Nange u dibhudisa: ‘Maji se Nzambi uejiia kiá ioso, katé muene ni ibanzelu iami ni ima i nga bhindamena, mukonda diahi nga tokala ku samba dingi?’ Kiki kibhuidisu kiambote. Jezú ki muene ua zuela kuila Nzambi, ‘uejiia kiá ima ioso i tua bhindamena, ande muene dia ku mu bhinga?’ (Matesu 6:8) M’ukulu, Davidi, o Sobha ia Izalaiele, uejidile o kidi kiki iu ua soneka: “Né ngó kizuelu kia ngi kala bhu dimi, eie-phe, u Jihova, ka ku dingila kima.” (Jisálamu 139:4) Mukonda diahi-phe, tua tokala ku samba kua Nzambi? Phala ku tambuijila o kibhuidisu kiki, tua-nda di longa hanji ihi iamba o Bibidia ia lungu ni misambu ia abhezi a Nzambi. *

Sumbala o Bibidia iamba kuila Jihova * Nzambi uejiia ioso, iamba ué kuila Nzambi ka mesena ngó kuijiia ima ia lungu ni abhezi iê. (Jisálamu 139:6; Loma 11:33) O ukexilu ua Nzambi ku lembalala o ima, ki u difu ni ukexilu ua komputadolo ua ku bhaka o ima ia lungu ni athu. Nzambi ua mesena kiavulu kuijiia o ibanzelu ia muxima uetu, mukonda muéne ua mesena kuila tu zukama kua muéne. (Jisálamu 139:23, 24; Tiiaku 4:8) Mukonda dia kiki, Jezú ua suínisa o akaiedi iê o ku samba sumbala o tat’ê uejiia kiambote o ima i tua bhindamena. (Matesu 6:6-8) Kioso ki tu zuela ni Mubhangi uetu, tu mu zukama dingi.

Saí ithangana i tu bhonza kuijiia ihi i tu bhinga kua Nzambi mu musambu. Mu ithangana íii, Nzambi u tena ku mona o ibanzelu ietu ni kuijiia ihi i tua bhindama, anga u tu kuatekesa. (Loma 8:26, 27; Efezo 3:20) Kioso ki tu mona kuila Nzambi ua tu kuatekesa ku muenhu uetu, né muene sé etu ku kijiia, tu zukama dingi kua muéne.

O Bibidia iamba kuila, o Nzambi Muteni-a-ioso u tambuijila o misambu ia jiselevende jê ja fiiele, maji i zuela ué se mukonda diahi saí misambu, Nzambi kene mu i tambuijila. Mu kifika, m’ukulu kioso o kuiibha kuezalele mu Izalaiele, Nzambi ua tumikisa o polofeta iê Izaia ku tangela o mundu: “Kioso ki mu vudisa o misambu, eme ki ngi ivu, mukonda o maku’enu ezala manhinga.” (Izaia 1:15) Kienhiki, o athu ka belesela o itumu ia Nzambi, mba ka samba ni muxima ua zele, Nzambi kene mu kuívua o misambu iâ.—Jisabhu 28:9; Tiiaku 4:3.

O Bibidia iamba: ‘Kima kioso ki tu mu bhinga, se mu vondadi iê, muène u tu ivua.’ (1 Nzuá 5:14) Maji o kuila kiki kilombolola kuila Nzambi, u bhana ku jiselevende jê ioso ia bhinga? Kana. Xinganeka mu phangu ia poxolo Phaulu, ua dióndo kua Nzambi mu veji jitatu phala ku mu katula o ‘uhaxi mu xitu.’ (2 Kolindu 12:7, 8) Nange Phaulu ua katele o mesu. Nange kia mu bhonzele kiavulu ku dibhana ni uhaxi iú! Phaulu ua tambuile o ujitu ua ku saka mauhaxi iu ua fukunuine kiá muthu, maji muéne ua tokalele ku dibhana ni uhaxi uê muene. (Ikalakalu 19:11, 12; 20:9, 10) Sumbala o musambu ua kexile mu bhanga ka u tambuijila kala kia mesenene, Phaulu ua xikina o kitambuijilu kia Nzambi ni muxima uoso.—2 Kolindu 12:9, 10.

Tuejiia ué kuila, saí athu a a tange mu Bibidia, a a tambuijila o misambu iâ mu ku a bhangela madiuanu. (2 Jisobha 20:1-7) Maji kiki ki kiene kia kexile mu bhanga Nzambi ni misambu ioso ia jiselevende jê m’ukulu. Saí abhezi a Nzambi, a thandanganhele kiavulu kia kexile mu mona kuila Nzambi ka mu tambuijila o misambu iâ. O Sobha Davidi uebhuidisa: “Mbambe bhebhi, Jihova tata? Kifua ua ngi jimbila-ku?” (Jisálamu 13:1) Maji kioso Davidi, diiiala dia fiiele, kia di lembalala kuila Jihova ua mu bhuluile mu ithangana iavulu, muéne ua mateka dingi o ku dielela kua Nzambi. Mu musambu iú, Davidi ua zuela dingi: “Eme-phe nga dielela mu ku lenduka kuê.” (Jisálamu 13:5) Kala kia bhange Davidi, o abhezi a Nzambi lelu, a tokala ku kolokota mu ku samba katé Nzambi kia tambuijila o misambu iâ.—Loma 12:12.

Nzambi uejiia o ibhindamu ietu.

Jitata ja henda kene mu bhana ioso i bhinga o tuana tuâ, ni ku a bhana ithangana ioso ia bhinga. Kiene kimoxi ué, Nzambi ka tambuijila o misambu ietu mu ukexilu u tua mesena kuila muene u tambuijila ni mu kithangana ki tua mesena. Maji tua tokala tuijiia kuila o Mubhangi uetu, kala ki bhanga o tata ia henda, muéne ua-nda tu bhana ioso i tua bhindamena mu kithangana ni mu ukexilu ua tokala.—Luka 11:11-13.

Nzambi u tena ku tambuijila sé etu ku kijiia.

Maji ihi i tu bhanga se né muene ni ku samba, o ibhidi ietu ki ia mu bhita? O kuila tua tokala ku banza kuila, mukonda dia ku kamba ku tu tambuijila bhu kaxi ka madiuanu, Jihova ka mu tambuijila o misambu ietu? Kana, tua tokala kuijiia se Nzambi ka mu tu kuatekesa kiá sé etu ku kijiia. Mu kifika, nange kamba dietu ua henda, ua bhange ioso ia tena phala ku tu kuatekesa mu kithangana kia malamba. (Jisabhu 17:17) O kuila ki Jihova ua bhangesa kamba dietu ku tu kuatekesa mu kithangana kieniókio? Nzambi u tambuijila ué o misambu ietu bhu kaxi ka Bibidia. O Bibidia i tena ku tu bhana unjimu phala ku dibhana ni ibhidi i moneka ku muenhu.—2 Timote 3:16, 17.

Mu veji dia ku zubha o maka, Nzambi u bhana nguzu ia soko ku mundu uê phala n’a tene ku kolokota. (2 Kolindu 4:7) Mu kifika, kioso Jezú kia dióndo kua Tat’ê phala ku mu katula o kima kia mu bhonzele kiavulu o ku ki bhanga, mukonda ua kexile ni uôma ua ku xidisa o dijina dia Nzambi, Jihova ua tumikisa anju phala ku suínisa Mon’ê. (Luka 22:42, 43) Kiene kimoxi ué, Nzambi u tena ku tumikisa kamba dietu phala ku tu suínisa mu kithangana kia ku bhindama. (Jisabhu 12:25) Mukonda o ukexilu iú ua ku tambuijila o musambu ki tu u mona, tua tokala ku tonginina kiambote o ukexilu ua Nzambi ku tambuijila o misambu ietu.

SAÍ ITAMBUIJILU IA MISAMBU I KINGA O KITHANGANA KIA TOKALA KIA NZAMBI.

O Bibidia iamba kuila, o Nzambi Muteni-a-Ioso u bhanga mbote ku athu ‘mu kithangana kia tokala.’ (1 Phetele 5:6) Mukonda dia kiki, se tu mona kuila Nzambi ua mu laleka mu ku tambuijila o misambu ietu, ki tu tokala ku banza kuila Jihova ka tu suu. Kuma muéne uejiia ioso, o Mubhangi uetu u mona ioso ia tokala phala etu.

Mu kifika: Xinganeka kuila uala ni mona u ku bhinga ku mu sumbila bixi. O kuila ua-nda mu sumbila-iu mu kithangana kieniókio? Se eie uejiia kuila muéne kale hanji mu kitala kia kuendesa bixi, nange ku ua-nda mu sumbila o bixi mu kithangana kieniókio. Maji ua-nda kinga katé ki ua-nda mona kuila o bixi ia-nda mu kuatekesa. Kiene kimoxi ué, Nzambi u bhana ki tua “solo ku muxima [uetu]” mu kithangana kia tokala se tu kolokota o ku samba.—Jisálamu 37:4.

O Bibidia i tendelesa o Jikidistá ja kidi phala ka bhange phoko ku valolo ia ku samba. Saí iá nange amba: ‘O kuzuela ki ku bhonzo, maji o ku bhanga ku bhonza.’ Mu kidi, se tua mu dibhana ni maka a bhonzo o ku a batula, nange ku tu bhonza kiavulu ku kinga o itambuijilu ia misambu ietu. Maji kima kiambote ku di lembalala ia longo Jezú ia lungu ni ku kolokota mu ku samba.

 Jezú ua tange o kifika kia muhatu ua bhindamene ua kexile múia izuua ioso ku mufundixi ua iibha phala ku mu batula o maka mê. (Luka 18:1-3) Sumbala o mufundixi mu dimatekenu ua ditunu o ku mu kuatekesa, mu ku suka-ku muéne ua zuela moxi diê : ‘Ngi mu fundisa, phala muéne keze dingi izuua ioso mu ku ngi bhonzesa.’ (Luka 18:4, 5) Kala kilondekesa o milongi mu dimi dia Ngeleku, o mufundixi ua kuatekesa o mutudi phala o mutudi “ka mu bhane huxi ku pholo” mba, “ku xidisa [o] dijina diê dia fuma.” * Se hanji o mufundixi ua iibha, mukonda dia uôma ua ku xidisa o dijina diê dia fuma, ua kuatekesa o mutudi ngadiama, o Nzambi ietu ia henda, ua-nda batula mu kidi o maka ia ió “a di kola kola kua muène mu muanha ni mu usuku!” Kala kiambe Jezú, Nzambi ‘u a fundisa lusolo, ni ku batula kiambote o maka.’—Luka 18:6-8.

Sumbala saí ithangana tu bhuila mu ku bhinga kikuatekesu, ki tu tokala ku bhuila. Mu ku kolokota o ku samba, tu londekesa kuila tua mesena o kikuatekesu kia Nzambi ku muenhu uetu. Tua di longo ué ku tongolola o itambuijilu ia misambu ietu, ni ku zukama dingi kua muéne. Mu kidi, tu tena ku xikina kuila Jihova ua-nda tambuijila o misambu ietu se tu kolokota mu ku samba ni kixikanu.—Luka 11:9.