O muthu wívwa o ndolo ya akwa, “kyoso kya di ta mu kididi kya muthu wengi mba kudivwa we kala wa mu tala o hadi ya mu tala ene.” O ngijiye ya mawuhaxi a kusaluka Dotolo Rick Hanson, wambe kwila, “kwívwa o ndolo ya akwetu, a tu vwalé na-ku kyá.”

XINGANEKA: Mukonda dyahi etu twala ni uhete wa kwívwa o ndolo ya akwetu o yama kana? O Bibidya i jimbulula kwila, Nzambi wa bhange o athu mu kidifwanganu kyê. (Dimatekenu 1:26) A tu bhange mu kidifwanganu kya Nzambi, kyenyiki, tu tena kulondekesa o ukexilu wê, ni kulondekesa bhofele o idifwa yê yambote. Mu kiki, kyoso, kyévwa o ndolo ya akwa, anga a a kwatekesa, kifwa a mu kayela o ukexilu wa Mubhangi wâ Jihova Nzambi, mukwa kwívwa o jindolo jya athu.—Jisabhu 14:31.

Nzambi wívwa o ndolo yetu, ka wabhela ku tu mona kutala hadi. Ya lungu ni mundu wa Izalayele yokulu, a dibhanene ni ubhika wa kabhikolo ku Ijitu, ya a tale dingi hadi mu kikangalakata mu 40 a mivu, o Bibidya yamba: ‘Mu lamba dyâ dyoso ni mwene wevwile dilamba.’ (Izaya 63:9) Nzambi ka kexile ngó mu mona o dilamba dyâ. Mwene wevwile o ndolo yâ. Mwene wambe: “Eme ngejiya o malamba mâ.” (Makatukilu 3:7) Nzambi wambe: ‘Mukonda woso u mi kwata enu, wa kwata mu mona dyesu dyami.’ (Zakadiya 2:8) Kyoso akwetu kya tu bhanga kima kyayibha, mwene we u dívwa kyayibha ku muxima.

O Bibidya i tu dyelelesa kwila, sumbala tu tena ku di tatela ni kudívwa kwila Nzambi ka tokala kwívwa o ndolo yetu, “Nzambi wala kota o muxima wetu ndenge.” (1 Nzwá 3:19, 20) Nzambi wa beta kota mu ku twijiya, etu ndenge. Mwene wejiya kyambote o ibhidi o ixinganeku ni kyebhi ki tu dívwa. Mwene wívwa o ndolo yetu.

 O Bibidya i tu kanena

• “Ki u dikola, Jihova wa-nda ku kwitaya; o ki u ta nzôngo, mwene wa-nda kwila: Eme’ú!’”—IZAYA 58:9.

• “‘Kuma ixinganeku yoso i ngala ku mi xinganeka na-yu, nga ijiya kyambote mwene, eme ngi Jihova, ixinganeku ya wembu, ki ya phulu, kana, nda ngi mi bhane dizubhilu di mwene ku kinga. Kyenyókyo mwa-nda kwà di kola kokwami, anga muya, mu ngi sambela, eme ngá kà m’ivwa.’”—JELEMIYA 29:11, 12.

• “O masoxi mami moso, eye wa a bhake mu kisudi kyé; manyi, ni mu divulu dyé, kwa a soneka-mu?”—JISÁLAMU 56:8.

O kwila kwijiya kwila Nzambi wívwa o ndolo yetu ku tu kwatekesa kudibhana ni ibhidi? Xinganeka mu musoso wa Madiya:

“Nga divwile kwila o mwenyu wa bhonzele kyavulu, kyoso ki nga fundu mon’ami wa 18 dya mivu wa kexile ni uhaxi a wixana cancer mu phutu. Nga kexile ni njinda mukonda nga fikile kwila, Nzambi ka bhange kima phala ku mu saka!

“Mu kubhita mivu isamanu, sayi dikamba dya kazola mu kilunga, wa ngivu kyoso ki ngexile mu mu tangela kwila Jihova ka ngi zolele. Mwene wedi ivweé, jihola javulu, katé ki nga tula, ka ngi batula. Kyoso ki nga tula, mwene wa tumbula velusu ya ngi tula ku muxima—. O mukanda wa 1 Nzwá 3:19, 20, dyamba: ‘Nzambi wala kota o muxima wetu ndenge, kuma Mwène wejiya o ima yoso. Mwene wambe kwila, Nzambi wejiya o malamba metu moso.

“Maji né kiki, kya ngi bhonzele kweha o njinda yami! Mu kiki nga tange o divulu dya Jisálamu 94:19, dyamba: “Hele jivula jandekele ku ngi kwata mu muxima, maji mu ukamba wé, muxima wami wa batama dingi.” Nga divu kala o jivelusu jiji a ji sonekene mwene phala eme! Ku disukilu, muxima wami wa tululuka mu kwijiya kwila, ngi tena kuzwela ni Jihova ya lungu ni ibhidi yami, ni kwila mwene u ngivwa, wejiya o ibhindamu yami.”

Kisangu-sangu kya dikota kwijiya kwila, Nzambi wejiya, wívwa o ndolo yetu! Maji-phe mukonda dyahi kwene hadi yavulu? O kwila mukonda Nzambi u tu kaxtikala mu ima yayibha i tu bhanga? O kwila Nzambi wa-nda bhanga kima phala kuzubha o hadi yoso? O maka yá twa-nda ku a zwela mu milongi ya kayela.