1, 2. (a) Nalunaajaasuuneq qanoq paasisariaqarpa, nunarsuarmilu tusagassiuuteqarfiit inuit sumik ilisimatissimanngilaat? (b) Sooq Jehovap nunarsuarmi tusagassiuuteqarfiit pisariaqartinngilai?

NALUNAAJAASUUNEQ qanoq paasisariaqarpa? Oqaaseq kalaallisooq ‘nalunaajaasoq’ (oqaatsimit ‘nalunaajarpaa’-mit aallaaveqartoq) aamma ‘nassuiaasumik’ imaluunniit ‘uppernarsaasumik’ isumaqarsinnaavoq. Taamaattumik nalunaajaasoq tassaavoq inuk takusaminik ilisimasaminillu nassuiaasartoq, soorlu eqqartuussivimmi ilisimannittoq. Sydafrikami aviisi The Witness (Ilisimannittoq) ukiut 160-it sinnerlugit saqqummersinneqartarsimavoq. Aviisit pisimasut eqqortumik allaatiginissaat siunertarimmatigit aviisip eqqaaneqartup taaguutaa naleqquppoq. Aviisip aallarniisuata neriorsuutigaa aviisimi “ilumoortoq, ilumoortoq tamaat, ilumoortoq kisiat” allaatigineqassasoq.

² Ajoraluartumilli nunarsuarmi tusagassiuuteqarfiit pisimasorpassuit eqqortumik allaatigisimanngilaat. Guuti qanorlu iliorsimanera pillugit ilumoortoq ingammik allaatigineq ajorpaat. Kisianni Jehovap Ajugaqanngitsup nunarsuarmi tusagassiuuteqarfiit pisariaqartinngilai. Guuti pruffiitini Ezekieli aqqutigalugu ima oqarpoq: “Inuiaat paasissavaat uanga tassaasunga Naalagaq [Jehova, NW].” (Ez 39:7) Nunarsuaq tamakkerlugu Jehova 8 millionit missaanniittunik nalunaajaasoqarpoq, taakkulu taanna pillugu oqaluussisartuupput. Nalunaajaasorpassuit taakku Guuti itsaq nalitsinnilu inunnut qanoq iliorsimanersoq aamma siunissaq pillugu neriorsuutigisimasai nuanningaartut inunnut oqaluussissutigaat.  Esajap allagaani 43:10-mi ima allassimavoq: “‘Ilissi nalunaajaasigaassi’, oqarpoq Jehova, ‘aap kiffaraassi, qinigaralusi’”. (NW) Inuunitsinni oqaluussinermik pingaarnerpaatitsinitsigut ersersipparput taaguuterput — Jehovap Nalunaajaasui — naapertorlugu inuulluta.

3, 4. (a) Biibilimik Atuaqqissaartartut qanga Jehovap Nalunaajaasuisut taaguuteqalerpat, tamannalu qanoq isumaqarfigaat? (Allaaserisap aallaqqaataani asseq takuuk). (b) Apeqqutit suut sammissavavut?

³ Jehova ‘naassaanngilluinnartumik kunngiummat’ taassuma aqqa atajuassaaq. Jehova ima oqarpoq: “Tassa atera naassaanngitsumik aterisara, tassa ateriumasara kinguaariikkuutaani.” (1 Tim 1:17; 2 Mos 3:15; Oqaluussisartup oqaasii 2:16 naleqqiuguk) Jehovap aqqanik taaguuteqarnerput sunit tamanit ataqqinaataanerpaavoq. Biibilimik Atuaqqissaartartut 1931-mi Jehovap Nalunaajaasuinik taaguuteqalernertik nuannaarutigingaarpaat. Amerlasuut allannguut tamanna pillugu qujamasunnertik allaatigaat. Canadami ilagiit ataatsit allapput nutaamik taaguuteqalernertik Jehovamut ataqqinaataasumik inooriaaseqarnissaminnik aalajangiusimanninnerulissutigalugu.

⁴ Jehovap aqqanik taaguuteqarnerit ataqqinaatigalugu qanoq ersersissinnaaviuk? Aamma Esajap allagaani allassimasutut sooq Jehovap Nalunaajaasumisut taaguuseraatigut nassuiarsinnaaviuk?

5, 6. (a) Angajoqqaat Israelikkuusut qanoq Jehova nalunaajaatigaat? (b) Angajoqqaat Israelikkuusut aamma susariaqarpat, ullumikkullu angajoqqaat sooq aamma taamaaliortariaqarpat?

⁵ Jehovap inuiaqatigiit Israelikkut nalunaajaasumisut toqqarpai. Israelikkut tamarmik immikkut taanna pillugu nalunaajaanissartik akisussaaffigaat. (Es 43:10, NW) Assersuutigalugu angajoqqaat Guutip itsaq iliuuserisimasai pillugit meeqqaminnik ilinniartitsisarnermikkut nalunaajaasarsimapput. Jehovap angajoqqaat peqquai meeqqatik poorski pillugu ilinniartittassagaat ima oqarami: “Qitornassilu aperippasi maleruagassiaq tamanna  qanoq isumaqartoq ima akiumaarpusi: ‘Tassa Naalakkamut poorskisiornermi pilliutissaq, taassuma taamani Egyptenimiut toqorartikkamigit Israelikkut illui qaangiinnarmagit taamalu uagut illutsinniittut asattuullugit.’” (2 Mos 12:26, 27) Angajoqqaat taakkua aamma meeqqatik oqaluttuuttarpaat Farao qanoq akisimanersoq Mosesimit aperineqarami Israelikkut inoqajuitsumut Jehovamik pallorfiginnikkiartorsinnaanersut. Faraomi ima akivoq: “Naalagaq [Jehova, NW] kinaammat naalassavara Israelikkullu aallarnissaat akueralugu?” (2 Mos 5:2) Faraop apeqqutaanut Jehovap akissutaa Ajugaqanngitsuunerminillu ersersitsisimanera angajoqqaat meeqqaminnut oqaluttuarisarpaat. Jehovap perluit qulit Egyptenimut nalliutitippai Israelikkullu Immami Aappalaartumi Egyptenimiut sakkutuuinit aniguisillugit. Israelikkut takuaat Jehova Guutiusoq ilumoortoq neriorsuutiminillu eqqortitsiuaannartoq.

⁶ Israelikkut Jehova pillugu nalunaajaasuunertik ataqqinaatitut isigaat. Jehovap iliuuserisimasai nuannersut meeqqaminnut inussiaatiminnullu tamanut oqaluttuaraat. Israelikkut aamma nalunngilaat illernartumik pissuseqartariaqarlutik. Jehova ima oqarpoq: “Illernartuussaasi uanga Naalagaq Guutersi illernartuugama.” Angajoqqaat Israelikkuusut qitornatik illernartuunissaannik, tassa Jehovap najoqqutassiaanut naapertuuttumik inuunissaannik, ilinniartittariaqarpaat. (3 Mos 19:2; 5 Mos 6:6, 7) Ullumikkut angajoqqaat aamma taamaaliortariaqarput. Qitornatik Guutip aqqanut naalannartumut ataqqinaataasumik inooriaaseqarnissaannik ilinniartittariaqarpaat. — Ussatit 1:8; Efesosimiut 6:4, NW * atuakkit.

7. (a) Israelikkut Jehovamut naalakkaangata inuiannut eqqaamiuusunut qanoq sunniuteqartarpa? (b) Jehovamut sinniisuusut tamarmik qanoq akisussaaffeqarpat?

⁷ Israelikkut naalakkaangamik Guutip aqqa nalunaajaatigilluartarpaat. Ima oqarfigineqarsimapput: “Inuiaat nunarsuarmiittut tamarmik paasissammassuk Naalakkap [Jehovap, NW] aqqa ilinnut taaneqartoq, ersigiumaarpaatsillu.” (5 Mos 28:10) Ajoraluartumilli Israelikkut amerlanertigut Jehovamut naalasseriitsuupput. Kana’animiut guutiliaat pallorfigaat. Israelikkut guutiliatut taakkunatut naakkittaatsunngorput. Meeqqatik pilliutigisarlugillu piitsut ajortumik pisarpaat. Maligassiuinerlunnerat pingaarutilimmik ilinniutigaarput. Jehova ilaartariaqarlugulu taassumunnga, Illernarnerpaamut, sinniisuugatta illernartuusariaqarpugut.

8. Jehovap Esaja qanoq peqquaa, Esajalu qanoq piva?

⁸ Esaja aqqutigalugu Jehovap Israelikkunnut mianersoqqusilluni illoqarfik pingaarneq Jerusalemi piuneerunneqarumaartoq innuttanilu tigusarineqarumaartut siulittuutigai. Aammattaaq Jehovap siulittuutigaa innuttami tupinnangaartumik aniguisinnerisigut ‘nutaanik pinngortitsissalluni’, tassa allaanerusumik iliuuseqassalluni. (Es 43:19) Jehovap Israelikkut allamik isumataarnavianngitsut nalunngikkaluarlugu Esaja taakkuninnga mianersoqqusiuaqquaa. Esajap atuagaani kapitalit arfinillit siulliit Jerusalemip piuneerunneqarnissaa pillugu mianersoqqussutinik imaqarnerupput. Esajap paaserusuppaa Israelikkut qanoq sivisutigisumik tusarnaarumassanngitsut. Jehovap ima akivaa: “Illoqarfiit piuneerunneqarserlugit inuerullutik, illullu inigineqassaarserlugit, nunalu inoqajuitsunngorserlugu.” — Esaja 6:8-11 atuakkit.

9. (a) Esajap Jerusalemi pillugu siulittuutaa qanga eqquuppa? (b) Ullumikkut suna eqqumaffigisariaqarparput?

⁹ Kunngip Uzzijap ukiumi naalakkersuiffiani kingullermi, ukiup 778-ip missaani Kr.in.si., Esaja pruffiititut kiffartulerpoq. Kunngip Hizkijap naalakkersuinerata nalaani ukiup 732-p tungaanut Esaja  ukiut 46-t missaanni kiffartorpoq. Tamatuma kingorna Jehovap innuttani ukiumi 607-imi Jerusalemip piuneerussaanissaata tungaanut mianersoqqujuarpai. Taamaattumik Israelikkut susoqarumaarneranik ukiorpassuit sioqqullugit paasitinneqareersimapput. Ullumikkut Jehovap innuttani aqqutigalugit inuit siunissami susoqarumaartoq pillugu mianersoqqusarpai. Ukiorpassuarni Napasuliaq Alapernaarsuiffik atuartartuminik paasititsisimavoq Saatani nunarsuarmut naalakkersuiunnaassasoq Kristusilu naalakkersuilissasoq. — Saqq 20:1-3, 6.

10, 11. Esajap siulittuutaata eqquunnera Israelikkut Babylonimiittut qanoq misigaat?

¹⁰ Juutit ilaat Jerusalemip piuneerussaaneranit aniguipput. Babylonimiunut tunniutiinnarlutillu aallarussaanermikkut Jehovap peqqussutaa naalappaat. (Jer 27:11, 12) Ukiut 70-it tamatuma kingorna taakkua ilaasa aamma Esajap siulittuutaa una misigivaat: “Ima oqarpoq Naalagaq, Israelip Illernartua, utertitsisersi: Ilissi pillusi Babylonimut nalunaariartortitsissaanga isaaffiit parnaarutaat tamaasa piiassavakka”. — Es 43:14.

¹¹ Jehovap siulittuut taanna tupinnangaartumik eqquutitippaa. Ukiumi 539-mi Kr.in.si. oktobarimi unnuit ilaanni Babylonimi kunngip naalagartaasalu guutertik nalliuttorsiutigaat. Allaat immersakkanit Jehovap naalaffianit tillissimasaminnit viinnisorput. Kisianni unnuk taanna kunngip Kyrosip sakkutuuisalu Babyloni tiguarpaat naalagaaffissuarlu taanna ajugaaffigalugu. Ukiumi 538-mi imaluunniit 537-mi Kr.in.si. Kyrosip juutit peqquai Jerusalemimut utissasut Guutillu naalaffia sanaqqissagaat. Jerusalemimukartillutik Jehovamit isumassorneqarlutillu sernissorneqarput. Tamakku tamaasa Esajap siulittuutigisaatut pipput. Guutip innuttaasa Jerusalemimi naalaffiliornertik naammassigamikku uppernarsarsinnaavaat, imaluunniit nalunaajaatigisinnaavaat, Jehova Guutiusoq ilumoortoq neriorsuutiminik eqqortitsiuaannartoq. Juutit Jerusalemimut utertut pillugit Guuti ima oqarpoq: “Inuiaat uannut piliarisama nersorneqaatissara nalunaajaatigissavaat.” — Es 43:21; 44:26-28.

12, 13. (a) Juutit naalaffik sanaqqikkumallugu utermata qanoq pisoqarpa? (b) ‘Savat allat’ qanoq immikkut pisinnaatitaaffeqarpat, sunalu qilanaaraat?

¹² Juutit naalaffik sanaqqinniarlugu utermata allamiut tuusintillit juutit upperisaannut ilanngupput. Kingusinnerusukkullu Guutimik nalusut suli allat aamma uppertunngorput. (Ezra 2:58, 64, 65; Est 8:17) Ullumikkut kristumiut tanitat ‘Israelimik Guutip pigisaanik’ taaneqartut Jiisusip ‘savaataanit allanit’ ‘amerlangaartunit’ tapersersorneqartarput. (Gal 6:16; Joh 10:16; Saqq 7:9, 10) Tanitat savallu allat tamarmik taaguutertik — Jehovap Nalunaajaasui — ataqqinaatigaat.

¹³ Silarsuassami nutaami ‘amerlangaartut’  tupinnangaartumik periarfissaqarumaarput. Taakkua Saatanip silarsuaata naggataatungaani Jehovamik nalunaajaasuuneq qanoq issimanersoq toqusunit makititaasunut nassuiassavaat. Siunissami tamanna pisinnaatitaaffigiumallugu illernartuujuartariaqarpugut. Jehovap najoqqutassiai naapertorlugit inuunissarput ilungersuutigigaluarlutigu ullut tamaasa kukkusarpugut. Taamaattumik ullut tamaasa Jehovamut isumakkeerfigeqqulluta qinusariaqarpugut. Jehovamut sinniisuusinnaanitsinnut qujamasunnerput illernartuujuarnitsigut ersersittarparput. — 1 Johannesi 1:8, 9 atuakkit.

14. Ateq Jehova qanoq isumaqarpa?

¹⁴ Jehovap aqqanik taaguuteqarnerup immikkut pisinnaatitaaffiunera paasilluarnerujumallugu taassuma aqqa qanoq isumaqarnersoq paasisariaqarparput. Ateq Jehova hebræerit oqaluutaannit ‘sunngornermik’ nutserneqarsinnaasumit aallaaveqarpoq, oqaatsimilu iliuuseqarneq pineqarpoq. Taamaattumik Guutip aqqa, Jehova, ima isumaqarsorineqarpoq: “-nngortippoq” aamma “-nngortippaa”. Jehovap atini toqqarpaa kinaassusianik paasinnilluarnerusinnaaniassagatta. Tassaavormi sunik tamanik Pinngortitsisoq. Aamma Jehovap piumasaata naammassinissaa kimilluunniit, allaat Saatanimit, akornuserneqarsinnaanngilaq.

15. Jehovap atini pillugu nassuiaaneranit suna ilinniarparput? (Ungalusaq “ Jehova — Ateq isumalerujussuaq” takuuk).

¹⁵ Jehovap atini Mosesimut sukumiinerusumik nassuiarpaa. Jehovap Mosesi Egyptenimut innuttaminik aniguisitseqqullugu aallartikkamiuk ima oqarfigaa: “Sunngorusunnera naapertorlugu taamaalissaanga.” (2 Mos 3:14, NW) Imaluunniit Rotherhamip nutsigaa naapertorlugu: “Iluarisara naapertorlugu qanorluunniit ilissaanga.” Taamaattumik Jehova siunertani naammassiniarlugu sunngorsinnaavorluunniit. Jehova Israelikkunnut Aniguisitsisunngorpoq, Illersuisunngorpoq, Siulersuisunngorpoq pisariaqartitaannillu sunilluunniit Pilersuisunngorpoq.

16, 17. (a) Guutip aqqanik taaguuteqarnitsinnut ataqqinaataasumut qujamasunnerput qanoq ersersissinnaavarput? (b) Allaaserisami tulliuttumi suna sammissavarput?

¹⁶ Ullumikkut Jehova allanngorsimanngilaq. Aqqata isumaanit eqqaasinneqarpugut innuttani isumassorumallugit sunngorsinnaasartoq. Assersuutigalugu ullut tamaasa inuusinnaaniassagatta upperluartuarsinnaaniassagattalu pisariaqartitatsinnik tunisarpaatigut. Guutilli aqqata isumaa Jehovap nammineq sunngortinnera pineqaannanngilaq. Aamma Jehovap piumasani naammassineqaqqullugu pinngortitani pisariaqartumik sunngortissinnaavai. Assersuutigalugu Nalunaajaasuni oqaluussinermut atortarpai. Tamanna eqqarsaatigeqqissaarutsigu Jehovamut sinniisuulluarnissatsinnut kajumississutigisinnaavarput. Kåre 84-inik ukiulik Norgemi ukiuni 70-ini aallussilluarluni Nalunaajaasuusoq ima oqarpoq: “Jehovamut naassaanngitsumut kunngiusumut kiffartorsinnaallungalu innuttaanut aqqanik illernartumik taaguutilinnut ilaasinnaanera ataqqinaataangaartutut isigaara. Sallusuissummik Biibilimeersumik nassuiaasinnaallungalu inuit nuannaarlutik paasinnilernerannik takunnissinnaanera tamatigut immikkut pisinnaatitaaffiungaarpoq. Assersuutigalugu inuit Kristusip utertitsissutitut pilliutaa iluaqutigalugu silarsuassami nutaami eqqissisimaarfiusumi naapertuilluarfiusumilu naassaanngitsumik inuulersinnaanerannik ilinniartikkaangakkit qamuuna nalerisimaartarpunga.”

¹⁷ Nunat ilaanni inuit Jehova pillugu ilinniarusuttut amerlanngillat. Kåretulli inummik Jehovap aqqa pillugu ilinniarusuttumik naapitsigaangatta nuannaarutigisarparput. Jehovap nalunaajaasigaatigut, kisianni Jiisusi aamma oqarpoq nalunaajaasigissalluta. Qanoq taamaassinnaagami? Tamanna allaaserisami tulliuttumi sammineqassaaq.