Nga uabhela o ibhangelu mu ngongo tunde mu undenge. Saí ithangana eme ni muiji uami tua kexile múia mu mixitu ni mu jingiji ja kexile mu ixi ia Finlândia, mu mbanza ietu ia Jyväskylä. Nga zolo ué kiavulu o iama; kioso ki ng’exile hanji mona ndenge, nga uabhele kiavulu ku tonoka ni jingatu ni jímbua! Ki nga kexile mu kula, nga kexile mu kala ni njinda iavulu mu ku mona o kuiibha kua kexile mu bhanga o athu ku iama. Mu ku bhita thembu, nga di lungu ni kisangela ki zokela o ufôlo ua iama, nga sange-ku athu akexile mu banza kala eme.

Etu tua bhange ngolokela ia lungu ni ufôlo ua iama. Tua bhana mikanda iavulu ku athu, tua kexile mu nhunga mu ikoka ioso ni ku bhanga jingokela, phala ku fidisa o maloja ku sumbisa o ikonda ia iama, ni jinzo ja kexile ni ji makina ja ku tokuesa o iama. Etu tua bhange kisangela kia ubhe ki langa o iama. Mu ku bhanga ioso phala n’a tuijiie ku athu, saí ithangana tua kexile mu kala ni maka ni jinguvulu. Mu veji javulu a ngi ambata mu kaleia, ni ku inzo ia ku fundisa.

Ki nga thandanganhele ngó ni iama, maji nga thandanganhele ué ni maka a mukuá ku mundu. Mu ku suka-ku, eme nga dilungu ni isangela iavulu kala o kisangela, Anistia Internacional ni kisangela, Greenpeace. Nga tele o nguzu iami ioso mu ku kuatekesa o isangela íii. Eme nga kexile mu zokela o ufôlo ua jingadiama ni athu akexile mu bhita ni nzala, ni athu ka kexile ni jinzo.

Maji bhofele-bhofele, nga kexile mu mona kuila ki ngeji tena ku lungulula o mundu. Sumbala o isangela íii ia kexile mu tena ku batula o maka ofele, o maka a makota a kexile ngó mu dibandekesa dingi. Iexile kala o kuiibha kua kexile ku mundu uoso, ni kuila se-ku muthu u tena ku ku batula. Ki ngi kexile ni nguzu.

Mu ku luuala mu ku kamba ki kuatekesu, nga mateka o ku banza kua Nzambi ni ku Bibidia. Nga di longele kiá o Bibidia ni Jimbangi ja Jihova. Sumbala nga uabhele kiavulu o ukexilu uambote ua Jimbangi ja Jihova ni ku zola o athu, ki ngi mesenene ku lungulula o muenhu uami. Mu veji íii o ima ia lungulukile.

Nga katula o Bibidia iami, eme nga mateka o ku i tanga. Kia ngi suínisa kiavulu. Nga mono velusu javulu ja Bibidia ji tu longa ku langa kiambote o iama. Mu kifika, o divulu dia Jisabhu 12:10, i zuela kuma, ‘o muthu uambote u langa o muenhu ua ibhaku iê.’ Nga mono ué kuila Nzambi ki muene uala ni kikuma ku maka oso ku mundu. O maka ku mundu ene mu dimendala ngó mukonda o athu kene mu belesela Nzambi. Nga sanguluka kiavulu mu ku di longa ia lungu ni henda ia Jihova ni muanhu uê phala ku zubha o jiphaxi mu ngongo.—Jisálamu 103:8-14.

Mu thembu íii, nga sange o kamukanda phala ku bhinga o divulu, Mu Kidi Ihi i Longa o Bibidia? nga ka soneka, eme nga ka tumikisa. Anga a ngi kundu ku dikaza, Jimbangi ja Jihova, phala ku ngi longa o Bibidia, eme nga xikina. Nga mateka ué kuia mu iônge mu Kididi kia Ubhezelu. Kienhiki, o kidi kia Bibidia kia mateka ku lungulula o ukexilu uami.

Mukonda dia Bibidia, nga tena ku lungulula o ukexilu uami uoso. Ngeha o ku buakula ni kúnua kiavulu. Nga zelesa o ukexilu uami ni kuzuela kuami. Eme nga lungulula o ukexilu uami ua lungu ni jinguvulu. (Loma 13:1) Nga xisa ué o ukexilu ua ufusa, u nga kexile mu bhanga ithangana ioso.

O kia ngi bhonzele dingi o ku lungulula o ibanzelu iami ia lungu ni ku zokela o ufôlo ua athu. Kua bhiti thembu iavulu phala ku lungulula. Ku dimatekenu nga kexile mu banza kuila ki ngeji kala muthu ua fiiele se ngi tunda mu isangela íii. Maji nga kexile mu tendela kuila o Utuminu ua Nzambi uene ngó ua-nda batula o maka oso ku mundu. Eme nga solo ku di bhakula mu ku kuatekesa o Utuminu iú ni ku kuatekesa athu ku u uijiia kiambote.—Matesu 6:33.

Kuma ng’exile ngi mukua ku zokela o ufôlo ua athu, nga kexile mu uanuna o athu mu ibuka iiadi—ki kale o athu ambote mba o athu a iibha—eme nga kexile polondo phala ku zoka ni ió akexile mu bhanga ima ia iibha. Maji mukonda dia Bibidia, ki ngi zembe dingi athu. Maji, nga mesena kulondekesa henda ku athu oso. (Matesu 5:44) Kienhiki, ngene mu londekesa o henda íii, mu ku tula o njimbu iambote ia Utuminu ua Nzambi. Nga sanguluka kiavulu mu ku mona kiebhi o kikalakalu kiki kia henda, ki bheka paze ni ku zediua ni ku bhana kidielelu kia kidi ku athu.

Ngala ni kitongoluelu kiambote mu kueha o maka bhu maku a Jihova. Ngejiia kuila muéne, mukonda dia ku kala Mubhangi, ka-nda kuehela kuila o athu ni iama a a bhanga kia iibha katé ku hádia, mba kuehela o athu ku zanga o ixi ietu. Bhu kaxi ka Utuminu uê, Jihova ua-nda iudika o ima ioso iene mu zanga o athu mu ixi. (Izaia 11:1-9) Kisangusangu kia dikota kuijiia o kidi kiki, ni ku kuatekesa athu ku kala ni kixikanu kia kidi. Ki ngi banza dingi kuila eme nga tokala ku lungulula o mundu.