Mbangi ja Jihova ji kuxi ji uejiia? A moxi mudietu, jivizinhu jê, koleka ia kikalakalu, mba koleka ia xikola. Mba tu di longa o Bibidia kumoxi n’eie. A nanhi o Jimbangi ja Jihova, ni mukonda diahi tu zuela ku akuetu ia lungu ni kixikanu kietu?

Etu tua difu ni athu oso. Tua tundu mu ifuxi ioso. Saí athu mudietu, m’ukulu tua kexile mu bhanga mbandu mu jingeleja ki ji difu, a mukua ka kexile mu xikina Nzambi. Ande dia ku kituka Jimbangi, etu enioso tua bhingi kithangana phala ku tonginina kiambote o ilongesu ia Bibidia. (Ikalakalu 17:11) Tua xikina mu ioso i tua di longo, tua solo kubheza Jihova Nzambi.

Tu katula mbote mu kudilonga o Bibidia. Kala o athu oso, tuene mu dibhana ni maka, ni ibhidi. Maji mu ku fikisa kubelesela o itumu ia Bibidia izuua ioso ku muenhu uetu, tuene mu lungulula o ukexilu ua muenhu uetu. (Jisálamu 128:1, 2) Kiene o kima ki tu bhangesa kuzuela ni akuetu o ima iambote i tu di longa mu Bibidia.

Tu-enda ni ukexilu ua muenhu uetu kala ki tanga o Bibidia. O itumu íii, iala mu Bibidia, i tu kuatekesa kukala kiambote ku muenhu ni kuxila o akuetu, ni ídifua kála, kukala muthu ua kidi, ni kubhanga mbote. Iene i kuatekesa athu kukala ni sauidi iambote, akalakadi ambote, i suínisa o ukamba ku muiji, ni kukala ni kilunji kiambote. Kuijiia kuila “Nzambi kene ni kathombo,” etu tu bhanga mbandu ia muiji a di zolo mudiâ ku mundu uoso, ki tu bhange kathombo ka lungu ni kikonda mba dimi. Sumbala tua difu ni athu engi, tuala tu mundu umoxi ngó.—Ikalakalu 4:13; 10:34, 35.

• Ihi iala na-iu o Jimbangi ja Jihova, kala o athu oso?

• Itumu iahi ia di longo o Jimbangi ja Jihova mu kudilonga o Bibidia?