Ku Akwa Loma 10:1-21
10 Enu jiphange jami, ngene mu dyondela kwa Nzambi ni muxima woso phala akwa Izalayele abhuluke.
2 Ngitena kuzwela kwila, ene abhanga nguzu yavulu phala kusidivila Nzambi, maji kejiya kyambote o vondadi ya Nzambi.
3 Kuma ene kejiya o ima imona Nzambi kala yayuka, akayela o ijila yâ. Mukonda dya kiki, ene katumaka o ima i mona Nzambi kala yayuka.
4 Mukonda Kidistu mwéne o dizubhilu dya Kijila, phala woso u muxikana, Nzambi u mumona kala muthu wayuka.
5 Mozé wasoneka yalungu ni kuyuka kwijila bhukaxi ka Kijila, wambe: “Woso ubhanga o ima ya yuka, wanda tambula o mwenyu.”
6 Maji yalungu ni kuyuka kwijila mu kulondekesa kixikanu, o Mak’â Nzambi, ambe: “Kana kuzwela ku muxima wé kwila, ‘Nanyi wanda banda ku dyulu?’ kilombolola kubanda ku dyulu phala kutulukisa Kidistu,
7 mba, ‘Nanyi wanda tuluka ku dikungu dyazongo?’ kilombolola kutuluka ku dikungu dyazongo phala kufukununa Kidistu mw’alunga.”
8 Maji ihi yamba o Mikanda Ikôla? Yene yamba: “O maka a kuzukama, ala mu dikanu dyé ni ku muxima wé.” Yá ene o “maka” a kixikanu, u tubokela o athu.
9 Se ufisala ni dikanu kwila, Jezú mwéne Ngana, anga uxikina ku muxima wé kwila, Nzambi wa mufukununa mw’alunga, eye wanda bhuluka.
10 Mukonda ni muxima, o muthu ulondekesa o kixikanu n’a mumone kala muthu wayuka. Maji ni dikanu, mwene ubokela akwâ yalungu ni kixikanu kyê, n’a bhuluke.
11 O Mikanda Ikôla yamba: “Woso ulondekesa kixikanu kwa mwene, kanda dyela.”
12 Kibhwala katungu mukaxi ka Jijudé ni Jingeleku. O Ngana wala kuthandu dya athu oso, yene imoxi. Mwene ukwatekesa ni henda yoso oso adikola kwa mwene.
13 Mukonda “woso udikola mu dijina dya Jihova, wanda bhuluka.”
14 Maji kyebhi kyanda dikola kwa mwene se ka muxikana? Kyebhi kyanda muxikana se kévu kima kyalungu ni mwene? Kyebhi-phe kyanda kwívwa se kibhwala muthu wa abokela?
15 Kyebhi-phe kyanda boka se ka atumikisa? Kala kyósoneke mu Mikanda Ikôla, exi: “Kisangu-sangu kyadikota kumona yó* aboka o njimbu yambote!”
16 Maji ki athu oso abelesela o njimbu yambote. Mukonda Izaya wambe: “Jihova, nanyi waxikana o ima i twazwela?”
17 Kyenyiki, o kixikanu kijila mu kwívwa o maka. O maka a evwa, kyoso muthu kyaboka yalungu ni Kidistu.
18 Yalungu ni akwa Izalayele, ng’ibhwidisa: O kwila ene k’evu o maka? Mu kidi, ene evwile mwene! O Mikanda Ikôla yamba: “O dízwi dyâ adivu mu ngongo yoso, o njimbu yâ, yabhixila katé ku maxokololo a jixi.”
19 Ng’ibhwidisa dingi: O kwila akwa Izalayele ka tongoloka? Mozé wadyangela kuzwela, wixi: “Nganda mi bhangesa kukala ni difuba dya athu akwa jixi jengi. Nganda mi bhangesa we kukala ni njinda ya athu atokala ku kifuxi a amono kwila atobho.”
20 Izaya wazwela ni kuswina kwoso, wixi: “O athu kakexile mu ngisota, éne a ngisange. O yó kakexile mu dibhwidisa yalungu n’eme, nga atukulukila.”
21 Maji Izaya wambe we yalungu ni akwa Izalayele: “Kumbi dyoso nga sununa o lukwaku lwami ku mundu wabhukumuka, akolo o mixima.”
Footnotes
^ Mu Ngel.: “o inama ya yó.”
