1, 2. Jehovap qilammi nunarsuarmilu peqatigiissortai pillugit takorruukkat sunissamut kajumississutigaavut?

NUANNERPOQ eqqarsaatigalugu qilammi nunarsuarmilu peqatigiissortarujussuarnut ilaanerput. Takorruukkani Ezekielip Allagaani kapitali 1-imi aamma Danielimik Allakkani kapitali 7-imi allassimasuni Jehovap siunertani naammassiniarlugu suliuarnera nuannersumik allaatigineqarpoq. Jiisusip peqatigiissortat ilaat nunarsuarmiittoq siulersorlugu oqaluussinermik aallussilluarnissaanut oqaluussisartullu anersaakkut pisariaqartitaannik pilersuinissaanut aamma pallorfiginninnermik ilumoortumik siuarsaanissaanut ikiorpaa. Tamanna Jehovap peqatigiissortaanik tatiginninnissatsinnut kajumississutigaarput. — Matt 24:45.

² Jehovap peqatigiissortaasa maligassiuinerat Guutimut kiffartornermi ulapputeqartarnikkut malippiuk? Imaluunniit aallussilluarpiarunnaariartulertutut misigivit? Kristumiut ilaat ukiuni hundredelinni siullerni taamatut misigisimapput. Jiisusip aallussilluarnermigut maligassiaa pillugu apustilip Paulusip taakku eqqaasittariaqarsimavai. Taanna allappoq Jiisusip maligassiaa iluaqutigisinnaagaat ‘qasuleqqunatik nikalloqqunatillu’. (Hebr 12:3) Allaaserisap matuma siuliani sammivarput Jehovap peqatigiissortaasa ullumikkut suliaat nuannersut. Kristumiut ukiuni hundredelinni siullerni Kristusip maligassiaanik kajumississutiginnissimanerattut, Jehovap peqatigiissortaasa ullumikkut maligassiuinerat Guutimut kiffartornitsinni pinertusaarnissatsinnut aallussilluartuarnissatsinnullu iluaqutigisinnaavarput.

3. Aallussilluarpiarunnaaqqunata susariaqarpugut, allaaserisamilu matumani suna sammissavarput?

³ Guutimut kiffartornitsinni ‘qasulissanngikkutta’, imaluunniit aallussilluarpiarunnaassanngikkutta, Guutip peqatigiissortaasa maligassiuinerannik eqqarsaatiginninnerput naammanngilaq. Paulusip ‘ajunngitsuliortuarnissatsinnut’ kajumissaarpaatigut. (Gal 6:9) Taamaattumik iliuuseqartariaqarpugut. Aallussilluartuarsinnaaqqulluta  Jehovallu peqatigiissortaanit siulersorneqartuarsinnaaqqulluta iliuuserisariaqakkavut tallimat sammeriartigit. Taava taakkua ilaat sorliit iliuuserinerusariaqarnerlutigit tamatta immikkut eqqarsaatigisinnaavarput.

4. Sooq oqarsinnaavugut ataatsimiinnerit pallorfiginninnermi ilumoortumi pingaaruteqartuaannarsimasut?

⁴ Ataatsimiinnerit Jehovap kiffaanut pingaaruteqartuaannarsimapput. Qilammi Jehovap inngilini ataatsimeeqatigisarpai. (1 Kng 22:19; Job 1:6; 2:1; Dan 7:10) Itsaq Guutip Israelikkut ‘tusarnaarniassammata ilikkarsinnaaniassammatalu’ ataatsimiittaqquai. (5 Mos 31:10-12) Ukiuni hundredelinni siullerni juutit synagogini Allakkanit atuarniarlutik katersuuttarput. (Luk 4:16; ApS 15:21) Aamma ilagiit kristumiut pilersinneqarmata ataatsimiinnerit pingaaruteqarput, ullumikkullu suli pingaaruteqartorujussuupput. Kristumiut ilumoortut ‘imminnut isumageqatigiipput asaqatigiinnermut ajunngitsuliornermullu kajumissaaqatigiittarlutik’. Taamaaliornissarput pisariaqarpoq ingammik ulluni kingullerni inuugatta. — Hebr 10:24, 25.

5. Ataatsimiinnitsinni qanoq immitsinnut kajumissaaqatigiissinnaavugut?

⁵ Ataatsimiinnerni immitsinnut kajumissaaqatigeeriaatsit ilaat tassaavoq akisarneq. Assersuutigalugu immikkoortumut apeqqut akisinnaavarput, allassimaffik oqaaseqarfigisinnaavarput, imaluunniit misigisaq najoqqutassiap Biibilimeersup uagutsinnut iluaqutaaneranik ersersitsisoq eqqartorsinnaavarput. (Tuss 22:23; 40:10) Qanorluunniit sivisutigisumik sallusuissummiissimagaluarluta akissutigineqartut tamaasa — utoqqarnit inuusuttuaqqanilluunniit akissutaagaluarpata — kajumississutigisaqaavut.

6. Ataatsimiinnerit sutigut iluaqutigisarpavut?

⁶ Ataatsimiinnerit, ataatsimeersuaararnerit ataatsimeersuarnerillu assigiinngitsutigut iluaqutigisarpavut. Assersuutigalugu oqaluussiffigisartakkatsinniittut akeqqersimaarpata tusarusunngippataluunniit nakimaalluta oqaluussinissatsinnut taakku iluaqutigisinnaavavut. (ApS 4:23, 31) Oqalugiaatit saqqummiunneqartullu allat Biibilimik tunngavillit uppernikkut nakussatsissutigaavut. (ApS 15:32; Rom 1:11, 12) Qatanngutinik peqateqartarnerput nuannerlunilu tuppallersaataavoq. (Tuss 94:12, 13) Siulersuisoqatigiit Ilinniartitaanermut Ataatsimiititaliaat Jehovap innuttaasa ataatsimiittarneranni sammisassanik aaqqissuussisarput. Ukioq kaajallallugu sapaatit-akunneri tamaasa ataatsimiittarnitsinni ilinniartinneqartarnerput qujamasuutigeqaarput!

7, 8. (a) Ataatsimiigiartarnissamut pissutaasoq pingaarnerpaaq suua? (b) Ataatsimiinnerit qanoq iluaqutigaagit?

⁷ Ataatsimiinnitsinni iluaqutigisartakkavut pissutigiinnarnagit ataatsimiigiartarpugut, ataatsimiigiartarnissamummi pissutaasoq pingaarnerpaaq tassaavoq Jehovamik pallorfiginninnissaq. (Atuaruk Tussiaat 95:6). Guutitta asseqanngilluinnartup unnersiutiginissaa immikkut pisinnaatitaaffiuvoq! (Kol 3:16) Aamma ataatsimiinnerni akisarnitsigut Jehova unnersiutigisarparput. Jehova ilumut taamatut pallorfigineqartariaqarpoq. (Saqq 4:11) Paasinarpoq ataatsimiinnernut najuuttuarnissarput sooq taama pingaaruteqartigisoq. — Hebr 10:25.

⁸ Ataatsimiinnerit Jehovamit tunissutaasutut silarsuup matuma ajortup naggatissaata tungaanut pinertusaartuarnissatsinnut iluaqutaasutut isigaavut? Taamaappat ulapputeqaraluarluta ataatsimiigiartuarnissarput pingaartissavarput. (Fil 1:10) Pissutissaqavitsinnata ataatsimiigianngitsoortassanngilagut.

9. Qanoq nalunngilarput oqaluussinerup pingaaruteqassusia?

⁹ Jehovap peqatigiissortaanit siulersorneqarutta aallussilluarluta oqaluussissaagut. Jiisusip nunarsuarmiikkallarami oqaluussineq aallarnerpaa. (Matt 28:19, 20) Taamanimiilli oqaluussineq ajoqersuganngortitsiortornerlu Jehovap peqatigiissortaasa tamarmik suliaasa pingaaruteqarnerpaartaraat. Misigisarpassuarnit erserpoq inngilit suliarput tapersersoraat sallusuissummillu upperinnilerusuttunik ujaasinitsinni ikiortaraatigut. (ApS 13:48; Saqq 14:6, 7) Jehovap peqatigiisortaasa takussaasut siunertaat tassaavoq oqaluussinermik aaqqissuussillunilu tapersersuineq. Suliaq tamanna aamma illit inuuninni pingaarnerpaatippiuk?

10. (a) Qatanngut angut sallusuissummik qanoq nuannarinnittuarpa? (b) Oqaluussineq illit sallusuissummik nuannarinningaartuarnissannut qanoq iluaqutigaajuk?

¹⁰ Aallussilluta oqaluussisarutta sallusuissummik nuannarinningaartuarsinnaavugut. Mitchel utoqqaanertaq misilittagaqarluartoq pioneriusoq taama misigivoq. Ima oqarpoq: “Inuit sallusuissut pillugu oqaluttuullugit nuannaraara.” Taava atuagassiat Napasuliaq Alapernaarsuiffik-up aamma Vågn op!-ip allataalluarnerat qanoq nuannaarutigitigalugu eqqartoramiuk ima nangippoq: “Inuit qanoq oqassanersut qanorlu soqutiginnilersissinnaanerlugit paaserusukkakku oqaluusserusulertarpunga. Kiffartornera oqimaaqatigiissaarinissamut iluaqutigaara. Pisassakka  allat oqaluussinermut piffissaliisimanerma siorna kingornaluunniit suliarisarpakka.” Uaguttaaq Guutimut kiffartornermi ulapputeqarutta ulluni kingullerni makkunani pinertusaarsinnaavugut. — Atuaruk 1 Korinthimiut 15:58.

11. Sooq atuagassiaativut atuagaativullu atuartariaqarpavut atuakkavullu eqqarsaatigeqqissaarlugit?

¹¹ Jehovap atuagassiat atuakkallu pisartakkavut aqqutigalugit aamma nakussatsittarpaatigut. Ilimanarpoq ilaanni atuareerninni ima eqqarsartutit: ‘Allaaserisaq taanna tassa pisariaqartilluinnagara! Soorlu uanga eqqarsaatigalunga Jehovap allatsissimagaa!’ Pissusissamisoorpoq taamatut misigiguit. Jehovap Biibililersaarutit aqqutigalugit ilinniartittarlutalu siulersortarpaatigut. Ima oqarpoq: “Ilinniartissavakkit ilitsersorlutillu ingerlavissannik.” (Tuss 32:8) Atuagassiat atuakkallu pisartakkavut tamaasa sapinngisatsinnik atuarniartarpavut atuakkavullu eqqarsaatigeqqissaarniartarlugit? Taamaaliortarutta ulluni kingullerni erloqinartorsiorfiusuni makkunani pinertusaarnissatsinnut Guutimullu kiffartornermi aallussilluartuarnissatsinnut iluaqutaangaassaaq. — Atuakkit Tussiaat 1:1-3; 35:28; 119:97.

12. Atuagassiaativut atuagaativullu pingaartinneruniarlugit susinnaavugut?

¹² Atuagassiaativut atuagaativullu pingaartinnerusinnaavavut taakku saqqummersittuarniarlugit suliarujussuaq eqqarsaatigigutsigu. Biibililersaarutit tamarmik misissoqqissaarneqarnissaat, allanneqarnissaat, kukkunersiorneqarnissaat, assiliartalersorneqarnissaat, nutserneqarnissaat, naqiterneqarnissaat nittartakkatsinnullu ilineqarnissaat Siulersuisoqatigiit Aaqqissuisoqarnermut Ataatsimiititaliaannit akisussaaffigineqarput. Immikkoortortaqarfiit atuagassianik atuakkanillu naqiterisut ilagiippassuarnut taakkuninnga nassiussisarput. Sooq suliarujussuaq tamanna suliarineqartarpa? Jehovap innuttai aalajaattuarsinnaaqqullutik ilitsersorneqarlutillu siulersorneqarniassammata. (Es 65:13) Atuagassiat atuakkallu Jehovap peqatigiissortaanit pisartakkavut tamaasa iluaqutiginiartartigit! — Tuss 119:27.

13, 14. Qilammiittut kikkut Jehovap peqatigiissortaasa aaqqissuussaannik tapersersuisarpat, qanorlu tamatumunnga assingusumik tapersersuisinnaavugut?

¹³ Johannesip takorruuilluni takuaa Jiisusi Jehovamut pikitsitsisunik ajugaaffiginninniarluni hestimi qaqortumi hestersoq. (Saqq 19:11-15) Aamma tanitat aalajaatsut qilammut makititaasimasut inngilillu aalajaatsut Jiisusi malillugu hestersut takuai. Tamatuminnga erserpoq taakkua tamarmik Jiisusi siulersuisutut tapersersoraat. (Saqq 2:26, 27) Taakkua asseqanngilluinnartumik maligassiaannit ilinniarsinnaavarput Jehovap peqatigiissortaani siuttuusut tapersersortariaqarivut.

¹⁴ Tamatumunnga assingusumik inuppassuit amerlangaartut Kristusip qatanngutaasa tanitat nunarsuarmiittut suliaannik tapersersuilluinnarput. (Atuaruk Zakaria 8:23). Illit Jehovap peqatigiissortaasa aaqqissuussai qanoq tapersersorsinnaavigit? Tapersersueriaatsit ilaat tassaavoq siuttuusunut naalanneq. (Hebr 13:7, 17) Utoqqaanertat ilagiitsinniittut pillugit oqaaserisavut taakkuninnga suliaannillu ataqqinninnerulersitsisarpat? Meeqqavut angutinik aalajaatsunik taakkuninnga ataqqinninnissaannut taakkualu siunnersuutaannut naalannissaannut kajumissartarpavut? Aamma allatigut Jehovap peqatigiissortai tapersersorsinnaavavut. Assersuutigalugu oqaluussinermik aningaasatigut tapersersuinissarput ilaqutariittut oqaloqatigiissutigisarparput? (Uss 3:9; 1 Kor 16:2; 2 Kor 8:12) Aamma  Naalagaaffilersaarfimmi aserfallatsaaliueqataallutalu eqqiaaqataasarpugut? Jehovap peqatigiissortaminik taamatut tapersersuinerput takugaangamiuk anersaaminik illernartumik tunisarpaatigut. Anersaavalu iluaqutigalugu ulluni kingullerni makkunani pinertusaarnissamut pisariaqartitatsinnik nakussatsinneqartarpugut. — Es 40:29-31.

15. Sooq eqqortumik iliornissarput ilungersuutigiuartariaqarparput?

¹⁵ Pinertusaassagutta Jehovallu peqatigiissortaasa siulersuinerat malissagutsigu Jehovap iluarisaatut inuusariaqarpugut. (Ef 5:10, 11) Saatani, silarsuaq ajortoq manna naammalluinnanngissuserpullu pissutaallutik eqqortumik iliornissarput sapernartorujussuusinnaavoq. Ilissi qatanngutit asanartusi, ilasi Jehovamik ikinnguteqartuarumallusi ullut tamaasa ilungersortorujussuusariaqartarpusi. Ilungersornersi pissutigalugu Jehovap asavaasi. Ajunngitsuliornersi qatsuteqinasiuk! Jehovap iluarisaatut inuugutta siunertaqarluartumik pilluarnartumillu inuussaagut qularutiginagulu Jehovamit akuerisaanerput. — 1 Kor 9:24-27.

16, 17. (a) Ingasattumik ajortulioraluarutta qanoq iliortariaqarpugut? (b) Anne qanoq ilinniarfigisinnaavarput?

¹⁶ Ingasattumik ajortulioraluaruit qanoq iliortariaqarpit? Isertuunniassanngilat. Ikiortissarsiupallagit. Eqqaamajuk Daavip ajortuliani isertorniarsarigamiuk qanoq misigisimanera. Taanna ima allappoq: “Timiga taroriartorpoq anersaarulunninni ulloq tamaat.” (Tuss 32:3) Ingasattumik ajortuliaq isertorniarsarigutsigu nuannaarunnaassaagut immaqalu allaat Jehovamik ikinnguteqarunnaassalluta. Ingasattumilli ajortuliarput nassuerutigigutsigu ‘nallittorneqarumaarpugut’. — Uss 28:13.

¹⁷ Anne assersuutigeriartigu. * Anne inuusuttuaraatilluni pioneriuvoq, eqqunngitsumilli iliortalerpoq. Tamatuma kingunerisaanik ilerasuuteqalerpoq. Ima oqarpoq: “Nuannaarnangalu nikallungajuarpunga.” Ilaanni ataatsimiinnermi Jaaku 5:14, 15 sammineqarput. Annep paasilerpaa ikiorneqartariaqarluni. Qanoq iliorpa? Allassimaffimmi siunnersuutigineqartutut iliorpoq utoqqaanertallu saaffigalugit. Oqarpoq napparsimasutut illuni Jehovamillu ‘katsorsaammik’ tunineqarluni. Ima nassuiaavoq: “Katsorsartinneq sapernaraluarluni ajorunnaarsitsivoq.” Maanna Anne ilerasuuteqarnani aallussilluaqqilerluni Jehovamut kiffartorpoq.

18. Suut ilungersuutigisariaqarpavut?

¹⁸ Eqqaamajuartariaqarparput ulluni kingullerni makkunani Jehovap peqatigiissortaanut ilaanerput immikkut pisinnaatitaaffiusoq! Ilaquttavut ilagalugit ataatsimiinnernut najuuttuarisa, angalaarfigisartakkatsini aallussilluarluta oqaluussisa, atuagassiaativut atuagaativullu tamaasa iluaqutigisigit. Aamma siuttuusut tapersersortigit, Jehovallu iluarisaatut inuusa. Taamaaliortarutta Jehovap peqatigiissortaanit siulersorneqassallutalu ‘ajunngitsuliorneq qatsutissanngilarput’.