1. Jihova ua bhange o athu ni idifua iebhi?

JIHOVA ua bhange o athu ni idifua ia di tungula. Muene ua tu bhange ni kutena kua kuxinganeka. O kidifua kiki, ki tu kuatekesa kubatula o maka, ni ku di sokejeka phala o ima i tena ku bhita ku pholo. (Jisabhu 2:11) Muene ua tu bhana ue o kutena, phala ku tu kuatekesa kubhanga o ima i tu xinganeka, mba o ima i tua mesena. (Filipe 2:13) Muene ua tu bhange ue ni kitongoluelu, phala ku tu kuatekesa kusola o ima iauabha, mu ima iaiibha. O kitongoluelu kietu ki tu kuatekesa kulenga o ituxi, ni kuxisa o ima iaiibha i tua bhangele.​—Loma 2:15.

2. Kiebhi Jihova kia mesena kuila, tu londekesa o idifua ietu?

² Jihova ua mesena kuila, tu londekesa o idifua ietu, mu kubhanga o ima mu ukexilu ua tokala. Mukonda diahi? Mukonda muene ua tu zolo. Muene uejiia kuila, se tu londekesa o idifua ia tu bhana, tua-nda zediua. Mu kifika, mu Mikanda ia Hebalaiku, tu sanga-mu o izuelu íii: “Mukua muanu, o ixinganeku iê  i bhangela kuvudisa nzungule ia jimbote,” ni kuila, “kioso kia kuiza bhu maku phala ku ki bhanga, bhanga-kiu muene katé bhuoso bhua suku o nguzu ié.” (Jisabhu 21:5; Ndongixi 9:10) Mu Mikanda ia Ngeleku, tu sanga-mu o izuelu íii: “Bhuoso bhu tu muena o kithangana, tu bhangienu mbote athu oso,” ni kuila, “muthu uoso uhete uê ua tambula kua Nzambi a u kumbidile mudienu.” (Ngalásia 6:10; 1 Phetele 4:10) Sé phata, Jihova ua mesena kuila, tu bhanga ioso i tu tena, phala o mbote ietu ni mbote ia akuetu.

3. O athu kala ni kutena kua kubhanga ihi?

³ Jihova ua mesena kuila, tu kalakala kiambote ni mauhete metu, maji muene uejiia kuila, ki tu tena kubhanga o ima ioso. Mu kifika, ki tu tena kuzubha o ukexilu uetu ua ku kamba kuiuka, o kituxi, ni kalunga. (1 Jisobha 8:46) Ki tu tena ue kulanga o athu oso, mukonda o athu ala ni ufôlo ua kusola o ima ia mesena. Né muene se tuejiia ima iavulu, mba tua bhiti kiá ni ima iavulu ku muenhu, ki tu tena kusokela ni Jihova.​—Izaia 55:9.

4. Ihi i tua-nda di longa mu milongi íii?

⁴ Tua tokala kuehela Jihova ku tuendesa, ni kudielela kuila, muene ua-nda tu kuatekesa, ni ku tu bhangela o ima ia tundu o nguzu ietu. Maji Jihova ua mesena ue kuila, tu xinganeka mu ima i tu tena kubhanga phala kubatula o maka, ni kukuatekesa akuetu. (Tanga Jisálamu 37:3.) Etu tua bhingi ‘kudielela kua Jihova, ni kubhanga o mbote.’ Tua bhingi ‘kulondekesa o ufiiele.’ Kiebhi ki tu tena kubhanga kiki? Tu mone o phangu ia Noué, Davidi, ni jiselevende ja mukuá ja Nzambi, ja dielele kua Jihova. Tua-nda mona kuila, sai ima, ene ka  tenene ku i bhanga, maji a solo kuxinganeka mu ima ia tenene kubhanga.

5. Jimbulula o ibhidi ia bhitile na-iu Noué.

⁵ Noué ua tungile ku mundu ‘uezalele ni usuéia.’ (Dimatekenu 6:4, 9-13) Sumbala Noué uejiidile kuila, Jihova ueji buikisa o mundu ió ua iibha, maji né kiki, muene ua luualele ni ima iaiibha ia kexile mu bhanga o athu. Mu kithangana kienhokio, Noué ua mono kuila, sai ima, muene ka tenene ku i bhanga. Maji muene ua mono ue kuila, kuexile ima iavulu ia tenene o kubhanga.

6, 7. (a) Ima iahi Noué ka tenene ku i bhanga? (b) Kiebhi o izuua ietu ia difu ni ia Noué?

⁶ O ima Noué ka tenene ku i bhanga: Noué ua boko o njimbu ia Jihova ni ufiiele uoso, maji muene ka tokalele kujijidika o athu kuxikina o njimbu ia kexile mu tula. Muene ka tenene ue kubhangesa o Dilúviu kuíza ni lusolo. Noué ua tokalele kudielela kuila Jihova ueji kumbidila o kikanenu Kiê kia kuzubha o kuiibha, ni kuxikina kuila, mu kithangana kia tokala, Nzambi ueji bhanga o kima kia kanene.​—Dimatekenu 6:17.

⁷ Lelu, etu tua tungu ue ku mundu uezala ni kuiibha. Maji tuejiia kuila, Jihova ua-nda buikisa o mundu iú. (1 Nzuá 2:17) Sumbala tua mu kingila o kithangana kiki, etu ki tu tena kujijidika o athu kuxikina o ‘njimbu iambote ia Utuminu.’ Ki tu tena ue kubhanga kima, phala ku bhangesa o hadi ia dikota kuiza ni lusolo. (Matesu 24:14, 21) Kala kia bhangele Noué, tua tokala kukala ni kixikanu kia kolo, ni ku dielela kuila, kua kambe ngó, Nzambi ua-nda zubha o kuiibha kuoso. (Jisálamu 37:10, 11) Tuejiia ni kidi kioso kuila, kioso kia-nda bhixila o kithangana kia ku buikisa o mundu iú ua iibha,  Jihova ua-nda ki bhanga muéne. Muene ka-nda kuehela kuila, ku bhita dingi kizuua.​—Habakuke 2:3.

8. Ima iahi ia kexile mu suua Noué? (Tala o foto ia dianga.)

⁸ O ima Noué ia tenene ku i bhanga: Mu veji dia ku bhuila mukonda dia ima ka tenene ku i bhanga, Noué ua solo kusuua o ima ia tenene kubhanga. Ni ufiiele uoso, Noué ua boko o njimbu ia Jihova, phala ku dimuna o athu. (2 Phetele 2:5) Nange o kikalakalu kiki, kia mu kuatekesa kusuinisa o kixikanu kiê. Muene ka boko ngó. Ua tungu ue o alaka ia mu tumine Jihova.​—Tanga Jihebeleu 11:7.

9. Kiebhi ki tu tena kukaiela o phangu ia Noué?

⁹ Kala kia bhangele Noué, tua tokala kubhanga o “kikalakalu kia Ngana.” (1 Kolindo 15:58) Mu kifika, nange tu tena kukuatekesa kutunga o Ididi ia Ubhezelu, mba kuiudika o ima i budika-mu. Tu tena kukalakala mu iônge ia ilunga ni ia makota, kukalakala ku filiiale, mba kukuatekesa o ibuka ia kulungulula. Maji o kima kia beta-o-kota ki tu tena kubhanga, o kubandekesa o ukunji uetu, mukonda o kubhanga kiki, kua-nda tu kuatekesa kudielela dingi mu ima ia-nda bhita ku hádia. Sai phange ia muhatu ua zuela kuila, kioso kia zuela ni athu ia lungu ni mabesá a-nda bheka o Utuminu ua Nzambi, muene u mona kuila, ene kala ni kidielelu. Ene a banza kuila, o ibhidi iâ ki ia-nda bhua. Kala kia londekesa o phange íii, etu tuala ni kidielelu. Kioso ki tu zuela ku akuetu ia lungu ni kidielelu kietu, o kixikanu kietu ki kola dingi. O kidielelu kiki, ki tu kuatekesa kukolokota mu kulenga phala kutambula o muenhu ua kalelaku!​—1 Kolindo 9:24.

10. Jimbulula o maka a bhitile nau Davidi.

¹⁰ Sobha Davidi uexile diiala dia fiiele. Mukonda dia kiki, Jihova ua mu zolele kiavulu. (Ikalakalu 13:22) Maji né kiki, Davidi ua te phánda ni Bate-seba. O kima kia bhangele, kiexile kituxi kia dikota. Kuma ua mesenene kusueka o kituxi kiê, muene ua bhangesa Udiia, o muadi ua Bate-seba, kufua mu ita. Davidi ua bhana kua Udiia, o mukanda mua sonekene o kitumu kia ku mu jibha! (2 Samuuele 11:1-21) Mu kubhita thembu, o kituxi kia Davidi kia tukuluka. (Marku 4:22) Kiebhi kia divu Davidi, kioso kia mono kuila o athu ejiidile kuila, muene ua te kituxi?

11, 12. (a) Kioso kia te o kituxi, Davidi kexile ni kutena kua kubhanga ihi? (b) Ihi ia-nda bhanga Jihova, se tu diela o ituxi ietu ni muxima uoso?

¹¹ O ima Davidi ka tenene ku i bhanga: Davidi kexile ni kutena kua kujima o ima iaiibha ia bhangele. Mu kidi, mukonda dia kituxi kia tele, muene ueji dibhana ni ibhidi ku muenhu. (2 Samuuele 12:10-12, 14) Mu kiki, muene ua tokalele kukala ni kixikanu. Muene ua tokalele kudielela kuila se ua diele o ituxi iê ni muxima uoso, Jihova ueji mu loloka, ni ku mu kuatekesa kudibhana ni ibhidi ieji kuiza mukonda dia kituxi.

 ¹² Kuma tu akua ituxi, etu enioso tu bhanga ima iaiibha. Maji sai ima i tu bhanga, ituxi ia makota, ki i sokela ni ituxi iofele i tu ta. Sai bhabha, ki tu tena kujima o ituxi íii. Mukonda dia kiki, nange tu di bhana ue ni ibhidi mukonda dia ima iaiibha i tu bhanga. (Ngalásia 6:7) Maji se tu dielela mu kikanenu kia Jihova, kia kuloloka o athu a diela ni muxima uoso, muene ua-nda tu kuatekesa ku dibhana ni ibhidi íii, né muene se ia lungu ni ima iaiibha i tua bhange.​—Tanga Izaia 1:18, 19; Ikalakalu 3:19.

13. Ihi ia bhange Davidi, phala kukala dingi ni ukamba uambote ni Jihova?

¹³ O ima Davidi ia tenene ku i bhanga: Davidi ua mesenene kubhanga dingi ukamba ni Jihova. Ihi ia bhange Davidi? Muene uehela Jihova ku mu kuatekesa. Mu kifika, muene ua xikina o kibazelu kia Jihova bhu kaxi ka Natane. (2 Samuuele 12:13) Davidi ua sambe ue kua Jihova phala ku mu tangela o kituxi kia tele. Mu kubhanga kiki, muene ua londekesa kuila, ua mesenene kubhanga dingi ukamba ni Jihova. (Jisálamu 51:1-17) Mu veji dia ku di tatela kiavulu, Davidi ua di longo disá mu ima iaiibha ia bhangele. Muene ka te dingi kituxi kia dikota. Mu kubhita mivu, muene uafu. Maji phala Jihova, muene uexile diiala dia fiiele.​—Jihebeleu 11:32-34.

14. Ihi i tu tena ku di longa mu phangu ia Davidi?

¹⁴ Ihi i tu longa o phangu ia Davidi? Se tu ta kituxi kia dikota, tua tokala ku diela ni muxima uoso, ku zuela o ituxi ietu kua Jihova, ni ku mu bhinga muloloki. (1 Nzuá 1:9) Tua tokala ue kuzuela ni tufunga, mukonda ene a tena ku tu kuatekesa kukala dingi ni ukamba uambote ni Jihova. (Tanga Tiiaku 5:14-16.) Kioso ki tu xikina o kikuatekesu kia Jihova, tu londekesa kuila, tua dielela mu kikanenu kiê, kia ku tu loloka. Tua tokala ue ku di longa disá mu ituxi i tu ta, ni kusuluka ni kusidivila Jihova ni muxima uoso.​—Jihebeleu 12:12, 13.

15. Ihi i tu longa o phangu ia Hana?

¹⁵ Nange u tena ue kuxinganeka mu phangu ia jiselevende ja mukuá ja Jihova ji tanga o Bibidia, ja dielele kua Jihova mu ithangana ia malamba, mu kubhanga ioso ia tenene phala kubatula o maka. Mu kifika, sai kithangana, Hana kexile mu vuala. Muene ka tenene kubhanga kima, phala kuvuala. Maji ua dielele mu kikuatekesu kia Jihova. Mu kiki, muene ua suluka ni ku bheza mu balaka, ni kusamba kua Jihova, phala ku mu tangela o malamba mê. (1 Samuuele 1:9-11) Íii phangu iambote phala etu! Se tu kata, mba tu dibhana ni ibhidi ia mukuá, anga tu mona kuila ki tuala ni kutena kua kulungulula o ima, tua tokala ku xisa o hele ietu kua Jihova, ni kudielela kuila muene ua-nda tu kuatekesa. (1 Phetele 5:6, 7) Tua tokala ue kubhanga ioso, phala kukatula mbote mu iônge ietu, ni ima iamukuá i tu bhana o kilunga kia Jihova.​—Jihebeleu 10:24, 25.

16. Ihi i tena ku di longa o jitata mu phangu ia Samuuele?

 ¹⁶ Ihi i tuamba ia lungu ni jitata jala ni an’a a xisa o kilunga kia Jihova? O polofeta Samuuele, ka tokalele kujijidika an’ê kukolokota mu ufiiele uâ kua Nzambi. (1 Samuuele 8:1-3) Muene ua tokalele ku xisa o maka iá bhu maku a Jihova. Maji Samuuele ua bhange ioso phala kukolokota mu ufiiele uê kua Nzambi, ni kusangulukisa o muxima ua Tat’ê ia diulu. (Jisabhu 27:11) Lelu, jitata javulu a di bhana ue ni maka enhá. Ene a dielela kuila, kala kia bhangele o tata mu kifika kia Jezú kia lungu ni mona ua vutuka ku bhata, Jihova uala ue polondo phala kutambulula o athu a diela o ituxi iâ ni muxima uoso. (Luka 15:20) Mu kiki, o jitata a tokala kukolokota mu ufiiele uâ kua Jihova, mu kudielela kuila, o phangu iâ, i tena kukuatekesa o tuana tuâ kuvutuka mu kilunga.

17. Mukonda diahi o phangu ia mutudi ua ngadiama, i tu suinisa?

¹⁷ O phangu iamukuá, o phangu ia mutudi ua ngadiama mu izuua ia Jezú. (Tanga Luka 21:1-4.) Muene ka tenene kubhanga kima phala ku zubha o ima iaiibha ia kexile mu bhanga o athu mu tembulu. Ka tenene ue ku zubha o uadiama uê. (Matesu 21:12, 13) Maji o kidielelu kiê kua Jihova, kia mu suinisa kuzokela o ubhezelu ua kidi. Kuma muene uexile ni ukexilu ua kubhana, ua bhana “tumilambongo tuiadi.” Mu kubhanga kiki, muene ua bhana o kitadi kioso kia kexile na-kiu. Muhatu iú ua fiiele, ua dielele kua Jihova ni muxima uoso. Muene uejiidile kuila, se ua tele o sidivisu ia Jihova ku pholo, muene ueji mu bhana o ima ioso ia bhindamene. Tu dielela ue ni muxima uoso kuila, se tu ta o Utuminu ua Nzambi ku pholo, Jihova ua-nda tu bhana o ima i tua bhindamena.​—Matesu 6:33.

18. Bhana phangu ia phange ua soto kumona o ima mu ukexilu uambote.

¹⁸ Lelu, jiphange javulu ji londekesa ue o kixikanu kiá kua Jihova, mu kusuua o ima ia tena kubhanga, mu veji dia kuxinganeka mu ima ka tena ku i bhanga. Xinganeka mu phangu ia phange Malcolm, ua kolokota mu ufiiele uê katé ku ufuilu uê ku muvu ua 2015. Ku mivu ioso ia sidivila Jihova kumoxi ni muhatu’ê, ene a dibhana ni ithangana ia kusanguluka, ni ia malamba. Muene uambe: “Ki tu tena kuijiia o ima ia-nda bhita ku muenhu uetu. Sai bhabha, ki bhonza ku dibhana ni maka a moneka. Maji Jihova u besoala o athu a mu dielela.” Ihi ia tendelesa Malcolm? Muene uambe: “Samba phala kubhanga ioso i ua tena mu sidivisu ia Jihova. Mu veji dia kuxinganeka mu ima ki u tena ku i bhanga, suua o ima i u tena kubhanga.” *​—Tala ku luiji.

19. (a) Mukonda diahi o kibatulu kietu kia Bibidia kia muvu ua 2017, kia fuama? (b) Kiebhi ki ua-nda kumbidila o kibatulu kia Bibidia kia muvu ua 2017 ku muenhu uê?

¹⁹ O kuiibha mu ngongo, kua muia ‘ni ku di bandekesa.’ Mukonda dia kiki, tuejiia kuila, tua-nda dibhana ni ibhidi iavulu. (2 Timote 3:1, 13) Mu kiki, ki tu tokala kuthandanganha kiavulu ni ibhidi ietu. Mu veji dia kiki, tua tokala kudielela kua Jihova ni muxima uoso, ni ku suua o ima i tu tena kubhanga. Mukonda dia kiki, o kibatulu kietu kia Bibidia kia muvu ua 2017, kia fuama. Kiene kiambe: “Dielela kua Jihova, enda ni kubhanga o mbote!”​—Jisálamu 37:3.