Maliina: Aluu, Susie. Sapaatip-akunnerani kingullermi Jiisusip Kristusip toquneranik eqqaaniaanermut najuuttutit takullugu nuanneqaaq. * Ataatsimiinneq qanoq igaajuk?

Susie: Nuannaraara, oqaatigineqartulli ilaat paasilluanngilakka. Tusartarpara Jiisusip inuuia juullimi toqusunillu makititaanera poorskimi nalliussineqartartut, toquneratali eqqaaniarneqartarnera aatsaat tusarpara.

Maliina: Ilumoorpoq silarsuarmi sumi tamani juullip poorskillu nalliuttorsiutigineqartarnerat pingaartinneqartut. Jehovap Nalunaajaasuili isumaqarput Jiisusip toqunerata eqqaaniarneqarnissaa pingaaruteqartoq. Piffissaqalaaruit erseqqissaalaarsinnaavunga.

Susie: Ilaana piffissaqarpunga.

Maliina: Jehovap Nalunaajaasui Jiisusip toquneranik eqqaaniaallutik nalliuttorsiortarput taassuma ajoqersukkani taamaaliortaqqummagit. Jiisusi aqagumut toqusussaasoq qanoq pisoqarnersoq eqqartoriartigu. Taassuma ajoqersukkani aalajaatsut immikkut ittumik nereqatigigai eqqaamaviuk?

Susie: Nerliivik piviuk?

Maliina: Aap, taanna. Aamma Naalakkap unnukkorsiortitsineranik taaneqartarpoq. Taamani unnukkorsiortillutik Jiisusip ajoqersukkani erseqqissumik ilitsersorpai. Jiisusip oqaasii Iivangkiiliu Lukasip allagaa 22:19-mi allassimasut atuarusuppigit?

Susie: Aappi. “Timiusarlu tiguaa, qujallunilu aggorpaa, taakkununngalu tunniullugu oqarpoq: ‘Tassa timiga ilissi pillusi tunniunneqartoq. Taamaaliortaritsi uanga eqqaaniarlunga!’”

Maliina: Qujanaq. Versimi tamatumani oqaaseqatigiinni kingullerni Jiisusip peqqussutaa malugiuk: “Taamaaliortaritsi uanga eqqaaniarlunga!” Jiisusip eqqaaniartaqqulluni oqanngitsiarluni imminut tunngasoq suna eqqaaniartassagaat erseqqissarpaa. Oqarpoq taakku pillugit inuunini tunniunneqassasoq. Jiisusip oqaasii tamatumunnga assingusut Iivangkiiliu Matthæusip allagaa 20:28-mi ima allassimapput: “Soorlu Inuup Ernera tikiutinngitsoq kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.” Naatsumik oqaatigalugu tamanna pissutigalugu Jehovap Nalunaajaasui katersuuttarput Jiisusip toqunera nalliussiniarlugu — taassuma utertitsissutitut pilliutaa eqqaaniarlugu. Toqunera inunnut naalattunut tamanut inuussutaasinnaavoq.

Susie: Tusartarpara inuit oqartartut uagut inuusinnaaqqulluta Jiisusi toqusoq. Unneqqarissagumali  oqartariaqarpunga tamanna paasinngisaannarlugu.

Maliina: Kisimiinngilatit. Jiisusip utertitsissutitut pilliutaanut tunngasut itisuujupput. Aammali tassaapput sallusuissutit Guutip oqaasianeersut nuannernerpaat ilaat. Suli piffissaqarpit?

Susie: Aap, suli minutsialuit.

Maliina: Torrak. Utertitsissutitut pilliut pillugu atuaqqammerpunga. Paasiuminartumik nassuiarniarsarissavara.

Susie: Ajunngilaq.

Maliina: Utertitsissut paasiumallugu Adamip Evallu naatsiivimmi Edenimi ajortuliornerisa kingunerat paaseqqaartariaqarparput. Suna pineqartoq paasiumallugu Romamiunut allakkat 6:23 atuariartigu. Atuarusuppiuk?

Susie: Ilaana. Ima allassimavoq: “Ajortimmi akissarsiarititaa tassa toqu, Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.”

Maliina: Qujanaq. Oqaatsit taakku isumasioriartigit. Siullermik versip aallaqqaataa malugiuk: ‘Ajortip akissarsiarititaa tassa toqu.’ Tamanna Guutip inuit oqaluttuarisaanerata aallaqqaataani najoqqutassiaraa paasiuminartoq: Ajortip akissarsiarititaa, tassa pillaatisiarititaa, tassaavoq toqu. Soorunami aallaqqaataani ajortuliortoqanngilaq. Adami Evalu naammalluinnartutut pinngortitaapput, kinguaassaallu tamarmik naammalluinnartuullutik inunngortussaagaluarput. Taamaattumik toqusoqartariaqanngikkaluarpoq. Adami Evalu taakkualu kinguaavi tamarmik pilluarlutik naassaanngitsumik inuusinnaagaluarput. Nalunngisatsitulli pissutsit allaanerulluinnarput, ilaa?

Susie: Aap. Adamip Evallu paarnaq nereqqusaanngitsoq nerivaat.

Maliina: Ilumoorputit. Taamaalioramillu — tassa Adami Evalu Guutimut naalannginniarlutik aalajangeramik — ajortuliorput. Naammalluinnartuujunnaarniarlutik, tassa ajortiliuniarlutik, aalajangerput. Taamaaliornerat Adamikkunnuunnaanngitsoq aammali kinguaavinut tamanut ajunaarutaangaarpoq.

Susie: Tassa qanoq?

Maliina: Assersuusiorsinnaagunarpunga. Iffiortarpit?

Susie: Aap! Nuannarivara.

Maliina: Oqariarta nutaarsuarmik kaagiliorfiuteqartutit. Suliluunniit atornagu natermut nakkarpoq singarujussuarlunilu. Kaagiliorfik taanna atorlugu iffiukkatit qanoq issappat? Tamarmik iluserluuteqassapput, ilaa?

Susie: Soorunami.

Maliina: Taamatupajaaq Adami Evalu Guutimut naalannginnamik ajorti naammalluinnanngissuserlu singarnerilerpaallusooq, tassa ajoqutigilerpaat. Qitornartaartinnatillu ajortilinngoramik qitornaat tamarmik assigiimmik ‘iluserluuteqarlutik’ inunngussapput. Tamarmik ajortiliullutik inunngussapput. Biibilimi ‘ajorti’ pineqaraangat iliuuseq pineqaannarnani aamma inunnguuseralugu ajortiliuneq pineqartarpoq. Taamaattumik uanga illillu eqqunngitsuliorsimanngikkarluartugut — suliluunniillu inunngunngitsugut — Adamip Evallu ajortulioramik perloqqusaatippaatigut. Kinguaassatillu aamma uagut kinguaassavut tamaasa naammalluinnanngitsutut ajortilittullu inuusussatut naggataatigullu toqusussatut pineqartippaat. Soorlu Romamiunut allakkat 6:23-mi atuaripput ajortip toqu pillaatisiaraa.

Susie: Naapertuilluanngippasingaarami. Sooq Adamip Evallu ajortuliornerat pissutigalugu inuit tamarmik naassaanngitsumik naalliussappat?

Maliina: Ilumoorputit — naapertuilluarpasinngilaq. Tamannali kisiat eqqarsaatigissanngilarput. Guuti naapertuilluinnaqqissaartuugami aalajangerpoq Adami Evalu ajortuliarisimasatik pillugit toqussasut, uagulli taakkua kinguaavisut neriuutissaqartitaavugut. Guutip uagutsinnut aniguiffissaq pilersippaa Jiisusip pilliutaa ajortit matoorneqaatissaat pilersillugu. Romamiunut allakkat 6:23 takoqqeriaruk. Allassimavoq ‘ajortip akissarsiarititaa tassaasoq toqu’, nangillunilu ima allassimavoq: “Guutilli saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni.” Tassa Jiisusip toqunera ajortimit toqumillu aniguisinneqarsinnaanitsinnut tunngaviliivoq.

Maliina: Versimi matumani allamik maluginiagassaqarpoq.

Susie: Suna piviuk?

Maliina: Malugiuk allassimasoq ‘Guutip tunissutaa tassaasoq inuuneq naassaanngitsoq Kristusi-Jiisusimi Naalakkatsinni’. Uagut pilluta anniarlunilu toqusoq tassaammat Jiisusi, taassumalu inuunini uagut pilluta pilliutigimmagu sooq allassimava utertitsissut tassaasoq ‘Guutip tunissutaa’? Sooq allassimanngila tassaasoq ‘Jiisusip tunissutaa’? *

Susie: Hmm, asuki.

Maliina: Adamimik Evamillu Pinngortitsisoq tassaavoq Guuti, naatsiivimmilu Edenimi naalannginnamik Guutimut ajortuliorput. Nunami qitornami siulliit marluk imminut pikitsitsinerat aliasuutigisimassaqaa. Jehovali ingerlaannaq aaqqiissutissamik pilersitsivoq. * Siunertaraa pinngortitami anersaajusut ilaat nunamukassasoq, inuttut naammalluinnartutut inuussasoq inuuninilu utertitsissutitut pilliutigissagaa. Taamaattumik utertitsissummik pilersitsineq tunissutaavoq Guutimeersoq. Tamannaannaanngilarli, eqqarsaatiginikuuiuk Guuti qanoq misigisimassanersoq Jiisusi toqutaammat?

Susie: Naamik, eqqarsaatiginikuunngilara.

Maliina: Silatissinni pinnguaqartoq takuara. Meeraqaravit?

Susie: Suu, marlunnik. Erneqarpunga paneqarlungalu.

Maliina: Illit angajoqqaatut eqqarsaatigeriaruk Jiisusip Ataataa qilammiusoq, Jehova Guuti, ullormi Jiisusip toquffiani qanoq misigisimassanersoq. Erni asasani tigusarineqartoq, mitaatigineqartoq tilluarneqartorlu qilammiit takugamiuk qanoq misigiva? Aamma Erni qisummut nappakkamut kikiattugaalluni arriitsumik naalliunnartumillu toqujartormat Ataataq qanoq misigiva?

Susie: Anniaatigingaarsimassavaa! Tamanna eqqarsaatiginikuunngisaannarpara.

Maliina: Soorunami naluarput Guuti ullormi tamatumani qanorpiaq misiginersoq. Nalunngilarpulli misigissuseqartoq, nalunngilarputtaaq sooq Ernermi ajortumik pineqarnera akuerineraa. Allassimaffimmi ilisimaneqarluartumi, Iivangkiiliu Johannesip allagaa 3:16-mi, tamanna killitsinnartumik nassuiarneqarpoq. Atuarusuppiuk?

Susie: Aap. Ima allassimavoq: “Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.”

Maliina: Qujanaq. Versip aallaqqaataa malugiuk. Allassimavoq ‘Guutip silarsuaq asagaa’. Tassa pingaarnerpaaq — asanninneq. Asanninneq kajumississutigalugu Guutip Erni uagut pilluta toquniassammat nunamukartippaa. Aap, utertitsissutitut pilliut asannittuliornerit tamarmik pingaarnerpaartaraat. Tamannalu eqqaaniarlugu Jehovap Nalunaajaasui ukiut tamaasa ulloq Jiisusip toquffia nalliussiniarlugu katersuuttarput. Oqaloqatigiinnerput iluaqutigaajuk?

Susie: Aap, pissarsiffigeqaara. Qujanaq nasuiaakkamma.