Thembu Kuxi Ia-nda Kuíza o Ita ia Alumajedone?

‘Ngedi ngi tala, kua moneka mundu uavulu kana muthu u tena ku u tanga! Ua tundu ku ifuxi ioso, ni ku miji ioso, ni ku madiembu moso, ni ku madimi moso . . . a tundu ku hadi ia dikota.’—DIJINGUNUINU 7:9, 14.

O MAKA enhá alungu ni ita ia Alumajedone. Mukonda diahi?

Kuene kiá kibuka kia athu ku mundu uoso kiene mu sidivila Jihova, ene mu belesela o itumu ia Bibidia. Ni kikuatekesu kia Nzambi, athu a mu tunda mu ifuxi, madiembu, madimi, ni miji ia athu a mu di bhongolola mu ubhezelu umoxi. Kiki tu ki mona ngó mu kaxi ka Jimbangi ja Jihova.—Nzuá 13:35.

Kua kambe ngó bhofele, Satanaji ua-nda bhongolola o kifuxi kiê phala ku zukutisa o mundu iú ua tululuka, a-nda moneka kála kala ni mubhuludi. (Izekiiele 38:8-12; Dijingunuinu 16:13, 14, 16) Kiebhi ki uejiia kuila kiki kidi muene? O Bibidia izuela ia lungu ni izulukutu i tu kuatekesa kuijiia o thembu ia-nda kuíza o ita ia Alumajedone. Saí izulukutu ia mu dikumbidila kiá.

Izulukutu i ua mu Mona kiá o i Kumbidilu iê

O maxibulu a Jezú a mu ibhuidisa se kiebhi o athu kieji kuijiia kuila o “dizubhilu dia mundu” dia zukama. (Matesu 24:3) Jezú ua a tambuijila mu ku a zuelela kuila kueji kuíza kithangana ‘akua’xi imoxi a ka di kuata ni akua’xi ia mukuá; kilômbo kia ka balukila kilômbo kia mukuá; kua ka kala nzala, ni o ixi kutunguta mu ididi iavulu.’ Muéne uambe dingi: “Ima ioso iíi-phe dimatekenu ngó dia malamba.” (Matesu 24:7, 8) O poxolo Phaulu uexana o kithangana kiki, “izuua isukidila-ku,” uambe kuila kueji kuíza “jithembu jabhonzo.” (2 Timote 3:1) O kuila lelu ua mu mona o ki kumbidilu kia ikanenu íii?

Mukonda diahi o jithembu jiji jeji bhonza kiavulu? O poxolo Nzuá ua zuela mukonda diahi. Muéne uambe kuila kueji kala  ‘kithangana,’ Satanaji ni madimonho mê, eji ku a lundumuna mu ixi. O Bibidia i zuela kuila Satanaji uala ni “njinda iavulu,” mukonda uejiia kuila o thembu iê ia butu kiá. (Dijingunuinu 12:7-12) Ki uene mu mona kuila o athu ene mu londekesa o njinda, ni usuéia ku mundu uoso?

Jezú ua zuela ué kuila mu thembu íii ia bhonzo, eji bhanga kikalakalu kia dikota. Muéne uambe: “O Njimbu íii Iambote ia Utuminu ua Nzambi, ia bhingi ku i tula mu ngongo ioso, mu ku bhana umbangi ku ifuxi ioso; kiene kia kiéza o dizubhilu.” (Matesu 24:14, NW) Lelu 235 a jixi ndenge, o Jimbangi ja Jihova a mu boka o njimbu iambote ia Utuminu ua Nzambi, 500 a madimi ndenge. O tudivulu tu iiadi tuene mu bhana ijimbuluilu ia Bibidia, O Mulangidi ni Despertai!, ene mu i uanena ku mundu uoso. O Jimbangi ja Jihova ene mu lungulula o Bibidia mu 100 a madimi ndenge. O kikalakalu kiâ, ene mu ki bhanga ku athu a di bhakula mu vondadi iâ, a ki bhanga ué ni kitadi kia bhana o athu mu vondadi iâ. O kuila o kikalakalu kiki kia kuboka kia lungu ni ki kumbidilu kia kikanenu kia bhange Jezú?

O Bibidia ilondekesa ué o izulukutu ia-nda londekesa o ita ia-nda bheka Jihova Nzambi ku jinguma jê. Tua-nda di longa ikanenu itatu i ua-nda mona o i kumbidilu iê.

Izulukutu i Ua-nda Mona o ku di Kumbidila

Kikanenu 1. O Bibidia izuela kuila o ifuxi ia mundu ia-nda dikola kuma “kua batama, kua tululuka.” Ene a-nda banza kuila a mu tena ku batula o maka oso ene nau. Maji o izulukutu ia kaiela-ku ki ia-nda londekesa kuila kua tululuka.—1 Tesalonika 5:1-3.

Kikanenu 2. Jinguvulu javulu a-nda mesena ku lungulukila o isangela ioso ia jingeleja ku mundu. O Bibidia izuela kuila o jinguvulu jiji, kijimbuete kia kiama; o jingeleja ja makutu ja mundu, kijimbuete kia muhatu ua xikama ku kiama. (Dijingunuinu 17:3, 15-18) O kiama, kia-nda bhanga ioso ia-nda mu tumina Nzambi, ku buika o jingeleja ja makutu jamba kuila a zuela mu dijina dia Nzambi.

O poxolo Nzuá ua jimbulula o kizulukutu kiki, mu kuzuela: “O kuinhi dia lumbinga di ua muene, ni kiama muène, a kà di zemba ni kidia-nzunga. ‘Ene a ka mu sebhulula, o ioso iala na-iu a ka mu katula-iu, hé u xala ni tuxi. A ka mu dia xitu, a mu oha mu túbhia katé kia buila. Kuma Nzambi ua te ku mixima iâ, o kubhanga kia mu kala mu kilunji kiê.’”—Dijingunuinu 17:16, 17.

Kikanenu 3. Kia-nda zukutisa o jingeleja ja makutu, Satanaji ua-nda tumina o ifuxi ia mundu ku zukutisa o abhezi a Jihova Nzambi.—Dijingunuinu 7:14; Matesu 24:21.

O Kuila ua-nda Bhuluka?

Se kiluua u mateka o ku di longa o Bibidia, nange u kala ni phata ia ku xikina mu izulukutu i tua di longo kiá kuila ia-nda bhita muene. Maji saí ima i tu bhangesa ku dielela kuila ikanenu ioso ia-nda di kumbidila, ni kuila o izulukutu íii, kua kambe ngó bhofele, ia-nda bhita muene. O ikanenu ia Bibidia ia di kumbidila kiá, iene i tu bhana o kidielelu kiki. *

Mukonda diahi ku sote kithangana phala kuijiia se mukonda diahi o Jimbangi ja Jihova a xikina kuila o “ita ia kizuua kia Dikota kia Nzambi, Muteni-a-Ioso” kia zukama, ni mukonda diahi ku tokala ku kala ni uôma? Ene a-nda ku longa ihi i zuela o Bibidia i ua tokala o ku bhanga, phala ku kala ku mbandu ia kibuka kia athu a-nda ku a langa kua Jihova Nzambi. (Dijingunuinu 16:14) O ima i ua-nda di longa, i tena ku ku kuatekesa ku lungulula o ibanzelu iê ia lungu ni hádia.

[Tanga mu luji]

[Kilombuelelu ku mbandu 8]

O kuila o kikalakalu kia bhanga o Jimbangi ja Jihova, ki kumbidilu kia ki kanenu kia Bibidia?