Guutip suut tamaasa takusinnaavai iliuuseriumasanilu sumiluunniit iliuuserisinnaallugit. (Ussatit 15:3; Hebræerit 4:13) Taamaattorli Biibilimi ajoqersuutigineqanngilaq Guuti sumi tamaaniittuusoq, tassa sumi tamaani najuuttoq. Kinaassusiliuvorli najugaqarfeqarlunilu.

•   Guutip qanoq ittuunera: Guuti anersaajuvoq. (Johannesi 4:24) Inunnit takuneqarsinnaanngilaq. (Johannesi 1:18) Guutimik takorruuinerni Biibilimi allaatigineqartuni Guuti aalajangersimasumik inissisimaffeqartutut, sumi tamaaniittutuunngitsoq, ersersinneqartarpoq. – Esaja 6:1, 2; Saqqummersitat 4:2, 3, 8.

•   Guutip najugaqarfia: Guuti anersaat silarsuaanni, tassa “qilammi”, inuit uumasullu silarsuaannit allaanerusumi najugaqarfeqarpoq. (1 Kunngit 8:30) Biibilimi allassimavoq anersaat ‘takkuttut Naalakkamullu sassarlutik’, tassanilu ersarippoq Guuti aalajangersimasumik inissisimaffeqartoq. – Jobi 1:6.

Guuti sumi tamaaniissimanngikkuni uanga inuttut isumassorsinnaavaanga?

 Aap. Guutip inuit ataasiakkaat isumassungaartarpai. Anersaat silarsuaanniikkaluarluni inuit imminik nuannaartitsiumasut maluginiartarpai ikiorniarlugillu iliuuseqartarluni. (1 Kunngit 8:39; 2 Nalunaarsuutit 16:9) Imminut ilumoorlutik kiffartortunik qanoq isumassuisarnera maluginiaruk:

•   Qinugaangavit: Guutip qinnutitit oqaatiginiariaritit ingerlaannaq tusaasarpai. – 2 Nalunaarsuutit 18:31.

•   Nikallungagaangavit: Guutip “qanippai sequmissimasumik uummatillit, annaattarpai aserortersimasumik anersaallit”. – Tussiaat 34:19.

•   Siunnersortissarsioraangavit: Guutip oqaatsini, Biibili, aqqutigalugu ‘ilinniartissavaatit ilitsersorlutillu’. – Tussiaat 32:8.

Sumi tamaaniinnera pillugu kukkusumik isummernerit

 Kukkusoq: Tussiaat 139:8 naapertorlugu Guuti sumi tamaaniissimassaaq, tassanimi ima allassimavoq: “Qilaliaraluaruma tappavaniipputit, toqusut inaanni innaraluaruma tassaniipputit.”

 Eqqortoq: Allassimaffimmi tassani Guutip najugaqarfia pineqanngilaq. Taalliorpalaartumik allaatigineqarpoq Guuti ikiuiniarluni iliuuseqarnissaminut ungasippallaanngitsoq.