1. Mukonda dyahi o jiselevende ja fiyele ja Jihova m’ukulu atenene kukala ni kuswina?

 O BIBIDYA mu veji javulu itumbula o mayala a fiyele m’ukulu kala athu aswinine, ezalele ni nguzu. Maji kate mwene yo bhukaxi kawu abetele o kuswina, sayi bhabha exile mudivwa kwila azozele. Mu kifika, sayi ithangana Sobha Davidi, wexile mudivwa kwila ‘wadifikidila kala mulundu,’ maji mu ithangana yamukwa ‘wa bhondalele.’ (Jisá. 30:7) O yalungu ni Sasawu, sumbala wexile ni nguzu yavulu mu mukutu mukonda dya nzumbi ikola ya Nzambi, maji mwene wejidile kwila se o kikwatekesu kya Nzambi, ‘weji zoza, ni kusokela ni athu oso.’ (Afun. 14:​5, 6; 16:17) O mayala ya afiyele aswinine ngo mukonda dya kutena kwa abhanene Jihova.

2. Mukonda dyahi Phawulu wambe kwila wazozele maji wexile we ni nguzu? (2 Kolindu 12:​9, 10)

² O poxolo Phawulu wejidile we kwila wabhindamene o kutena kutunda kwa Nzambi. (Tanga 2 Kolindu 12:​9, 10.) Kala avulu mudyetu, Phawulu wexile mudibhana ni ibhidi yalungu ni sawidi. (Nga. 4:​13, 14) Sayi ithangana, kyamubhonzele we kubhanga o ima yambote. (Lom. 7:​18, 19) Sayi bhabha Phawulu wexile ni woma wa ima yejitena kubhita ni mwene. (2 Ko. 1:​8, 9) Ne kiki, kyoso Phawulu kyexile muzoza, wexile mudivwa kwila wala dingi ni nguzu. Maji kyebhi? Kiki kyexile mubhita, mukonda Jihova wexile mu mubhana o nguzu yabhindamene phala kudibhana ni ibhidi.

3. Ibhwisisu yebhi itwanda twambwijila mu milongi yiyi?

³ Jihova wakanena kwila wanda tubhana we o nguzu itwabhindamena phala kukolokota. (1 Ph. 5:10) Maji etu ki twanda tambula o kikwatekesu kiki mu kingoho, twabhingi kubhanga nguzu.  Mu kifika, se wala ni dilonga dya kudya, kwanda tena kwikuta ni kukala ni sawidi yambote, mu kutala ngo o dilonga. Maji wabhingi kukatula o kudya ni lukwaku lwe phala kukuta mu kanu. Kyene kimoxi we, Jihova wamesena kutubhana o nguzu itwabhindamena, maji etu twatokala kubhanga we kima phala ku itambula. Ihi ibhana Jihova phala kutukolokotesa? Ihi itwatokala kubhanga phala kutambula o nguzu yiyi? Twandamona o itambwijilu ya ibhwidisu yiyi kyoso kituya ni kudilonga kyebhi Johova kya kolokotesa o polofeta Jona, Madiya, man’ya Jezú, ni poxolo Phawulu. Twandamona we kyebhi Jihova kyamusuluka mu kuswinisa o jiselevende je lelu.

4. Kyebhi kitutena kutambula o nguzu itunda kwa Jihova?

⁴ Ukexilu umoxi wakutambula o kutena kubhana Jihova, o kusamba kwa mwene. Jihova wanda tambwijila o misambu yetu mu kutubhana “o kutena kusomboka o kutena kwa athu.” (2 Ko. 4:7) Tutena we kutambula o nguzu itwabhindamena, mu kutanga o Bibidya ni kuxinganeka kyambote mu ima itutanga. (Jisá. 86:11) O njimbu ya Jihova phala etu, itusanga mu Bibidya, ‘yala ni kutena.’ (Jih. 4:12) Kyoso ki usamba kwa Jihova anga utanga o Maka me, eye utambula o nguzu iwabhindamena phala utene kukolokota, kukala ni kisangusangu, ni kubhanga kikalakkalu kyabhonzo ki utambula mu kilunga. Tumone kyebhi Jihova kya kolokotesa polofeta Jona.

5. Mukonda dyahi Jona wabhindamene nguzu?

⁵ Polofeta Jona wabhindamene kuswina. Kyoso Jihova kyamubhele kikalakalu kyabhonzele, mwene walengela dikanga. Mukonda dya kiki, kwakambele ngo bhofele mwene wejifwa mu kitembu kya nguzu. Mwene we wate o myenyu ya akwa mu kilwezu. Kyoso o akalakadi a naviyu kyamutakula mu musanza wa kalunga, Jona wabokona mu kididi nuka wakixinganekene — mu mala dya mbiji ya dikota. Mudye, kyebhi kyadivu Jona? O kwila mwene wafikile kwila wejifwila mwenyomo? O kwila wabanzele kwila Jihova wamubwazeka? Nange Jona wexile ni woma wavulu.

6. Kala kyosoneke mu divulu dya Jona 2:​1, 2, 7, Ihi yabhana nguzu kwa Jona kyoso kyexile mu mala dya mbiji?

⁶ Ihi yabhange Jona phala kutambula nguzu kyoso kyexile ubheka, mu mala dya mbiji? O kima kyadyanga kyabhange, o kusamba kwa Jihova. (Tanga Jona 2:​1, 2, 7.) Sumbala Jona wabhukumukine Jihova, mwene wadyela, yu waxikinine kwila Jihova weji kwivwa o musambu we. Mwene we waxinganeka mu Mak’a Nzambi. Mukonda dyahi tuzwela kiki? Mukonda mu musambu we, utusanga mu kibatulu 2 kya divulu dya Jona, mwene watumbula izwelu yavulu yala mu divulu dya Jisálamu. (Mu kifika, sokesa o divulu dya Jona 2:​2, 5 ni divulu dya Jisálamu 69:1; 86:7.) Tutena kumona kwila Jona wejidile kyambote o Bibidya. O kuxinganeka mu jivelusu jiji kyoso kyexile mu ibhidi, kyabhana kwa Jona o kidyelelu kya kwila Jihova weji mukwatekesa. Jihova wabhulula Jona. Kupholo dya kwenda mwene wexile polondo phala kukumbidila o kikalakalu kyamutendelesele o kubhanga.—Jona 2:10–3:4.

7-8. Kyebhi o phange ya dyala ku Taiwan kyatambula nguzu phala kukolokota mu ibhidi?

⁷ O phangu ya Jona itena kutukwatekesa kyoso ki twamubhita mu ibhidi yabhonzo. Mu kifika, phange Zitu, b watungu mu ixi ya Taiwan, wene mu dibhana ni ibhidi yavulu yalungu ni uhaxi. Ku mbandu yamukwa, amoxi ku mwiji wa phange Zitu, ene mumutalatala kyayibha mukonda dyakukala Mbangi ya Jihova. Maji bhukaxi ka musambu ni kudilonga, mwene wene mutambula o nguzu itunda kwa Jihova. Mwene wambe: “Sayi ithangana kyoso ki kumoneka maka, ngene mukala ni hele yavulu, kate kyene mu ngibhonza kusanga o kutululuka phala  kudilonga ubheka.” Maji phange Zitu kene mubhwila. Mwene wambe: “Kyadyanga, ngisamba kwa Jihova. Mu kusuluka, ngita o ji auricalar jami ku matwi anga ngimateka kwivwa o mimbu yetu. Sayi bhabha kate mwene ngisosolola o dizwi dyami mu kwimba, kate kingitululuka. Kyoso kingizubha kubhanga kiki kyene ngo kingimateka o kudilonga.”

⁸ O kudilonga ubheka kya kwatekesa kyavulu phange Zitu. Mu kifika, mukubhita tu izwa, kyoso kyamubhangele pelasá, sayi musaki wa muhatu wamutangela kwila wejibhindamena kumuta manyinga, mukonda o ndundula ye yakusuka ya sosolokele kyavulu. Maji mu usuku ande dyakumubhanga pelasá yamukwa, phange Zitu watange musoso wa phange yamuhatu amubhangele we pelasá kala yoyo. O ndundula yakusuka ya phange ya muhatu yasosolokele dingi o ya phange Zitu ndenge. Ne kiki mwene ka xikina kumuta manyinga, maji watena kudisanza. O mososo yo wabhana nguzu kwa phange Zitu phala kusuluka mukukala fiyele.

9. Se wamudibhana ni kibhidi kyamukuzozesa, ihi i utena kubhanga? (Tala we ojifoto.)

⁹ O kwila wadibhanene kya ni kibhidi kyabhonzo, kate ki watenene kutangela Jihova kyebhi kiwexile mudivwa? O kwila sayi kizuwa watohokele kyavulu, anga ki watenene kudilonga? Lembalala kwila, Jihova utendela o maka me ni kuyuka kwoso. Kyenyiki, ne mwene se uzwela ngo ima yofele mu musambu we, utena kudyelela kwila Jihova wandakubhana iwabhindamena. (Efe. 3:20) Se kyamukubhonza kutanga ni kudilonga mukonda wakate, wa tohoka, mba wa luwala, utena kwivwa o kitangelu kya Bibidya mba kya madivulu m’etu kyongalavale. Utena we kusanga kikwatekesu mu kwivwa o mimbu yetu mba kutala vidyu mu sayte jw.org. Kyoso ki usamba anga usota o kitambwijilu mu Bibidya ni mu madivulu m’etu, kyedi kala wamwixana Jihova phala kukuswinisa. Kyene phe mwene kyanda bhanga.

10. Kyebhi o jiphange jetu kyatuswinisa?

¹⁰ Jihova utena kutuswinisa bhukaxi ka jiphange jetu. Ene atena ‘kutukonda o malamba’ kyoso kitudibhana ni ibhidi mba kyamutubhonza kukumbidila kikalakalu mu kilunga. (Kol. 4:​10, 11) Etu twabhindamena makamba, bengebenge mu ithanagana ya “jiphaxi.” (Jisa. 17:17) Kyoso kituzoza, o jiphange jetu atena kutubhana  o nguzu itwabhindamena, ni kutukolokotesa phala tusuluke mu kusidivila Jihova ni ufiyele woso. Kindala, tumone kyebhi Madiya, man’ya Jezú, kyamuswinia ku akwa.

11. Mukonda dyahi Madiya wabhindamene nguzu?

¹¹ Madiya wabhindamene nguzu phala kubhanga yamesenene Jihova. Xinganeka o kuthandanganya kwa Madiya kyoso anju Ngabidiyele kyamubhana o kikalakalu kyokyo kyabhonzele. Mwene ka kazalele luwa; maji ne kiki weji kwimita. Mwene kexile ni uhete wa kusasa twana, maji weji sasa ni kulanga o mona weji kituka o Mexiya. Kuma nuka wazekele hanji ni diyala, kyebhi Madiya kyeji jimbulula o maka enya kwa Zuze, o diyala weji kazala ne? —Luk. 1:​26-33

12. Kala kysoneke mu divulu dya Luka 1:​39-45, kyebhi Madiya kyatambula o nguzu ya bhindamene?

¹² Kyebhi Madiya kyatena kukala ni nguzu phala kukumbidila o kikalakalu kyokyo kyabhonzele? Mwene wasoto o kikwatekesu kya akwa. mu kifika, mwene wabhingi kwa anju Ngabidiyele phala kumujimbulwila dingi yalungu ni kikalakalu kyenyokyo. (Luk. 1:34) Mu kusuluka, Madiya wayi kate ku “sanzala yala ku milundu” ya mbanza ya Judá phala kukunda ndandu ye, Nzebele. Madiya wabhange kyambote mu kuyaku. Nzebele waximana Madiya. Bhukaxi ka nzumbi iloka, Jihova wabhangesa Nzebele kubhana kikanenu kyalungu ni mona eji kumuvwala kwa Madiya. (Tanga Luka 1:​39-45.) Madiya wambe kwila Jihova “wabhange madiwanu ni lukwaku lwê.” (Luk. 1:​46-51) Jihova waswinisa Madiya bhukaxi ka anju Ngabidiyele ni Nzebele.

13. Ihi yabhiti kyoso phang’yetu ku Bolivia kyabhingi o kikwatekesu kya jiphange?

¹³ Kala Madiya, eye we utena kutambula nguzu bhukaxi ka jiphange jetu. Phange Belita, mu ixi ya Bolívia, wabhindamene nguzu. Kyoso tat’e kyexile mu inzo ya kusaka, ya amutangela kwila o uhaxi ki wejibhita dingi, phange Belita wamesenene kukala jinga ku mbandu ye phala kumulanga. (1 Ti. 5:4) Maji sayi ithangana kyexile mu mubhonza kyavulu. Mwene wambe: “Mu ithangana yavulu ngexile mudivwa kwila kingejitena dingi kusuluka.” O kwila mwene wabhingi kikwatekesu? Ku dimatekunu kana. Mwene wajimbulula, wixi: “Eme ki ngamesenene kubhana kikalakalu ku jiphange. Eme ngexile mubanza kiki: ‘Jihova mwene wandangibhana o nguzu i ngabhindamena.’ Maji bhenyobho ngamono kwila mu kudisondolola ku jiphange, ngexile mufikisa kubatula o maka mami ubheka.” (Jisa. 18:1) Phange Belita wasolo kusonekena makamba me, ni ku ajimbulwila o maka exile mubhita nawu. Mwene wambe: “Ki kwala izwelu itena kujimbulula o kiswinisu kyangibhana o jiphange jami. Ene abheka kudya mu inzo ya kusaka, ni angitangela jivelusu ja Bibidya ji kolokotesa. Ngadivu kyambote mu kwijiya kwila ki ngexile ubheka. Etu tubhanga mbandu ku mwiji wadikota wa Jihova. O jiphange jetu ala pholondo phala kutukwatekesa, kudila kumoxi n’etu, ni kutuswinisa kusuluka mu kusidivila Jihova kumoxi ni ene.”

14. Mukonda dyahi twatokala kuxikina o kikwatekesu kya tufunga?

¹⁴ Ukexilu umoxi wa Jihova kutubhana o kutena, bhukaxi ka tufunga. Ene ala ujitu watubhana Jihova phala kutuswinisa ni kubhebhulukisa o hadi yetu. (Iza. 32:​1, 2) Kyenyiki, kyoso ki ukala ni hele, tangela o tufunga yoso ya mukuthandanganyesa. Xikina ni lusolo o kikwatekesu kya tufunga. Bhukaxi ka tufunga, Jihova utena kukuswinisa.

15. Kidyelelu kyebhi kyala nakyu o jiselevende joso ja Jihova?

¹⁵ O ikanenu ya Bibidya itena kutubhana kidyelelu ni nguzu phala kusuluka mu kusidivila Jihova. (Lom. 4:​3, 18-20) Etwenyoso tu Jimbangi ja Jihova, twala ni kidyelelu kya kukala ni mwenyu wakalelaku—amoxi mu palayizu mu ixi, akamukwa ku dyulu. O kidyelelu kyetu  kitukwatekesa kukolokota mu ibhidi, kuboka o njimbu yambote, ni kukumbidila kabasa kikalakalu kitwala nakyu mu kilunga. (1 Te. 1:3) O kidyelelu kiki kyene we kya kolokotesa poxolo Phawulu.

16. Mukonda dyahi poxolo Phawulu wabhindamene nguzu?

¹⁶ Phawulu wabhindamene nguzu yavulu. Mu mukanda we ku akwa Kolindu, mwene wadisokesa ni kitutu kyatolo o nguzu. Mwene ‘amuxina,’ sayi ithangana wexile ‘ni jiphata,’ a ‘muzukutisa,’ ni ‘kumulundujula.’ Mu ithangana yavulu, o mwenyu we wexile mu kilwezu. (2 Ko. 4:​8-10) Phawulu wasoneka o izwelu yiyi kyoso kyende o njila kala mukunji, mu veji ya katatu. Maji, mwene kejidile kwila kupholo wejidibhana dingi ni ibhidi yebeta o kubhonza. Eji mubeta ku kibuka kya athu, eji mukuta, eji tomboka ni naviu mu musanza wa kalunga, ni eji muta mukaleya.

17. Kala kizwela o divulu dya 2 Kolindu 4:​16-18, ihi yabhana nguzu kwa Phawulu phala kukolokota mu ibhidi?

¹⁷ Phawulu watena kukala ni nguzu yabhindamenene phala kukolokota, mukonda wadikwatenene mu kidyelelu kye. (Tanga 2 Kolindu 4:​16-18.) Mwene watangela akwa Kolindu kwila o mukutu we wejitena ‘kujila,’ maji ne kiki mwene keji zoza. Phawulu wexile mu xinganeka ku hadya. O kidyelelu kya kutambula o mwenyu wakalelaku ku dyulu, kyexile kima ‘kya katunda’ phala mwene. Kyenyiki, mwene wexile polondo phala kukolokota kabasa kibhidi phala kutambula o futu ye. Phawulu wexile muxinganeka ku kidyelelu kye, mukonda dya kiki wexile mudivwa kala wexile mutambula “dingi nguzu kizuwa ni kizuwa.”

18. Kyebhi o kidyelelu kyene muswinisa phange Tinu ni mwiji we?

¹⁸ O kidyelelu kyalungu ni hadya, kyene mu kolokotesa phange Tinu, mu ixi ya Bulgária. Tumivu kudima, o ndeng’ye ya diyala, Zuwa, wafu mu kilwezu kya makalu. Mukonda dya kiki, phange Tinu wexile ni kikote kyavulu. Phala kudibhana ni ndolo yiyi, mwene ni mwiji we ene muxinganeka kyebhi kyandakala o difukunukinu. Mwene wambe: “Mu kifika, etu twaxinganeka kwebhi kutwanda disanga ni Zuwa, kudya kwebhi kutwanda mulambela, nanyi twanda mwixana mu fesa yadyanga itwanda mubhangela, ni ima yabhiti mu  izuwa yasukidilaku itwanda mutangela.” Phange Tinu wambe kwila o kulunga o muxima mu kidyelelu kiki, kyene mu swinisa o mwiji we kusuluka mu kukolokota ni kukingila o kithangana kyatokala kya Jihova kufukununa phang’ye.

19. Ihi i utena kubhanga phala ukolese o kidyelelu kye? (Tala we ofoto.)

¹⁹ Kyebhi ki utena kukolesa o kidyelelu kye? Se wala ni kidyelelu kya kutambula o mwenyu wa kalelaku mu ixi, tanga o misoso ya Bibidya izwela yalungu ni palayizu, anga uxinganeka mu maka enya. (Iza. 25:8; 32:​16-18) Xinganeka kyebhi kyandakala o mwenyu ku mundu wa ubhe. Xinganeka kwila kwene kuwala kya. Nanyi uwamumumona? Jibuya jahi ji wamukwivwa? Kyebhi kiwamudivwa? Phala kukukwatekesa kudixinganeka mu palayizu, tala jifoto jalungu ni maka enya mu madivulu m’etu, mba tala o jividyu ja mimbu yetu, kala Kiyandalaleka, Kwakambe Ngó Bhofele, mba Eu penso no dia. Se tu katula jinga kithangana phala kuxinganeka kyebhi kyandakala o mwenyu ku mundu wa ubhe, twandamona kwila o ibhidi yetu “ki yanda nangenena, ya bhebhuluka.” (2 Ko. 4:17) O kidyelelu kyatubhana Jihova kyene kyanda tukolokotesa.

20. Ne mwene se twamudivwa kwila twazoza, kyebhi kitutena kukala ni nguzu?

²⁰ Ne mwene kyoso kitudivwa kwila twazoza, ‘mu nguzu ya Nzambi twanda kala ni kutena.’ (Jisá. 108:13) Jihova utubhana yoso itwabhindamena phala kutamabula o nguzu itunda kwa mwene. Kyenyiki, kyoso ki ubhindamena kikwatekesu phala kukumbidila kikalakalu mu kilunga, kudibhana ni kibhidi mba kusuluka ni kusanguluka, jikula o muxima kwa Jihova mu musambu, anga usota o itendelesu ye bhukaxi ka kudilonga ubheka. Xikina o kikwatekesu ni kiswinisu kya jiphange. Katula jinga kithangana phala kuxinganeka kyebhi kyanda kala o mwenyu ku hadya. Mu kubhanga kiki eye wanda ‘swina ni nguzu yoso bhukaxi kakutena kwa Nzambi, phala u kolokote ni mwanyu ni kusanguluka.’—Kol. 1:11.