Nzambi wakanena kwa polofeta Mbalahamu kwila bhu kaxi ka mbutu yê weji bheka mabesá ku “ifuxi yoso mu ngongo.” (Dimatekenu 22:18) Nanyi weji kala o mbutu?

Midi jiyadi jamivu kudima ndenge, Jezú, o mbutu ya Mbalahamu, Nzambi wamubhana o kutena kwa kubhanga madiwanu. O madiwanu yá alondekesa kwila o kikanenu kyabhange kwa Mbalahamu kyakuzediwisa o ifuxi, kyeji dikumbidila bhukaxi ka Jezú.—Ngalásya 3:14.

O madiwanu abhange Jezú alondekesa kwila, mwéne o muthu amusolo kwa Nzambi phala kubesowala o mundu ni kwila alondekesa we kyebhi Nzambi bhukaxi ka Jezú kyandabheka o mabesá akalelaku ku athu. Tala kyebhi o madiwanu a Jezú alondekesa o idifwa yê yambote.

Henda—Jezú wasake jihaxi.

Sayi kizuwa, o mukwa dibhute wadyondela Jezú phala kumusaka. Jezú wamukwata anga, wixi: “Nga mesena!” Mukithangana kyenyókyo, o diyala weluka.—Máluku 1:40-42.

Mukwa kubhana—Jezú wadikila o athu exile ni nzala.

Jezú kamesenene kwila o athu aya ni nzala. Bhukaxi kamadiwanu, wabhangesa o jimbolo jofele ni jimbiji jofele kukituka javulu, phala kudikila jimidi ja athu. Kyoso kyadi, enyoso ekuta, kwasubhuka hanji kudya kwavulu. (Matesu 14:17-21; 15:32-38) Maji Jezú kabhange ngó o madiwanu yá muveji imoxi.

Kuditula bhu kididi kya akwâ—Jezú wafukununa athu afu.

Kuma “henda ya mu kwata,” Jezú wafukununa o mona umoxyelele wa mutudi weji mutambula o konda.—Luka 7:12-15.