Jiisusi inuit ilaasa taanna pillugu oqaaserisimasaat

“Jiisusi Nazaretimiu . . . qularnanngitsumik oqaluttuarisaanermi inunni malunnaateqarnersaavoq.” — H.G. Wells, tuluk oqaluttuarisaanermik ilisimatooq.

“Kristusi . . . oqaluttuarisaanermi sapiitsuliortunit tamanit allaaneruvoq.” — Philip Schaff, Schweizimiu teologi oqaluttuarisaanerlu pillugit ilisimatooq.

KINA inuit inuusimasut pingaarnersaattut taaneqarnissaminut piukkunnarnersaava? Qanoruna ililluni inuk pingaaruteqartunngortartoq? Sakkutuut naalagaattut immikkut ittumik piginnaassuseqarami? Nukittugami? Silatulluinnarami? Imaluunniit inuup pingaaruteqassusia suliamigut maligassiuinermigullu allanut qanoq sunniuteqartarneranut aalajangiisuua?

Malugeriaruk oqaluttuarisaanermik ilisimatuut, Biibilimik ilisimatuut, ilisimatuullu allat, atuakkiortut, politikkikkut siuttut allallu — itsaq maannakkullu — Jiisusi Kristusi Nazaretimiu pillugu qanoq oqarsimasut:

“Eqqumiissaaq miserratigissallugu Jiisusi Nazaretimiu inuk sunniuteqarnerpaasimasoq — ukiuni tusindilinni taakkunani marlunniinnaanngitsoq, inuiaalli oqaluttuarisaaneranni tamarmi.” — Reynolds Price, Amerikamiu atuakkiortoq Biibilimillu ilisimatooq.

“Angut pisuussuteqanngilluinnartoq allat iluaqutissaannut imminut pilliutigisoq, akeqqaminuttaaq, silarsuarmullu utertitsissutinngorpoq. Tamanna iliuusiuvoq naammalluinnartoq.” — Mohandas K. Gandhi, Indiami politikkikkut anersaakkullu siuttoq.

“Meeraagallarama Biibilimik Talmudimillu ilinniartinneqartarpunga. Juutiuvunga, inulli Nazaretimiu maluginiarnartoq taanna tiguartinnaraara.” — Albert Einstein, tyskeq ilisimatooq.

“Jiisusi Kristusi Guutip erneratut inuullu erneratut qaqugukkulluunniit, oqaluttuarisaaneq tamaat, inuk pingaaruteqarnerpaasoraara. Oqaasii iliuusiilu tamarmik ullumikkut uagutsinnut pingaaruteqarput, inullu alla pillugu taamatut oqartoqarsinnaanngilaq, ullumikkut siusinnerusukkulluunniit inuusoq.” — Schalom Asch, Amerikamiu atuakkiortoq, Polenimi inunngorsimasoq, avisimi Christian Herald-imi issuarneqarsimasoq; taakkunannga uingasunngortinneqarpoq.

“Ukiuni 35-ni nihilistiuvunga, angut sumilluunniit upperisaqanngitsoq. Ukiut tallimat matuma siorna uppertunngorpunga. Jiisusi Kristusi upperilerpara, inuuneralu tamarmi tassanngaannaq allanngorpoq.” — Lev Tolstoj, russeq atuakkiortoq isumaliutersortartorlu.

“[Jiisusip] inuunera nunarsuarmi maani inuusimasunit allanit tamanit sunniuteqarnersaasimavoq, sunniuteqarnerujartuinnarporlu.” — Kenneth Scott Latourette, Amerikamiu oqaluttuarisaanermik ilisimatooq atuakkiortorlu.

“Isumaqassaagut Jiisusi pillugu oqaluttuaq oqaluttualiaannaasoq? Ikinngutiga, oqaluttualiaannaanngivippoq. Sokratesili pillugu oqaluttuaq, kialuunniit akerlilerusunngisaa, Jiisusip Kristusip inuunerata oqaluttuarineqarneratulli uppernarsaatissaqartiginngilaq.” — Jean-Jacques Rousseau, franskeq isumaliutersortartoq.

Inuunitsinni maligassaqqissoqarpat tassaasimassaaq Jiisusi Kristusi. Paulusip angutip ilisimatuup ukiuni hundredelinni siullerni Jiisusip ajoqersugassamisut inuiaqatigiinnullu tamanut ilisarititsisussamisut toqqagaata kajumissaarpaatigut Jiisusi ‘tunaareqqullugu’. (Hebræerit 12:2; Apustilit Suliaat 9:3) Qanoq inuunissarput eqqarsaatigalugu Jiisusip qanoq ilinniartissinnaavaatigut? Taassuma inuuneranik oqaluttuaq qanoq iluaqutigisinnaaviuk?