Ajugaasup nersornaatisiassaa eqqarsaatigiuaruk

“Apuuffissaq anguniarpara ajugaasup nersornaatisiassaa piniarlugu.” — FILIPPIMIUT 3:14.

1. Ajugaasup nersornaatisiassaata suup pinissaa Paulusip qilanaaraa?

APUSTILI PAULUSI, aamma Saulusitut Tarsusimiutut ilisarisimaneqartoq, ilaqutariinnit akimasuninngaanneersuuvoq. Siuaasami upperisaat pillugu Gamalielimit, inatsisinik ajoqersuisumit tusaamasamit, ilinniartinneqarpoq. (Apustilit Suliaat 22:3) Atorfittut qaffasissutut isigineqartumik atorfeqalernissaa ilimanarpoq, juutilli upperisaat qimappaa kristumiunngorlunilu. Tamatuma kingorna ajugaasup nersornaatisiassaata pinissaa qilanaarilerpaa — tassa Guutip naalagaaffiani qilammiusumi kunngisut palasitullu toqujuissuseq. Naalagaaffik tamanna nunarsuarmut paratiisiusumut naalakkersuissaaq. — Matthæusi 6:10; Saqqummersitat 7:4; 20:6.

2, 3. Ajugaasup nersornaatisiassaa, qilammi naassaanngitsumik inuunissaq, Paulusip qanoq pingaartitsigaa?

² Ajugaasup nersornaatisiassaa taanna Paulusip qanoq pingaartitsigineraa oqaasiini ukunani erserpoq: “Siornatigut iluanaarutigigaluakka tamakku maanna Kristusi pissutigalugu ajunaarutaatippakka. Ilumummi suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq. Taanna pillugu tamakku tamaasa annaasimavakka, tamaasalu perlukutut igitassaannaatippakka.” (Filippimiut 3:7, 8) Inuit amerlanersaasa pingaarutilittut isigisartagaat — atorfikkaajuneq, pigissaarneq ataqqisaanerlu — Paulusip suunngitsutut, perlukutut igitassaannartut, isigai Jehovap inunnut siunertaa pillugu sallusuissut paasereeramiuk.

³ Taamanimiilli Paulusimut pingaaruteqarnerpaasoq tassaavoq Jehova Jiisusilu pillugit ilisimasaqarneq naleqangaartoq, tamannalu pillugu Jiisusi Guutimut qinnutimini ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Johannesi 17:3) Paulusip naassaanngitsumik inuulernissaminik qamannga pisumik kissaateqarnera Filippimiut 3:14-imi oqaasiini erserpoq: “Apuuffissaq anguniarpara ajugaasup nersornaatisiassaa piniarlugu, Guutip Kristusi-Jiisusikkut pavannga uatsinnut qaaqqusissutaa.” Aap, ajugaasup nersornaatisiassaa, Guutip naalagaaffiani naalakkersueqataasutut qilammi naassaanngitsumik inuunissaq, eqqarsaatigiuarpaa.

Nunarsuarmi naassaanngitsumik inuuneq

4, 5. Ullumikkut Guutip piumasaatut iliortut millionillit ajugaasup nersornaatisiassaata suup pinissaa qilanaarisinnaavaat?

⁴ Guutip piumasaatut iliorniarlutik aalajangertut amerlanersaasa ajugaasup nersornaatisiassaanik, Guutip silarsuassaani nutaami inuunermik naassaanngitsumik, angusinissaq sulissutigisariaqarpaat. (Tussiaat 37:11, 29) Jiisusip neriuutip tamatuma qularnaatsuunera uppernarsarpaa. Imami oqarpoq: “Pilluarput qanilaartut, taakkuami nunarsuaq kingornutissavaat.” (Matthæusi 5:5) Jiisusi nammineq pingaarnertut nunarsuarmik kingornussisussaavoq, soorlu tamanna Tussiaat 2:8-mi ersertoq, 144.000-inillu qilammiusunik naalakkersueqateqassaaq. (Danieli 7:13, 14, 22, 27) ‘Savanut allanut’ ilaasut, nunarsuarmilu inuusussaasut, Guutip naalagaaffiata ilaa nunarsuarmiittoq ‘kingornussarissavaat’. Tassa “naalagaaffik silarsuup tunngavilerneqarneraniit [taakkununnga] pisassarititaasoq”. (Matthæusi 25:34, 46) Tamatuma pinissaanut uppernarsaatissaqarpugut, Guutimi taamatut neriorsuisoq ‘sallusuitsuuvoq’. (Titusi 1:2) Josvap qularutiginninnginneratut, Guutip neriorsuutaasa eqquunnissaat qularutiginngilluinnarsinnaavarput. Taassumami Israelikkut ima oqarfigai: “[Jehovap] Guutissi ilissinnut oqaatigisaasa ilaat ataasinnguarluunniit [qammuinnarsimanngilaq]. Tamarmik piviusunngorsimapput, oqaaseq ataasiinnarluunniit maangaannarsimanngilaq.” — Josva 23:14.

 ⁵ Guutip silarsuassaani nutaami inuuneq ullumikkutut pakatsinarnavianngilaq. Allatorluinnaq issaaq: Sorsuttoqarani pinerluttoqaranilu, piitsoqarani naapertuilluanngitsoqaranilu napparsimasoqaranilu toqusoqartarnavianngilaq. Inuit taamanikkussamut peqqilluinnartuussapput nunarsuarmilu paratiisinngortinneqarsimasumi inuussallutik. Nuannaarneq nalerisimaarnerlu taamanikkussamut ullut tamaasa misigiumaakkavut takorluukkatsinnik nuannernerpaanik akimuissapput. Ajugaasup nersornaatisiassaa nuanningaarami!

6, 7. (a) Guutip silarsuassaani nutaami suut pissanersut Jiisusip qanoq ililluni takutippaa? (b) Allaat toqusimagaluartut qanoq ilillutik inuuneq aallaqqaataaniit aallartissavaallusooq?

⁶ Jiisusip nunarsuarmiikkami Guutip anersaava illernartoq tupinnartulianik silarsuassami nutaami tamarmi piumaartunik takutitsisinnaannguutigaa. Assersuutigalugu Jiisusip angut ukiuni 38-ni nukillaarsimasimasoq makeqquaa angalaaqqullugulu. Biibilimi oqaluttuarineqarpoq angut taamaaliortoq. (Atuaruk Johannesi 5:5-9). Pisimasumi allami Jiisusip “inuk inunnguutsiminiilli tappiitsuusoq” naapippaa, ajorunnaarsippaalu. Kingusinnerusukkut angut taanna aperineqarami kimit ajorunnaarsinneqarsimanersoq ima akivoq: “Tappiitsuulluni erniusup isaanik uisitsisumik siornatigut tusartoqanngisaannarsimavoq. Taanna Guutimit pisuunngikkuni qanoq iliorsinnaassanngilaq.” (Johannesi 9:1, 6, 7, 32, 33) Jiisusip tamakku tamaasa iliuuserisinnaavai Guutimit taamaaliornissaminut nukissaqalersinneqarami. Sumulluunniit pigaluaraangami ‘napparsimasortaasunik ajorunnaarsitsisarpoq’. — Lukasi 9:11.

⁷ Jiisusi napparsimasunik innarluutilinnillu ajorunnaarsitsisinnaaginnanngilaq, aammali toqusimasunik makititsisinnaavoq. Assersuutigalugu niviarsiaqqap aqqaneq-marlunnik ukiullip toqunera angajoqqaavisa aliasuutigingaarpaat. Jiisusili ima oqarpoq: “Niviarsiaraq oqarfigaakkit: Nikuigit!” Nikuipporlu! Angajoqqaavisa najuuttullu allat qiimmattarnerat takorloorsinnaaviuk? (Atuaruk Markusi 5:38-42). Guutip silarsuassaani nutaami toqusimasut milliardillit makititaappata qiimmattarnersuaqassaaq, taamanikkussamummi ‘toqusut makikkumaarput — iluartut iluaatsullu’. (Apustilit Suliaat 24:15; Johannesi 5:28, 29) Naassaanngitsumik inuunissamik neriuuteqarlutik inuuneq aallaqqaataaniit aallartissavaallusooq.

8, 9. (a) Kristusip ukiuni tusindini naalakkersuinerani ajorti Adamimit kingornussaq qanoq pineqassava? (b) ‘Toqusimasut’ makititaasimasut suna tunngavigalugu eqqartuunneqassappat?

⁸ Makititaasimasut naassaanngitsumik inuunissamut periarfissinneqassapput, toqunnginnerminnilu ajortuliatik pillugit eqqartuunneqassanngillat. (Romamiut 6:7) Kristusip ukiuni tusindini naalakkersuinerani Guutip naalagaaffiani innuttaasut naalattut utertitsissutitut pilliutip pilluaqqussutissartai atorneqarnerujartortillugit naammalluinnartunngoriartuaassapput naggataatigullu Adamip ajortuliaata sunniutaanit tamanit aniguisitaalluinnassallutik. (Romamiut 8:21) Jehovap ‘toqu nungutissavaa piujunnaarsivillugu’, “Guutillu [Jehovap] isit tamaasa qullingiarumaarpai”. (Esaja 25:8) Aamma allassimavoq ‘mappersakkat mapperneqarumaartut’, tassa taamanikkussamut inuusut nutaanik paasissutissinneqassapput. (Saqqummersitat 20:12) Nunarsuaq paratiisinngortinneqariartuaartillugu ‘silarsuarmi najugallit iluartuliornissaq ilikkassavaat’. — Esaja 26:9.

⁹ Makititaasimasut ajorti Adamimit kingornussartik tunngaviginagu namminnerli iliuutsitik tunngavigalugit eqqartuunneqassapput. Saqqummersitat 20:12-imi ima allassimavoq: “[Toqusimasut] eqqartuunneqarput suliatik naapertorlugit, mappersakkani allassimasut malillugit,” tassa makititaanermik kingorna suliaat, imaluunniit iliuuserisaat. Tamanna Jehovap naapertuilluartuullunilu nallittuisuullunilu asannittuuneranut ersiutaalluarpoq! Aammattaaq taakku silarsuatoqqami inuunerminni misigisaat nuanniitsut “eqqaamaneerutissapput eqqaaqqinneqarnatillu”. (Esaja 65:17) Paasissutissat qiimmaallannartut taamanikkussamut nuannaarutigisinnaasatik inuunerminnilu misigisatik nuannersut pissutigalugit siornatigut pisimasut nuanniitsut aliasuutigiunnaassavaat. Tamakku tamarmik puiorneqarsimassapput. (Saqqummersitat 21:4) ‘Amerlangaartunut’ Harmagedonimi aniguisunut aamma taamatut pisoqassaaq. — Saqqummersitat 7:9, 10, 14.

10. (a) Guutip silarsuassaani nutaami inuuneq qanoq issava? (b) Ajugaasup nersornaatisiassaanik eqqarsaatiginnittuarnissamut suna iluaqutigissaviuk?

¹⁰ Guutip silarsuassaani nutaami inuit napparsimasaratik toqunatilluunniit inuusinnaassapput. “Innuttaasoq kinaluunniit oqassanngilaq: ‘Napparsimavunga!’” (Esaja 33:24) Nunarsuarmi innuttaasut  naggataatigut ullaat tamaasa itersinnaanngussapput peqqilluinnassusertik ullormillu nuanningaartumik misigisaqarnissamik qilanaarinninnertik nuannaarutigalugit. Nalerisimaarnartumik suliaqarnissartik inunnillu pitsaanerpaamik kissaassisuinnarnik peqateqarsinnaanissartik qilanaarisinnaavaat. Taamatut inuuneq ajugaasumut nersornaatisiassaavoq nuanningaartoq, ilaa? Soormi Biibili qupperukku siulittuutillu Esaja 33:24-mi aamma 35:5-7-imiittut atuarlugit? Allaaserineqartut takorloorniarsarikkit. Tamanna ajugaasup nersornaatisiassaanik eqqarsaatiginnittuarnissamut iluaqutigissavat.

Ajugaasup nersornaatisiassaanik puiuisut

11. Salomop naalakkersuinera qanoq aallartilluarnersoq oqaluttuariuk.

¹¹ Ajugaasup nersornaatisiassaa pillugu ilisimasaqaliinnarluta taanna eqqarsaatigiuarniartariaqarparput, taamaaliunngikkuttami puiorsinnaavarput. Salomo Israelimi kunnginngorami Guuti maniguulluni qinnuigaa silaqassusermik paasisimasaqassusermillu tuneqqulluni innuttani naapertuilluartumik eqqartuussinnaaniassagamigit. (Atuaruk 1 Kunngit 3:6-12). Tamatuma kingunerisaanik “Guutip Salomo tunivaa ilisimassusermik, paasisimasaqangaarnermik”. Aap, Salomop “[ilisimassutsimigut] akimorsimavai Kangiamiut ilisimassusiat tamaat Egyptenimiullu ilisimassusiat tamaat”. — 1 Kunngit 5:9-12.

12. Israelimi kunnginngortartut Jehovap qanoq mianersoqquai?

¹² Jehovali siusinnerusukkut mianersoqqusivoq kinaluunniit kunnginngortoq ‘hestinik amerlasuunik pissarseqqunagu’ aamma ‘amerlasuunik nuliaqaleqqunagu tamatumuuna tammartinneqaqqunagu’. (5 Mosesi 17:14-17) Kunngip hestinik amerlasuunik pissarsiguni takutissavaa inuiaqatigiinnik sernissuinissamut sakkutuut pissaanerat tatigalugu, Jehova, taakkua Sernissuisuat, pinnagu. Aamma amerlasuunik nuliarneq navianassaaq taakkua ilaat inuiannit guutipilussiortuninngaanneersuusinnaammata, aamma taakkua kunngi Jehovamik pallorfiginninnermik tunussisissinnaammassuk.

13. Salomop imminut tunniunneqartut qanoq ililluni puiorpai?

 ¹³ Salomop mianersoqqussutit taakku eqqumaffiginngilai. Jehovap kunngimut iliuusereqqunngisarpiaanik iliuuseqarpoq. Hestinik hestersussanillu tusindilinnik pissarsivoq. (1 Kunngit 5:6) Aamma piffissap ingerlanerani 700-nik nuliaqalerpoq 300-nillu panerfaqalerluni, ilarpassuilu inuiaqatigiinnit Guutimik nalusuneersuupput. Taakku taassuma uummataa ‘guutinut allanut saatsippaat Jehovamut Guutiminut uummammigut iluunngarluni ilumoorunnaarsillugu’. Guutimik nalusut guutipilui maajunnartut nuliami nunami allamiut nassataat pallorfigilerpai, taamaattumillu Jehovap oqarfigaa ‘naalagaaffianik arsaarumaarlugu’. — 1 Kunngit 11:1-6, 11.

14. Salomop inuiaqatigiillu tamarmik naalannginnerat qanoq kinguneqarpa?

¹⁴ Salomop Guutimut ilumoortumut sinniisuunermik immikkut pisinnaatitaaffik angingaartoq eqqarsaatigiunnaarpaa. Guutipilussiornermut akuulluinnalerpoq. Naggataatigut inuiaqatigiit tamarmik tunussisunngorput, tamannalu ukiumi 607-imi Kr.in.si. uppisitaanerannik kinguneqarpoq. Juutit piffissap ingerlanerani pallorfiginninnermik ilumoortumik pilersitseqqikkaluartut, Jiisusi ukiut hundredet arlallit tamatuma kingorna ima oqartariaqarpoq: “Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.” Taamatullu pisoqarpoq. Jiisusi ima nalunaarpoq: “Illorsi ilissinnut qimagaassaaq inuerullugu.” (Matthæusi 21:43; 23:37, 38) Inuiaqatigiit ilumuunnginnamik Guutimut ilumoortumut sinniisuuneq immikkut pisinnaatitaaffigiunnaarpaat. Ukiumi 70-imi Kr.in.king. Romamiut sakkutuuisa Jerusalemi naalaffillu piuneeruppaat, juutillu aniguisut ilarpassui inussiatut aallarunneqarput.

15. Pingaaruteqavissunik eqqarsaatiginnikkunnaartunik allanik eqqaasaqarit.

¹⁵ Judasi Iskarioti Jiisusip apustiliisa aqqaneq-marluk ilagaat. Taassuma Jiisusi ilinniartitsisoq tusarnaartarsimavaa Guutillu anersaavatigut illernartukkut tupinnartuliai takusarsimallugit. Uummatinili paarinngilaa. Aningaasivimmik Jiisusip apustiliisalu aningaasaataannik imalimmik paarsisussanngortinneqarsimavoq, ‘tillituujuvorli aningaasallu tassunga ikineqartut ilaannik tillittarluni’. (Johannesi 12:6) Ima piumatutigaaq naggataatigut sølvinik 30-nik akilersilluni Jiisusimik killuutiginninnissaq palasiunernut isumaqatigiissutigalugu. (Matthæusi 26:14-16) Toraakkaminik aalajangiusimannikkunnaartoq alla tassaavoq Demasi, apustilip Paulusip angalaqataasa ilaat. Demasip uummatini paarinngilaa. Paulusi ima allappoq: “Demasip silarsuaq manna nuannarinerulerlugu [qimappaanga].” — 2 Timotheusi 4:10; atuaruk Ussatit 4:23.

Tamatta immikkut ilinniutigisinnaasavut

16, 17. (a) Qanoq sakkortutigisumik akerlilersorneqarpugut? (b) Tamatuminnga akiuinissamut suna iluaqutigissavarput?

¹⁶ Guutip kiffaasa tamarmik oqaluttuat mianersoqqussutaasut Biibilimiittut eqqarsaatiminniitittariaqarpaat, imami allassimavoq: “Tamakku tamarmik taakkununnga nalliupput mianersoqqussutaallutik, allassimappullu uatsinnut ullut naggatissaannik angumerinnittunut ilitsersuutaallutik.” (1 Korinthimiut 10:11) Maanna pissutsit aaqqissuussaanerata ajortup matuma ulluini kingullerni inuuvugut. — 2 Timotheusi 3:1, 13.

¹⁷ Saatanip Diaavulup, ‘silarsuup matuma guutiata’, “piffissakissutsi” nalunngilaa. (2 Korinthimiut 4:4; Saqqummersitat 12:12) Jehovap kiffai kristumiutut assuarnaakkunnaarsinniarlugit sapinngisani tamaat iliussaaq. Saatanip silarsuaq manna tamatumalu sunniiniuterpassui tamaasa aquppai. Jehovalli innuttai sunniisinnaassuseqarnerungaartumik, pissaaneqarnerungaartumik, pigisaqarput —  “pissaaneq asseqanngitsoq”. (2 Korinthimiut 4:7) Pissaanermik Guutimeersumik tamatuminnga Saatanip akerlilersorniarluta atugaanik sumilluunniit akiuinissamut iluaqutiginninnissarput qularutiginngilluinnarsinnaavarput. Taamaattumik kajumissaarneqarpugut  qinujuaqqulluta, qularutiginagu Jehovap “imminut qinusut Anersaamik Illernartumik tuniumaarai”. — Lukasi 11:13.

18. Silarsuaq ajortoq maanna atuuttoq qanoq isigisariaqarparput?

¹⁸ Aamma Saatanip aaqqissuussaata tamarmi qanittukkut piuneerunneqarumaarneranik kristumiullu ilumoortut aniguiumaarnerannik ilisimaarinninnerput nakussatsissutigisinnaavarput. “[Silarsuaq] piumatussusialu nungussapput, Guutilli piumasaanik iliortoq naassaanngitsumik atassaaq.” (1 Johannesi 2:17) Taamaattumik Guutip kiffaasa ilaat isumaqaruni silarsuarmi matumani Jehovamut attaveqarnerminit pingaaruteqarnerusoqartoq sianiilliungaassaaq. Silarsuaq manna, Saatanimit aqunneqartoq, umiarsuartut kiviartortutut ippoq. Jehova ilagiinnik kristumiunik, “annanniummik”, kiffami aalajaatsut annanniarfigisinnaasaannik pilersitsisimavoq. Silarsuassap nutaap tungaanukarnerminni neriorsuut manna upperisinnaavaat: ‘Pinerluttut piiagaasussaapput, Jehovamulli neriuttut nuna kingornutissavaat.’ (Tussiaat 37:9) Taamaattumik ajugaasup nersornaatisiassaa nuanningaartoq taanna eqqarsaatigiuaruk!

Eqqaamavigit?

• Paulusip ajugaasup nersornaatisiassaa qanoq isigaa?

• Nunarsuarmi inuusussat suna tunngavigalugu eqqartuunneqassappat?

• Maanna qanoq ilioruit silatusaassavit?

[Atuaqqissaarnermi apeqqutit]

[Qupp. 13-mi assiliartat]

Biibilimi oqaluttuanik atuaraangavit takorloortarpiuk ajugaasup nersornaatisiassaa illit nammineq pigit?