Siunnersuutinik atoriaannaasunik ujartuineq

SIUNNERSUUTINIK ujartuiguit sivisuumik ujaasisariaqanngilatit. Imminut ikiornissamut iluaqutissanik nioqqutissiortut silarsuarmi amerliartupallannerpaanut ilaapput. Nunani assigiinngeqisuni, soorlu Japanimi, Tuluit Nunaanni, USA-mi nunanilu Latinamerikamiittuni atuakkat imminut ikiorniarnermut naatsorsuussat pisiarineqarnerpaapput. Videot, kursusit tv-milu aallakaatitassiat imminut ikiorniarnermut tunngasut nuannarineqaleraluttuinnarput. Inuppassuit psykologimut, aappariinnik siunnersuisartumut palasimulluunniit ikiortissarsioqqaarnatik ajornartorsiutiminnik namminneq aaqqiisinnaaneq kajungernartittarpaat. Atuakkani imminut ikiorniarnermut naatsorsuussani assigiinngitsuni suut sammineqartarpat?

Sammineqarnerpaanut ilaasarput imminut ineriartortinnissaq, aappassarsiorneq meeqqanillu perorsaaneq. Inuppassuit soqutigisaat allat tassaapput nikallorujussuaqqanerup, aliasunnerup avinnerullu sunniutaasa qanoq anigorneqarsinnaanerannut tunngasut. Aamma inuppassuaqarpoq qanoq pujortarunnaartoqarsinnaanera pillugu imaluunniit qanoq nerivallaarunnaarlunilu imerpallaarunnaartoqarsinnaanera pillugit siunnersorneqarumasunik. Atuakkani taama ittuni siunnersuutit iluaqutaasarpat? Ilaannikkut iluaqutaasarput, amerlanertigulli iluaqutaaneq ajorput. Taamaattumik silatusaarnerussaaq mianersoqqussutip Biibilimiittup matuma eqqarsaatiginissaa: “Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.” — Ussatit 14:15.

Atuakkat imminut ikiorniarnermut naatsorsuussat assiliineq, naatsorsuuserineq oqaatsilluunniit pillugit atuakkanit najoqqutassanit allaanerujussuupput. Atuakkat najoqqutassat iluaqutaasinnaapput immikkullu ittumik kursusernissamit akikinnerusinnaallutik. Atuakkalli imminut ikiorniarnermut naatsorsuussat  allaanerupput — niuernermut, aappariinnermut, meeqqanik perorsaanermut eqqarsartaatsikkulluunniit peqqissusermut tunngagaluarunilluunniit. Atuakkani taama ittuni aalajangersimasumik inooriaaseqarnissaq imaluunniit aalajangersimasumik inuunermik isumaliutersuuteqarnissaq kajumissaarutigineqarajuppoq. Taamaattumik pitsaassaaq imminut ima aperigaanni: ‘Kikkunuku taamatut siunnersuisut? Paasissutissat siunnersuisup ingerlateqqitai suminngaanneerpat?’

Immikkut paasisimasallit oqaaserisatik uppernarsaatinik immikkoortiteqqissaakkanik tunngaveqartittuaannanngilaat. Ilaat pisiariumaneqarnerusunik siunnersuuteqartarput, aamma nalunngilaat inuit tusarusutaannik siunnersuuteqarneq aningaasarsiorluarnartoq. Nunami ataasiinnarmi imminut ikiornissamut iluaqutissanik nioqqutissiorneq ukiut tamaasa 45 milliardit koruunit sinnerlugit isertitaqartitsisarpoq.

Atuakkat imminut ikiorniarnermut naatsorsuussat qanoq atorsinnaatigippat?

Atuakkamik taama ittumik pissarsisimagaanni siunnersuutinik atoriaannaasunik tassaniittoqarnissaa naatsorsuutigineqartarpoq. Ilaannikkulli paasissutissat atuakkani taama ittuniittut qarsupittuusarput eqqarsaatersuutaannaasarlutilluunniit. Siunnersuutigineqarajuttoq mannaavoq: ‘Isumalluaruit sutigut tamatigut iluatsissaatit. Sunilluunniit kissaateqaraluaruit, pisuussutinik, peqqissuunissamik inummulluunniit allamut isumaqarluartumik attaveqarnissamik kissaateqaraluaruit, tamakku angusinnaavatit isumalluartuunikkut.’ Siunnersuut tamanna atorluarneqarsinnaava? Inuunermi piviusut pakatsissutigisallu naammagalugit atornissaannut iluaqutaassava?

Assersuutigalugu eqqarsaatigeriaruk atuakkat nuannarineqartupilussuit aappariinnermut allanullu attaveqarnermut tunngasut. Taakku inuit ilaqutariittut pilluarlunilu nukittunissamut iluaqutigisarpaat? Tamatiguunngitsoq. Atuakkialerisoq allappoq atuakkanik imminut ikiorniarnermut naatsorsuussanik asanninnermut tunngasunik Latinamerikami nuannarineqartorujussuanngupallattunik atuakkiortup “atuartussat aappariilluarnermik imminullu tatiginermik qanoq ineriartortitsisinnaanerannik siunnersorai”. Atuakkiortup aappariittut ingerlalluarnani qimanngikkaanni, tamanna imminut salloqittapajaarnerunerarpaa. Matumani oqariartuut tunngaviusoq tassaavoq iliuusererusunnerusat iliuuserineqassasut ajornartorsiutit iliuuseqarfiginagillu aaqqinniarsarinagit.

Atuakkat imminut ikiorniarnermut naatsorsuussaasut soorunami pitsaasunik siunnersuutitaqarsinnaapput, aammali ajortunik ilaqarsinnaapput. Immikkut ilisimasalik aalajangersimasumut tunngatillugu immaqa siunnersuuteqarpoq, allamulli tunngatillugu siunnersuutaa immaqa atukkanik ajornerulersitseqataalluni. Isummat amerlasuut imminut naapertuutinngikkajuttut atuakkani taama ittuni ersersinneqartut immikkoortiteruminaapput. Kia siunnersuutai tutsuigisinnaavavut? Imminut ima aperigit: ‘Siunnersuut tamanna misilittaqqissaarneqareerpa, imaluunniinuna atuakkiortup nammineq isumaa? Atuakkiortup pisuunngorusussusia tusaamasanngorusussusialu uppernassusianut qanoq sunniuteqartigaa?’

Atuagaqarporli siunnersuutinik iluaqutaajuarsimasunik imalimmik, tassa Biibili. Tassani siunnersuutit atoriaannaasut atuakkani imminut ikiorniarnermut naatsorsuussani sammineqartartunut allarpassuarnullu tunngasut nanineqarsinnaapput. Inuit millionillit Biibili kajumississutigisimavaat kajumissaarummik matuminnga malinninnissamut: “[Allanngoritsi] isummassigut nutaanngortitaajuarlusi.” (Romamiut 12:2) Biibilimi siunnersorneqarlutalu ilitsersorneqarpugut ajornartorsiutinut pissutaasunik paasinninnissamut taakkulu qanoq iliuuseqarfiginissaasa paasinissaanut iluaqutissatsinnik. Pingaarnerpaamillu, Biibili eqqortumik iliornissamut kajumissisitsingaarsinnaavoq. Allaaserisami tulliuttumi tamanna sammineqassaaq.