BEBEKA ua kexile mu mona o ithulu ia buingitile kiambote. Muéne ua kexile ku thandu’a kamelu, mu kubhita jisemana mu njila, muéne uejidile kiá ni uendelu ua kamelu ua kamuanhu-kamuanhu. O mbanza ia Hala mua kudila, ia xalele kiá dikanga. Muéne nange keji tena kumona dingi o jindandu jê. Sé phata muéne ua kexile mu dibhuidisa kiebhi kieji kala o muenhu uê, benge-benge mu kindala kiki kia mu bhixila kiá.

Ene a bhitile kiá o ixi ia Kanana ia akexile kiá mu mbanza ia Negebe. (Dimatekenu 24:62) Bebeka nange ua mono jimbudi mu njila. Muéne ua mono kuila o ixi ia uabhele kiavulu phala ku i dimina, ni kusasa-mu ibhaku. Maji o muadikime ua kexile ku pholo uejidile kiambote o kididi kieniókio. Muéne ua kexile ni njimbu iambote, ua mesenene kiavulu ku i tudila ngana iê—Bebeka ueji kazala ni Izake! Bebeka nange ua kexile mu banza kiebhi kieji kala o muenhu uê mu ixi muenhomo. Ua kexile ué mu dibhuidisa se o diiala ueji kazala-nê, Izake, diiala diambote muene mba kana. Mukonda ene nuka a disangele! O kuila Izake ueji uabhela Bebeka? O Bebeka, kiebhi kieji divua?

Lelu mu jixi javulu, o jitata kene ni kifua kia kubhenga muhatu phala an’ê. Mu jixi ja mukuá, o athu ene hanji ni kifua kiki. Maji né kiki, etu oso tu xikina kuila Bebeka kejidile kuoso kua kexile mu ila. Mu kidi, muéne uexile muhatu ua nguzu ni kixikanu kia dikota. Etu ué tua bhingi kukala ni ifua iiadi ienii kioso o ima ku muenhu uetu i lunguluka. Maji Bebeka ua londekesa ué ifua ia mukuá ia uabha i tua tokala kukala na-iu.

O muenhu ua Bebeka ua mateka kulunguluka mu fixi ia menha, o kididi mua kexile múia muéne izuua ioso ni mukonda ué dia ukexilu uê ua kutambulula kiambote o athu. Muéne ua kudila mu Hala, mbanza ia kexile mu Mezopotamiia. O jitata jê ka difuile ni athu mu mbanza ia Hala, mukonda ene ka kexile mu bheza Sine o nzambi ia mbeji. Maji akexile mu bheza Jihova Nzambi.​—Dimatekenu 24:50.

Bebeka ua uabhele kiavulu o pholo, maji kexile kimonha. Muéne uexile muhatu ua nguzu, uexile ué ni ukexilu uambote. O muiji uê uexile ni jimbongo javulu se a mesenene hinu eji kala ni jiselevende javulu, maji Bebeka kexile kala mvuale kana; a mu longo tundé undenge kukalakala ni nguzu. Kala kiene mu bhita ni ahatu mu izuua ietu, Bebeka ua kexile ué ni ikalakalu iavulu m’onzo kala o kuteka o menha. Mu ngoloxi muéne ua kexile múia mu fixi ia menha ni disanga diê bhu isuxi.​—Dimatekenu 24:11, 15, 16.

Saí kizuua mu ngoloxi, kioso muéne kiezalesele kiá o disanga diê, diiala muadikime uai ni kulenga phala ku mu sanga. O diiala ua muambela: “Nga ku diondo, ngi bhane tumenha mu disanga dié.” Iú ukexilu uambote ua kubhinga kima! Bebeka ua mono kuila o diiala dia tundile dikanga, ua kexile muene ni dinhota. Kienhiki, ni lusolo-luoso muéne ua tulula o disanga dia menha iu ua di bhana o diiala n’a nu. Muéne ua mono ué kuila o diiala dia kexile ni kuinhi dia jikamelu ja xikamene, maji mu kididi mua kexile mu nuina o ibhaku ki mu kexile menha. Kienhiki, muéne ua mono kuila o diiala ua kexile mu mu tala ni henda ioso, Bebeka ua mesenene kiavulu kubhanga mbote ku diiala. Mu kiki, Bebeka uambe: “Ni jikamelu jé ngi ji tekela ué katé ki ji zubha kúnua.”​—Dimatekenu 24:17-19.

Talesa kuma, Bebeka ka bhana ngó tumenha phala o dikuinhi dia jikamelu kana, Bebeka ua a bhana menha katé ki ja zubha o kunua. O jikamelu se jala ni dinhota diavulu, kamelu kamoxi ka tena kunua 95 kia ji litulu ja menha! Mu kiki, se o dikuinhi dia jikamelu jiji ja kexile ni dinhota diavulu, tu tena kuzuela  kuila Bebeka ua bhiti ola javulu ni kusunga o menha mu fixi. Maji o ima ilondekesa kuila o jikamelu ki ji kexile ni dinhota diavulu. * O kuila Bebeka uejidile kuila o jikamelu ki ji kexile ni dinhota diavulu? Kana. Muéne ua mesenene kiavulu kukalakala phala kubhanga mbote ku diiala didi dia tundu ‘xi iengi. O diiala ua xikina ioso ia bhange o kilumba. Muéne ua kexile mu tala kiambote o kilumba kioso kia kexile mu kuizalesa o disanga ni ku di lundulula katé kiezalesa o kididi mua kexile mu nuina o jikamelu.​—Dimatekenu 24:20, 21.

O musoso ua Bebeka u tu longa ima iavulu. Mu izuua ietu, o athu a suua ngó o jihanji jâ o ja akuâ kana. Kála kia ki tangele kiá m’ukulu, lelu o athu “azodi a ene ngó,” ka mesena kuta o ibhindamu ia akuâ ku pholo dia ibhindamu iâ. (2 Timote 3:1-5) Phala ka kale ni ifua íii, kima kiambote o Jikidistá kuxinganeka ku phangu ia Bebeka, uaile veji javulu mu sunga o menha mu fixi.

Bebeka uejidile kuila o muadikime ua kexile mu mu iala kiavulu. Maji ka kexile mu mu iala mu ukexilu ua iibha; o diiala dia diuanene kiavulu iu ua sangululukile mu kumona o henda ia Bebeka. Kioso Bebeka kia zumbuka, muéne ua mu bhana maujitu a ulu! Anga ua muibhuidisa: “Mona kilumba, e’ tat’enu nanhi? Ngi tangele-kiu; o kuila ku bhata dia tat’enu tu mona-ku kididi kia ku tu zalela?” Kioso Bebeka kia mu tangela o muiji uê, o diiala dia sanguluka dingi. Nange ni kusanguluka kuoso Bebeka uambe: “Tuala ni iangu, ni ngânda ia jikamelu, ia soko muene, ni kididi kia ku mi zalela.” Iú uexile ujitu ua dikota mukonda o diiala kexile ubheka kana. Bebeka anga ua tuamena ni lusolo luoso phala ku dikunda ni manh’â ioso ia bhitile.​—Dimatekenu 24:22-28, 32.

Sé phata, Bebeka a mu sase kuala o jitata jê ni ukexilu ua kubhanga mbote ku athu. Mu izuua íii o kubhanga mbote, ki kuene-ku dingi. Mu kiki kima kiambote o athu kukaiela o phangu ni kixikanu kia kilumba kiki, mukua henda. O kuxikana Nzambi kua tokala ku tu suínisa kubhanga mbote ku athu. Jihova mukua kubhanga mbote ku athu, muéne u bhana ima iambote ku athu oso, mukonda dia kiki muéne ua mesena kuila abhezi’ê oso a bhanga uá kiki. Kioso ki tu bhanga mbote katé muene kua ió kene ni kima kia ku tu vutuila, mu ku a bhanga mbote, Tat’etu ia diulu Ngana Jihova u sanguluka kiavulu.​—Matesu 5:44-46; 1 Phetele 4:9.

Maji diiala diódio, ua kexile mu zuela ni Bebeka mu fixi ia menha, nanhi muene? Muéne uexile selevende ia Mbalahamu, kuku’a Bebeka ku mbandu ia pha’iâ. Mukonda dia kiki, a mu tambulula kiambote kuala Betuele, pha’iâ Bebeka. O selevende íii dijina diê nange, Iliezele. * Diiala didi a mu bhana kudia maji muéne ua ditunu-ku, uambele kuila kia dianga ua tokalele kuzuela ia mu bhekele. (Dimatekenu 24:31-33) Tu tena kuxinganeka kioso muéne kia kexile mu zuela ni kisangusangu kioso. Mukonda ua muene kiá kuila Jihova Suke-ku ua kexile mu besoala kiavulu o njila iê. Maji ua kexile mu mu besoala kiebhi?

Xinganeka Iliezele ua mu tanga o musoso uê, o phá’iâ Bebeka, Betuele ni kota diê Labano a mu kuívua. Muéne ua a tangela kuila Jihova ua bhanene dibesá dia dikota kua Mbalahamu mu ixi ia Kanana. Ua a tangela ué kuila Mbalahamu ni Sala a vualele mon’â diiala, a mu lukile o dijina dia Izake ueji lundula o unvuama uoso. Mbalahamu ua bhanene kikalakalu kia dikota ku selevende íii: Muéne ua tokalele kusota muhatu phala Izake bhu kaxi ka jindandu ja Mbalahamu mu ixi ia Hala.​—Dimatekenu 24:34-38.

Mbalahamu ua bhangesa Iliezele kuloka kuila, keji sota muhatu phala Izake bhu kaxi ka akua Kanana. Mukonda diahi kana? Mukonda o ahatu akua Kanana ka kexile mu bheza Jihova o Nzambi ia kidi né muene ngó ku mu xila. Mbalahamu uejidile kuila Jihova ua xindile kithangana kia kukaxtikala oso a bhanga ima ia iibha. Mbalahamu ka mesenene kuila mon’ê ua kazola Izake, u sakana muhatu mukua Kanana, akexile ni maukexilu a bolo. Muéne uejidile kuila mon’ê ua kexile ni kikalakalu kia dikota mu ku kumbidila o ikanenu ia Nzambi.​—Dimatekenu 15:16; 17:19; 24:2-4.

Iliezele ua suluka ni kutanga o musoso kuila kioso kia bhixile bhu fixi ia menha mu ixi ia Hala, ua sambele kua Jihova. Muéne ua bhingile kua Jihova phala ku mu kuatekesa kusola muhatu phala kukazala ni Izake. Kiebhi kia bhangele kiki? Iliezele ua bhingile kua Nzambi kuila o kilumba kia tokalele kukazala na-kiu Izake ua tokalele kuia mu teka menha mu fixi muenhomo. O kieji bhinga menha, o kilumba ua tokalele ku mu bhana menha ni henda ioso, ua tokalele ué kubhana menha ku jikamelu jê joso. (Dimatekenu 24:12-14) Nanhi uejile iu ua bhangele o ima ioso íii? Bebeka! Xinganeka kiebhi kieji divua Bebeka se kexile m’onzo mu kithangana kioso Iliezele kia kexile mu tangela o muiji uê ioso ia bhitile!

Betuele ni Labano a sangulukile kiavulu ni musoso uoso ua tangele Iliezele. Ene ambe: “Kimbamba kia tundu kua Jihova.” Mukonda dia ijila iâ, ene a suku mu kuta o kikutu kia ukaza ua Bebeka ni Izake. (Dimatekenu 24:50-54) O kuila kiki kilombolola kuila Bebeka ka tokalele dingi kuzuela kima?

Ande dia Iliezele kuia kua Hala, muéne ua bhangele o kibhuidisu kiki kua Mbalahamu: ‘O se o muhatu ka xikina ku ngi kaiela, n’eza kunu?’ Mbalahamu ua tambuijile: “Mulôko uami ki u kuata dingi.” (Dimatekenu 24:39, 41) Ku dibhata dia Betuele, o kilumba muéne ua tokalele kusola ihi ia-ndalele. Iliezele ua sangulukile kiavulu mukonda ioso ia kexile mu bhita kála kia-ndalele muéne, mu kiki mu kúkia, muéne uebhuidisa se ua tenene kiá kuambata Bebeka ni kuvutuka mu njila iê. Maji o muiji ua mesenene hanji kukala ni Bebeka dikunhi dia izuua. Mu kiki phala kubatula o maka, ene ‘exana o mona kilumba, a muívu mu kanu diê.’​—Dimatekenu 24:57.

Ia maka a dikota phala Bebeka. Ihi ieji zuela muéne? O kuila ueji diondela pha’iâ ni kota diê phala kaié ni Iliezele? Inga ueji mona o maka enhá kala ujitu ua dikota kubhanga mbandu mu ima ia kexile mu bhanga Jihova, phala kukumbidila o kizuelu kiê? Kioso Bebeka kia tambuijila, muéne ua londekesa kiebhi kia kexile mu divua ku muxima bhu kaxi ka maka enhá. Bebeka uambe ngó: “Ngiia.”​—Dimatekenu 24:58.

Bebeka ua londekesa ukexilu uambote! Lelu nange o ijila ietu ia lungu ni ukaza ki i difu ni ijila iokulu, maji né kiki o musoso ua Bebeka u tu longa ima iavulu. Phala Bebeka o kia betele dingi kota ko jivondadi jê kana, maji o vondadi ia Nzambi iê Jihova. Bhu kaxi ka ukaza, o Mak’â Nzambi a tu bhana hanji milongi iambote ia lungu ni kusola muthu phala kukazala, ni milongi ia lungu ni kukala diiala mba muhatu uambote. (2 Kolindo 6:14, 15; Efezo 5:28-33)  Kima kiambote kukaiela o phangu ia Bebeka ni kusota kubhanga o ima kala kia uabhela Nza-mbi.

O muiji ua Betuele ua besoala mon’â kazola, Bebeka. Mu kiki, Bebeka ni Debola, uexile masek’ê mu undenge kumoxi ni ilumba ia mukuá, ai ni Iliezele ni makuenze mê. (Dimatekenu 24:59-61; 35:8) Kienhiki ene ai, o ixi ia Hala ia xalele kiá dikanga. Ene akexile mu kuenda njila ia lebha, kueji bhinga semana jitatu phala kubhixila. Bebeka nange ka kexile mu divua kiambote mu kuenda o njila ióio. Bebeka ua muene kiá jikamelu javulu maji ki tu tena kuzuela kuila muéne uejidile kuendela ku kamelu. O Bibidia ilondekesa kuila o muiji ua Bebeka uexile ni jimbudi, kexile jingenji ja kexile mu kuendela ku jikamelu kana. (Dimatekenu 29:10) Oso a mateka kindala o kusambela ku kamelu amba kuila ka divuá kiambote kuendela ku kamelu né muene se tu ithangana ngó!

Bebeka ua kexile ni hele, ua mesenene kuijiia dingi ia lungu ni Izake ni muiji uê, kienhiki ua kexile mu kuivuidila kiambote Iliezele. Xinganeka o muadikime ua xikama, ua mu kuota iu ua mu mu tangela o kizuelu kia tangele Jihova kua kamba Diê Mbalahamu. Nzambi ueji bhangesa kuila o mbutu mba Mexiia u tunda ku muiji ua Mbalahamu ni kuila mundu uoso ueji tambula mabesá bhu kaxi ka mbutu íii. Xinganeka o kisangusangu kia Bebeka kioso kievu kuila o kikanenu kia Jihova kieji di kumbidila bhu kaxi ka Izake ueji kala muadi uê ni bhu kaxi ué ka muéne!​—Dimatekenu 22:15-18.

Mu kienhiki, o kizuua ki tua tange ku dimatekenu dia milongi íii kia bhixila. Kioso ene kia zukamene ku mbanza ia Negebe, kuma kua kexile mu vunda kiá, mu kiki Bebeka ua mono diiala ua kexile mu kuenda ku mukau. Muéne uedile kála muthu ua mu banza kiavulu. O Bibidia iamba: ‘Bebeka u tuluka ku kamelu,’ muéne nange ka kingi dingi o kamelu ku bhetama phala muéne n’a tuluke. Bebeka anga uebhuidisa o muadikime: “Diiala diódio nanhi, uala kuijila mu mukáu mu ku tu batuila?” Kioso muéne kievu kuila o diiala diódio Izake, Bebeka ua xiti o pholo iê ni dilesu diê. (Dimatekenu 24:62-65) Mukonda diahi? Kiki kia lomboluele kuxila o diiala dieji kazala-né. Phala amoxi lelu o kuxila kiki o diila kifua kiokulu. Maji ki kale o maiala mba o ahatu tu tena kudilonga ima iavulu mu kulenduka kua Bebeka, mukonda etu oso tua bhingi kulenduka mu kudibhana ni athu.

Izake ua kexile ni 40 a mivu, ua kexile hanji mu dila o kufua kua manh’â Sala, tundé kia fuile kua bhitile mivu itatu. Mu kiki, tu tena kuzuela kuila Izake uexile diiala diambote, mukua henda. Kienhiki, dibesá dia dikota Izake kukazala ni Bebeka muhatu ua nguzu, mukua kubhanga mbote ni kulenduka! Kiebhi kia divu Izake? O Bibidia iamba kuila Izake “anga mu zola.”​—Dimatekenu 24:67; 26:8.

Sumbala kua bhiti kiá 39 dia jihama, tu tena kumona kuila Bebeka uexile muhatu uambote. Kiebhi ki tena ku tu kuatekesa o kusuina kua Bebeka, o nguzu iê, o ukexilu uê ua kubhanga mbote ni kulenduka? Etu oso, mizangala, adiakime, mala ni ahatu, makaza ni makudi, kima kiambote etu oso kukaiela o kixikanu kia Bebeka!