Piitsuuneq Guutimit iluarisaannginnermut ersiutaava?

GUUTIP itsaq Israelikkut ima oqarfigai: ‘Ilinni piitsoqassanngilaq.’ Inatsisit taakkununnga tunniussai naapertorlugit taakku piitsunik isumassuisartussaapput allaallu allat akiitsuinik isumakkeerfiginnittartussaallutik. (5 Mosesi 15:1-4, 7-10) Taamaattumik Israelikkut akornanni piitsoqartariaqanngikkaluarpoq, Jehovammi taakku pilluaqquniarlugit neriorsorsimavai. Pilluaqquneqassagunilli Inatsisinik maleruaasariaqarput, maleruaanngillalli.

Imaanngilarli pigisakitsut Guutimit iluarisaanngitsut aamma naammattunik pillit Guutimit akuerisaasut. Guutip kiffaasa aalajaatsut ilarpassui pigisatigut piitsuupput. Pruffiiti Amosi savanik paarsisuuvoq piitsoq ukiullu ilaannaatigut suliassaqartartuulluni. (Amosi 1:1; 7:14) Pruffiitip Eliap nalaani Israelimi kaannersuaqalermat Elia uillarnerup piitsup inooroorsaarusussusia pissutigalugu inuussutissaqarpoq. Uillarneq taanna immannguaannaq qajuusaateqarlunilu uuliaateqarpoq, kaannersuullu nalaani taakku tupinnartuliornikkut nungunneq ajorput. Elia uillarnerluunniit taanna pisuunngunngillat; Jehovap taakkua pisariaqartitaat pingaarnerusut matussusiinnarpai. — 1 Kunngit 17:8-16.

Nalaatsornikkut pisut inuit piitsunnguutigeriataarsinnaavaat. Ajutoornerit nappaatillu inuit ilaasa sulisinnaajunnaarallassutigisinnaallugillu sulisinnaajunnaarluinnassutigisinnaavaat. Aamma toqu ilaasa uillarninnguutigalugulu iliarsunnguutigisinnaavaat. Allaat pissutsit unamminiarnartut tamakku Guutimit iluarisaannginnermut ersiutaasinnaanngillat. No’omimik Ruthimillu oqaluttuaq Jehovap piitsunik asannittumik isumassuisarneranut takussutissaavoq killitsinnartoq. Taakku uitik toqummata annikilliungaarput, Jehovalli pilluaqquai pisariaqartitaallu isumagalugit. — Ruthi 1:1-6; 2:2-12; 4:13-17.

Tassa erseqqippoq piitsuussuseq Guutimit iluarisaannginnermut ersiutaanngitsoq. Jehovamut aalajaatsut kunngip Daavip qularutiginngisaa manna aamma qularutiginngilluinnarsinnaavaat: “Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik qitornaanilluunniit nerisassanik qinnuuloortunik.” — Tussiaat 37:25. (wp09 09/01-E)

[Qupp. 8-mi assiliartaq]

No’omi Ruthilu piitsuupput, Guutilli pilluaqquai asannittumillu isumassorlugit