Ikalakalu ya Jipoxolo 24:1-27
24 Kyabhiti izuwa itanu, o mukunji wa betakota Ananiya wakulumuka kumoxi ni adyakime amukwá, ni mulongexi* amwixana Teletulu. Ene anga azwela ima yayibha yalungu ni Phawulu bhu pholo dya nguvulu.
2 Kyoso kya mwixana, Teletulu wamateka o kutatela Phawulu mu kuzwela, wixi:
“Twala ni kutululuka kwadikota, mukonda dyé Ngana. Mukonda dya kutumina kwé kwa unjimu, o ixi yenyiyi ya mu wabha dingi.
3 Ngana Fele, mu ithangana yoso ni mu ididi yoso, twene mumona o ima yavulu i wene mubhanga. Twakusakidila kyavulu.
4 Maji phala ki ngi kukatule dingi o kithangana kyé, nga kubhingi kwila mu henda yé, ng’ivwidile ngó kakithangana.
5 Mukonda twamono kwila o diyala didi, wedi kala dibhebhu* wene muswinisa o Jijudé mu ngongo yoso ku bhukumukina o jinguvulu. Mwéne wala ku pholo dya kibuka kya akwa Nazalé.
6 Mwene wamesenene we kuxidisa o tembulu, maji etu twa mukwata.
7 ——
8 Kyoso ki wanda mubhanga o ibhwidisu, wanda kwijiya o ima yoso i twa mu mutatela.”
9 O Jijudé a mu kwatekesa we mu kulondekesa kwila, o ima yakexile mutatela Phawulu, yakidi.
10 O nguvulu wabhange kijimbwete ni mútwe wê phala Phawulu kuzwela, mwene wambe:
“Mu kwijiya kwila eye wa mufundisa o mundu yú mu mivu yavulu, ngizwela bhu pholo yé mu kudizokela.
11 Ngana, kala ki wakijiya, kwabhiti kyá kwinyi ni kiyadi kya izuwa ndenge, tundé o kizuwa ki ngabande mu Jeluzaleme phala kubheza Nzambi.
12 Ene ka ngisange nga muzoka ni muthu mu tembulu, né mwene kufunyisa athu phala kubhanga kavwanza mu malombe* mba mukididi kyengi kya mbanza.
13 Kindala ene katena ku kulondekesa kwila, o ima ya mu ngitatela yakidi.
14 Maji ngi kutangela ngó kima kimoxi: Bhukaxi ka njila a ixana kwa ene kwila, kibuka kya akwa Nazalé, nga musidivila o Nzambi ya jikuku jetu, mu kuxikina mu ima yoso yósoneke mu Kijila kya Mozé ni mu madivulu a Jipolofeta.
15 O kidyelelu kingala nakyu kwa Nzambi kyene we kyala nakyu ene, kya kwila, ku hádya kwanda kala difukunukinu dya athu ayuka ni athu akambe o kuyuka.
16 Mukonda dya kiki, ngibhanga nguzu phala kukala ni kitongolwelu kyazele,* bhu pholo ya Nzambi ni ku athu.
17 Kyabhiti mivu yavulu, ngeza mu Jeluzaleme phala kubhana maujitu ku kifuxi kyami ni kubhana jisata.
18 Kyoso kingexile mubhanga o ima yiyi, ene a ngisangele mu tembulu, ngazele kala kituma o Kijila, maji ki ngakexile ni mundu wavulu mba kubhanga kavwanza. Mwenyomo mwexile we Jijudé jatundile mu kibatu kya Azya.
19 Se amonene kikuma kokwami, éne afwamene kwiza bhabha n’a ngitatele.
20 Se kana, o mayala yá azwele-phe o kikuma kyamonene kokwami kyoso ki ngakexile mu Kididi Kya Kufundisa.
21 Kikale ngó a ngitatela mu kima ki nga zwelele mwaxaxi kâ, ngixi: ‘Lelu a mu ngifundisa bhu pholo yenu mukonda ngixikina kwila, o madifundu anda fukunuka!’”
22 Kuma Fele wejidile kyambote o ima yalungu ni Njila yiyi, o maka ka abatula hanji, maji wambe: “Kyoso Lizyu o kabhitangu ka kibuka kya masoladi kyanda kwiza, nganda batula o maka m’enu.”
23 Fele watumu o kabhitangu ka masoladi kwambata Phawulu mu kaleya, maji watumu we ku mubhana ufôlo phala o jiphange adikile o ibhindamu yê.
24 Mu kubhita izuwa, Fele weza kumoxi ni muhatu wê Nduluxila wexile Judé. Fele watumu kutakana Phawulu phala ku mwivwa yoso yanda zwela yalungu ni kixikanu kyê kwa Kidistu Jezú.
25 Kyoso Phawulu kyamateka kuzwela yalungu ni kuyuka, kuditumina jihânji ni kizuwa kya kufundisa kyanda kwiza ku hádya, Fele wôma wa mukwata, anga uzwela, wixi: “Kindala ndé hanji, maji kyoso kinganda kala ni kithangana, nganda tuma ku kwixana dingi.”
26 Mwene wakexile mukingila kwila, Phawulu u mubhana kitadi. Mukonda dya kiki, wakexile mutuma ku mutakana muveji javulu phala kuzwela-nê.
27 Kyoso kyabhiti mivu iyadi Fele a mubhingana kwa Poloxo dya Festu. Kuma Fele wa mesenene kwila o Jijudé a mu wabhela, waxisa Phawulu mu kaleya.
