Mukanda wa Kayadi ku Akwa Kolindu 7:1-16
7 Jiphange jetu ja kazola, kuma twala ni ikanenu yiyi, tudizelese mu ufusa woso wa xitu ni wa nzumbi, ni tukale tu athu azele ni kuxila Nzambi.
2 Tu tambululyenu ni mixima yenu yoso. Etu ki twa mi tondalesa, ki twa bhange kima kyayibha ku muthu, ki twa nganala we muthu phala o mbote yetu.
3 Eme ki nga mu mi tangela o ima yiyi phala ku mi fundisa. Mukonda nga mi ambelele kyá kwila, kikale tukala ku mwenyu mba tufwa, enu mwala ku mixima yetu.
4 Ngi zwela n’enu ni kidi kyoso. Ngi dinanza kyavulu mukonda dyenu. Mu hadi yami yoso, nga swina kyavulu, nga sanguluka we kyavulu.
5 Tundé ki twa bhixila ku Masedonya, ki twatenene kunyoha kyambote. Mukonda athu a mukwá akexile mu tutalesa hadi mu maukexilu oso ni ku tu zukutisa, etu we twa kexile ni wôma.
6 Maji Nzambi o mukwa kukonda o malamba a yó atoloka o mixima, wa tukondo o malamba bhukaxi ka wijilu wa Titu.
7 K’etu ngó twa sanguluka ni wijilu wa Titu, maji mwene we wa swina mukonda dyenu, kuma mwene wa twambela kwila, enu mwa mesena ku ngi mona. Wa tutangela we yalungu ni kuluwala kwenu, mukonda mwene mu ngibanza kyavulu, kyenyiki nga sanguluka dingi kyavulu.
8 Né mwene se o mukanda u nga mi tumikisa wa mi luwalesa, eme ki nga dyela. Sumbala ku dimatekenu nga dyele (mukonda ngi mona kwila mu ka kithangana kofele o mukanda wa mi luwalesa),
9 ki nga sanguluka mukonda dya kuluwala kwenu kana, maji nga sanguluka mukonda o kuluwala kwenu, kwa mi bhangesa kudyela. Kuma enu mwa luwalele mu ukexilu u sangulukisa Nzambi. Mukonda dya kiki, etu ki twa mi bhekela malamba.
10 Mukonda o kuluwala mu ukexilu usangulukisa Nzambi, kubhekela o kudyela kubhangesa o muthu kubhuluka. O kubhuluka kuku, ki kwanda bhangesa o muthu kudyela, maji o kuluwala kala kyene mu luwala o athu ku mundu, kubhekela kalunga.
11 Enu mwa luwala mu ukexilu usangulukisa Nzambi, mukonda dya kiki mwa diswinisa phala kubhanga ima yambote. Mwa dilondekesa kwila mwala mu athu azele. Mukonda dya ituxi i mwatele, mwa dilondekesa we kwila mwala ni mukôndo, anga mu kala ni wôma wa Nzambi, mwa dyela o ituxi yenu, mwa bheza Nzambi ni muxima woso, mwa bhange o ima yatokala. Mu kubhanga o ima yoso yiyi mwa londekesa kwila, ki mwala ni kikuma.
12 Sumbala nga mi sonekene o mukanda wenyó, ki nga kibhange mukonda dya yó watele o kituxi, mba mukonda dya yó a mutele o kituxi, maji nga mi sonekena phala kumona se enu mwa mesenene mwene ku twívwa ni muxima woso bhu pholo ya Nzambi.
13 Mukonda dya kiki, etu twa swina dingi.
Etu twatana dingi mukonda dya kusanguluka kwa Titu, kuma enu mwa mu swinisa kyavulu.
14 Mu kuzwela ni Titu yalungu ni enu, eme nga dinanze mukonda ki mwa ngi kwatesa jisonyi. Ima yoso i twa mi tangela yexile ya kidi, kyene we kimoxi o ima i twa tangela kwa Titu yalungu ni enu yexile we ya kidi.
15 Kyoso mwene kya lembalala o kutumaka kwenu, ni kyoso ki mwa mu tambulula ni ujitu woso, o henda yê kokwenu idibandekesa dingi.
16 Eme nga sanguluka mukonda mu ima yoso ngitena ku mi dyelela.*
Footnotes
^ Mba nange, “ngi tena kusanguluka mukonda dyenu.”
