Pisut, pis­sutsit inuillu pis­susilersor­neri ‘naggatis­sap nalaanut’, imaluun­niit ‘silarsuup naggatis­saanut’, ilisar­naataas­sasut Biibilimi allaatigineqar­put. (Matiusi 24:3; Biibili 2000-mi naqitigaq) Pif­fis­saq tamanna Biibilimi ‘ullunik kingul­ler­nik’ aamma ‘naggatis­samik’ taaneqar­poq. – Timuutiusimut 2. 3:1; Danieli 8:19.

 Ullunut kingul­ler­nut ‘ilisar­naataasut’ assigiin­ngitsor­pas­suit ataatsik­kut pisus­sat Biibilimi siulit­tuutigineqar­put. (Luk­karsi 21:7) Uku ilagaat:

 Nunani sorsunnerit. Jiisusi ima siulit­tuivoq: “[Inuiaqatigiit] inuiaqatigiin­nik allanik saas­sus­sisas­sap­put naalagaaf­fillu naalagaaf­fim­mik allamik saas­sus­sisas­sal­luni.” (Matiusi 24:7) Aamma angut hestersoq sorsun­nermut “nunarsuarmi eqqis­sineerutsitsinis­samut” assersuutaasoq Saq­qum­mersitat 6:4-mi siulit­tuutigineqar­poq.

 Kaannersuit. Jiisusi ima siulit­tuivoq: “Nerisas­saaleqisoqar­tas­saaq.” (Matiusi 24:7) Saq­qum­mersitani siulit­tuutigineqar­poq hestersoq assersuutaasoq alla kaan­nersuaqar­nermik kinguneqar­titsis­sasoq. – Saq­qum­mersitat 6:5, 6.

 Nunap sajorujussuartarneri. Jiisusi siulit­tuivoq ‘sumiif­finni assigiin­ngitsuni nuna sajut­tas­sasoq’. (Matiusi 24:7; Luk­karsi 21:11) Nunap sajorujus­suar­tar­neri aatsaat taama naal­liuutaatigalutillu inuit toquneran­nik kinguneqar­titsip­put.

 Nappaatit. Jiisusi oqar­poq tunil­laas­sor­tunik nap­paateqar­tas­sasoq, imaluun­niit ‘toqoraataasunik nap­paas­suaqar­tas­sasoq’. – Luk­karsi 21:11, Biibili 2000-mi naqitigaq.

 Pinerluttuliornerit. Ukior­pas­suarni pinerlun­neq atugaasimagaluar­toq ulluni kingul­lerni ‘inatsisinik unioq­qutitsisar­neq ingasatsik­kiar­tuin­nas­sasoq’ Jiisusip siulit­tuutigaa. – Matiusi 24:12.

 Nunarsuarmik aseruineq. Saq­qum­mersitat 11:18-imi siulit­tuutigineqar­poq inuit ‘nunarsuarmik aseruiumaar­tut’. Assigiin­ngitsor­pas­suar­tigut, soorlu peq­qar­niitsumik ilior­nik­kut mingutsitsinik­kullu, aseruiumaar­put.

 Pissusilukkiartorneq. Biibilimi Timuutiusimut allak­kat aap­paat 3:1-4 siulit­tuutigineqar­poq inuit tas­saalerumaar­tut “qujasuitsut, ilumoorfigin­nin­ngitsut, … saam­mar­titas­saan­ngitsut, nikas­saal­lutik sal­luliuutigin­nit­tar­tut, imminut aqus­sin­naan­ngitsut, saas­sus­siumatuut, ajun­ngitsumik nuan­narisaqan­ngitsut, akeq­qanut pisitsisut, uteriitsut, pingaakujul­lutik makitasuut”. Inuit taama ingasatsigisumik pis­susiluk­kiar­tor­nerat pis­sutigalugu ‘ulluni kingul­lerni pis­sutsit anigoruminaal­lutillu erloqinarumaar­put’.

 Ilaqutariittut avissaartuunneq. Biibilimi Timuutiusimut allak­kat aap­paat 3:2, 3-milu siulit­tuutigineqar­poq inup­pas­suit ilaqut­tamin­nut ‘asan­nis­san­ngitsut’ aamma meeq­qat ‘angajoq­qaamin­nut naalan­ngitsuus­sasut’.

 Guutimik asannikkunnaarneq. Jiisusi ima siulit­tuivoq: “Amerlanerit asan­nin­nerat nil­ler­tik­kiar­tus­saaq.” (Matiusi 24:12) Jiisusi isumaqar­poq inuit amerlanerit Guutimik asan­nin­nerat nil­ler­tik­kiar­tus­sasoq. Aamma Timuutiusimut allak­kat aap­paat 3:4-mi allas­simavoq ulluni kingul­lerni inuit taamaat­tut ‘Guutimik asan­nin­natik nuan­naar­niutinik pingaar­titsis­sasut’.

 Upperisarsiornikkut ilumoortuusaarneq. Biibilimi Timuutiusimut allak­kat aap­paat 3:5-imi siulit­tuutigineqar­poq inuit Guutimut tun­niusimasuusaas­sasut taas­sumalu najoq­qutas­siai maleruar­nagit.

 Biibilimi siulittuutit pillugit paasinnikkiartuaarneq. Danielimik allak­kani siulit­tuutigineqar­poq ‘naggatis­sap’ nalaani inup­pas­suit Biibilimi ilumoor­toq pil­lugu, ilaatigut siulit­tuutit taakku pil­lugit eqqor­tumik, paasin­nin­nerulis­sasut. – Danieli 12:4.

 Nunarsuaq tamakkerlugu oqaluussineq. Jiisusi ima siulit­tuivoq: “[Kun­ngeqarfik] pil­lugu nutaarsias­sat nuan­nersut … nunarsuaq tamak­kerlugu oqaluus­sis­sutigineqas­sap­put.” – Matiusi 24:14.

 Soqutigisaqanngilluinnarneq illaruaatiginninnerlu. Jiisusi siulit­tuivoq inuit amerlanersaasa naggatis­saq pil­lugu upper­narsaatit ersaris­sut soqutigis­san­ngik­kaat. (Matiusi 24:37-39) Aamma Petrusimit allak­kat aap­paat 3:3, 4-milu siulit­tuutigineqar­poq ilaasa upper­narsaatit akuerin­ngil­luin­narlugit illaruaatigis­sagaat.

 Siulittuutit tamarmik eqquunnerat. Jiisusi oqar­poq siulit­tuutit taak­kua tamarmik, imaan­ngitsoq ilaan­nai, ataatsik­kut eqquun­nerat ullunut kingul­ler­nut ilisar­naataas­sasoq. – Matiusi 24:33.

 Aap. Nunarsuarmi pis­sutsinit Biibililu naaper­torlugu ukiuinik naatsorsuisar­nermit erser­poq ullut kingul­liit 1914-imi, ukiumi sorsun­nersuup siul­liup aal­lar­tif­fiani, aal­lar­tit­tut. Nunarsuarmi pis­sutsit qanoq ersersik­kaat ulluni kingul­lerni inuusugut isigin­naagas­siami uani takusin­naavat:

 1914-imi Guutip kun­ngeqarfia qilammi naalak­kersuiler­poq, iliuuserisaasalu siul­liit ilagaat Saatanip Diaavulup anersaapiluillu qilam­mit anisin­nerat taamaal­laallu nunarsuarmi sun­niisin­naalersil­lugit. (Saq­qum­mersitat 12:7-12) Amerlasuut ajor­tumik isigin­nit­taaseqar­nerat iliuuseqar­tar­nerallu pis­sutigalugit ‘ulluni kingul­lerni pis­sutsit anigoruminaal­lutillu erloqinarmata’ Saatanip inuian­nut sun­niinera ersarip­poq. – Timuutiusimut 2. 3:1.

 Inup­pas­suit pis­sutsit anigoruminaatsut isumatsaq­qas­sutigaat. Inuiaqatigiit ajorsiar­tuin­nar­nerat ernumas­sutigaat. Allaat ilaasa inuit immin­nut nungutin­nis­saat annilaangatigisar­paat.

 Inuilli allat nunarsuarmi pis­sutsit aliasuutigigaluarlugit isumal­luarlutik neriuutis­saqar­put. Guutip kun­ngeqarfia qanit­tuk­kut nunarsuarmi ajor­nar­torsiutit tamaasa peer­niarlugit iliuuseqas­sasoq qularin­ngil­luin­nar­paat. (Danieli 2:44; Saq­qum­mersitat 21:3, 4) Guutip neriorsuutaasa eqquun­nis­saat qilanaaralugit utaq­qivaat Jiisusillu oqaasii uku tup­pal­lersaatigalugit: ‘Naggatis­samut piner­tusaar­toq annaan­neqas­saaq.’ – Matiusi 24:13; Mika 7:7.