MU KU tumikisa Mon’ê ua kazola Jezú mu ixi, Jihova ua tu bhana ujitu ua dikota ua henda! (Nzuá 3:16; 1 Nzuá 4:9, 10) Poxolo Phaulu uexana o ujitu iú, kala ujitu ua dikota, ka tena ‘ku u tanga.’ (2 Kolindo 9:15) Mukonda diahi Phaulu ua zuela kiki?

1, 2. (a) Uebhi o ujitu ua dikota ka tena ‘ku u tanga,’ ua tu bhana Nzambi? (b) Ibhuidisu iebhi i tua-nda di longa mu milongi íii?

² Phaulu uejidile kuila, o sata ia Jezú, ilondekesa kuila, o ikanenu ioso ia Nzambi, ia-nda di kumbidila ni kidi kioso. (Tanga 2 Kolindo 1:20.) Kiki kilombolola kuila, o ujitu ua dikota ka tena ‘ku u tanga,’ ua lungu ni sata ia Jezú, ni mbote ioso, ni henda i tu londekesa Jihova. Ki tu tena kutendela o ima ioso ia lungu ni ujitu iú. Kiebhi ki tua tokala ku divua ia lungu ni ujitu iú ua katunda? Kiebhi o ujitu iú, u tena ku tu suínisa, kioso ki tuia ni ku di pelepalala phala o Lembalasa ia Kufua kua Kristu, ia-nda bhita kia Kuarta, kizuua kia 23, kia mbeji ia Katanu ka muvu ua 2016?

3, 4. (a) Kiebhi ki u divua kioso kia kubhana ujitu? (b) Nange kiebhi o ujitu ua katunda ueji lungulula o muenhu uê?

³ Etu tu sanguluka kiavulu, kioso muthu kia tu bhana ujitu. Maji saí maujitu ala ni valolo iavulu, a tena kulungulula o muenhu uetu. Mu kifika, xinganeka kuila, eie ua nhana mba ua bhange kima kiéngi kia iibha. Mukonda dia kiki, a ku balakala o kufua. Maji mu veji dia ku ku kasa eie, kumoneka muthu u di bhakula phala ku mu kasa bhu kididi kiê. Muéne uala polondo phala kufua bhu kididi kiê! Kiebhi ki ueji divua mukonda dia ujitu iú ua katunda?

⁴ O ujitu iú ua dikota, ueji kubhangesa kulungulula o muenhu uê. Nange o ujitu iú, ueji kusuínisa ué kulondekesa o ukexilu ua kubhana, kuzola dingi akuenu, ni kuloloka oso a ku bhangele kia iibha. Eie ueji mesena kulondekesa o kisakidilu kiê ku ujitu iú, ku muenhu uê uoso.

5. Mu ukexilu uebhi o ujitu ua tu bhana Nzambi ua ku tu kula ua beta-o-kota, o maujitu a mukuá ndenge?

⁵ O ujitu ua Nzambi ua ku tu kula, ua beta-o-kota, o ujitu ua kifika ndenge. (1 Phetele 3:18) Xinganeka mu maka iá: Etu enioso tua lundula o kituxi kia Adá, mu kiki, o futu ia kituxi, o kalunga. (Loma 5:12) O henda ia bhangesa Jihova kutumikisa Jezú mu ixi, phala kufua bhu kididi kia athu, n’a “lole kalunga mu mulonga ua mundu uoso.” (Jihebeleu 2:9) Maji o sata ia Jezú, ia-nda bhanga dingi ima ia mukuá! Ia-nda buika o kalunga katé ku hádia ni hádia. (Izaia 25:7, 8; 1 Kolindo 15:22, 26) O athu oso a londekesa o kixikanu kua Jezú, a-nda kala ni muenhu ua kalelaku ni kutululuka. Saí iá, a-nda kala jisobha ku diulu, kumoxi ni Kristu mu Utuminu ua Nzambi, o athu a mukuá a-nda tunga mu ixi. (Loma 6:23; Dijingunuinu 5:9, 10) Mabesá ebhi dingi a-nda tu bhana Jihova?

6. (a) Mabesá ebhi u ua mesena o kutambula kua Jihova? (b) O ujitu ua Nzambi ua-nda tu suínisa kubhanga ima iebhi?

⁶ Mukonda dia ujitu ua Nzambi, o ixi ia-nda kituka palaízu, o jihaxi a-nda disanza, o madifundu a-nda fukunuka. (Izaia 33:24; 35:5, 6; Nzuá 5:28, 29) Etu tua zolo kiavulu Jihova ni Mon’ê ua kazola, mukonda dia ujitu iú ua dikota ua tu bhana ka tena ‘ku u tanga.’ O ujitu iú, ua-nda tu suínisa kubhanga ihi? Ua-nda tu suínisa (1) kukaiela kiambote Jezú Kristu, (2) kuzola o jiphange jetu, ni (3) kuloloka akuetu ni muxima uoso.

7, 8. Kiebhi ki tua tokala ku divua ia lungu ni henda ia Kristu? O henda íii ia tokala ku tu suínisa kubhanga ihi?

⁷ Kia dianga, o ujitu iú ua tokala ku tu suínisa kuximana Jezú, ni muenhu uetu uoso. Poxolo Phaulu uambe: ‘Tuezala ni henda ia tu kuatela Kristu.’ (Tanga 2 Kolindo 5:14, 15.) Phaulu uejidile kuila, se tu xikina o henda ia dikota ia Jezú, o henda íii, ia-nda tu suínisa kuzola, ni kuximana Jezú. Mu kidi, kioso ki tu tendela kiambote o ima ia bhange Jihova phala o mbote ietu, o henda iê, ia-nda tu suínisa kukala ni ukexilu u ximanesa Jezú. Kiebhi ki tu tena kubhanga kiki?

⁸ O henda ietu kua Jihova, ia-nda tu suínisa kukaiela o phangu ia Jezú, ni kukaiela kiambote o makanda mê. (1 Phetele 2:21; 1 Nzuá 2:6) Kioso ki tu belesela Nzambi ni Kristu, tua mu londekesa kuila, tua a zolo. Jezú uambe: “Uoso ua kuata o ijila iami, anga u i aluka, muène muthu ua ngi zola. Uoso-phe ua ngi zola, Tata iami u mu zola,  eme ngi mu zola, ngi di tukulula kua mùene.”​—Nzuá 14:21; 1 Nzuá 5:3.

9. A nanhi a tena ku tu fuinhisa?

⁹ Mu kithangana kia Lembalasa, kima kiambote kuxinganeka se kiebhi kiala o muenhu uetu. Mu kiki, dibhuidise: ‘O kuila ngene mu kaiela kiá o phangu ia Jezú mu maukexilu oso? Ihi i nga tokala o kulungulula?’ Kima kiambote ku dibhuidisa kienhiki, mukonda o athu ku mundu, a bhanga o ima kala kia mesena. (Loma 12:2) Se ki tu di lange, tu tena kukaiela ué o phangu ia jimesene ja mundu, o athu ala ni fuma, ni akua ku jokala. (Kolose 2:8; 1 Nzuá 2:15-17) Kiebhi ki tu tena ku dituna mba kulenga o ima íii?

10. Ibhuidisu iebhi i tu tena o kubhanga mu kithangana kia Lembalasa? O itambuijilu ietu i tena ku tu suínisa kubhanga ihi? (Tala o foto ia dianga.)

¹⁰ Mu kithangana kia Lembalasa, kima kiambote kutonginina o izuatu ietu, jifilme, mimbu, ni ima ioso iala mu komputadolo ietu, mba mutelembe ua kafuetele. Dibhuidise: ‘Se Jezú uexile kumoxi n’eme bhabha, ni kumona o izuatu iami, o kuila ngeji kala ni jisonhi?’ (Tanga 1 Timote 2:9, 10.) O kuila o izuatu iami ieji londekesa kuma, ngi dixibulu dia Kristu? O kuila Jezú ueji uabhela kumona o jifilme jami? O kuila muéne ueji uabhela kuívua o mimbu iami? Se nga sobhesele o mutelembe uami ua kafuetele kua Jezú, o kuila ngeji kala ni jisonhi mukonda dia ima ieji mona mu mutelembe? O kuila ki ngeji tena kujimbulula kua Jezú se mukonda diahi nga uabhela o jijoko ji ngene mu jokala?’ O henda ietu kua Jihova, ia tokala ku tu suínisa ku texa kima kioso-kioso ki ki tokala ku Jikidistá, né muéne se kima kia te kalu iavulu. (Ikalakalu 19:19, 20) Kioso ki tua di bhakula kua Jihova, tua kanena kuximana Kristu, ni muenhu uetu uoso. Mu kiki, ki tu tokala kukala ni kima kioso-kioso ki tena ku tu fidisa kukaiela Jezú.​—Matesu 5:29, 30; Filipe 4:8.

11. (a) Kiebhi o henda ietu kua Jihova ni Jezú, i tu suínisa mu sidivisu ia kuboka? (b) Kiebhi o henda ietu i tena ku tu bhangesa kukuatekesa akuetu mu kilunga?

¹¹ O henda ietu kua Jezú, i tu suínisa kuboka ni nguzu ioso. (Matesu 28:19, 20; Luka 4:43) O kuila u tena ku di phopheka kiambote, phala kukalakala kala muboki ua ithangana ni ithangana, ni kubhanga 30 mba 50 a ji ola mu sidivisu ia kuboka, mu kithangana kia Lembalasa? Saí phange mutudi uala mu 84 ia mivu, ua kexile mu banza kuila, keji tena kukalakala kala muboki ua ithangana ni ithangana, mukonda ka kexile ni sauidi iambote. Maji o aboki a kilunga, a mesenene ku mu kuatekesa. Ene a mu kuatekesa ni dikalu phala ku mu ambata, anga a sola o mbambe ia fuamene phala kuboka. Mukonda dia kiki, muéne ua tena kubhanga o 30 a ji ola, ja mesenene kubhanga mu ukunji. O kuila eie u tena kukuatekesa muthu mu kilunga, kukalakala kala muboki ua ithangana ni ithangana mu jimbeji ja Katanu ni Kasamanu? Mu kidi, ko athu oso a tena kukala aboki a ithangana ni ithangana, maji etu enioso tu tena kubhanga nguzu phala kubandekesa dingi o kikalakalu kietu kua Jihova. Se tu bhanga kiki, tua-nda kaiela o phangu ia Phaulu, ni kulondekesa kuila, o henda ietu kua Jezú iene ué i tu suínisa kubhanga dingi mu sidivisu ia Nzambi. O henda ietu kua Nzambi i tu suínisa kubhanga dingi ihi?

12. O henda ietu kua Nzambi, i tu suínisa kubhanga ihi?

¹² Kia kaiiadi, o henda ietu kua Nzambi ia  tokala ku tu suínisa kuzola o jiphange jetu. Poxolo Nzuá ua soneka: “Enu akuetu, tua mi zola, Nzambi se ua tena ku tu zola kiki, etu uetu tua fuama tu di zola mudietu.” (1 Nzuá 4:7-11) Mu kiki, se tua mesena kuila Nzambi u tu zola, etu ué tua tokala kuzola o jiphange jetu. (1 Nzuá 3:16) Kiebhi ki tu tena kuzola o jiphange jetu?

13. Phangu iebhi ia xisa Jezú, ilondekesa se kiebhi ki tua tokala kuzola akuetu?

¹³ O phangu ia tu xisa Jezú, i tu londekesa se kiebhi ki tua tokala kuzola akuetu. Kioso kiexile mu ixi, muéne ua kuatekesele athu avulu, benge benge o athu a lenduka. Muéne ua sakele o jihaxi, o inema, o maxilu, mabubu, ni ifofo. (Matesu 11:4, 5) Jezú ka difuile ni atuameni a jingeleja, muéne ua uabhele kulonga o athu a mesenene kuijiia o Mak’â Nzambi. (Nzuá 7:49) Muéne ua zolele o athu a lenduka, iú ua bhange ioso phala ku a kuatekesa.​—Matesu 20:28.

14. Ihi i u tena o kubhanga phala kulondekesa o henda ku jiphange jê?

¹⁴ O kithangana kia Lembalasa, kithangana kia fuama phala kuxinganeka mu maukexilu a kukuatekesa o jiphange ja kilunga kiê, benge benge ió a kuka kiá. O kuila u tena kukunda o jiphange jiji ja kuka? O kuila u tena ku a ambatela kama koso koso ka kudia, mba ku a ambata mu kiônge, ku a kuatekesa kubhanga o ikalakalu kubhata, mba kuboka nau kumoxi? (Tanga Luka 14:12-14.) O henda ia Nzambi, i tena ku ku suínisa kuzola o jiphange jê!

15. Ihi i tua tokala o kuxikina?

¹⁵ Kia katatu, o henda ietu kua Jihova i tu suínisa kuloloka o jiphange jetu. Etu enioso tua lundula o kituxi kia Adá ni kalunga, mukonda dia kiki, sé-ku muthu u tena kuzuela: “Eme ki ngi bhindamena o sata ia kukula.” Katé muene ni selevende ia Nzambi ia beta o kuiuka mu ixi, ua bhindamena ué o sata ia kukula. Etu enioso a tu loloka dikongo dia dikota! Mukonda diahi tua tokala ku xikina o kidi kiki? Tua-nda kuijiia o kitambuijilu mu ku di longa o kifika kia tele Jezú.

16, 17. (a) O kifika kia Jezú kia lungu ni sobha ni abhika, ki tu longa ihi? (b) Ihi i ua mesena o kubhanga mu ku di longa o kifika kia Jezú?

¹⁶ Jezú ua tele kifika kia sobha ua loloka dikongo dia tele o selevende iê. O dikongo didi, dia tenesele 10.000 dia jitalendu. Mu kubhita kithangana, o mubhika a mu lolokele, ka loloka o mubhika ni mukuá, ua kexile ni dikongo dia 100 dia denádia. Kuma a mu lolokele kua sobha, o mubhika ua tokalele ué kuloloka o mubhika ni mukuá. Kioso o sobha kievu kuma, o mubhika ka loloka o dikongo diofele dia mu tele o mubhika ni mukuá, njinda ia mu kuata. Muéne uambe: “Eie selevende ia kimi, u kísueia! Eme nga ku ehela dikongo diosu’odio, mukonda ua ngi dionda; manhi eie kífua ki kia ku tokalele ku kuatela mukuenu henda, uila eme ki nga ku kuatela eie o henda?” (Matesu 18:23-35)  Kála kia bhange o sobha, Jihova uene mu tu loloka dikongo dia dikota. O henda ia Jihova ni ukexilu uê ua kuloloka, ua tokala ku tu suínisa kubhanga ihi?

¹⁷ Kioso ki tuia ni ku di pelepalala phala o kizuua kia Lembalasa, tua tokala ku dibhuidisa: ‘O kuila saí phange ua ngi bhange kima kia ngi luualesa? O kuila ki nga mu tena ku mu loloka?’ Se kiki kia mu bhita n’eie, o kithangana kia Lembalasa, kithangana kia fuama phala kukaiela o phangu ia Jihova “u lenguluka kuloloka.” (Nehemiia 9:17; Jisálamu 86:5) Se tu bhana valolo mu henda ia tu kuatela Jihova, tua-nda zola akuetu ni ku a loloka ni muxima uoso. Se ki tu zolo o jiphange jetu ni ku a loloka, ki tu tokala ué kukingila o henda ni muloloki ua Jihova. (Matesu 6:14, 15) Mu kidi, kioso kia tu bhanga kima kia iibha, etu tu luuala, maji o kuloloka akuetu kua-nda tu kuatekesa kuzediua ku hádia.

18. Kiebhi o henda kua Nzambi ia kuatekesa phange ku dibhana ni itondalu ia phange ia mukuá?

¹⁸ Nange kibhonza kiavulu ku dibhana ni itondalu ia jiphange jetu. (Tanga Efezo 4:32; Kolose 3:13, 14.) Kiki kiene kia bhitile ni Lily. ^[1] (Tala ku disukilu dia milongi.) Muéne ua kuatekesele mutudi a mu ixana Carol. Mu kifika, muéne ua kexile ku xinjikila Carol bhuoso bhua mesenene kuia, kikale kusumba ima mu itanda, ni kubhanga dingi ima iéngi. Sumbala ni ima ioso ia kexile mu bhanga Lily, Carol uexile mukuá kufundisa, saí ithangana muéne ua bhonzele kiavulu. Maji Lily, ua sotele kumona o ídifua iambote ia Carol, iú ua suluka mu ku kuatekesa Carol katé mu kithangana kia katele kiavulu, iú uafu. Sumbala kia bhonzele kiavulu kukuatekesa Carol, maji Lily uambe: “Nga mesena kiavulu kumona Carol, kioso kia-nda mu fukununa. Eme nga mesena ku muijiia kiambote, kioso kia-nda kala muthu ua iuka.” Mu kidi, o henda ietu kua Nzambi, i tena ku tu kuatekesa, ku dibhana ni itondalu ia jiphange jetu, ni ku kingila ni hanji ioso o kithangana kioso Nzambi kia-nda zubha o ukexilu uetu ua ituxi, ni kubhangesa o athu oso ku kituka athu a iuka.

19. O ujitu ua dikota ka tena ‘ku u tanga,’ ua-nda ku suínisa kubhanga ihi?

¹⁹ Mu kidi, Jihova ua tu bhana muene ujitu ua dikota ka tena ‘ku u tanga.’ Tua tokala kubhana valolo ia dikota ku ujitu iú! O kithangana kia Lembalasa, kithangana kiambote phala kuxinganeka mu ima ioso ia bhange Jihova, ni Jezú, phala o mbote ietu. O henda ia tu londekesa, ia tokala ku tu suínisa ku kaiela o phangu ia Jezú, kuzola o jiphange jetu, ni kuloloka o jiphange ni muxima uoso.