Najoqqutassat iluaqutaasut
Inuit millionillit inuunermi sisamatigut Biibili iluaqutigisimavaat.
1. Aappariinneq
Inuit aappariinnermut aappariilluarumallunilu qanoq iliortoqartariaqarnera pillugu assigiinngitsunik isiginnittaaseqarput.
BIIBILIMI ALLASSIMAVOQ: “Uiusullu kialuunniit imminut asanermisut nuliani asassavaa, nuliaasullu uini ataqqingaassavaa.” – Efesossimiut 5:33.
ISUMAA: Aappariinneq Guutip pilersitarigamiuk nalunngilaa aappariit qanoq pillualersinnaanersut. (Makkorsi 10:6-9) Aappariittut pillualertoqartarpoq aappaasut tamarmik immikkut tunniussaqarnissartik pingaarnerutikkaangamikku, namminneq iluaqutissarsinissartik pinnagu. Uiusup nuliaminik asannittup nuliani isumassorluartarpaa inussiarnersumillu pisarlugu. Nuliaasullu uiminik ataqqinnittup uini tapersersortarpaa inussiarnersumillu oqaluuttarlugu.
BIIBILIMI SIUNNERSUUTIT ILUAQUTAAPPUT: Quang aamma Thi, Vietnamimeersut, misigipput aappariittut pilluaratik. Quang inussiarniikkajuppoq. Ima oqaluttuarpoq: “Nuliama misigissusii soqutiginngilakka nikassartarlugulu.” Thi avikkusuppoq. Ima oqarpoq: “Misigivunga uiga tatigisinnaajunnaarlugulu ataqqisinnaajunnaarlugu.”
Quang aamma Thi Biibili pillugu ilinnialeramik Efesossimiut 5:33-mi allassimasunik aappariinnerminni maleruaalerput. Quang oqarpoq: “Versi taanna iluaqutigalugu paasilerpara inussiarnersuusariaqarlunga Thilu pigisatigut, timikkut misigissutsikkullu isumassorneqartutut asaneqartutullu misigitittariaqarlugu. Taamatullu pigaangakku asanerulerlungalu ataqqinerulertarpaanga.” Thi oqarpoq: “Efesossimiut 5:33-mi allassimasutut uiga ataqqinerujartortillugu uima asaneqartutut toqqissisimasutullu misiginerulersittarpaanga.”
Aappariinneq pillugu siunnersuutit Iteritsi! nr. 2 2018-imoortumi “Ilaqutariit iluaqutissaat aqqaneq-marluk” jw.org-imiittumi atuarsinnaavatit.
2. Allanut qanoq pinnittarneq
Inuit ilaasa allat amiisa qalipaataat, sumiuunerat, isikkuat, upperisaat suiaqatiminnoortuunerallu pillugit ajortumik pisarpaat.
BIIBILIMI ALLASSIMAVOQ: “Inuit tamalaat ataqqisigit.” – Petrusimit 1. 2:17.
ISUMAA: Suiaassuseqatiminnik atoqateqartartunik allamiunillu uumissuineq Biibilimi akuersaarneqanngilaq. Kajumissaarutigineqarporli inuit tamaasa sumiuugaluarpataluunniit, pissakippata pisuujugaluarpataluunniit, ataqqisassagigut. (Apustilit Suliaat 10:34) Upperisaannut iliuusiinullu isumaqataanngikkaluaruttaluunniit inussiarnisaarfigalugillu ataqqinnittuliorfigisinnaavagut. – Matiusi 7:12.
BIIBILIMI SIUNNERSUUTIT ILUAQUTAAPPUT: Daniel ilinniartinneqarsimavoq inuit Asiameersut nunaminik navianartorsiortitsisuusut. Asiameersunik tamanik uumissuilerpoq taakkulu inuppassuit tusaatillugit akerartortarlugit. Daniel oqarpoq: “Isumaqarpunga taamaaliortarnikkut nunaga tapersersorlugu. Eqqarsartaasera iliuutsikkalu ajortutut isiginngilakkaluunniit.”
Daniel Biibilimik misissuisalerpoq. Ima oqarpoq: “Paasivara eqqarsartaasera allanngortilluinnartariaqarlugu. Inuit Guutip isiginninneratut isigisariaqalerpakka – taassumami isaani sumiuugaluaruttaluunniit tamatta assigiippugut.” Daniel inuit naapikkaangamigit qanoq misigisarnerluni oqaluttuarpoq: “Suminngaanneerneriluunniit eqqarsaatigineq ajorpakka. Maanna inuit sumiuugaluartulluunniit asavakka nunanillu assigiinngitsorpassuarneersunik qanimut ikinnguteqarlunga.”
Paasisaqarnerujumallutit Napasuliaq Alapernaarsuiffik nr. 1 2022-moortoq “Uumissuinermik unitsitsineq” jw.org-imiittoq atuarsinnaavat.
3. Aningaasat
Inuppassuit pillualerumallutik siunissartillu eqqarsaatigalugu pisuunngorniarsarisarput.
BIIBILIMI ALLASSIMAVOQ: “Ilisimassusermik sernissorteqarneq pisuussutinillu sernissorteqarneq assigiiginnarput, ilisimassutsip pitsaaqutigiinnarpaa ilisimassuseqartoq inuutittaramiuk.” – Oqaluussisartup oqaasii 7:12, Testamentitoqaq 1990-imi naqitigaq.
ISUMAA: Aningaasaateqartariaqartarpugut, aningaasalli pilluarnissamut siunissarissaarnissamullu qulakkeerutaanngillat. (Ussatit 18:11; 23:4, 5) Ilisimassuseq Guutimeersoq Biibilimiittoq maleruaraanni aatsaat pillualivittoqarsinnaavoq siunissarlu isumannaarneqarsinnaalluni. – Timuutiusimut 1. 6:17-19.
BIIBILIMI SIUNNERSUUTIT ILUAQUTAAPPUT: Cardop, Indonesiamiup, pigissaarnissani pingaartippaa. Ima oqarpoq: “Inuit amerlanersaasa pigerusuttagaannik peqarpunga. Angalasinnaavunga inuulluarniutinillu assigiinngitsunik, biilinik illunillu pisiortorsinnaallunga.” Taamatulli pigissaarnera sivisunngilaq. Ima oqaluttuarpoq: “Peqquserluttuliorfigineqarpunga, ukiorpassuarnilu suleruloorlunga aningaasaatigilersimasakka imaaliallaannaq annaavakka. Misigaanga inuunera atulussinnarsimallugu, suuteqannginnama suunngitsutullu misigigama.”
Cardo aningaasat pillugit Biibilimi siunnersuutinik maleruaalerpoq. Nukini tamaasa aningaasarsiornermut atorunnaarlugit pigisani naammagalugit inuulerpoq. Ima oqarpoq: “Maanna Guuti qanimut attaveqarfigigakku pisoorsuartut misigaanga. Unnuit tamaasa sinilluarsinnaavunga, pilluaqaanga.”
Aningaasanut isiginnittaatsimut tunngatillugu Biibilimi allassimasut pillugit paasisaqarnerujumallutit allaaserisaq “Naammaginninneq tukkortuunerlu” Iteritsi! nr. 1 2018-imoortumiittoq jw.org-imi atuarsinnaavat.
4. Atoqatigiinneq
Inuit atoqateqarnermut atatillugu akuerineqarsinnaasutut isigisaat assigiinngitsorpassuupput.
BIIBILIMI ALLASSIMAVOQ: “Atoqatigiinnikkut eqqunngitsuliorneq [itigartissavarsi]. Tamassi immikkut illernartumik ataqqinartumillu inuusinnaaqqullusi nalunngittariaqarparsi timersi qanoq aqussinnaanerlugu. Guutimik ilisarisimanninngitsut piumatuut aqussinnaanngisaminnik atoqateqarusussuseqartartut assigeqinasigit.” – Tessaluunikamiunut 1. 4:3-5.
ISUMAA: Kinguaassiuutitigut pilerissutsitsinnik qanoq ersersitsisinnaanitsinnut tunngatillugu Biibili killiliissuteqarpoq. Allasiorneq, atortittarneq, katissimanngitsut atoqatigiinnerat, anguteqammik arnaqammilluunniit atoqateqarneq uumasunillu atoqateqarneq Biibilimi ‘atoqatigiinnikkut eqqunngitsuliornermut’ tunngatinneqarput. (Korintimiunut 1. 6:9, 10) Atoqatigiissinnaaneq Guutimit tunissutaavoq taamaallaat angummut arnamullu katissimallutik aappariittunut naatsorsuussaasoq. – Ussatit 5:18, 19.
BIIBILIMI SIUNNERSUUTIT ILUAQUTAAPPUT: Arnaq Australiamiu Kyliemik atilik ima oqaluttuarpoq: “Ueqanngikkallarama isumaqartarpunga atoqateqaruma asaneqartutut misigilissallunga toqqissisimalissasungalu. Toqqissisimanngitsutulli asaneqanngitsutullu misigisarpunga.”
Kyliep Biibilimi atoqatigiinneq pillugu allassimasut paasigamigit malerualerpai. Ima oqarpoq: “Paasivara Guutip najoqqutassiai naalliuuteqaqqunata illersuutaasut. Jehovap peqqusineratut iliortalerpunga, maannalu uima toqqissisimasutut asaneqartutullu misigitittarpaanga. Biibilimi najoqqutassianik maleruaanikkut aliasuutissarpassuaraluakka pinngitsoortippakka!”
Paasisaqarnerujumallutit allaaserisaq “Katissimanani inooqatigiinneq pillugu Biibilimi qanoq allassimasoqarpa?” jw.org-imiittoq atuarsinnaavat.
Pinngortitsisitta eqqortut eqqunngitsullu pillugit paasitikkusuppaatigut. Taassuma najoqqutassiaanik maleruaaneq ajornaatsuaannanngikkaluartoq imminut akilersinnaavoq. Tamatigut pillualissutaasarpoq.
