Kála kia mu bhita ni Alex mu kifika kiki, athu avulu ka uabhela ku kalakala kiavulu. Saí diiala mukua ku iudika makalu, dijina diê Alá, uambe: “Athu avulu a banza kuila ka tokala ku kalakala ‘kiavulu.’ O athu enhá amba kiki: ‘Eme nga mu kalakala hanji bhabha, mukonda ki kua moneka luua salu iengi ia beta-o-kota.’”

Mukonda diahi athu avulu amba kuila ka tokala ku kalakala kiavulu? Nange a a funhisa kuala o minangu ia mitelembe iamba kuila o muenhu ua “kidi” ki u bhingi ku kalakala kiavulu. Matesu mukua ku iudika o ima ia zanganha, uambe: “O athu a banza kuila o ku kalakala kiavulu, ku a fudisa kuia ku pholo.” Shane, mulangidi, kiene ué kiambe, uixi: “Lelu, o ku kalakala kizuua kia muvimba phala ku nganhala o kitadi kia kizuua kiokio, athu ka mu ki bhanga dingi.”

Maji avulu a zediua, a uabhela kiavulu o ku kalakala. Daniiele uala ni 25 a mivu, mutungi ua jinzo, uambe: “Mudiami, o ku kalakala kiavulu ku zediuisa kiavulu o muthu benge-benge se o muthu ua mu kalakala ni ibanzelu iambote ku muxima.” Kiene ué kiambe André uala ni 23 kia mivu, muéne uixi: “Mudiami, o ku sanguluka kua kidi kuijila mu ku kalakala kiavulu. O ku kalakala ni umonha, ki ku tena ku sangulukisa kiambote o muthu—mu veji dia kiki, ki luualesa ngó o muthu!”

Ihi ia kuatekesa Daniele ni André ku kala ni ibanzelu iambote ia lungu ni ku kalakala? Mukonda ene a kaiela o milongi ia Bibidia. O Bibidia ki i suínisa o athu ku kala imonha, kana, maji i suínisa o athu ku kalakala ni nguzu ni ku kolokota. Maji o Bibidia ki i suínisa ngó o ku kalakala, iene i tu londekesa ué kiebhi ki tu tena o ku sanguluka mu ku kalakala.

Milongi iebhi ia Bibidia i tena ku ku kuatekesa ku sanguluka mu ku kalakala kuê? Tala o milongi íii mu mbandu ia kaiela-ku.