Wakatatu wa Nzwá 1:1-14
1 Eme ngi mwadyakime,* nga mu sonekena mukwetu Ngayu, muthu nga muzolo ni muxima woso.
2 Kamba dyami dyakazola, ngene musamba phala ukale kyambote ni ukale jinga ni sawidi yambote, kala kiwala kindala.
3 Mukonda nga sanguluka kyavulu kyoso o jiphange kyeza, ya angitangela kwila, eye wa dikwatenena mu kidi, ni kwila wa mukolokota mukwenda mu kidi.
4 O kima ki ngibhangesa kusanguluka kyavulu,* o kwijiya kwila o an’ami ala mukwenda mu kidi.
5 Kamba dyami dyakazola, eye wene mulondekesa o ufiyele wé mu ima i wene mubhanga phala o jiphange, né mwene yó ki wa ejiya.
6 Ene azwela yalungu ni henda i wene mulondekesa ku jiphange mu kilunga. Kyoso ene kyanda vutuka, bhanga yoso phala kwakwatekesa mu ukexilu usangulukisa Nzambi.*
7 Mukonda dya dijina dya Nzambi, ene atundu phala kuboka, sé kutambula kima ku akwa jixi jengi.
8 Twatokala kuzalela o jiphange kala yâ, phala tukale tu akwatekexi’â mu kuboka o kidi.
9 Nga sonekena o jiphange mu kilunga, maji Diyotelefu wa wabhela kukala kupholo dya akwâ, kaxikina kima kyoso-kyoso kituzwela.
10 Kyenyiki, se ngiya koko, nganda mi londekesa o ima yene mubhanga mwene, ni kyebhi kyene mu tutatela.* Mwene kaxikina we kutambulula o jiphange ni kuxila kwoso, ufidisa ni kukaya mu kilunga yó amesena kutambulula o jiphange.
11 Kamba dyami dyakazola, kana kukayela o ima yayibha, maji kayela o ima yambote. Woso ubhanga o ima yambote watokala kwa Nzambi. Maji woso ubhanga o ima yayibha, kejiya Nzambi.
12 Athu oso azwela kyambote yalungu ni Demétulu, o wendelu wé wa kidi. Mu kiki, etu we tubhana umbangi walungu ni mwene, eye wejiya kwila o umbangi u tubhana wa kidi.
13 Ngala ni ima yavulu phala ku kutangela, maji ki ngamesena ku kusonekena-yu mu mikanda.
14 Maji nga mukinga ku kumona kindala, ni tu dikunde pholo ni pholo.
O kutululuka kukale ni eye.
O makamba a kutumikisa o umenekenu. Tumikisa we o umenekenu wami ku makamba mami, kala muthu mu dijina dyê.
Footnotes
^ Mba, “kafunga.”
^ Mba nange, “o kima ki ngi bhangesa kusakidila.”
^ Nange kya lungu we ni kwa bhana kudya phala kwenda o njila.
^ Mu Ngel.: “kyene mu tu longolola.”
