1. Njila iebhi ia tokalele kuenda Jona ni kiebhi kia divu muéne?

 JONA ua kexile ni thembu ia soko phala ku xinganeka. Muéne ua tokalele kuenda 800 a ji kilómetulu. Phala kuenda o njila íii, kua bhingile mbeji ia muvimba. Kia dianga, muéne ua tokalele ku sola njila ia butu mba njila ia tululuka; ni ku bhitila mu milundu ia makota. Muéne ua tokalele ué ku kondoloka o kikangalakata ni ku zaúka ngiji javulu kala o ngiji ia dikota ia Efalate ni ku sota kididi kia tululuka mu ji sanzala ni mu jimbanza ja Sídia, Mezopotamiia ni Asídia. O izuua ia kexile mu bhita. Kioso Jona kia kexile mu zukama, muéne ua kexile ni uôma ni ku banza kiavulu mua kexile múia—o mbanza ia Ninive.

2. Kiebhi Jona kia di longo kuila, ka tokalele ku lenga o kikalakalu kia mu bhanene?

² Jona uejidile kuila, keji tena ku lenga o kikalakalu kia mu bhanene. Muéne ua lengele kiá. Kala ki tua di longo kiá mu kibatulu kia bhiti, Jihova ni muanhu uoso, ua longo Jona bhu kaxi ka kitembu kionene kia kexile mu bhuka mu kalunga ni bhu kaxi ka mbiji ia dikota ia minha Jona. Mu ku bhita izuua itatu, o mbiji ia lusu Jona ku ndundu. Kienhiki, Jona ua di longo o ku lenduka ni ku belesela.​—Jona kibatulu 1, 2. 

3. Kídifua kiahi kia londekesele Jihova kua Jona maji kibhuidisu kiahi ki tu bhanga?

³ Kioso Jihova kia tumu Jona kuia mu mbanza ia Ninive mu veji ia kaiiadi, o polofeta ua belesela. (Tanga Jona 3:1-3.) Maji o kuila Jona ua lungulula o ukexilu uê kioso Jihova kia mu bazela? Mu kifika, Jihova ua mu londekesele henda, ka mu ehele  kufuá mu kalunga, ka mu kaxtikala mukonda dia ku bhukumuka kuê, mu veji dia kiki, ua mu bhana kithangana kiéngi kia ku kumbidila o kikalakalu kiki. O kuila Jona ua di longo o kulondekesa henda kua akuâ? Ku bhonza kiavulu o athu a ituxi kulondekesa henda. Tu mone ihi i tu tena o ku di longa kua Jona.

4, 5. Mukonda diahi Jihova ua tumbula o mbanza ia Ninive kala “o mbanza ia dikota” ni ihi i tu di longa kua muéne?

⁴ Jona ka monene akua Ninive kala kia kexile mu mona Jihova. O Bibidia i zuela: ‘Ninive iexile mbanza ia dikota phala Nzambi.’ (Jona 3:3) Mu divulu dia Jona, Jihova u tumbula veji jitatu o kizuelu, ‘Ninive o mbanza ia dikota.’ (Jona 1:2; 3:2; 4:11) Mukonda diahi o mbanza íii iexile ia dikota mba ni valolo phala Jihova?

⁵ Ninive iexile mbanza iokulu, a i tungile kuala Nimilodi kioso kia bhiti o dilúvio. Ninive iexile mbanza ia dikota, phala ku nhunga Ninive ioso kua bhingile izuua itatu. (Dim. 10:11; Jona 3:3)  O mbanza ia Ninive, ia iukile kiavulu, ia kexile ni ji sabhalalu ja iuka ni milundu ionene. Maji phala Jihova, o mbanza íii ki i betele kota mukonda dia ima íii. O ia betele o kota phala Jihova, o athu a tungile mu mbanza. Mua tungile athu avulu mu mbanza ia Ninive mbanza ja mukuá ndenge. Sumbala ni ima ia iibha ia kexile mu bhanga o athu, Jihova ua a zolele kiavulu. Jihova u bhana valolo ku muenhu ua athu ni mu nguzu i bhanga o muthu phala ku diela o ituxi ni ku bhanga o kima kia tokala.

6. (a) Mukonda diahi Jona ua kexile ni uôma kioso kia bokona mu mbanza ia Ninive? (Tala ué ku luiji.) (b) Ihi i tu di longa kua Jona mu ku kumbidila o kikalakalu kiê kia kuboka?

⁶ Kioso Jona kia bokona mu mbanza ia Ninive, mu ku mona o 120.000 a athu a tungile mu mbanza ia Ninive, uôma ua mu kuata. a Ua nhungu kizuua kia muvimba mu mbanza ia Ninive, nange mu ku sota kididi kia tokala phala ku mateka o ku boka o njimbu. Kiebhi muéne kieji tena ku bokela o athu enhó? O kuila muéne ua di longele o dimi dia akua Asídia? Anga Jihova ua mu bhangesa ku zuela o dimi didi? Ki tuejiia. Nange muéne ua bokele mu dimi diê dia uvualukilu, Hebalaiku, ni ku bhinga muthu n’a i lungulule mu dimi dia akua Ninive. O njimbu iê ki i bhonzele o ku i tula, maji ieji bhonza kiavulu o mundu ku i xikina. Jona ua boko, uixi: “Kua kambe ngó makuinhi a uana a kizuua, Ninive a-nda ku mu sengulula, u jima mbutu.” (Jona 3:4) Ni ku suína, muéne ua suluka mu ku boka o njimbu. Mu ku bhanga kiki, ua londekesa ku suína ni kixikanu, iene o ídifua ia bhingi o Jikidistá lelu.

7, 8. (a) Kiebhi kia divu o mundu ua Ninive kioso kia tambula o njimbu ia Jona? (b) Ihi ia bhangele sobha ia Ninive kioso kiévu o njimbu ia bokele Jona?

⁷ Akua Ninive a xikina o njimbu ia Jona. Jona ua banzele kuila o athu eji mu beta mba ku mu jibha. Maji ki kiene kia bhitile. O athu a xikina o njimbu! O njimbu ia di muange kala túbhia. Mu ku bhita kithangana, athu oso mu mbanza akexile mu zuela ia lungu ni njimbu ia ku fundisa ia bokele Jona. (Tanga Jona 3:5.) Athu oso, jingadiama ni ji mvuama, minzangala ni adiakimi, a diela o ituxi iâ. Ene a fulu kudia. O njimbu íii ia Jona ia bhixila kua sobha.

⁸ O sobha ua diela ué o ituxi iê kioso kiévu o njimbu ia Jona.  Muéne ua balumuka ku kiandu kiê kia ungana, ua zula o izuatu iê ia sobha ni ku zuata saku kála o mundu, iu ua “xikama mu utokua.” Ni makota mê, muéne ua bhana ngolokela ia kuila mundu uoso ni ibhaku ka tokalele kudia kima kioso-kioso. Muéne ua tumina athu oso ku di kuta ji saku ni ibhaku ué kiene. b Ni ku lenduka kuoso, o sobha ua xikina kuila, o mundu uê ua tele ituxi iavulu bhu pholo ia Jihova. Muéne ua kexile ni kidielelu kia kuila, Jihova ueji ku a loloka se a diele o ituxi iâ. O sobha uambe: “Nanhi ua k’ijiia se Nzambi . . u sondolola ku tema kua njinda iê, phala ki tu jime mbutu.”​—Jona 3:6-9.

9. Ihi a dituna akua jiphata ia lungu ni akua Ninive, maji kiebhi ki tu tena kuijiia kuila ene a di nganala?

⁹ Sai iá, akua jiphata ka xikina kuila akua Ninive a lungulula ni lusolo o ukexilu uâ. Maji akua ku tokuesa o Bibidia, amba kuila, akua Ninive a lunguluile ni lusolo o ukexilu uâ, mukonda dia ifua ni ijila iâ. Maji mu ku bhita thembu, Jezú ua zuela ia lungu ni ku diela kua akua Ninive. (Tanga Matesu 12:41.) Jezú uejidile o ima ia kexile mu zuela, mukonda ua monene o izulukutu ioso ia bhiti kioso kia kexile ku diulu. (Nzuá 8:57, 58) Mu kidi, ki tu tokala ku banza kuila, o athu ka tena ku diela o ituxi iâ.​—né muene se ene a suína mu ku bhanga o ima ia iibha. Jihova, muéne ngó u tena kuijiia o ima iala ku muxima ua muthu.

10, 11. (a) Ihi ia bhangele Jihova kioso akua Ninive kia diela o ituxi iâ? (b) Mukonda diahi tu tena kuzuela kuila Jihova ka luezele mu ku kamba ku kaxtikala akua Ninive?

¹⁰ Ihi ia bhange Jihova kioso akua Ninive kia diela o ituxi iâ? Jona ua soneka: “Nzambi anga u mona o ikalakalu iâ, ni kioso kia diela ku jinjila jâ ja ku bhengalala. Ngana Nzambi anga u lungukuka, u bhomba muxima uê, o kia iibha kia tangele ku a bhanga ka a bange-kiu dingi.”​—Jona 3:10.

¹¹ O kuila kiki kilondekesa kuila Jihova ua mono kuila ua luezele mu ku mesena ku fundisa akua Ninive? Kana. O Bibidia i zuela kuila Jihova u fundisa mu kidi. (Tanga Matendelelu 32:4.) Jihova  ka luualele dingi ni akua Ninive mukonda dia ku diela o ituxi iâ. Muéne ua mono akua Ninive a lungulukile ku ima ia iibha ia kexile mu bhanga, iu ua mono kuila ki ku bhingile dingi ku a kaxtikala. Kiki kiexile o kithangana phala kulondekesa o henda ia Nzambi.

12, 13. (a) Kiebhi Jihova kia londekesa kuila mukua henda, mukua ku loloka? (b) Mukonda diahi o kikanenu kia Jona ki kiexile kia makutu?

¹² Jihova, ki Nzambi ia iibha, ua kambe o henda, kala kiene mu longa o ji mesene ja jingeleja. Mu veji dia kiki, muéne mukua henda, mukua ku loloka. Kioso kia mesena ku buika o athu a iibha, muéne u dianga ku tumikisa o selevende jê phala ku dimuna o athu, mukonda ua mesena kuila, o athu a iibha a bhanga uá kála kia bhangele akua Ninive​—a diela ia a lunguluka ku ima ia iibha ia kexile mu bhanga. (Ize. 33:11) Jihova ua zuelele kua Jelemiia: ‘Bhu kithangana kioso ki ngi kanena o kifuxi mba utuminu, phala ku u vuza, ni ku u lundumuna, ni ku u buikisa. O ki kala o kifuxi’okio ki nga kanena, ki bhiluka kuxa o ku iibha kuâ, kua ngi bhekesa o ku a kanena, eme uami ngi tolola o ithulu iami, divuua di nga banzele o ku a bhanga ene, ki ngi di bhange dingi.’​—Jel. 18:7, 8.

¹³ O kuila o kikanenu kia Jona kiexile kia makutu? Kana; kia tokalele phala ku dimuna o athu. O njimbu ia tokalele muene phala akua Ninive ku lunguluka ku ukexilu uâ ua iibha. Se a vutukile mu ku bhanga o ima ia iibha, Jihova ueji ku a fundisa. Kiki kiene kia bhiti ku pholo.​—Sof. 2:13-15.

14. Kiebhi Jona kia divu kioso kia mono kuila Jihova ua londekesa o henda iê ku akua Ninive?

¹⁴ Kiebhi Jona kia divu kioso kia mono kuila o mbanza ka i buika? Tu tanga: “Jona kia mu iibhila kiavulu, anga u kala ni njinda.” (Jona 4:1) Ni njinda ioso, Jona ua sambe kua Nzambi mu ukexilu ua ku bazela o Muteni-a-Ioso! Jona uambe kuma kieji beta o kota se ua xalele kubhata, ku ixi iê. Muéne uambe kuma, tundé ku dimatekenu uejidile kuila Jihova keji buika akua Ninive, ni kulondekesa kuila kiki kiene kia mu bhangesa ku lenga kua Talxixi. Kienhiki, muéne ua bhingi phala kufuá, mu kuzuela kuila kota o kufuá, o ku kala ku muenhu ndenge.​—Tanga Jona 4:2, 3.

15. (a) Ihi ia bhangesa Jona ku luuala ni ku kala ni njinda? (b) Kiebhi Jihova kia kuatekesa o polofeta iê ua luualele?

¹⁵ Ihi ia kexile mu luualesa Jona? Ki tu tena kuijiia ioso ia kexile mu banza Jona, maji tuejiia ngó kuila, Jona ua bhana ngolokela bhu pholo ia mundu ia kuila akua Ninive eji ku a jibha. O mundu ua xikinine mu izuelu ia Jona. Maji kindala, akua Ninive keji ku a buika dingi. O kuila muéne ua kexile ni uôma ua ku mu sebhulula ku mundu, ni ku mu ixana polofeta ia makutu? Né muene se kiene kia kexile mu banza, Jona ka sangulukile mu ku mona  o mundu ku diela o ituxi iâ, ka sangulukile ué mu ku mona Jihova ku a loloka o ituxi iâ. Muéne ua luualalele kiavulu, iu ua kexile ni njinda mukonda o ima ki i bhitile kala kia kexile mu kingila. Né muene ni ukexilu iú, o Nzambi ia Jona mukua henda, ua kexile hanji mu mona o ídifua iambote ia Jona. Mu veji dia ku mu kaxtikala mu ku kamba o ku mu xila, Jihova ni ku tululuka ua mu bhange kibhuidisu phala ku xinganeka, uixi: “Kifua eie ua lungu ku kala ni njinda?” (Jona 4:4) O kuila Jona ua tambuijila? O Bibidia ki i tu tangela.

16. Kiebhi o athu kia tena ku kala ni kibanzelu ki i difu ni kia Nzambi, ni ihi i tu tena o ku di longa ku phangu ia Jona?

¹⁶ Tu tena ku fundisa Jona mu ukexilu uê, maji ki tu tokala ku di jimba kuila, ki ku bhonza o athu akua ituxi ku kala ni ibanzelu ki i difu ni kia Nzambi. Saí athu a tena ku banza kuila, Jihova ka tokelele kuehela kima kia iibha ku bhita mba ua tokalele ku fundisa ni lusolo o muthu ua iibha, mba ku buika o mundu iú ua iibha mu kindala. O phangu ia Jona i sidivila phala ku tu longa kuila, se ibanzelu ietu ki i difu ni ia Jihova Nzambi, etu tua tokala ku lungulula o ibanzelu ietu​—ki Nzambi kana.

17, 18. (a) Ihi ia bhange Jona kioso kia xisa Ninive? (b) Kiebhi Jona kia divu ku madiuanu a bhangele Jihova alungu ni músala ua dinhángua?

¹⁷ Ni ku luuala, o polofeta ua xisa Ninive, maji mu veji dia ku vutuka kubhata, ua bande ku milundu ku mbandu ia thunda ku mu tudila-kumbila phala ku tala o mbanza. Muéne ua tungu-ko balaka, anga u xikama muenhomo mu kilembeketa kiê ni ku kinga phala ku mona ihi ieji bhita mu mbanza ia Ninive. Muéne ua kexile hanji ni kidielelu kia ku mona o kibuikilu kia mbanza ia Ninive. Kiebhi Jihova kieji longa o diiala didi kulondekesa henda?

¹⁸ Jihova anga u sabhukisa músala ua dinhángua u banda ku thandu dia balaka. Jona kia balumuka u sanguluka kiavulu mukonda dia músala ua dinhángua dia kexile mu bhana kilembeketa ku mutué, o balaka ia tungu muéne ndenge. Kiki kia mu sangulukisa kiavulu. “Jona anga u sanguluka kiavulu” mukonda dia músala ua dinhángua, nange ua banzele kuila o madiuanu enhá, exile kijimbuete kia mabesá ni kuila Jihova ua mu xikina. Maji, Jihova ka mesenene ku mu bhana kilembeketa ni ku sosolola o malamba mê. Muéne ua mesene kuila kiki, ki mu bhangesa o ku xinganeka. Maji mu kúkia mu kimene, Nzambi u tumikisa kibamba ki lelesa o músala, anga u kukuta. Anga ki bhita-phe kuila, Nzambi u tumikisa kitembu kionene kia tema “kia thunda” kienhiki, mukonda dia kalolo, Jona anga “u ambuka ni kizuza kia muanha.” Mukonda dia kiki u luuala kiavulu anga u bhinga kua Nzambi kufuá.​—Jona 4:6-8.

19, 20. Kiebhi Jihova kia zuela ni Jona ia lungu ni músala ua dinhángua?

¹⁹  Kienhiki, Jihova uebhula dingi Jona se ua tokalele muene ku kala ni njinda mukonda dia músala ku kukuta. Mu veji dia ku diela, Jona ua tambuijila, uixi: “Nga lungu’ami muene, o ku kala ni njinda ni kuinda kúfua.” Kiki kiexile muene o kithangana kia tokala phala Jihova ku longa disá kua Jona.​—Jona 4:9.

²⁰ Nzambi ua zuela ni Jona, mu ku mu tangela o polofeta o ku luuala kuê mukonda dia músala ua dinhángua ua sabhuka usuku umoxi sé muéne ku u kuna, ki muéne ué ua u tekela, ni ku u kudisa. Nzambi anga u mu vutuila dingi uixi: ‘Uala ni henda ia músala ua dinhángua, kima ku ki kalakela, ku ki dimi; kiedi kia sabhuka mu usuku. Kifua eme ki ngi tokala ku kala ni henda ia mbanza ia dikota ia Ninive, muala hama ni makuinhi a iiadi a midi ia athu ndenge, athu kejiia lukuaku luâ lua kadilu ni lukuaku lua kiasu, ni ibhaku iavulu?’​—Jona 4:10, 11. c

21. (a) Kifika kiahi kia bhangele Jihova phala ku longa Jona? (b) Kiebhi o musoso ua Jona u tu kuatekesa ku di tonginina mudietu?

²¹ O  kuila u tena ku mona kiebhi o disá dia Jihova diala ni valolo? Jona ka bhangele kima phala ku tekela o músala ua dinhángua. Maji Jihova muéne ua bhanene o muenhu ku athu oso akexile ku mbanza ia Ninive, iu ua kexile mua dikila, kala kia bhanga ni ibhangelu iê ioso mu ixi. Maji mukonda diahi-phe Jona ua betele ku bhana valolo ku músala ua dianhángua, o mienhu ia 120.000 ia athu ni ibhaku iâ, ndenge? O kuila kiki kia bhitile mukonda muéne ua kexile ni kibanzelu kia iibha kia lungu ni akua Ninive? Muéne ua kexile ngó ni henda ia músala ua dinhángua, mukonda uene ua kexile mu ku mu bhana kilembeketa. Ki kidi muene kuila o njinda iê ku akua Ninive iexile mukonda dia luímbi​—kibanzelu kia luímbi phala ka mu sebhulule ku athu, mu kulondekesa kuila ua lungu mu ioso ia zuela? O musoso ua Jona u tena ku tu kuatekesa ku di tonginina o ukexilu uetu. Nanhi mudietu nuka ua kexile ni ibanzelu ia iibha? Tu sakidila Jihova mu ku tu longa ku kala tu athu a tululuka, a lenduka, alondekesa henda​—kala ki bhanga muéne!

22. (a) Kiebhi Jona kia di longo ku milongi ia mu bhana Jihova? (b) Disá diahi di tua tokala ku di longa ué?

²² O kuila Jona ua di longo ku disá dia mu bhana? Ku disukilu dia divulu dia Jona, tu sanga-ku o kibhuidisu kia bhange Jihova kua Jona, maji Jona ka ki tambuijila. Saí athu nange a longolola se mukonda diahi Jona ka tambuijila o kibhuidisu. Maji mu kidi, o kitambuijilu kiala muene mu divulu dia Jona. O divulu dia Jona. O musoso ulondekesa kuila, Jona muéne ua soneka o divulu diambata o dijina diê. Xinganeka o polofeta íii mu ixi iê, ku soneka o divulu diê ni ku tululuka. Nange tu xinganeka, muadiakimi, ua lenduka, mukua unjimu, uala kiá ni jimvi, ua mu tanga o iluezu iê ioso, o ku bhukumuka kuê, ni ku tema kuê mu ku kamba kulondekesa henda kioso kiaia ni ku soneka o divulu diê. Kiki kilondekesa kuila Jona ua di longo kiavulu ku milongi ia mu bhana Jihova. Muéne ua di longo kulondekesa henda. O kuila tua-nda di longa ué?​—Tanga Matesu 5:7.