“Anguteqatinnut kajungis­suseqarnera peroriar­torninni akiussallugu sapernar­tinnerpaavara. Neriussimagaluarpunga taama misigis­suseqarun­naalissallunga, sulili akiortarpara.” – David, 23.

 David kristumiuuvoq Guutip piumasaatut iliorusuttoq. Suiaqatiminulli taama misigis­suseqar­tilluni Guutimut iluarisaasinnaava? Suiaqatiminoortarneq Guutip qanoq isumaqarfigaa?

•  Biibilimi qanoq allassimasoqarpa?

•  Isumaqarpa …?

•  Apeqqutit allat

 Ukiut ingerlaneranni inuit suiaqatiminoortarneq pillugu isiginnit­taasiat allanngorar­tarsimavoq. Kristumiulli isiginnit­taatsinit ilinniar­titsissutinil­luunniit inuit nuannaar­torisaannit sunnerneqarneq ajorput. (Efesossimiut 4:14) Akerlianilli suiaqatiminoorneq iliuutsillu allat pillugit Biibilimi allassimasunut naapertuuttumik isiginnit­taaseqartarput.

 Suiaqatiminoortarneq pillugu Biibilimi erseqqissumik najoqqutas­siaqarpoq. Guutip oqaasiani ima allassimavoq:

•  “Anguteqatit arnatut ilillugu innaatis­sanngilat innaassineq taamaattoq maajunnar­torsuummat.” – Mosesimik 3. 18:22.

•  “Uummatimik kissaatipilui malillugit inoorusummata … Guutip kanngunartumik atoqateqarusus­suseqartut immineerpai. Arnartaasa pissusis­samisoortumik atoqateqartarneq pissusis­samisuun­ngitsumik taarserpaat.” – Romamiut 1:24, 26.

•  “Tammarniaqinasi. Atoqatigiinnikkut eqqunngitsuliortartut, guutipilus­siortut, allasiortut, arnaqatiminnik anguteqatimin­nilluunniit atoqateqartartut, tillittut, piumatuut, imerajuttut, asissuisut ujajaasullu Guutip kunngeqarfia kingornutis­sanngilaat.” – Korintimiunut 1. 6:9, 10.

 Guutip inatsisai inunnut tamanut atuupput, suiaqammik imaluunniit suiaqatigin­ngisamik kajungerisaqar­tuugaluaraan­niluunniit. Tassa Guutip iluarin­ngisaanik kajungerisaqaraanni inuit tamarmik imminut aqussin­naasariaqarput. – Kolossimiut 3:5.

 Isumaqarpa Biibilimi kajumis­saarneqartugut suiaqatiminoortut uumigis­sagigut?

 Naamik. Biibili naapertorlugu kinaluunniit uumigis­sanngilarput. Kajumis­saarutigineqarpoq “inuit tamaasa”, qanorluunniit inooriaaseqaraluarpata, eqqisseqatiginiar­tuassagigut. (Hebræerit 12:14) Tassa suiaqatiminoor­tartunik uumiginninneq, pimmatiginninneq allatul­luunniit ajortumik pissusilersorneq kukkuneruvoq.

 Isumaqarpa inatsit suiaqatiminoortut katissin­naanerannut tunngasoq kristumiut akerliuf­figissagaat?

 Biibili naapertorlugu Guutip piumasaraa aappariit tassaassasut angut arnarlu. (Matiusi 19:4-6) Taamaattorli inatsit suiaqatigiit katissin­naalernerannut tunngasoq politikkimut tunngas­suteqarpoq. Kristumiulli Biibilimi kajumis­saarneqarput politikkimut akuliun­naveersaar­tuussasut. (Johannesi 18:36) Taamaattumik kristumiut inatsit suiaqatiminoortut katissin­naanerannut tunngasoq tapersersornagulu akerliuf­figissan­ngilaat.

 Suiaqatiminoortartoq allanngorsinnaava?

 Aap. Kristumiut siulliit ilaat taamaaliorsimapput! Arnaqatiminnik anguteqatimin­nilluunniit atoqateqartartut Biibilimi eqqaaneqarnerisa kingorna ima allassimavoq: “Ilasi taamaas­simagaluarput.” – Korintimiunut 1. 6:11.

 Tamanna isumaqarpa suiaqatiminoor­tarunnaarsimasut suiaqatiminnut kajungersusertik qaangivis­simagaat? Naamik. Biibilimi allassimavoq ‘kinaassuseq nutaaq, eqqoqqis­saartumik paasisimasaqarnikkut nutaanngor­titaajuartoq, atissagipput’. (Kolossimiut 3:10) Tassa ingerlaannaq allanngor­toqarnavianngilaq, kinaassuserpullu sulissutigiuas­savarput.

 Taavami Guutip najoqqutassiai malillugit inuujumasoq suli suiaqatigisaminik kajungerisaqartaruni?

 Inuk qanorluunniit kajungerisaqaraluaruni tamatuminnga aqutsik­kusunnani aalajangersinnaavoq. Qanoq ililluni? Biibilimi allassimavoq: “Anersaamit siulersor­tittuarussi pileris­susipiluit piviusun­ngortin­ngilluin­nassavasi.” – Galaatiamiut 5:16.

 Maluginiaruk versimi allassiman­ngimmat inuk pileris­susipiloqar­tarunnaassasoq. Kisianni Biibilimik misissuisarnerup qinusar­nerullu ileqquliun­neratigut pilerissutsit taama ittut akiorneqarsin­naapput.

 Davidip, siuliani eqqaaneqartup, paasilerpaa tamanna eqqortuusoq – pingaartumik angajoqqaani kristumiut sapernar­titaminik oqaluttuutereerlugit. Ima oqarpoq: “Oqilial­laqaanga, inuusut­tuunerali nuanner­nerusimas­sagaluarpoq siusinnerusukkut oqaluttuus­simasuugukkit.”

 Jehovap najoqqutassiai malikkaangatsigit pilluar­neruler­tarpugut. Aap, taakku “naapertuil­luartuupput, uummammik nuannaar­titsisarput”, aamma “maleruaraanni tamanna naammattumik akissarsis­sutaassaaq”. – Tussiaat 19:9, 12.