អត្ថបទអំពីក្របទស្សនាវដ្ដី | តើការអានគម្ពីរមានប្រយោជន៍អ្វី?
តើអ្វីខ្លះនឹងធ្វើឲ្យលោកអ្នកចូលចិត្ដអានគម្ពីរ?
ពេលលោកអ្នកអានគម្ពីរ តើលោកអ្នកមានអារម្មណ៍ថាអផ្សុកឬក៏សប្បាយ? តើលោកអ្នកចូលចិត្ដអានគម្ពីរតាមរបៀបណា? ការធ្វើឲ្យអំណានគម្ពីរគួរឲ្យចាប់អារម្មណ៍ គឺអាស្រ័យទៅលើវិធីដែលលោកអ្នកអានគម្ពីរ។ សូមពិចារណាអំពីអ្វីដែលលោកអ្នកអាចធ្វើ ដើម្បីជួយឲ្យលោកអ្នកកាន់តែចូលចិត្ដអានគម្ពីរ។
សូមជ្រើសរើសសេចក្ដីបកប្រែដែលទាន់សម័យនិងគួរឲ្យទុកចិត្ដ។ បើលោកអ្នកអានសេចក្ដីបកប្រែគម្ពីរដែលមានពាក្យពិបាកយល់ ឬហួសសម័យ នោះលោកអ្នកទំនងជាមិនចូលចិត្ដអានគម្ពីរទេ។ ដូច្នេះ សូមស្វែងរកគម្ពីរមួយដែលប្រើពាក្យសាមញ្ញនិងស្រួលយល់ ពីព្រោះនេះនឹងមានឥទ្ធិពលល្អមកលើចិត្ដលោកអ្នក។ ក៏ប៉ុន្ដែ ដំណាលគ្នានោះ គម្ពីរនោះគួរតែបានត្រូវបកប្រែយ៉ាងហ្មត់ចត់និងត្រឹមត្រូវ។ *
សូមប្រើបច្ចេកវិទ្យាទំនើប។ សព្វថ្ងៃនេះ គម្ពីរមិនគ្រាន់តែមានជាឯកសារបោះពុម្ពប៉ុណ្ណោះទេ តែក៏មានជាឯកសារអេឡិចត្រូនិកដែរ។ លោកអ្នកអាចអានគម្ពីរតាមគេហទំព័រ ឬថតចម្លងទុកអានក្នុងកុំព្យូទ័រ កុំព្យូទ័របន្ទះស្ដើង ឬទូរស័ព្ទដៃ។ សេចក្ដីបកប្រែគម្ពីរខ្លះជាឯកសារអេឡិចត្រូនិកមានកម្មវិធីដែលអនុញ្ញាតឲ្យមើលខគម្ពីរឯទៀត ដែលនិយាយអំពីប្រធានបទដូចគ្នា ឬថែមទាំងប្រៀបធៀបខគម្ពីរជាមួយនឹងសេចក្ដីបកប្រែគម្ពីរផ្សេងៗ។ បើលោកអ្នកចូលចិត្ដស្តាប់ជាជាងអាន នោះលោកអ្នកក៏អាចស្តាប់អំណានគម្ពីរជាឯកសារសំឡេងដែរ។ មនុស្សជាច្រើនចូលចិត្ដស្តាប់អំណានគម្ពីរពេលពួកគេកំពុងធ្វើដំណើរ បោកខោអាវ ឬធ្វើកិច្ចការណាទៀតដែលពួកគេអាចស្តាប់បាន។ សូមសាកល្បងរបៀបណាមួយដែលសមនឹងកាលៈទេសៈរបស់លោកអ្នក។
សូមប្រើជំនួយសិក្សាគម្ពីរ។ ជំនួយសិក្សាគម្ពីរអាចជួយលោកអ្នកទទួលប្រយោជន៍ជាច្រើនពីការអានគម្ពីរ។ មានផែនទីអំពីកន្លែងផ្សេងៗនៅសម័យគម្ពីរ ដែលនឹងជួយលោកអ្នកឲ្យស្គាល់ទីកន្លែងក្នុងកំណត់ហេតុគម្ពីរ។ ដូច្នេះ លោកអ្នកអាចស្រមៃឃើញទិដ្ឋភាពក្នុងកំណត់ហេតុដែលលោកអ្នកកំពុងអាន។ អត្ថបទផ្សេងៗក្នុងទស្សនាវដ្ដីនេះ ឬក្នុងគេហទំព័រjw.org អាចជួយលោកអ្នកឲ្យយល់អត្ថន័យនៃផ្នែកជាច្រើនក្នុងគម្ពីរ។
សូមប្រើវិធីផ្សេងៗ។ បើការអានគម្ពីរពីសៀវភៅមួយទៅសៀវភៅមួយធ្វើឲ្យលោកអ្នកអផ្សុក នោះសូមធ្វើឲ្យការអាននោះទៅជាអ្វីដែលគួរឲ្យចាប់អារម្មណ៍ជាង ដោយចាប់ផ្ដើមអានផ្នែកណាមួយដែលទាក់ទាញអារម្មណ៍លោកអ្នក។ បើលោកអ្នកចង់ដឹងអំពីមនុស្សល្បីល្បាញក្នុងគម្ពីរ លោកអ្នកអាចចាប់ផ្ដើមអានអំពីពួកគេម្ដងម្នាក់ៗ។ ឧទាហរណ៍ វិធីនោះមានក្នុងប្រអប់« ស្វែងយល់គម្ពីរយ៉ាងស៊ីជម្រៅដោយស្គាល់បុរសស្ដ្រីក្នុងគម្ពីរ»។ ឬមួយក៏លោកអ្នកប្រហែលជាចង់អានគម្ពីរតាមប្រធានបទ ឬតាមលំដាប់លំដោយនៃព្រឹត្ដិការណ៍។ សូមសាកល្បងធ្វើតាមវិធីណាមួយ។
^ វគ្គ 4 មនុស្សជាច្រើនបានឃើញថាសេចក្ដីបកប្រែពិភពលោកថ្មីពីបទគម្ពីរបរិសុទ្ធ (New World Translation of the Holy Scriptures) គឺត្រឹមត្រូវ គួរឲ្យទុកចិត្ដ និងស្រួលអាន។ គម្ពីរនេះបានត្រូវបោះពុម្ពដោយសាក្សីព្រះយេហូវ៉ា និងមានជាង១៣០ភាសា។ លោកអ្នកអាចថតចម្លងគម្ពីរនេះពីគេហទំព័រ jw.orgឬថតចម្លងកម្មវិធី JW បណ្ណាល័យ។ បើលោកអ្នកចង់បានគម្ពីរ សាក្សីព្រះយេហូវ៉ាអាចយកគម្ពីរមួយក្បាលទៅជូនលោកអ្នកដល់ផ្ទះ។
