“NGALA ni kidielelu.” Makuinhi atanu a mivu ku dima, mu kizuua kia 28 kia mbeji ia Kakuinhi ua muvu 1963, o diiala dia kexile ku pholo mu zokela o ufôlo ua athu, Martin Luther King, ua tumbula o izuelu íii mu diskursu diê. Mu ku tumbula o izuelu íii, King ua londekesa o kidielelu kiê bhu pholo ia athu, kuila saí kizuua, o athu a-nda kala kumoxi sé kathombo. Sumbala muéne ua zuela bhu pholo ia athu avulu mu ixi ia Estados Unidos, o kidielelu kiê kia tokala ué ku athu a ifuxi ioso.

Mu ku bhita mbeji jitatu kioso King kia bhange o diskursu diê mu kizuua kia 20 ku mbeji ia Kamoxi ua muvu ua 1963, hama ja jixi a xikina o ngolokela iala mu, Declaração das Nações Unidas ia lungu ni ku zubha o kathombo koso. Mu ku bhita mivu, jixi ja mukuá a kaiela uá o ngolokela ia lungu ni ku zubha o kathombo. Mu ioso íii ia bhange, o kuila o kathombo ka bhu?

Mu kizuua 21 ku mbeji ia Katanu ua muvu 2012, o seketa ia Nações Unidas, Ban Ki-moon, ua zuela: “Saí mikanda ni ndunge javulu ja katunda—phala ku fidisa ni ku zubha o kathombo ni ku zemba o athu akua jixi jengi. Maji né kiki, o kathombo kene hanji ku mundu ni ku bhekela hadi ku athu ku jixi joso.”

Né muene ku jixi kua sosolola o kathombo, o kibhuidisu kiene hanji, kiki: O kuila o ima ioso ia bhanga phala ku zubha o kathombo, iene mu longesa o athu phala ka londekese dingi o kathombo? Saí athu a xikina kuila o ima ioso ia bhanga iene ngó mu fidisa o athu ku tungula akuâ, maji kene mu zubha o kathombo. Mukonda diahi? Mukonda o ku tungula muthu, kima kia tena ku ki mona, ni ku ki fidisa ku kitumu kia ixi, maji o kathombo kima kiala ku muxima ua muthu, ka tena ku ki katula ni lusolo.

Mukonda dia kiki, o ukexilu uoso ua ku zubha o kathombo, ki ua-nda fidisa ngó o ima i bhanga o athu mukonda dia ku tungula akuâ, maji ua-nda lungulula ué o ibanzelu ia muthu ia lungu ni athu a jixi jengi. O kuila kiki ki tena ku bhita muene? Se kiene, kiebhi-phe? Tua-nda di longa phangu ia athu a-nda tu kuatekesa ku mona kuila o athu ka tena ku lungulula ngó o ukexilu uâ, maji ni ihi i tena ku kuatekesa o athu ku bhanga kiki.

Linda: A ngi vuala ku África do Sul. Nga kexile mu mona o ambundu ku África do Sul kala athu sé valolo, a kambele o ku di longa, ka tokalele ku a dielela, maji a tokalele ku kala ngó abhika a mindele. Ng’exile ngi mukua kathombo, maji ki ngi kexile mu di mona kuila ngi mukua kathombo. Maji kioso ki nga mateka o ku di longa o Bibidia, nga lungulula o ukexilu iú. Nga di longo kuila “Nzambi kene ni kathombo ka muthu” ni kuila o muxima uene ua beta dingi o kota, o kikonda kietu mba o dimi di tu zuela, ndenge. (Ikalakalu 10:34, 35; Jisabhu 17:3) O mikanda ikola mu divulu dia Filipe 2:3, ia ngi kuatekesa ku mona kuila, se ngi mona kuila athu oso ala ni valolo, eme ndenge, nga-nda tena ku katula o kathombo ku muxima uami. O ku belesela o milongi ia Bibidia, kala o velusu jiji, kuene mu ngi kuatekesa ku mona kuila athu oso ala ni valolo. Lelu ki ngala’mi dingi ni kathombo.

 Michael: Nga kudila mu mbanza mua kexile mindele iavulu akua Austrália, eme nga zembele kiavulu akua Azia bhenge-bhenge akua China. Mu kuendesa dikalu, se nga monene muthu ni pholo kála ia akua Azia, ngi jikula o njanela ia dikalu ni ku mu xinga: “Vutuka ku ixi iê, mukua Azia!” Mu ku bhita ithangana, kioso ki nga mateka ku di longa o Bibidia, nga di longo kiebhi Nzambi kia mona o athu. Muéne ua zolo o athu, ka tala ku pholo iâ mba o ixi iâ. Kiki kia ngi tula ku muxima, eme nga lungulula o ukexilu uami, mu veji dia ku zemba o athu, nga kexile mu a zola. Kiki kia ngi sangulukisa kiavulu. Lelu, ngi sanguluka kiavulu mu ku dibhana ni athu a jixi joso ni a ukexilu uoso. Kiki kiene mu ngi sangulukisa kiavulu.

Sandra: Mam’etu ua tokalele ku kibatu kia Delta, ku ixi ia Nigéria. Maji o muiji ua tat’etu ua tokala ku kibatu kia Edo, u zuela o dimi dia Esan. Mukonda dia ukexilu iú, o muiji ua tat’etu ua kexile mu londekesa kathombo kua mam’etu katé mu kizuua kiafú. Mukonda dia kiki, nga bhange kikutu ni muxima uami kuila, ki ngi tokala ku kala ni ukamba mba ku kazala ni diiala u zuela o dimi dia Esan, ua tokala ku kibatu kia Edo. Maji kioso ki nga mateka o ku di longa o Bibidia, nga kexile mu mona o ima mu ukexilu uéngi. Mukonda o Bibidia i zuela kuila, Nzambi kene ni kathombo, ni kuila muthu uoso-uoso u mu xila, muéne u mu xikina, eme nanhi phala ku zemba o athu mukonda dia diembu diâ mba o dimi dia zuela? Nga lungulula o ukexilu uami ua ku banza, eme nga bhange ukamba ni jindandu ja tat’etu. O ku belesela o milongi ia Bibidia, ku ngi sangulukisa, ku ngi bhekela ué kutululuka kua muxima. Ia ngi kuatekesa ué ku dibhana kiambote ni athu oso. Maji o muadi uami mukua-hi? Muéne ua tokala ku kibatu kia Edo u zuela o dimi dia Esan!

Mukonda diahi o Bibidia ia tena ku kuatekesa o athu enhá ni athu a mukuá ku katula o kathombo ku muxima? Kiki ki bhita mukonda o Bibidia iene o Mak’â Nzambi. O Bibidia iala ni kutena kua ku lungulula o ukexilu ua muthu, ni ukexilu ua  muthu ku dibhana ni akuâ. O Bibidia ilondekesa ué se ihi ia bhingi dingi phala athu ku zubha o kathombo koso.

Sumbala o kuijiia kua Bibidia ku tena ku kuatekesa o muthu ku kala ni ukexilu uambote ni ku katula o kathombo ku muxima, saí ima iiadi ia tokala kuijiia o muthu ande dia ku zubha o kathombo. Kia dianga, o muthu mukua ituxi, ua kambe o kuiuka. O Bibidia i zuela: “Kana-ku muthu u kamba kuta kituxi.” (1 Jisobha 8:46) Né muene se tu bhanga nguzu iavulu phala kueha o kathombo, tuene mu luua ita ia dikota moxi dietu kala kia bhiti ni poxolo Phaulu, ua soneka: ‘Kioso ki ngi sola ku bhanga ia uabha, ia iibha iene i dianga o ku ngi zukama.’ (Loma 7:21) Mu ukexilu iú, saí ithangana o muxima uetu u mesena ku banza ‘ima ia iibha’ i tena ku bhangesa o muthu kulondekesa o kathombo.—Marku 7:21.

Kia kaiiadi, Satanaji o Diabhu uene ué mu nganala o athu. O Bibidia i zuela kuila muéne ‘kijibhangânga,’ muéne “mukua kunganala o mundu uoso.” (Nzuá 8:44; Dijingunuinu 12:9) Kiki kiene ki bhangesa o kathombo ku kala ku mundu uoso ni mukonda diahi o athu kene mu tena ku zubha o kathombo, o ukexilu ua ku di tungula, o ujibhangânga, o ku zemba akua jingeleja jengi ni maukexilu a mukuá a iibha alungu ni kathombo.

Ande dia ku zubha o kathombo koso, a tokala ku katula hanji o kituxi ku athu, ni ku buikisa Satanaji, o Diabhu. O Bibidia ilondekesa kuila, o Utuminu ua Nzambi uene ua-nda bhanga o kikalakalu kiki.

Jezú Kristu ua longo o akaiedi iê ku samba kua Nzambi mu ukexilu iú: ‘Utuminu uê uíze. Vondadi iê a i bhange bhoxi, kala kiala ku i bhanga ku diulu.’ (Matesu 6:10) O Utuminu ua Nzambi—uene ua-nda batula o maka oso—ni kathombo koso.

Kioso o Utuminu ua Nzambi ki ua-nda bhixila ni ku tumina o ixi ioso, Satanaji a-nda mu “kuta,” phala ‘ka nganale dingi o ifuxi ioso.’ (Dijingunuinu 20:2, 3) Kua-nda kala ‘ixi ia ubhe,’ mba athu a ubhe ‘mua kala o kuiuka.’ *—2 Phetele 3:13.

O athu a-nda kala mu ixi mumu mua kala o kuiuka, a ka kala sé kituxi, ni ku kala athu a iuka. (Loma 8:21) Mukonda dia ku tokala ku Utuminu ua Nzambi, ‘ka ka bhanga-mu kia iibha mba phulu ioso-ioso.’ Mukonda diahi? ‘Mukonda o ixi ioso ia kezala ni kuijiia kua Nzambi.’ (Izaia 11:9) Athu oso a ka di longa o jinjila ja Jihova Nzambi, ni ku kaiela o ídifua iê. Kiki kia-nda londekesa kuila ki kua ka kala dingi kathombo mu ngongo, “mukonda kua Nzambi ki kuene katungu ka athu.”—Loma 2:11.