersut eqqarsaatigeqqissaartarlugulu Jehovamit qanoq ikiorneqartarnersut. Sandra, eqqaariigarput, inuunermini erloqinartorsiortoq ima oqarpoq: “Juuserfimik oqaluttuaq nakussatsissutigeqaara. Taanna misilinneqartaraluarluni ajortumillu pineqartaraluarluni Jehovamut attaveqarluartuarpoq.” – Mos 1. 39:21-23.
JEHOVAP UPPEQATIGUT AQQUTIGALUGIT TUPPALLERSARTARPAATIGUT
15. Kikkut tuppallersarsinnaavaatigut, aamma qanoq ikiorsinnaavaatigut? (Aamma asseq takuuk).
15 Naalliuuteqaraangatta uppeqatigut tuppallersaataangaarsinnaapput. (Kol 4:11) Aap, Jehovap uagutsinnik asanninneranut ilumut uppernarsaataapput. Peqatigaluta tuppallersarsinnaavaatigut misiginneqataallutik tusarnaarnikkut. Allassimaffimmik tuppallernartumik atuffassinnaavaatigut qinoqatigalutalu. e (Rom 15:4) Ilaannikkut uppeqatitta Jehovap eqqarsartaasianik eqqaasissinnaavaatigut taamaalillutillu eqqissisimanissatsinnut ikiorluta. Aamma ikiuuttarsinnaapput, soorlu aliasunnitsinni nerisassiuulluta.
Ikinngutit Jehovamik asannittut tatiginartullu tuppallersaasinnaapput ikiuillutillu (Immikkoortoq 15 takuuk)
16. Allanit ikiorneqarumalluta susariaqarsinnaavugut?
16 Imaassinnaavoq ikioqqusariaqartugut. Qatanngutitta asavaatigut ikiorusullutalu. (Uss 17:17) Immaqali naluaat qanorpiaq misiginersugut imaluunniit sunik pisariaqartitaqarnersugut. (Uss 14:10) Misigissutsikkut naalliuuteqaruit ikinngutaalluartut oqaloqatigisinnaavatit qanorlu misiginerlutit oqaluttuullugit. Suut iluaqutigisinnaanerlugit paasitikkit. Aamma utoqqaanertanik attaveqarfigilluakkannik oqaloqateqarsinnaavutit. Qatanngutit arnat ilaasa uppeqammik arnamik inersimalluartumik oqaloqateqartarnertik tuppallersaatigisimavaat.
17. Suut pissutigalugit qiimmassarneqanngitsoorsinnaavugut, aamma qanoq iliorsinnaavugut?
17 Uppeqativit peqatigisarnissaat pingaaruteqarpoq. Misigissutsikkut naalliuuteqarninni immaqa allat peqatigisarnissaannut kajumissuseqanngilatit. Ilaannikkut uppeqativit paatsoorsinnavaatsit ajuallannartumilluunniit oqaaseqartoortarlutik. (Jaak 3:2) Taakkunanngali immikkoorniarnaveersaarit. Jehovammi taakku aqqutigalugit qiimmassarsinnaavaatit. Gavin, utoqqaanertaasoq isumatsaqqarujussuarnermik nappaateqartoq, ima oqarpoq: “Amerlanertigut ikinngutima oqaloqatigisarnissaannut peqatigisarnissaannullu kajumissuseqarneq ajorpunga.” Gavinilli misigissutsiminit aqunneqaannarnani uppeqatimi peqatigisarnerat iluaqutigisarpaa. Qatanngut Amymik atilik ima oqarpoq: “Misigisimasakka pissutigalugit inuit tatiginissaat sapernartittarpara. Jehovali ilaarniarpara uppeqatimalu tatiginissaat asanissaallu ilinniarlugu. Nalunngilara tamanna Jehovap nuannaarutigisaraa uangalu nammineq nuannaalissutigisarlugu.”
JEHOVAP NERIORSUUTAI TUPPALLERSAATIGISINNAAVAGUT
18. Sooq siunissaq isumalluarfigisinnaavarput, maannalu qanoq iliorsinnaavugut?
18 Siunissaq isumalluarfigisinnaavarput Jehovap ungasinngitsukkut timikkut misigissutsikkullu anniaatigut tamaasa atuukkunnaarsissammagit. (Saqq 21:3, 4) Taamanikkussamut naalliuutigisimasagut tamarmik eqqaamaneerutissapput. (Es 65:17) Aamma sammeriikkatsitut Jehovap maanna isumassorluta ‘ikigut mattusertarpai’. Tuppallersarniarlutit ikiuisarnera iluaqutigisaruk. Qularinngisaannassavat isumassoraatit! – Pet 1. 5:7.
ERINARSUUT 7 Jehova, nakuussuterput
a Atit allanngortitaapput.
b Ungalusaq “ Jehovap illit naleqartingaarpaatit” takuuk.
c Jehovalu ‘akunnitsinni aaqqitassat aaqqikkumallugit’ peqqissiminerput ersersissavarput, tassa ajortuliagut pillugit isumakkeerfigeqqulluta qinnuigissavarput, iliuutsitsinnillu allannguilluta. Ingasattumik ajortuliorsimagutta aamma utoqqaanertanut ikiortissarsiortariaqarpugut. – Jaak 5:14, 15.
d Esaja 1:18, New World Translation: “‘Qaa, qaagitsi, akunnitsinni aaqqitassat aaqqitsigit,’ oqarpoq Jehova. ‘Ajortuliasi aappallarissutut ikkaluarunik, aputitut qaqorsagaassapput; aappallarissaatitut aappalutsigigaluarunik, savat meqquisut ilissapput.’”
e Assersuutigalugu Biibili inuuninni iluaqutigiuk-mi allassimaffiit sammisat ukua ataaniittut takukkit: “Isumakulunneq” aamma “Tuppallersaat”.
