O ku kala mukua Loma, kua bhanene ku muthu maufolo ni maujitu a kuia bhuoso-bhuoso bhua mesenene o kuia ku kibatu kia Loma. O muthu mukua Loma ua tokalele ku tumaka o kitumu kia Loma, kana o itumu ia ji mbonge. Se a mu tele milonga, o muthu ua xikinine ku mu fundisa kala ki tuma o kitumu kia mbonge, maji né kiki, muéne ua kexile ni ufolo ua ku lengela ué ku inzo ia dikota ia Loma ia ku fundisa o madimanda. Se a mu balakele o kufua, muéne ua kexile ni ufolo ua ku lengela kua nguvulu.

Mukonda dia maufolo iá, Cicero, uexile nguvulu ia Loma ku hama ia dianga A.K.K., uambe: “Kituxi kia dikota ku kuta muthu mukua Loma; o ku mu beta kuexile kuiibha kua dikota; o ku mu jibha kua difuanganene ni ku jibha tata jê,” mba ku jibha ndandu iê.

O poxolo Phaulu ua boko mu Kibatu kioso kia Loma. O Bibidia i tu tangela ithangana itatu, o poxolo Phaulu ua katula mbote mu ku kala mukua Loma: (1) Muéne ua tangela o jisalajendu akua Filipe kuila akexile mu ta kituxi mu ku mu beta. (2) Muéne ua zuela kuila uexile mukua Loma phala ka mu bete mu mbanza ia Jeluzaleme. (3) Muéne ua bhingi phala kuia kua Sézalu, nguvulu ia Loma, phala ku mu fundisa kiambote.—Ikalakalu 16:37-39; 22:25-28; 25:10-12.

Jakobo uexile mubhidi ua ibhaku ia sekulu’ê Labanu mu 20 a mivu. Jakobo ua dianga ku kalakala 14 kia mivu phala ku kazala ni an’a kiiadi kia Labanu, muéne ua tambula ué ibhaku phala o mivu 6 ia kalakala. (Dimatekenu 30:25-33) O divulu Biblical Archaeology Review diambe kuila: “O kikutu kia kexile mu bhanga o athu kia kuinga o ibhaku, kála kia bhangele Labanu ni Jakobo, a kijidile kiambote ku asoneki ni ku atangi a Bibidia.”

O ikutu ia sange ku mbanza ia Nuzi, Larsa ni ku ididi ia mukuá ku ixi ia Iraque, ilondekesa kiambote o ikutu íii. Saí kikutu kia kexile mu bhanga o athu kiexile kia ku langa o ibhaku ku muvu ua muvimba. O abhidi a tokalele kuijiia se iama ikuxi ieji langa ni itala iê, se jindumbe jikuxi mba akaji akuxi. Mu ku bhita muvu o mukua ibhaku ua kexile mu tambula o jindemba ja jimbudi ja mu tokele, ni lete ni matheka ni keju ni tu mbudi, ni ima ia mukuá dingi. O ima ioso ia kexile mu di bandekesa ia tokalele ku mubhidi.

Phala o ibhaku ku sokolola kiavulu kua bhingile jimbudi javulu. Hama ia jimbudi ia tokalele ku vuala 80 a tumbudi. Se kua kambele mba kua texikile jimbudi o mubhidi ua tokalele ku ji futa. O ukexilu iú ueji bhangesa o mubhidi ku langa kiambote o jimbudi.