Kala Kyasoneka Nzwá 12:1-50
12 Kyoso kya kambele izuwa isamanu phala kumateka o Fesa ya Phasu, Jezú wabhixila mu sanzala ya Betanya mwatungile Lázalu, yó a mu fukunwine kwa Jezú mu madifundu.
2 Mwenyomo, a mulambela kudya, Málata mwéne wakexile mu sidivila, o Lázalu wakexile mudya* kumoxi ni Jezú.
3 Madiya anga ukwata kaxaxi kalitulu ya máji adizumba o bhange ni náladu,* ate kitadi kyavulu, anga u alundulwila ku inama ya Jezú, yu wamateka ku ikondona ni ndemba yê. O inzo yoso anga izala ni dizumba dya máji.
4 Maji Juda dya Kadyota watokalele we ku maxibulu mê, yó weji ku mu sumbisa, wambe:
5 “Mukonda dyahi o máji yá adizumba, ka asumbisa mu hâma jitatu ja madenádyu, o kitadi n’a kibhane ku jingadyama?”
6 Mu kidi, mwene kazwela o ima yiyi mukonda dya henda ya jingadyama, maji mukonda wexile mwiyi. Mwene wakexile mulanga o ngonga ya kitadi, anga wakexile mu nyana o kitadi kyexile mutula-mu.
7 Kyenyiki Jezú wambe: “Mwehyenu, abhange kiki mu kuxinganeka kyoso kyanda ngi funda.
8 Mukonda enu mwanda kala jinga ni jingadyama, maji ki mwanda kala jinga n’eme.”
9 Kyenyiki Jijudé javulu evu kwila, Jezú wakexile mu Betanya. Ene anga ayi mwenyomo, ki mukonda ngó dya Jezú maji phala we kumona Lázalu, yó a mu fukunwine kwa Jezú ku madifundu.
10 O akunji a makota atele we kikutu phala kujibha Lázalu,
11 kuma Jijudé javulu akexile muya ku Betanya ni kuxikana Jezú, mukonda dya mwene.
12 Mu kizuwa kya kayela-ku, o mundu wayile ku fesa, evu kwila Jezú yu wiza mu Jeluzaleme.
13 Ene akwata isalale ya maye, ayi mudisanga ni Jezú, anga amateka kudikola, exi: “Nzambi twa kudyóndo, mu bhulule!* A tane-ku yó wiza mudijina dya Jihova. A tane-ku o Sobha ya Izalayele!”
14 Jezú wasange kamona ka jumendu, yu wasambela-ku kala kyosoneke:
15 “Kana kukala ni wôma eye u mon’a muhatu wa Ziyone. Talesa! Sobha yé yu wiza, wasambela ku kamona ka jumendu.”
16 Mu kithangana kyenyókyo, o maxibulu mê katendela o ima yiyi, maji kyoso Jezú kya mu jingisa, ene alembalala kwila, o ima yabhange o mundu kwa Jezú, yosoneke mu Mikanda Ikôla.
17 O mundu wakexile nê kumoxi kyoso mwene kyexanene Lázalu phala kutunda mu mbila, ni kufukunuka mw’alunga, wasulukile ni kutangela ku athu o ima ya mwene.
18 Kiki kyene kyabhangesa o mundu kuya mudisanga-nê, mukonda evu kwila mwene wabhange o madiwanu yá.
19 Kyenyiki o Jifalizewu adyambela mudyâ, exi: “Twamono kwila ki twa mutena kubhanga kima. Talenu kyebhi o mundu woso wa mu mukayela!”
20 Mwaxaxi ka athu ayile mu fesa, mwakexile akwá Ngelexa.
21 Ene azukama kwa Filipe wexile mukwa Betesayida ya Ngalileya, ya amateka ku mubhinga, exi: “Ngana, etu twa mesena kumona Jezú.”
22 Filipe anga wayi muzwela ni Mandele. O Mandele ni Filipe ayi muzwela ni Jezú.
23 Jezú anga u atambwijila, wixi: “O kithangana kya kujingisa o Mon’a muthu kyabhixila.
24 Ngi mi tangela ni kidi kyoso kwila, se lumbundu lwa tiliku lu sonoka mu mavu anga lukamba kujimuka,* lwene lukala ngó lumbundu. Maji se lujimuka* mu mavu, lubhana ibundu yavulu.
25 Woso wazolo o mwenyu wê, wanda ku utexi, maji woso wazembe o mwenyu wê mu ngongo mumu, wanda ku ubhulula phala o mwenyu wakalelaku.
26 Se muthu wamesena ku ngi sidivila, a ngi kayele, bhwoso bhu ngi kala, bhene we bhwanda kala o selevende yami. Se muthu umesena ku ngi sidivila, o Tata wanda mu jingisa.
27 Ngala ni kikote ku muxima, ihi i nganda zwela? Tata, ngi bhulule ku yoso yanda bhita.* Maji, eme ngeza mukonda dya ima yiyi yanda bhita.
28 Tata, jingisa o dijina dyé.” Anga kutunda dízwi ku dyulu, dixi: “Eme nga dijingisa kyá, nganda dijingisa dingi.”
29 O mundu wemanene bhenyobho wevu o dízwi, anga amateka kuzwela kwila kwa numine. A kamukwá, exi: “Anju yazwela ni mwene.”
30 Jezú wa atangela, wixi: “O dízwi didi kidyeza mukonda dyami, maji mukonda dyenu.
31 Kindala, o kithangana kya kufundisa o ngongo yiyi, kyabhixila kyá, o nguvulu ya mundu yú anda mukaya.
32 Kyoso kyanda ngi zangula, nganda bheka athu a idifwa yoso kokwami.”
33 Mwene wazwela kiki phala kulondekesa kyebhi kyeji fwa.
34 O athu a mutangela, exi: “O Kijila kya Mozé kyamba kwila, o Kidistu wanda nangenena katé ku hádya. Kyebhi ki wa muzwela kwila o Mon’a muthu atokala ku muzangula mu ixi? O Mon’a muthu yú nanyi?”
35 Kyenyiki Jezú wa atangela: “O mukengeji wanda kala hanji mwaxaxi kenu tu ithangana. Endenu kyoso kimwala hanji ni mukengeji, phala o kitombe ki ki mitolole. Mukonda woso wenda mu kitombe kejiya kwoso kwa muya.
36 Kuma mwala hanji ni mukengeji, londekesenu kixikanu ku mukengeji phala mukale mu an’â mukengeji.”
Kyoso Jezú kyazubha kuzwela o ima yiyi, mwene wayé, anga udisweka.
37 Sumbala Jezú wabhangele madiwanu avulu bhu pholo yâ, maji ene ka muxikana.
38 Kiki kyabhiti phala kudikumbidila o izwelu ya polofeta Izaya, kyoso kyambe: “Jihova, nanyi waxikina o ima i twa zwela?* O kutena* kwa Jihova a kulondekesa kwa nanyi?”
39 Izaya wambele we se mukonda dyahi ene keji londekesa kixikanu:
40 “Mwene wa afwisa o mesu, yu wa akolesa o mixima. Phala kamone ni mesu, né kutongoloka ni muxima, anga alunguluke ni ngi asake.”
41 Izaya wambele o ima yiyi yalungu ni Kidistu, mukonda wa mwene o fuma yê.
42 Katé mwene ni atwameni avulu a Jijudé a mu xikinine, maji ene kakexile mu dilondekesa ku athu mukonda dya Jifalizewu, phala ka akaye mu dilombe.*
43 Kuma ene azolele dingi o fuma ya athu, o ya Nzambi ndenge.
44 Jezú anga uzwela ni dízwi dya swina, wixi: “Woso u ngi xikana, ka ngi xikana ngó eme, maji uxikana we yó wa ngi tumikisa,
45 woso u ngi mona, u mona we Yó wa ngi tumikisa.
46 Eme ngeza kala ngi mukengeji wa ngongo phala woso u ngi xikana, kanangenena mwavundu.
47 Maji se muthu wívwa o maka mami, anga ukamba ku akumbidila, eme ki ngi mufundisa, mukonda ki ngeza mufundisa o mundu, maji ngeza phala kubhulula o mundu.
48 Woso u ngi dituna anga ukamba kuxikina o maka mami, sayi yó u mufundisa. O maka u ngazwela, éne anda mufundisa mu kizuwa kya suka-ku.
49 Mukonda ki ngizwela o ima itunda kokwami, maji o Tata wa ngi tumikisa, mwéne wa ngibhana kitumu kyalungu ni ima i nga tokala o kuzwela ni kulonga.
50 Eme ngejiya we kwila, o kitumu kyê kilombolola mwenyu wakalelaku. Kyenyiki, yoso i ngi zwela, ngizwela kala kya ngi longo o Tata.”
Footnotes
^ Mba, “wa xikama ku meza.”
^ O náladu, ka kisasa kala ni dizumba dyambote.
^ Mu Ngel.: “Hozana.”
^ Mu Ngel.: “kufwa.”
^ Mu Ngel.: “lu fwa.”
^ Mu Ngel.: “ku kithangana kiki.”
^ Mu Ngel.: “mu ima yevu kokwetu.”
^ Mu Ngel.: “lukwaku.”
^ Mba, “kididi kya ubhezelu.”
