Ande dia kufuá kuê, Jezú uambe: “O Njimbu íii Iambote ia Utuminu ua Nzambi, ia bhingi ku i tula mu ngongo ioso, mu ku bhana umbangi ku ifuxi ioso; kiene kia kiéza o dizubhilu.” (Matesu 24:14, NW) Kiebhi kieji bhanga o kikalakalu kiki ku mundu uoso? Mu ku kaiela o phangu ia xisa Jezú kia kexile mu ixi.—Luka 8:1.

Tuene mu sota athu ku mabhata mâ. Jezú ua longo o maxibulu mê kiebhi kieji boka mu inzo ni inzo. (Matesu 10:11-13; Ikalakalu 5:42; 20:20) O aboki ku hama ia dianga, akexile ni jimbambe mua tokalele phala kuboka. (Matesu 10:5, 6; 2 Kolindo 10:13) Lelu ué kiene kimoxi, phala tu tene kubhanga o kikalakalu kietu, kala kilunga kiala ni jimbambe jê phala ku kalakala-mu. Kiki, ki tu kuatekesa kubhanga o kikalakalu kia tu xila Jezú kia “kutula o Njimbu Iambote ku mundu, ni kubhana umbangi.”—Ikalakalu 10:42.

Etu tu suína phala ku sanga athu mu ididi ioso. Jezú ua tu xila ué phangu ia kuboka o athu mu ididi ioso, kála bhu mbandu ia kalunga ni mu ji sanzala. (Marku 4:1; Nzuá 4:5-15) Etu ué tua bhingi tu zuela ni athu ia lungu ni Bibidia kioso ki moneka kithangana—mu ikoka, mu itanda ni mu ididi mua bhaka o makalu ni mu mitelembe. Tu boka ué o jivizinhu jetu ni jikoleka jetu mu sidivisu, mu xikola ni jindandu jetu, kioso ki ku moneka kithangana. O nguzu ioso íii i tuene mu bhanga, i bhangesa kuila jimidi ja athu ku mundu uoso evua o ‘njimbu iambote.’—Jisálamu 96:2.

O kuila eie u tena kuxinganeka muthu u ua mesena ku mu tangela o njimbu ia Utuminu ua Nzambi, ni ihi i lombolola o njimbu ia mbote phala muéne? Kana kubhaka o njimbu íii i bhana kidielelu. Tangela-iu akuenu!

• Iebhi o “njimbu iambote” i tua tokala kuboka?

• Kiebhi kiene mu kaiela o Jimbangi ja Jihova o phangu ia Jezú ia kuboka?