ចម្រៀងសរសើរព្រះ ១៤៥:១-២១
-
សរសើរព្រះជាស្ដេចដ៏ឧត្ដម
ទំនុកសរសើររបស់ដាវីឌ។
א [អាល់ឡេហ្វ]
១៤៥ ឱព្រះជាស្ដេចរបស់ខ្ញុំអើយ ខ្ញុំនឹងលើកតម្កើងលោក+ខ្ញុំនឹងសរសើរនាមរបស់លោកជារៀងរហូត។+
ב [បេត]
២ ខ្ញុំនឹងសរសើរលោកជារៀងរាល់ថ្ងៃ។+
ខ្ញុំនឹងសរសើរនាមរបស់លោករហូតតទៅ។+
ג [គីមេល]
៣ ព្រះយេហូវ៉ាខ្ពង់ខ្ពស់ពេកក្រៃ លោកសមទទួលការសរសើរតម្កើងជាងគេបំផុត។+
ភាពឧត្តុង្គឧត្តមរបស់លោកគឺហួសពីការដែលអាចស្វែងយល់បាន។*+
ד [ដាលេត]
៤ មនុស្សនឹងសរសើរដល់ស្នាដៃរបស់លោកគ្រប់ជំនាន់ពួកគេនឹងថ្លែងប្រាប់អំពីឫទ្ធានុភាពដ៏ខ្លាំងក្លារបស់លោក។+
ה [ហេ]
៥ ពួកគេនឹងនិយាយអំពីសិរីរុងរឿងដ៏ថ្កើងថ្កានរបស់លោក+ហើយខ្ញុំនឹងរំពឹងគិតអំពីកិច្ចការដ៏អស្ចារ្យរបស់លោក។
ו [វ៉ោ]
៦ ពួកគេនឹងរៀបរាប់អំពីការប្រព្រឹត្តដ៏គួរឲ្យស្ញប់ស្ញែងរបស់លោកហើយខ្ញុំនឹងប្រកាសអំពីភាពថ្កុំថ្កើងរបស់លោក។
ז [ហ្សាយីន]
៧ កាលដែលពួកគេគិតដល់គុណធម៌ដ៏លើសលប់របស់លោកពួកគេនឹងរ៉ាយរ៉ាប់អំពីរឿងនោះឥតឈប់ឈរ+ហើយពួកគេនឹងបន្លឺសំឡេងត្រេកអរ ដោយសារសេចក្ដីសុចរិតរបស់លោក។+
ח [ហេត]
៨ ព្រះយេហូវ៉ាមានចិត្តអាណិតអាសូរ* និងមានសេចក្ដីមេត្តាករុណា+លោកមិនរហ័សខឹង និងមានសេចក្ដីស្រឡាញ់ដ៏ស្មោះត្រង់ដែលរកថ្លែងពុំបាន។+
ט [ថេត]
៩ ព្រះយេហូវ៉ាប្រព្រឹត្តល្អ*ចំពោះមនុស្សទាំងអស់+គ្រប់ទាំងស្នាដៃរបស់លោកជាភ័ស្តុតាងបញ្ជាក់ថាលោកមានសេចក្ដីមេត្តាករុណា។
י [យ៉ូដ]
១០ ឱព្រះយេហូវ៉ា អ្វីៗទាំងអស់ដែលលោកបានបង្កើតនឹងលើកតម្កើងលោក+ហើយមនុស្សដែលមានភក្ដីភាពចំពោះលោកនឹងសរសើរលោក។+
כ [កាប]
១១ ពួកគេនឹងប្រកាសអំពីសិរីរុងរឿងនៃរាជ្យរបស់លោក+ហើយថ្លែងប្រាប់អំពីឫទ្ធិដ៏មហិមារបស់លោក+
ל [ឡាមេត]
១២ ដើម្បីឲ្យមនុស្សទាំងឡាយដឹងអំពីកិច្ចការដ៏អស្ចារ្យរបស់លោក+និងអំពីសិរីរុងរឿងដ៏ខ្ពង់ខ្ពស់នៃរាជ្យរបស់លោក។+
מ [មេម]
១៣ រាជ្យរបស់លោកនៅស្ថិតស្ថេរជារៀងរហូតហើយការគ្រប់គ្រងរបស់លោកនៅជាប់ជាដរាបតទៅ។+
ס [សាមេក]
១៤ ព្រះយេហូវ៉ាជួយទប់អស់អ្នកដែលហៀបនឹងដួល+ហើយលើកអស់អ្នកដែលឱនខ្លួនឲ្យក្រោកឡើង។+
ע [អាយីន]
១៥ ជីវិតទាំងឡាយសង្ឃឹមលើលោក។លោកផ្ដល់អាហារតាមរដូវកាល។+
פ [ភេ]
១៦ លោកលាដៃហើយបំពេញបំណងប្រាថ្នារបស់ជីវិតទាំងឡាយ។+
צ [សាដេ]
១៧ ព្រះយេហូវ៉ាធ្វើអ្វីគ្រប់យ៉ាងដោយសុចរិត+ហើយលោកស្មោះត្រង់ក្នុងគ្រប់ការទាំងអស់។+
ק [ឃូហ្វ]
១៨ ព្រះយេហូវ៉ានៅជិតអស់អ្នកដែលហៅរកលោក+គឺអស់អ្នកដែលហៅរកលោកដោយចិត្តស្មោះ។*+
ר [រ៉េស]
១៩ លោកបំពេញបំណងប្រាថ្នារបស់អស់អ្នកដែលកោតខ្លាចលោក+លោកឮពាក្យស្រែកអង្វរសុំរបស់ពួកគេ ហើយលោកក៏ជួយពួកគេ។+
ש [ស៊ីន]
២០ ព្រះយេហូវ៉ាការពារមនុស្សគ្រប់រូបដែលស្រឡាញ់លោក+ប៉ុន្តែ លោកនឹងបំផ្លាញមនុស្សទុច្ចរិតឲ្យសាបសូន្យអស់ទៅ។+
ת [ថាវ]
២១ ខ្ញុំនឹងពោលពាក្យសរសើរព្រះយេហូវ៉ា+ចូរឲ្យជីវិតទាំងឡាយសរសើរតម្កើងដល់នាមបរិសុទ្ធរបស់លោកជារៀងរហូត។+
កំណត់សម្គាល់
^ ឬ«ហួសពីសមត្ថភាពយល់ដឹង»
^ ឬ«ចិត្តសប្បុរស»
^ ឬ«បង្ហាញគុណធម៌»
^ ឬ«ដោយពិតត្រង់»
