Makatukilu 18:1-27
18 Jétulu mukunji wa akwa Midiyana, ukow’â Mozé, wevu yoso yabhangele Nzambi kwa Mozé ni ku mundu wê akwa Izalayele, ni kyebhi Jihova kya katwile akwa Izalayele ku Ijitu.
2 Jétulu ukow’â Mozé watambulwile Zipola muhatu wa Mozé. Mwene wa mutumikisine ku dibhata dya ukowê,
3 kumoxi ni an’ê kiyadi. Umoxi wa muluku o dijina dya Ngelexome,* mukonda Mozé wambe: “Ngatungu kala ngi musonyi mu ixi yangene.”
4 O mukwa wa muluku o dijina dya Eliyezele,* mukonda mwene wambe: “O Nzambi ya tat’etu, mwéne o mukwatekexi wami, wa ngibhulula ku xibhata ya Falawó.”
5 Mukyenyiki, Jétulu ukow’â Mozé, kumoxi ni twana ni muhatu wa Mozé, ayi mudisanga ni Mozé mu kikangalakata bhwa tele o kibangu, bhu mbandu a mulundu wa Nzambi yakidi.
6 Mukiki, mwene watumina kutangela Mozé, wixi: “Éme Jétulu ukowé, ngamukwiza mudisanga n’eye, ngamukwiza kumoxi ni muhat’wé ni twana twé tuyadi twa mala.”
7 Mu kithangana kyenyokyo Mozé wayi mudisanga ni ukowê, ubhetama anga u mubhana nzobole. Adibhwidisa mudyâ kyebhi kyakexile, mukusuluka abokona mu balaka.
8 Mozé watangela kwa ukowê yoso yabhangele Jihova kwa Falawó ni ku akwa Ijitu mukonda dya Izalayele, ni ibhidi yoso ya dibhanene-nayu mu njila, ni kyebhi Jihova kya abhulula.
9 Jétulu wasanguluka mu kwivwa o mbote yoso yabhangele Jihova kwa akwa Izalayele, mu ku abhulula bhu maku a akwa Ijitu.
10 Kyenyiki, Jétulu wambe: “Jihova ataneku wa mibhulula kwa akwa Ijitu ni kwa Falawó, wabhulula we o mundu bhu maku akwa Ijitu.
11 Kindala ngejiya kwila Jihova wabetakota o jinzambi joso jamukwa ndenge, mukonda dya ima yabhange mwene kwa akwa Ijitu, atalatala kyayibha o mundu wê.”
12 Mukiki, Jétulu ukow’â Mozé weza ni sata ya kwoha ni maujitu phala Nzambi. Alá ni tufunga twoso twa Izalayele ayi mudya kumoxi ni ukow’â Mozé bhu pholo ya Nzambi yakidi.
13 Mu kizuwa kya kayela-ku, Mozé waxikama phala kufundisa o mundu kala kyexile mubhanga kyá. O mundu anga ukala bhu pholo ya Mozé tunde mu kamene kate ku dimatekenu dya usuku.
14 Mukumona yoso yexile mubhanga phala o mundu, ukow’â Mozé wambe: “Mukonda dyahi wa mubhanga o ima mu ukexilu yú? Mukonda dyahi waxikama phala kufundisa o mundu ubheka wé, maji o mundu wemana bhu pholo yé tunde kamene ndu ku dimatekenu dya usuku?”
15 Mozé wambela ukowê: “Kyamubhita mukonda o mundu wiza kokwami phala kwijiya yebhi o vondadi ya Nzambi.
16 Kyoso ki kumoneka kiyadi kya athu adikwata, ene a ngitangela o maka mâ ni nga afundisa, anga nga ejidisa o ima yasolo o Nzambi yakidi ni ijila yê.”
17 Ukow’â Mozé wa mutangela: “O ki wamubhanga ki kima kyambote.
18 Sé phata wanda bhwila,* ni mundu wala kumoxi n’eye wanda bhwila we, mukonda o muhamba yú waneme kyavulu phala ku wambata ubheka wé.
19 Kindala ngívwe. Nganda kubhana ndunge, o Nzambi wanda kala n’eye. Kyene mwene. Eye watokala kusidivila kala u mukunji wa mundu bhu pholo ya Nzambi yakidi, o maka a mundu éye wenda ni ku abheka kwa Nzambi yakidi.
20 Watokala kwalonga o jingonge ni ijila ni kwa ejidisa o njila yatokala kwendela ni ikalakalu yatokala o kubhanga.
21 Mukyenyiki-phe, watokala kusola mwaxaxi ka mundu, mayala ala ni kilunji, axila Nzambi, mayala atokala kwa adyelela, kaxikina kudyodya akwâ. Wa asola phala akale ku pholo kala atwameni a midi, atwameni a hama, atwameni a makwinyi atanu ni atwameni a dikwinyi.
22 Éne mwene atokala kufundisa o mundu kyoso ki kumoneka maka. O maka abhonzo anda kwabheka kokwé, maji o akambe o kubhonza éne mwene anda kwabatula. Bhebhulukisa o kikalakalu* kyé, mu kukiwana ni ene.
23 Se ubhanga o ima yiyi, o yene anga ilunga ni vondadi ya Nzambi, wanda tena kwambata o muhamba, o mundu woso wanda vutuka ku bhata ni kisangusangu.”
24 Sé kulaleka, Mozé wevu ukowê, yu wabhange yoso ya mutangela.
25 Mozé wasolo mayala ala ni kilunji mwaxaxi ka mundu wa Izalayele, wa asolo phala kukala ku pholo dya mundu, kala atwameni a midi, atwameni a hama, atwameni a makwinyi atanu ni atwameni a dikwinyi.
26 Mukyenyiki, ene exile mufundisa o mundu kyoso kikwexile mumoneka maka. Maka oso abhonzele, exile mwa ambata kwa Mozé, maka oso akambele o kubhonza, éne exile mwabatula.
27 Mukusuluka Mozé wadilekela ni ukowê, ukowê anga uvutuka ku ixi yê.
Footnotes
^ Dilombolola, “musonyi mu kididi kyenyokyo.”
^ Dilombolola, “Nzambi yami mukwatekexi.”
^ Mba, “wanda tohoka.”
^ Mba, “o muhamba wé.”
