Kana. O Bibidya izwela ni kidi kyoso kwila Nzambi wabhange o muthu, ni ‘idifwa’ yavulu ya yama ni mixi. a (Dimatekenu 1:12, 21, 25, 27; Dijingunwinu 4:11) O Bibidya yamba we kwila athu oso atundu kwa Adá ni Eva, o jitata jetu ja dyanga. (Dimatekenu 3:20; 4:1) O Bibidya ki ilongo kwila Nzambi wabhange o idifwa yoso yala ni mwenyu mu kidifwa kimoxi ngó. O kixinganeku kiki akijiya kala kixinganeku kya kwila, ima ya moneke ngó, ki kwene Nzambi wa ibhange. Ku mbandu ya mukwa, o Bibidya ixikina o ixinganeku ya jingijiye ya kwila bhukaxi ka idifwa ya yama mba ya mixi sayiku yiyi yala ni ukexilu wengi. b

•  Ihi yene muxikina athu amoxi?

•  O kwila o Bibidya ilonga kwila o ima ya moneke ngó?

•  Kuma o athu, o yama, ni mixi ene mu dibhana kyambote ni ima ya a kondoloka, o kwila kiki kilombolola kwila, o ima ya moneke ngó?

 O athu axikina kwila Nzambi bhukaxi ka ima ya moneke ngó, wabhange o idifwa yoso ya mwenyu, ala ni ixinganeku yavulu ki idifu phala kujimbulula o maka enya. Kala kilondekesa o divulu Enciclopédia Britânica, o kixinganeku kya kwila o ima ya moneke ngó ki kwene Nzambi wa ibhange, kizokela o kixinganeku kya kwila o “ukexilu wa ima kukala ku mwenyu ni kudivwalula u kwatekesa Nzambi kwendesa o ima mu ngongo.”

 O athu axikina kwila, o ima ya moneke ngó ni kwila ki kwene Nzambi, nange axikina mu ixinganeku ya kayela:

•   Ima yoso yala ni mwenyu ya tundu ku kima kyakexile kya ku mwenyu tunde m’ukulu.

•   Mu kidifwa kimoxi mutena kutunda kidifwa kyengi. O kixinganeku kiki ene mu kixana macroevolução.

•   Sé phata, Nzambi mwene wene mulanga o ima yiyi.

 O kixinganeku kya kwila o ima ya moneke ngó ni kwila ki kwene Nzambi, kibhangesa kubanza kwila o musoso wala mu divulu dya Dimatekenu wa lungu ni ibhangelu ki wa kidi. Maji Jezú wazwela ya lungu ni musoso wala mu divulu dya Dimatekenu kwila musoso wa kidi, atokala ku udyelela. (Dimatekenu 1:26, 27; 2:18-24; Matesu 19:4-6) O Bibidya yamba kwila ande dya Jezú kwiza mu ixi mwene wakexile ku dyulu, wakwatekesa Nzambi mu kubhanga “o ima yoso.” (Nzwá 1:3) Kyenyiki phe o kixinganeku kya kwila, Nzambi bhukaxi ka ima ya moneke ngó wabhange o idifwa yoso ya mwenyu, ki kilungu ni milongi ya Bibidya.

 O Bibidya ki ijimbulula o ima yoso itena kubhita mu kidifwa kimoxi kya yama mba kya mixi. O Bibidya ki iditunu we o kidi kya kwila mixi ni yama ya bhange Nzambi itena kulunguluka kyoso ki idivwalula mba kyoso kiya ni kukula mu ididi mu yala mba mwa ikunu. Amukwa exana o ukexilu yú kala ima ya moneke ngó, maji o kulunguluka kuku kikutena kubhana mwenyu wa ubhe kana.