Nange ua mu di lembalala hanji o musoso ua Gail, a mu tumbula kiá ku dima, ua kexile ni phata se ueji disanza muéne ku ndolo ia ku funda muadi uê, Rob. Maji muéne ua mu kingila ku mu mona, ku mundu ua ubhe ua kanena Nzambi. Muéne uambe: “O kibatulu kia Bibidia ki nga uabhela dingi, kiala mu divulu dia Dijingunuinu 21:3, 4.” Kiambe: “Nzambi muène uenda jinga-nâ, u kala Nzambi iâ. Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.”

Gail uambe: “Kiki kikanenu kiambote! Ki ngi bhangesa kubanza ku athu a fundu jindandu jâ, maji kaláu ni kidielelu kia ku a mona dingi.” Kienhiki, Gail ua di bhakula kala muboki ua thembu ioso, mu kuzuela ni jivizinhu jê ia lungu ni jipolomesa ja Nzambi ja kuila ku hádia “ki ku kala dingi kùfua.”

Nange uamba ‘iá makutu!’ Maji tanga o musoso ua Jobe. Muéne ua katele kiavulu. (Jobe 2:7) Sumbala Jobe ua mesenene kufua, maji muéne ua dielele kuila Nzambi ueji mu fukununa. Muéne uambe ni kidi kioso: “Tamanu ua ngi suekele mu mbila . . . Eie-phe ueje ku ng’ixana, eme hé ngi ku’itaia; Ngana, kuatela henda ku kikalakalu kia maku mé!” (Jobe 14:13, 15) Jobe ua dielele kuila, Nzambi ueji mu kuatela henda, iu ueji mu fukununa.

Kua kambe ngó bhofele, kioso o ixi ki ia-nda kituka palaízu Nzambi ua-nda fukununa Jobe ni jimidi ni jimidi ja athu afu. (Luka 23:42, 43) O Bibidia mu divulu dia Ikalakalu 24:15 iamba kiki: “Hádia ku kala difukunukinu.” Jezú ua tu kanena: “Ki mu diuane. Kuma kumbi dí diza, dia oso ala mu jimbila kuívua o dízui diê, ni kutunda-mu.” (Nzuá 5:28) Jobe ua-nda mona o kikumbidilu kia polomesa íii. ‘Muéne ua-nda vutukila dingi mu izuua ia unzangala ué,’ phala ‘o xitu iê, i beta dingi kubuingita anga i somboka muene kia kexi mu nguzu ia undenge.’ (Jobe 33:24, 25) Kiene ué kia-nda bhita ni athu oso a bhana valolo ku ujitu ua Nzambi ua kufukununa o athu.

Se ua fundu kiá ndandu, o milongi i tua dilongo kiá, nange ki ia-nda zubha o ndolo ioso i uala na-iu. Maji mu ku xinganeka mu ji polomesa ja Nzambi jala mu Bibidia, u tena kukala ni kidielelu ni nguzu phala kukolokota.​—1 Tesalonika 4:13.

O kuila ua mesena kuijiia dingi ia lungu ni kiebhi ki u tena kudibhana ni ndolo ia kufunda ndandu? Inga ua mesena kuijiia se “Mukonda diahi Nzambi uehela o hadi?” Tua kudióndo, jikula o jw.org u mone kiebhi o Bibidia i tena ku kuate-kesa.