1. Jimbulula se mukonda diahi, Malata ua luualele kiavulu.

 MALATA, keji tena ku jimba o ima ia monene​—o mbila mua fundile phang’iê, a i jikile ni ditadi. Ua kexile ni ndolo iavulu. Kia mu bhonzele ku xikina kuila phang’iê Lázalu ua fuile. Mu izuua itatu, kioso kia fundu phang’iê, muéne ua luualele kiavulu, o athu akexile mu kuíza ku mu konda malamba, ni ku dila kiavulu.

2, 3. (a) Kiebhi kia divu Malata, kioso kia mono Jezú? (b) O izuelu ia Malata ia londekesa ihi?

² Mu kithangana kiki, Malata ua kexile ni muthu a mu zolele kiavulu kuala Lázalu. O muxima uê ua mu xiximine kiavulu mu ku mona dingi Jezú, mukonda muéne ngó ku mundu ueji bhulula phang’iê. Né muene kiki, Malata ua divu kiambote mu ku kala ni Jezú, bhu kididi kia zukamene ku mbanza ia Betanha. Mu kithangana kiki, Malata ua mono ué o henda ia Jezú ku mesu mê, ia mu kolokotesa kiavulu. Jezú ua bhange ibhuidisu iavulu, kua Malata ia mu kuatekesa ku kolesa dingi o kixikanu kiê ku difukunukinu. Mu ku zuela ni Jezú, Malata uambe kima kia betele-kota ku muenhu uê: “Eme nga ku xikana kuma eie u Kristu, Mon’a Nzambi, a mu kingile kuiza mu ngongo.”​—Nzuá 11:27.

³ O izuelu ia Malata, ia londekesa kuila muéne uexile muhatu ua kixikanu. O izuelu ia lungu ni Malata i tanga o Bibidia, i tu longa ima iavulu i tena ku kolesa o kixikanu kietu. Tua-nda di longa o musoso ua dianga ua Malata uala mu Bibidia.

4. Kiebhi o muiji ua Malata, ki ua difuile ni miji ia mukua, ni ukamba uahi akexile nau ni Jezú?

⁴ Tu mone ihi ia bhiti. Lázalu ua kexile ku muenhu ni sauidi iambote. Akexile phala ku tambulula mujitu ua katunda, Jezú Kristu. Lázalu, Malata ni Madiia, akexile muiji umoxi ngó, ki u difuile ni miji iéngi​—kitatu kia jiphange, a tungile mu inzo imoxi. Saí akuâ ku tokuesa, a banza kuila o Malata muene uexile o  dikota mudiâ mukonda, ua kexile mu tambulula o ajitu, ni kuila muéne a dianga ku mu tumbula mu Bibidia. (Nzuá 11:5) Ki tuejiia se bhu kaxi kâ, kua kexile kiá muthu ua kazalele. Né muene kiki, ene a kexile ni ukamba uambote ni Jezú. Mu ukunji uê mu mbanza ia Judeia, mua mu zukutisa kiavulu, Jezú ua kexile mu tudila mu inzo ia Malata ni jiphange jê. Sé phata, muéne ua uabhele o kutululuka mu kididi kieniókio mua kexile ku mu kuatekesa.

5, 6. (a) Mukonda diahi Malata ua thandanganhele kiavulu kioso kia a kundu kua Jezú? (b) Ihi ia bhange Madiia kioso kia tambula Jezú ku dibhata diâ?

⁵ Malata ua kexile mu bhanga ioso phala ku tambulula kiambote o ajitu. Muéne ua zolele kiavulu o ku kalakala, ua kexile mu kalakala ola joso. Kioso Jezú kia a kundu, ua mu sange ua mu kalakala. Kia mono Jezú ua banze ku bhanga kúdia kua mbote, phala o mujitu ua katunda, ni ió ejile ni muene. Mu izuua ienioió, a bhanene valolo iavulu mu ku tambulula o ajitu. Kioso ki ku bhixila mujitu, akexile mu ku mu tambulula ni nzobole, o idiatelu iê a i katula, o inama iê a mu sukula-iú ni ku mu zunzumuna maji a dizumba ku mutué. (Tanga Luka 7:44-47.) O mujitu akexile mu ku mu zalela ni ku mu bhana kudia kua mbote.

⁶ Malata ni Madiia, akexile ni ima iavulu phala ku bhanga. Madiia ua tululukile dingi, ua kuatekesa phang’iê ku dimatekenu. Maji kioso kia bhixila Jezú, o ima ia lunguluka. Jezú ua monene kuila kiexile kithangana kiambote phala ku longa​—iú ua mateka o ku longa! Jezú ka di fuile ni atuameni a jingeleja mu izuua iê, muéne ua kexile mu xila o ahatu, ni ku a longa ia lungu ni Utuminu ua Nzambi, o kikalakalu kia mu tumine o ku bhanga. Madiia ua sangulukile, ua xikama bhu mbandu ia Jezú iu ua kexile mu kuívua o maka.

7, 8. Mukonda diahi Malata ua kexile ni njinda, ni ihi ia zuela?

⁷ Malata ua lalamene kiavulu. Muéne ua mesenene ku lamba kudia kuavulu, ni ima ia mukuá ia tokalele o ku bhanga phala o asonhi, ua thandanganhele dingi. Mu ku mona phang’iê ua xikama, se ku mu kuatekesa, o kuila muéne ua kexile ni njinda, ua banzele kuila muéne kimonha? Nange kiene. Mukonda kieji mu bhonza kiavulu ku bhanga o ima ioso ubheka uê!

⁸ Malata, njinda ia mu kuata. Muéne uambe kua Jezú: ‘Ngana, ki kia ku kuatela kima phang’iami kia ng’ehela ku kalakala ubheka uami? Mu tangele Ngana, n’eze n’a ngi kuatekese.’ (Luk. 10:40) Malata ua kexile mu bhinga kikuatekesu. Saí Bibidia ja mukuá, a lungulula o kibhuidisu kia Malata, kiki: “Ngana o kuila  u tena kuehela . . . ?” Mu ku suka-ku, Malata ua bhingi kua Jezú phala ku bazela Madiia, n’ende ku mu kuatekesa o ku lamba.

9, 10. (a) Kiebhi kia tambuijila Jezú kua Malata? (b) Mukonda diahi tu zuela kuila Jezú ka kambe ku bhana valolo ku nguzu ioso ia bhange Malata?

⁹ Malata ua di uana ni kitambuijilu kia Jezú, o atangi a Bibidia nange a diuana uê. Jezú ua mu ambela: ‘Malata, Malata, eie ua lalama, kuma ua thandanganha ni ima iavulu. Maji kia kate-phe ngó kima kimoxi: Madiia ua solo o mbandu iambote, kà tena ku mu tambula-iu.’ (Luka 10:41, 42) Ihi ia mesenene kuzuela Jezú? O kuila ua kexile mu zuela kuila Malata, ua zolele kiavulu o jimbote? O kuila ka kexile mu bhana valolo, mu nguzu ioso ia bhange Malata, phala ku lamba?

¹⁰ Kana. Jezú ua mono kuila, Malata ua mesenene ku a tambulula kiambote. Jezú ka banzele kuila o ku lamba kiavulu phala o ajitu, kima kia iibha, mukonda, kioso Jezú kia mu ixanene kuala Matesu, phala kuia mu “fesa ia dikota,” ia bhangele mu inzo iê, muéne ua xikana ni vondadi ioso. (Luka 5:29) O ku lamba ki kima kia iibha, maji Malata ua thandanganhele dingi ni ku lamba o kudia. Muéne ua lalamene kiavulu, mukonda dia kiki, muéne ka suu o kima kia betele dingi kota. Kima kiahi?

11, 12. Kiebhi Jezú kia bazela Malata ni henda ioso?

¹¹ Jezú, o Mona umoxi-elele ua Jihova Nzambi, ua kexile mu inzo ia Malata, phala ku a longa o maka a Nzambi. O milongi ia Jezú, ia betele dingi kota, o kudia ndenge. Jezú ua luualele mu ku mona kuila Malata, ua thandanganhele kiavulu ni ima iéngi, mu veji dia ku kolesa o kixikanu kiê, maji né kiki, Jezú ua mu bhana o ufolo ua ku sola.  a Mu kithangana kieniókio, Malata ka tokalele ku bhinga kua Jezú phala ku tangela Madiia, n’a mu kuatekese.

¹² Ni henda ioso, Jezú ua bazela Malata, ua tumbula o dijina diê, ni henda, phala ku mu tululukisa, ua mu ambele kuila ki ku bhingile ku ‘lalama ni ku thandanganha ni ima iavulu.’ Mukonda dia milongi ia tokalele o kuívua, ki ku bhingile ku  lamba kudia kuavulu. Muéne keji fidisa o ‘mbandu iambote’ ia solo Madiia​—kuívua o milongi ia Jezú!

13. Disá diahi di tu katula, mu ukexilu ua Jezú ua ku bazela Malata?

¹³ O musoso iú, u longa kima ku akaiedi a Kristu, lelu. Ki tu tokala kuehela kima ku tu fidisa kuijiia o kidi kia lungu ni Nzambi. (Mat. 5:3) Tua tokala ku kaiela o phangu iambote ia Malata, ia ku zalela o ajitu, maji se tua mesena ku katula mbote mu milongi, ki tu tokala ku ‘thandanganha kiavulu’ ni ku lamba. Ki tu di bhongolola ngó ni jiphange, phala kudia, mba ku a bhana kudia, maji tu bhanga kiki, phala ku di kuatekesa mu nzumbi, ni ku di suínisa. (Tanga Loma 1:11, 12.) O ku diongeka ni jiphange ku suínisa, né muene se o kudia kua tolo.

14. Mukonda diahi tu zuela kuila, Malata phangu iambote ia ku xikina o milongi?

¹⁴ O kuila Malata, ua xikina o milongi kioso kia mu bazela ni henda ioso kua Jezú, iu ua katula mbote? O Bibidia i longa kuila, muéne ua katula mbote. O poxolo Nzuá, mu ku zuela ia lungu ni musoso ua jiphange ja Malata, uambe: “Jezú-phe ua zolo kiavulu [Malata] ni Madiia, ni Lázalu.” (Nzuá 11:5) Kua bhitile kiá mbeji javulu, tundé o kizuua kia kexile Jezú mu Betanha. Malata ka luualele, ka kexile ni njinda mukonda dia ku mu bazela kuala Jezú. Muéne ua xikana o milongi ni muxima uoso. Malata phangu iambote ia kixikanu phala etu, nanhi mu dietu ka bhingi ku mu bazela?

15, 16. (a) Ihi ia bhangele Malata, kioso phang’iê kia katé? (b) Mukonda diahi Malata ni Madiia a di nganele, ia lungu ni ku disanza kua phang’iâ?

¹⁵ Kioso phang’iê kia kate, Malata ua mu lange kiambote. Ua bhange ioso phala ku mu kuatekesa ku disanza. Maji né kiki, Lázalu ka disanze. Ene a mu lange mu ithangana ioso. Malata ua luualele kiavulu, mu ku mona phang’iê ua kate, mu ku xinganeka o izuua iambote ni izuua ia iibha, ia bhitile kumoxi!

¹⁶ Kioso kia mono kuila, o ima ia bhonzele kiavulu, Malata ni Madiia a tumikisa njimbu kua Jezú. Muéne ua kexile mu boka dikanga, phala ku bhixila mu sanzala kua kexile Madiia ni Malata, kua bhingile kuenda izuua iiadi mu njila. O njimbu ia mu kundile ienii: “Ngana, o kamba diê Lázalu ua mu [zolo] iú kata.” (Nzuá 11:1, 3) Malata ni Madiia, ejidile kuila Jezú ua zolele kiavulu Lázalu, a xikanene kuila muéne ueji bhanga ioso phala ku kuatekesa kamba diê. O kuila ene a mesenene kuila, Jezú uíza mu kithangana kieniókio, se ku laleka? Se kiene, a di nganele. Mukonda Lázalu uafú.

17. Mukonda diahi Malata ua thandanganhele dingi, ni ihi ia bhangele kioso kiévu kuila Jezú ua kexile mu bhixila mu mbanza?

¹⁷ Malata ni Madiia a didi kiavulu, a bhange ioso phala ku mu funda, a tambula ajitu avulu a tundu ku mbanza ia Betanha ni mbanza ja mukuá. Jezú ka bhanene luua njimbu. Malata ua thandanganhele dingi, mu ku mona kuila Jezú ka kexile mu kuíza. Kienhiki, mu ku bhita izuua iuana ia ufuilu ua Lázalu, Malata uevu kuila Jezú ua bhixila mu mbanza. Ni ku lenga kuoso, Malata uia mu kokela Jezú, se ku tangela Madiia.​—Tanga Nzuá 11:18-20.

18, 19. Kidielelu kiahi kia londekesa Malata, ni mukonda diahi o kixikanu kiê kia kolele?

¹⁸ Kioso  kia mono o Mesene iê, muéne uambela kua Jezú kiebhi kia divu, ki kale muéne ni Madiia: “Ngana, eie se ua kexile-bhu, phang’ami hinu kafu.” Maji né kiki, Malata ua kexile hanji ni kidielelu, muéne uambe: ‘Né kiki eme nga k’ijiia kuma, ima i u bhinga kua Nzambi, Nzambi u ku bhana-iu.’ Mu kithangana kiki, Jezú ua zuela kima, phala ku suínisa o kidielelu kiê: ‘Phang’iê ua-nda fukunuka.’​—Nzuá 11:21-23.

¹⁹ Malata ua banzele kuila, Jezú ua kexile mu zuela ia lungu ni difukunukinu ku hádia, mukonda dia kiki, uambe: ‘Ng’ejiia kuma muéne ua-nda fukunuka mu kizuua kia difukunukinu.’ (Nzuá 11:24) Malata ua kexile ni kidielelu kiavulu. Saí atuameni a jingeleja a Jijudé, a exanene Jisaduseu akexile mu zuela kuila o difukunukinu ki kidi, maji o Bibidia i longa kuila o difukunukinu kidi. (Dan. 12:13; Mar. 12:18) Maji Malata ua kijidile kuila,  Jezú ua longele ia lungu ni difukunukinu, uejidile ué kuila saí athu a a fukunuine​—sumbala o athu enhá ka bhitile izuua iavulu mu mbila, kála Lázalu. Malata kejidile ihi ieji bhanga Jezú.

20. Jimbulula o kidielelu kia bhana Jezú kua Malata kala ki tanga o divulu dia Nzuá 11:25-27, ni kiebhi kia tambuijila Malata,

²⁰ Mu ku suka-ku, Jezú ua bhana kidielelu kia mu suínisa dingi: “Eme ngi difukunukinu ni muenhu.” Jihova ua bhana o kutena kua Mon’ê, kua ku fukununa o mundu uavulu ku hádia. Jezú uebhuidisa Malata: “Eie kienhiki, ua ki xikana?” Malata ua bhana o kitambuijilu ki tu sanga mu dimatekenu dia kibatulu kiki. Malata uejidile kuila, Jezú muene Kristu mba Mexiia, kuila muéne uexile Mon’a Jihova Nzambi, a mu kanene ku ji polofeta kuila ueji kuíza ku mundu.​—Nzuá 5:28, 29; tanga Nzuá 11:25-27.

21, 22. (a) Kiebhi Jezú kia londekesa o henda iê kua Malata ni Madiia? (b) Jimbulula o difukunukinu dia Lázalu.

²¹ O kuila Jihova Nzambi, ni Mon’ê Jezú Kristu, a bhana valolo ku athu ala ni kixikanu kála kia Malata? O ima ia mono Malata, ilondekesa kuila Jihova ni Jezú a bhana valolo ku athu ala ni kixikanu. Malata ua lenge phala kuixana phang’iê. Mu ku suka-ku, Malata ua mono kuila Jezú ua luualele kiavulu, kioso kia kexile mu zuela ni Madiia, ni athu a mukuá a kexile mu dila. Malata ua mono ué kuila, Jezú ua kexile mu dila kioso, kia kexile ku mu kunda o malamba oso, a bhekela o kalunga. Muéne uevu kioso Jezú kia bhingi ku katula o ditadi, dia kexile ku muelu ua mbila ia phang’iê.​—Nzuá 11:28-39.

²² Ni ku suína kuoso, Malata uambe kuila o mukutu ua kexile kiá mu nuha, mukonda ua bhangele kiá izuua iuana mu mbila. Jezú ua mu ambela: “Eme ki ngi kuambela, kuma se u xikana, ua-ndu mona o fuma ia Nzambi?” Malata ua xikana, iú ua mono o fuma ia Jihova Nzambi. Mu kithangana kieniókio, Nzambi ua bhana o kutena kua Mon’ê phala ku fukununa Lázalu. Sé ku phata kuila Malata, ka jimbe o ima ia mono: Jezú ua di kola ni dízui dia suína, uixi: “Lázalu, tunda bhu kanga!”, kuívua Lázalu ua mu di zambesa mu mbila, phala ku balumuka, n’a tena ku tunda bhu kanga ni kuívua Jezú ua mu zuela, ‘mu katulenu o itele, phala ende,’ Malata ni Madiia a kuata phang’iâ. (Tanga Nzuá 11:40-44.) Malata ka kexile dingi ni kikote ku muxima!

23. Ihi a mesena ku bhanga Jihova ni Jezú phala eie, ni ihi i ua tokala o ku bhanga?

²³ O musoso iú u londekesa kuila, o difukunukinu dia athu ki nzoji kana; maji o milongi ia kidi ia Bibidia i tu sangulukisa.  (Jobe 14:14, 15) Jihova ni mon’ê a uabhela ku bhana futu ku jiselevende jê ja fiiele, kala kia bhitile ni Malata, Madiia ni Lázalu. Eie a-nda ku besoala uê se u suína, ni kulondekesa kixikanu kia kolo.

24. O Bibidia i tumbula dingi Malata, mu kithangana kiebhi?

²⁴ O Bibidia i tumbula dingi Malata veji imoxi. Iexile o izuua ia sukina ia Jezú mu ixi. Mu kuijiia o hadi ioso ieji bhita, Jezú ua solo ku xala mu inzo ia Malata mu Betanha. Tundé ku mbanza ia Betanha katé mu Jeluzaleme, muéne ueji kuenda kilometulu jitatu. Jezú ni Lázalu a kexile mu dia mu inzo ia Ximá, mukua dibhute, Malata a mu tumbula ngó dingi mu kithangana kiki, o musoso u zuela: ‘Malata ua kexile mu zalela o ajitu.’​—Nzuá 12:2.

25. Mukonda diahi o jiphange ja ahatu ala ni ukexilu ua difu ni ua Malata, dibesá phala o kilunga?

²⁵ Malata ua uabhele kiavulu o ku kalakala! Kioso o Bibidia kia mu tumbula mu veji ia dianga, muéne ua kexile mu kalakala, mu ku mu tumbula mu veji ia suku-ku, ua kexile mu kalakala ué, mu ku bhanga ioso phala ku kuatekesa o athu a mu kondolokele. Lelu, o ilunga ia akaiedi a Jezú, muene jiphange ja ahatu ala ni ukexilu ua difu ni ua Malata​—a kolokota, a uabhela o ku bhana, a di bhakula mu vondadi iâ phala ku kuatekesa akuâ. O kuila Malata ua suluka mu ku bhanga kiki? Nange ua suluka. Muéne uexile muhatu ua unjimu, o ukexilu iú ua mu kuatekesa ku kolokota sumbala ni ibhidi.

26. O kixikanu kia Malata kia mu kuatekesa ku bhanga ihi?

²⁶ Mu ku bhita izuua, Malata ua mono o ufuilu ua Mesene iê Jezú. O ifumbe a jibha Jezú, a mesenene ku jibha Lázalu, mukonda o difukunukinu dia Lázalu dia kexile mu kolesa o kixikanu kia athu. (Tanga Nzuá 12:9-11.) Mu ku bhita kithangana, o kalunga ka batula o ukamba ua kexile bhu kaxi ka Malata ni jiphange jê. Maji ki tuejiia kiebhi kia bhitile, ni kithangana kiebhi, maji tuejila kuila: O kixikanu kia Malata kia mu kuatekesa ku kolokota katé ku disukilu dia muenhu uê. Mukonda dia kiki, kima kiambote o Jikidistá ku kaiela o phangu ia Malata.