’Ikinngutigissavassi’

“Inassutikka malillugit iliorussi tassaassaasi ikinngutikka [ikinngutigissavassi, 1936].”— JOHANNESI 15:14.

1, 2. (a) Jiisusip ikinngutai assigiinngitsunik sunik tunuliaqutaqarpat? (b) Sooq Jiisusimut ikinngutaanissaq pingaaruteqarpa?

ANGUTIT Jiisusi peqatigalugu inimi qullermiittut assigiinngitsunik tunuliaqutaqarput. Qatanngutigiit Petrusi Andreasilu aalisartuusimapput. Matthæusi ilanngaaserisuusimavoq — juutit asissugaannik atorfeqarsimavoq. Najuuttut ilaasa, ilaatigut Jaakup Johannesillu Jiisusi nukappiaraallutilli ilisarisimasimagunarpaat, allat, ilaatigut Nathanaelip, ukiualuinnarni ilisarisimasimagaat. (Johannesi 1:43-50) Jerusalemimili unnummi pingaarutilimmi tamatumani najuuttut tamarmik qularutiginngilaat Jiisusi tassaasoq Missiarsi neriorsuutigisaq, Guutip uumasup ernera. (Johannesi 6:68, 69) Taanna ima oqarmat qamuuna nuannaajallassimassapput: “Ikinngutinik taavassi Ataatannit tusarsimasakka tamaasa ilissinnut ilisimalersissimagakkit.” — Johannesi 15:15.

² Jiisusip matumani apustiliminut aalajaatsunut oqaasii ullumikkut kristumiunut tanitanut tamanut, annertunerusumillu isumaqartillugu, taakkua suleqataannut ‘savanut allanut’  atuupput. (Johannesi 10:16) Qanorluunniit tunuliaqutaqaraluarutta Jiisusimut ikinngutaaneq immikkut pisinnaatitaaffigisinnaavarput. Taassumunnga ikinngutaanerput pingaaruteqangaarpoq, ikinngutigigutsigu aamma Jehova ikinngutigissagatsigu. Tassami Kristusimut qanilleqqaartinnani Jehovamut qanillisoqarsinnaanngilaq. (Atuakkit Johannesi 14:6, 21). Jiisusimulli ikinngutaajuarumalluta qanoq iliortariaqarpugut? Pingaarutillip tamatuma samminnginnerani Jiisusip ikinngutaalluarneq eqqarsaatigalugu nammineq maligassiaa misissoriartigu ajoqersukkallu taassuminnga ikinnguteqarnertik pissutigalugu iliuuserisaat sumik ilinniarfigisinnaanerlugit paasiniarlugu.

Jiisusip ikinngutitut maligassiuilluarnera

3. Jiisusip suut ilisimaneqaatigai?

³ Kunngi Salomo silatooq ima allappoq: “Pisooq amerlasuunik ikinnguteqartarpoq.” (Ussatit 14:20) Ussammi tamatumani naatsumik oqaatigineqarpoq inuit naammalluinnanngitsut namminneq iluaqutigisinnaasatik eqqarsaatigalugit, nammineq tunniussinnaasatik eqqarsaatiginagit, ikinngutitaartoqqajaasartut. Jiisusi taamatut sanngiiffeqanngilaq. Inuup aningaasaqarnikkut innuttaaqatigiinniluunniit inissisimaffianit sunnertinneq ajorpoq. Ilumoorpoq Jiisusip angut inuusuttoq pisooq naalagaasut ilaat asaleraa imminullu ajoqersuganngoqqullugu kajumissaaraa. Jiisusilli angut taanna peqquaa pigisani tamaasa akigissagai piitsunullu tunniullugit. (Markusi 10:17-22; Lukasi 18:18, 23) Jiisusip pisuunik nuimasunillu ikinnguteqarneq ilisimaneqaatiginagu piitsunik inuiaqatigiinnilu asissugaasunik ikinnguteqarnini ilisimaneqaatigaa. — Matthæusi 11:19.

4. Jiisusip ikinngutaasa kukkusarnerat qanoq erserpa?

⁴ Jiisusip ikinngutai soorunami inuupput naammalluinnanngitsut kukkusartut. Assersuutigalugu Petrusip pissutsit Jehovap isiginnittaasiatut isigiuaannanngilai. (Matthæusi 16:21-23) Aamma Jaakup Johannesillu Jiisusi Guutip naalagaaffiani nuimasumik inissisimaffileqqullutik qinnuigigamikku ataqqineqarumatunertik qulaarpaat. Taakkua qinnutaat apustilit allat kamaatigaat, apustilillu nuimarusunnerat unamminerannut pissutaajuarpoq. Jiisusilli naammagittarluni ikinngutimi eqqarsartaasii naqqinniarsarisarpai uumitsaateqqajaanerlu ajorlugit. — Matthæusi 20:20-28.

5, 6. (a) Sooq Jiisusip apustilit amerlanersaat ikinngutigiuarpai? (b) Sooq Jiisusip Judasi ikinngutigiunnaarpaa?

⁵ Jiisusip angutinut naammalluinnanngitsunut taakkununnga ikinngutaajuarneranut pissutaasoq tassaanngilaq maleruutianera naammalluinnanngissutaannillu sianiginninngitsuusaarnera. Pissutaasoq tassaavoq taakkua pissutiginiagaannik pissusiinillu ajunngitsunik isiginiaanerunera. Assersuutigalugu Petrusi, Jaaku Johannesilu Jiisusi artornartorsiornerpaaffiani tapersersornagu sinilerput. Jiisusi pakatsimmat paasinarpoq. Ajunngitsunilli pissutiginiagaqarnerat  maluginiarpaa imalu oqarluni: “Anersaaq kajumikkaluarpoq, uinilli qajannarpoq.” — Matthæusi 26:41.

⁶ Jiisusilli Judasi Iskarioti ikinngutigiunnaarpaa. Judasi ikinngutaasuusaartuaraluartoq Jiisusip paasivaa qanimut suleqatigisimasami taassuma uummatini ajortunngortissimagaa. Judasi silarsuarmut ikinngutaalersimavoq taamaalillunilu imminut Guutimut akeranngortilluni. (Jaaku 4:4) Taamaattumik Jiisusip apustilinut aalajaatsunut aqqanilinnut kinguleruttunut ikinngutaanini nalunaarutigigamiuk Judasi aallartereerpaa. — Johannesi 13:21-35.

7, 8. Jiisusip qanoq ersersippaa ikinngutini asallugit?

⁷ Jiisusip ikinngutimi aalajaatsut kukkuneri isiginiarnerunngilai, taakkununngali pitsaanerpaaq eqqarsaatigiuaannarpaa. Assersuutigalugu Ataatani qinnuigaa taakku misilinneqarneranni sernissoqqullugit. (Atuaruk Johannesi 17:11). Jiisusip taakkua timikkut pisinnaasaasa killeqarnerat eqqumaffigaa. (Markusi 6:30-32) Aamma nammineq qanoq isumaqarnerluni oqaluttuunnissaat kisiat soqutiginagu aammali taakkua eqqarsaataasa misigissusiisalu paasinissaat soqutigaa. — Matthæusi 16:13-16; 17:24-26.

⁸ Jiisusi ikinngutini pillugit inuullunilu toquvoq. Soorunami nalunngilaa Ataatami naapertuilluarnermut najoqqutassiaa pissutigalugu inuunini pilliutigisariaqarlugu. (Matthæusi 26:27, 28; Hebræerit 9:22, 28) Jiisusili taamatut pilliuteqarpoq asanninneq kajumississutigalugu. Nammineq ima oqarpoq: “Annerusumik asanninneqanngilaq ikinngutini pillugit inuunerminik akiginnittup asanninneranit.” — Johannesi 15:13.

Ajoqersukkat Jiisusimut ikinngutaanertik sunissamut kajumississutigaat?

9, 10. Jiisusip tukkortuunera inuit qanoq periarfigaat?

⁹ Jiisusi allanut piffissaqarluartarlunilu tunniusimangaartarpoq sapinngisanilu naapertorlugu tunisisarluni. Inuit tamanna pissutigalugu taanna kajungerilertarpaat akillugulu iliuuseqarusulertarlutik. (Lukasi 8:1-3) Jiisusi nammineq misigisimasani tunngavigalugit ima oqarsinnaasimavoq: “Tunisigitsi, taava ilississaaq tunineqassaasi. Uuttukkap imai ajunngitsut naqittaassat aalaterussat qammisimasullu ilissinnut tunniunneqarumaarput. Uuttuutigisassinnimmi uuttuiffigineqarumaarpusi.” — Lukasi 6:38.

¹⁰ Inuit ilaasa soorunami Jiisusi ilaginiartarpaat taassumannga pisinnaasatik kisiisa pissutigalugit. Ikinngutaasuusaartut taakkua Jiisusi qimappaat oqaasii paatsooramikkit. Jiisusi paasinngisaminnik oqaaseqarmat ajunngitsumik eqqarsarnatik kukkusumik isummipallapput tunullugulu. Apustililli ilumoorfiginnipput. Jiisusimut ikinngutaanerat misilinneqarajuppoq, piffissanili ajunngitsuni ajortunilu tapersersorniarlugu sapinngisartik tamaat iliuuseqarput. (Atuakkit Johannesi 6:26, 56, 60, 66-68). Jiisusip nunarsuarmi inuttut inuunermini unnummi kingullermi ikinngutiminik pingaartitsinini ersersippaa ima oqarluni: “Ilissi uannut najuuttuartuuvusi misilinneqarfigisanni.” — Lukasi 22:28.

11, 12. Jiisusip ajoqersukkanut ikinngutaanini qanoq uppernarsarpaa, taakkulu qanoq periarpat?

¹¹ Jiisusip ajoqersukkami ilumoorfiginninnerat pillugu nersualaarinerata kinguninngua taakkua taanna qimappaat. Inunnut qununertik Kristusimik asanninnerminnit malunnarnerutikkallarpaat. Jiisusilli taakku isumakkeerfigeqqippai. Toqunermi kingorna Jiisusi taakkununnga saqqummerpoq oqarfigalugillu suli ikinngutigalugit. Aamma illernartumik suliassippai — tassa ‘inunnik inuiannit tamaneersunik’ (NV) ajoqersuganngortitsiortornermik   “nunarsuullu isua tikillugu allaat” imminik pilluni nalunaajaanermik. (Matthæusi 28:19; Apustilit Suliaat 1:8) Taakku qanoq periarpat?

¹² Ajoqersukkat uummatikkut tarnikkullu iluunngarlutik Guutip naalagaaffia pillugu tusarliussamik siaruarteripput. Jehovap anersaava illernartoq iluaqutigalugu Jerusalemi ajoqersuutiminnik erniinnaq tamakkerpaat. (Apustilit Suliaat 5:27-29) Toqutaanissamik sioorasaarneqaraluarlutilluunniit Jiisusip ajoqersuganngortitsiortornissamik peqqussutaa naalakkunnaanngilaat. Jiisusimit taamatut peqquneqarnerminnit ukiut qulikkuutaat arlaqanngitsuinnaat qaangiummata apustili Paulusi allassinnaasimavoq nutaarsiassaq nuannersoq oqaluussissutigineqarsimasoq “qilaap ataani pinngortitanut tamanut”. (Kolossemiut 1:23) Ajoqersukkat taakku ilumut ersersippaat Jiisusimut ikinngutaanerminnik pingaartitsillutik!

13. Ajoqersukkat Jiisusip ajoqersuutai imminnut qanoq sunniuteqartippaat?

¹³ Aamma ajoqersuganngortut Jiisusip ajoqersuutaa inooriaatsiminnut sunniuteqartippaat. Ilarpassui pissusilersornerminnik inuttullu pissusiminnik allannguerujussuarput. Ajoqersuganngorlaat ilaat suiaassuseqatiminnik atoqateqartartuusimapput, allasiortuusimapput, imerajuttuusimapput tillittuusimallutilluunniit. (1 Korinthimiut 6:9-11) Allat naggueqatigiinnut allanut isiginnittaatsiminnik allannguisariaqarsimapput. (Apustilit Suliaat 10:25-28) Jiisusili naalassimavaat. Inuttut pissusitoqartik peersimavaat nutaarlu atisimallugu. (Efesosimiut 4:20-24) Aap, “Kristusip eqqarsaatai” paasisimavaat — taassuma eqqarsartaasia periaasialu paasisimallugillu ilaarsimavaat. — 1 Korinthimiut 2:16.

Ullumikkut Jiisusimut ikinngutaaneq

14. Jiisusi ‘pissutsit aaqqissuussaanerata naggataatungaani’ suniarluni neriorsuiva?

¹⁴ Ukiuni hundredelinni siullerni kristumiut taakkua ilarpassuisa Jiisusi namminneq ilisarisimasimalluguluunniit makititaanerata kingorna takusimavaat. Soorunami uagut tamanna immikkut pisinnaatitaaffiginngilarput. Qanormi ililluta Kristusimut ikinngutaasinnaavugut? Ilaatigut inussiaqatigiit aalajaallutillu silatuut, Jiisusip qatanngutaasa tanitat suli nunarsuarmiittut, siunnersuutaannut naalannikkut. Jiisusi neriorsuivoq ‘pissutsit aaqqissuussaanerata naggataatungaani’ inussiaq taanna “pigisaminut tamanut” paarsisunngortikkumaarlugu. (Matthæusi 24:3, 45-47, NV) Ullumikkut Kristusimut ikinngutaajumasut amerlanersaat inussiaqatigiinnut ilaasortaanngillat. Inussiap aalajaatsup siunnersuutaanut periarnerat Kristusimut ikinngutaanerannut qanoq sunniuteqartarpa?

15. Inuup savatut savaasatulluunniit isigineqarnissaanut suna aalajangiisuua?

¹⁵ Atuakkit Matthæusi 25:31-40. Jiisusip inussiamut aalajaatsumut ilaasortaasussat qatanngutimisut eqqartorpai. Jiisusip savat savaasanit immikkoortiterneqarnerannik assersuusiaanit erseqqippoq Jiisusip qatanngutaanut iliuuserisartakkavut imminut iliuuserineqartutut isigisarai. Oqarpormi inuup Jiisusip qatanngutaasa minnersaannuugaluartumulluunniit  iliorfiginneriaasia savanut savaasanulluunniit ilaanissaanut aalajangiisuusoq. Tassa nunarsuarmi inuunissamik neriugisallit pingaarnerpaamik inussiaqatigiinnik tapersersuinikkut ersersissinnaavaat Kristusimut ikinngutaajumallutik.

16, 17. Kristusip qatanngutaanut ikinngutaanerput qanoq ersersissinnaavarput?

¹⁶ Guutip naalagaaffia naalakkersuilerpat nunarsuarmi inuunissamik neriuuteqaruit, taava Kristusip qatanngutaanut ikinngutaanerit qanoq ilillutit iliuutsikkut ersersissinnaaviuk? Iliuuserineqarsinnaasut pingasut sammeriartigit. Siullermik, uummatikkut iluunngarlutit oqaluusseqataanikkut. Kristusip qatanngutini peqquai ‘nutaarsiassamik nuannersumik’ (NV) silarsuarmi tamarmi oqaluussissutiginneqqullugit. (Matthæusi 24:14) Ullumikkut Kristusip qatanngutaasa nunarsuarmiittut kinguleruttut savanit allanit suleqatiminnit ikiorneqarnatik tamatuma akisussaaffiginissaa sapissagaluarpaat. Aap, savanut allanut ilaasut oqaluusseqataagaangamik tamatigut Kristusip qatanngutai suliassaannik illernartumik naammassinninnissaannut ikiortarpaat. Kristusi inussiarlu aalajaallunilu silatooq taamatut ikinngutitut iliorfigineqarnerminnik qujamasuutiginningaarput.

¹⁷ Savanut allanut ilaasut Kristusip qatanngutaanik ikiuiniarlutik iliuuserisinnaasaat alla tassaavoq oqaluussinermik aningaasatigut tapersersuineq. Jiisusip ajoqersukkani kajumissaarpai ‘pisuussutinik naapertuilluanngitsunik’ (NV) ikinngutissarsiutiginneqqullugit. (Lukasi 16:9) Imaanngilaq Jiisusimut Jehovamullu ikinngutaaneq pisiarisinnaagipput. Guutilli naalagaaffiata soqutigisaanik siuarsaanermut pigisatsinnik atuinitsigut ikinngutaanerput asanninnerpullu “oqaasiinnartigut oqaannakkulluunniit pinnata” ersersittarparput. (1 Johannesi 3:16-18) Taamatut aningaasatigut tapersiisarpugut oqaluusseqataagaangatta, ataatsimiittarfitsinnik sananermut aserfallatsaaliinermullu silarsuarlu tamakkerlugu oqaluussinermut aningaasanik tunissuteqaraangatta. Assut immannguarluunniit tunissuteqaraluarutta qularutiginngilluinnarsinnaavarput Jehovap Jiisusillu kajumilluta tunisisarnerput qujamasuutigigaat. — 2 Korinthimiut 9:7.

18. Sooq utoqqaanertat ilagiinniittut siunnersuutaat Biibilimik tunngavillit naalattariaqarpavut?

¹⁸ Kristusimut ikinngutaanerput ersersinniarlugu tamatta iliuuserisinnaasarput suli alla tassaavoq utoqqaanertanik ilagiinniittunik suleqateqarneq siunnersuutaallu malillugit iliorneq. Angutit taakku Kristusip siulersuineratigut anersaamit illernartumit toqqagaapput. (Efesosimiut 5:23) Apustili Paulusi ima allappoq: “Siulersortisi naalassigit peqqusaallu maleruarlugit.” (Hebræerit 13:17) Ilaannikkut immaqa utoqqaanertat najukkatsinniittut aqqutigalugit uagutsinnut siunnersuutigineqartut Biibilimik tunngavillit naalannissaat unamminiarnartutut isigisarparput. Qularnanngitsumik taakkua kukkuneri nalunngilavut, taamaammallu taakkua siunnersuutaat kukkusumik isigisinnaavavut. Kristusilli, ilagiinnut niaquusup, angutit naammalluinnanngitsut taakku atussallugit nuannaarutigisarpaa. Taamaattumik taakkua oqartussaassusiannut isiginnittaaserput Kristusimut ikinngutaanitsinnut toqqaannartumik sunniuteqartarpoq. Utoqqaanertat kukkuneri pillugit isumakkeerfigigaangatsigit kajumillutalu taakkua siunnersuutaat malillugit ilioraangatta Kristusimik asanninnerput uppernarsartarparput.

Sumi pitsaasunik ikinngutitaarsinnaasugut

19, 20. Ilagiinni kikkut naapissinnaavavut, allaaserisamilu tulliuttumi suna sammineqassava?

¹⁹ Jiisusip paarsisut asannittut nakkutilliisut aqqutigalugit isumassortuarpaatigut, aammali anersaakkut anaanartaartillutalu qatanngutitaartippaatigut. (Atuakkit Markusi 10:29, 30). Illit ilaquttatit qanoq periarpat Jehovap peqatigiissortaaniittut peqatigisalerakkit? Neriunarpoq Guutimut Kristusimullu qanilliniarninni tapersersorsimagaatsit. Jiisusilli mianersoqqussutigaa angutip ‘inoqutini akerarilissagai’. (Matthæusi 10:36) Taamaattumik tuppallersaataaqaaq nalunagu ilagiinni inoqartoq  qatanngutivitsinnit qaninnerulersinnaasatsinnik! — Ussatit 18:24.

²⁰ Soorlu Paulusip ilagiinnut Romamiittunut allakkami naanerani inuulluaqqussutaanit ersertoq taanna qanimut ikinnguterpassuaqarpoq. (Romamiut 16:8-16) Aamma apustilip Johannesip allakkami pingajui ima naggaserpai: “Ikinngutit tamaasa immikkut inuulluaqqutikkigit.” (3 Johannesi 15) Erseqqippoq aamma taanna ataavartunik ikinnguterpassuaqartoq. Jiisusip ajoqersugaasalu siulliit anersaakkut qatanngutitsinnik ilagiinniittunik ikinngutitaartornermut ikinnguteqartuarnermullu tunngatillugu maligassiaat qanoq ililluta ilaarsinnaavarput? Apeqqut tamanna allaaserisami tulliuttumi sammineqassaaq.

Qanoq akissavit?

• Jiisusi ikinngutaalluarneq eqqarsaatigalugu qanoq maligassaalluarpa?

• Ajoqersukkat Jiisusimut ikinngutaanertik qanoq periarfigaat?

• Qanoq ililluta ersersissinnaavarput Kristusimut ikinngutaalluta?

[Atuaqqissaarnermi apeqqutit]

[Qupp. 20-mi assiliartaq]

Jiisusip ikinngutimi eqqarsaataat misigissusiilu soqutigai

[Qupp. 22-mi assiliartaq]

Qanoq ililluta ersersissinnaavarput Kristusimut ikinngutaajumalluta?