Misigisat Tuluit Nunaanneersut neriuttuarnissannut iluaqutigissavatit. Aamma paasissavat sallusuissummik suli aalajangiussisimanngitsut ikiorniarlugit “nerisassaatitit imaanut” qanoq igissinnaagitillusooq. — Oqal 11:1.

Pingaarutillit ilagaat illit nikallujuinnissat. Sallusuissutip aalajangiusimanissaa Jehovamullu qanittumik attaveqarnissat pisariaqartippatit. (5 Mos 10:20) Georgina taamaaliorpoq. 1970-imi Jehovap Nalunaajaasuinit Biibilimik atuaqqissaaqatigineqartalermat uia Kyriacos kamattorujussuuvoq. Atuaqqissaartarunnaarsinniaraluarpaa. Jehovap Nalunaajaasunik illuminnut iseqqusisarnanilu taakkua atuagassiaataat nanisinnaasani tamaasa igittarpai.

Georgina ilagiit ataatsimiinnerinut najuuttalermat Kyriacos suli kamannerulerpoq. Ullut ilaanni naalagaaffilersaarfiliarpoq oqqassiartorluni. Qatanngutip arnap paasigamiuk Kyriacos grækerit oqaasii tuluttuuminngarnit sapinnginnerugai qatanngut grækereq ilagiinni allaneersoq sianerfigaa ikioriartoqqullutik. Kyriacosip qatanngutinit inussiarnisaarfigineqarnini iluaraa, allaallu qaammatialunni Biibilimik atuaqqissaaqatigineqarluni. Atuaqqissaartarunnaarporli.

Suli ukiuni pingasuni Georgina akerlilersorneqarpoq. Kyriacos oqarpoq qaquguluunniit kuisissagaluarpat qimakkumallugu. Ullormi kuisiffigisamini Georgina Jehovamut qamannga pisumik qinuvoq Kyriacosip qimassanngikkaani. Nalunaajaasut Georginamik aallertut takkummata Kyriacosip ima oqarfigai: “Siulliuniaritsi, malinnaassaagut.” Ataatsimeersuarnerup ullaap tungaa najuuffigaa nulianilu kuisittoq takullugu!

Tamatuma kingorna Kyriacos akerlilersuivallaarunnaarpoq pingaarutilinnillu allannguiartuaarluni. Georginap nalunaajaasunik naapitseqqaarnermi kingorna ukiut 40-ngajaat qaangiuttut uini kuisittoq takuaa! Kyriacosip suna iluaqutigisimavaa? Ima oqarpoq: “Georginap taama aalajangiusimannissimatiginera nuannaarutigeqaara.” Georgina ima oqarpoq: “Uiga akerlilersuigaluartoq Guutiga pallorfigiunnaarnianngilara. Ukiuni taakkunani Jehovamut qinujuartillunga neriuutaarutinngisaannarpunga.”

Aappappit iluaqutigisinnaasa alla tassaavoq illit kristumiutut pissuserineqartussanik ineriartortitsinerit. Apustilip Petrusip nuliaasut kristumiut ima oqaaqqissaarpai: “Uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit.” (1 Petr 3:1) Christinep siunnersuut tamanna maleruartuarpaa ukiorpassuillu aatsaat qaangiuttut uini ilataaralugu. Ukiut 20-nit amerlanerusut matuma siorna Christine nalunaajaasunngormat uia John misigivoq Guuti inuunermini pisariaqartinnagu. John upperisarsiornermut akuliukkusunngilaq, takusinnaasimavaali Christinep upperilikkani qanoq pingaartitsigigaa. “Takusinnaavara pillualissutigigaa,” John oqarpoq. “Aalajaalluinnartumik pissuseqarneq tatiginartuunerlu ineriartortippai tamannalu pissutsini ajornakusoorfiusuni iluaqutigisarpara.”

Christinep upperisani uiminut pinngitsaaliissutiginngisaannarpaa, uialu ima nassuerpoq: “Christinep nalunngilaa upperisani pillugu oqaluttuutinngikkuninga pitsaanerusoq, uanga aalajangiisuutillunga isumagalu naapertorlugu ilikkagaqariartorninni erinitsajuippoq.” Christine Napasuliaq Alapernaarsuiffik-mi aamma Vågn op!-imi Johnip soqutigisinnaasaanik, soorlu ilisimatuussutsimut pinngortitarsuarmullu tunngasunik, allaaserisanik takusaqaraangami taakku Johnimut takutittarpai ima oqarluni: “Allaaserisaq una nuannarissagunarpat.”

John soraarninngorami naatsiivilerisalerpoq. Inuunermi apeqqutinik pingaarutilinnik eqqarsaatiginninnissamut piffissaqarnerulerami makku eqqarsaatigisalerpai: ‘Nalaatsornerinnakkut pisut pissutigalugit maaniilerpugut, siunertaqartumilluunniit pinngortitaavugut?’ Ullut ilaanni nalunaajaasup John oqaloqatigitillugu ima aperaa: “Atuaqqissaartalerusuppit?” “Akuersivunga,” John oqarpoq: “Maannami Guuti upperaara.”

Christinep neriuutaarutinngisaannarnerata pingaaruteqassusia! Taassuma ukiuni 20-ni Johnip sallusuissummik ilassinninnissaa qinnutigisareeraa John kuisippoq. Maanna aallussilluarlutik Jehovamut kiffartoqatigiipput. John ima oqarpoq: “Ingammik marluk pissutigalugit ilataarineqarpunga — nalunaajaasut inussiarnersuunerat ikinngutinnersuunerallu. Aamma Jehovap Nalunaajaasuisa ilaannik aappaqaruit ilumoorfiginnittumik, tatiginartumik namminissarsiortuunngitsumillu aappaqarputit.” Aap, Petrusip allagai siulliit 3:1-imi allassimasoq Christinep maleruarpaa taamaaliorneralu iluaqutaavoq!

Biibilimimmi atuaqqissaartartut arlaannik pissuteqarlutik soqutiginnikkunnaarsimasut? Kunngi Salomo ima allappoq: “Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.” (Oqal 11:6) Ilaannikkut sallusuissutip naatsiiassartai ukiorpassuit qaangiukkaangata aatsaat naajartulertarput. Taamaakkaluartoq piffissap ingerlanerani Guutimut qanillinissap pingaaruteqassusia siaruarteriffigisap paasilersinnaassavaa. (Jaak 4:8) Aap, immaqa ullut ilaanni qujasarneqassaatit.

Eqqarsaatigeriartigu Alice Indiamiit Tuluit Nunaannut nuuttoq. 1974-imi Biibilimik atuaqqissaaqatigineqartalerpoq. Hindisut oqaluppoq tuluttulli pikkorinnerulerusulluni. Ukiualunni atuaqqissaaqatigineqartarpoq ilagiillu tuluttut oqaluttut ataatsimiinneri marlussuit najuuffigalugit. Nalunngilaa ilikkakkani sallusuissutaasoq aliikkutariinnarpaali. Aammami aningaasat soqutigineruai festerumatoqalunilu. Atuaqqissaartarunnaarporlu.

Ukiut 30-ngajaat qaangiuttut Stella, Alicemik atuaqqissaaqatiginnittarsimasoq, taassumannga allagarsivoq. Allakkat imaapput: “1974-imi Biibilimik atuaqqissaaqatigisartakkat qanittukkut ataatsimeersuarnermi kuisittoq tusassallugu killitsissutigissagit qularutiginngilara. Uanga inuuninnut pingaaruteqarsimaqaatit. Sallusuissutip naatsiiassartaa uanni siaruarterpat, Guutimut tunniulluinnarnissannut piareersimanngikkaluarlunga sallusuissutip naatsiiassartaa isumanni uummatinnilu toqqortaraakka.”

Susoqarami? Alice nassuiaavoq 1997-imi uimi toqunerata kingorna nikallorujussuarluni. Guutimut qinuvoq. Minutsit qulit qaangiuttut Jehovap Nalunaajaasuisa ilaat Punjabisut oqaluttut marluk kasuttorput naqitaararlu Asasatsinnut toqungasunut sumik neriuutissaqarpa? tunniullugu. Alice misigivoq qinnutini tusarneqartoq aalajangerporlu Jehovap Nalunaajaasui peqatigisalerniarlugit. Sumiippalli? Qaammatisiutitoqqat ilagiit Punjabisut oqaluttut naalagaaffilersaarfiisa sumiinnerannik allassimasortalik Stellap tunniussai nassaarai. Alice ataatsimiigiarpoq qatanngutinillu Punjabisut oqaluttunit ilassilluarneqarluni. “Angerlareeraluarlunga asanninnerat misigisimajuarpara nikallorujussuaqqaninni oqiliallaatigaara,” Alice oqarpoq.

Aalajangersimasumik ataatsimiigiartalerpoq Biibilimillu atuaqqissaaqatigineqaqqittalerluni Punjabisullu oqalunneq atuarnerlu ilikkarluarlugit. 2003-mi kuisippoq. Stellamut allakkani ima naggaserpai: “Qujanarujussuaq ukiut 29-t matuma siorna naatsiiassanik ikkussuigavit uannullu maligassiuilluaravit.”

“Qujanarujussuaq ukiut 29-t matuma siorna naatsiiassanik ikkussuigavit uannullu maligassiuilluaravit.” — Alice

Misigisat taakku qanoq ilinniarfigisinnaavavut? Ilimagisannit piaartiginngikkaluartoq inuup anersaakkut kaattup, assuarnaatsup maniguuttullu uummataani sallusuissut Jehovap ineriartortikkumaarpaa. Jiisusip assersuusiaa una eqqarsaatigiuk: ‘Karrit naajartorput alliartorlutillu, naluaali qanoq pisut. Nuna imminik inerititaqarpoq — siullermik kanaartamik, taava karrertaqarfimmik taavalu karrertaqarfimmi karrertanik inerissimasunik.’ (Mark 4:27, 28) Taama inerititaqarneq “imminik” ineriartornikkullu pisarpoq. Guutip naalagaaffianik oqaluussisartut naluaat ineriartorneq tamanna qanoq pisarnersoq. Taamaattumik naammattorsuarmik siaruarterigit. Taava naammattorsuarmik katersuissaatit.

Aamma qinunerup pingaaruteqarnera puioqinagu. Georgina Christinelu Jehovamut qinujuarput. ‘Qinuninni qasusuikkuit’ neriuttuaruillu “nerisassaatitit” imaanut siaruartikkatit “kingunersuarilerpagu” nassaarisinnaassavatit. — Rom 12:12; Oqal 11:1.